Roma 1
1
1Sulat inin amban si Paul pinasampay piyu si kaꞌam si lahat Romahin. Aku inin daraꞌakan Isa Almasi. Tapeneꞌ ku weꞌ Tuhanin duk kawakilan ku weꞌ ne magmahalayak aka-aka mahāp amban iyehin. 2Aka-aka mahāp inin pananggup Tuhanin awwalley duk dinaꞌak weꞌ ne sinulat si meꞌ nabinen dem kitab. 3Aka-aka mahāp inin sabab Anak Tuhanin, Isa Almasi, Panuhutanten bi. Pinalahil iye si dunya tubuꞌ Sultan Daꞌud pagmanusiyaꞌ iye. 4Saguwaꞌ Tuhan teꞌed iye. Weꞌ balakat Tuhanin pastiꞌ weꞌ bennal iye Anak Tuhanin peggeꞌ pinakellum iye balik amban kamateynen. 5Sabab si Isa Almasi inurungan ku hinang weꞌ Tuhanin. Kawakilan ku weꞌ ne magmahalayak aka-aka mahāpin supaya niyaꞌ taboꞌoku amban kēmon meꞌ kabangsa-bangsahanin meꞌ aꞌa sandel duk nuhut pu Isa Almasi supaya iye tapudji. 6Sakup du isab kaꞌam meꞌ maluꞌu si lahat Romahin. Tapeneꞌ kaꞌam weꞌ Tuhanin duk kaꞌam sukuꞌ pu si Isa Almasi.
7Hangkan ku inin nulat si kaꞌam meꞌ maluꞌu si lahat Romahin. Kalasahan Tuhanin kaꞌam duk tapeneꞌ kaꞌam weꞌ ne supaya kaꞌam meꞌ aꞌane. Karayaw weꞌ luwal kaꞌam ipat Tuhanin, Samaten bi duk Isa Almasi, Panuhutanten bi. Karayaw isab weꞌ urungande kaꞌam kasanyangan dem ateybi.
Magsukul si Paul si Tuhan
8Iye inin tagnaꞌ kabayaꞌanku inaka si kaꞌamin weꞌ asal magsukul ku si Tuhan sababbi kēmon. Peggeꞌ bawag ne si tibuꞌukan dunya weꞌ sandel kaꞌam pu Isa Almasi. Si Isa Almasi jānnen hangkan tayimaꞌ Tuhanin pagsukulkun. 9Luwal ku māku-māku si Tuhan para si kaꞌam. Kataꞌuhan Tuhanin weꞌ toꞌo pinaꞌinku inin. Maghinang ku si iye ateykun dambūs-būs, magmahalayak ku aka-aka mahāp sabab Anaknen. 10Pāku-pākuku si Tuhan weꞌ bang amban bayaꞌne du tapiyu ne siꞌ ku nindew kaꞌam. Tiggel ne kabayaꞌku mapiyuhin. 11Peggeꞌ mabayaꞌ teꞌed kaꞌam kiteku duk kaꞌam katoloꞌanku meꞌ bakas panoloꞌ Niyawa Tuhan akuhin supaya magkasōng sandelbin. 12Hāti pinaꞌinkun, mabayaꞌ ku piyu si kaꞌam supaya kite bi kapagasig-inasig. Asig ateybin bang kitebi sandelkun duk asig isab ateykun bang kiteku sandelbin.
13Meꞌ kapungtinaꞌihanku masandel pu si Isa Almasihin, kabayaꞌankun kataꞌuhanbi weꞌ daran ku magsakap piyu nindew kaꞌam saguwaꞌ niyaꞌ makaꞌalal aku hangkan ku gaꞌ tapiyu. Mabayaꞌ ku piyu supaya ku kapagmahalayak si kaꞌam duk du niyaꞌ meꞌ aꞌa maluꞌuhin taboꞌoku nuhut Isa Almasi kuweꞌ pamoꞌoku meꞌ aꞌa amban meꞌ kabangsahan dumaꞌin Yahudi sinduwehin. 14Subey ku teꞌed magmahalayak sabab Isa Almasi si kēmon manusiyaꞌ bisan ine bangsanen, si meꞌ taga pangadjiꞌin duk si meꞌ maꞌawamin. 15Hangkan hep mabayaꞌ ku teꞌed piyu magmahalayak aka-aka mahāpin si kaꞌam isab meꞌ maglahat maluꞌu si Romahin.
16Gaꞌi ku teꞌed iyaꞌ magmahalayak aka-aka mahāp sabab Isa Almasihin. Peggeꞌ kēmon makahagad si aka-aka mahāp inin, tinagnaꞌan amban Yahudi pī si meꞌ dumaꞌin Yahudi, laꞌi balakat Tuhanin maluwas siye amban duseden. 17Amban aka-aka mahāp inin kataꞌuhante bang saꞌingge supaya kimmatan Tuhanin meꞌ aꞌahin bentel. Subey hadja siye sandel dambūs-būs pu Isa Almasi. Tasulat dem kitab sabab inin, pinaꞌin, “Sine-sine masandel si Tuhanin, kimmatan Tuhanin iye bentel duk ellum du iye.”
Kēmon manusiyaꞌin taga duse
18Tuhanin laꞌi si surgaꞌ duk pakitehanne weꞌ astel teꞌed iye si meꞌ manggaꞌi matalew si iyehin duk si meꞌ maghinangan malaꞌatin. Sabab hinangande malaꞌatin, saggaꞌde meꞌ aꞌa sinduwehin supaya gaꞌi kataꞌuhande toloꞌ mabennal sabab Tuhanin. 19Legga Tuhanin du siye peggeꞌ pastiꞌ du si siye bang ine-ine makajari kinataꞌuhan sabab Tuhanin, bu Tuhanin ne teꞌed magpapastiꞌ si siyehin. 20Kemuwe pinapanjari weꞌ Tuhanin dunyahin, pastiꞌ si meꞌ aꞌahin weꞌ Tuhanin taga balakat gaꞌi tahalaꞌ bisan du gaꞌi takitede balakatnen, duk pastiꞌ isab si siye weꞌ iye Tuhan mabennalin bisan du iye gaꞌi takitede. Tahāti meꞌ aꞌahin sabab Tuhanin duk sabab balakatnen si meꞌ bayuꞌ-bayuꞌan bakas pinapanjarinen. Hangkan gaꞌi siye kapagdaꞌawa sabab hinanganden. 21Kataꞌuhande hep sabab Tuhanin, saguwaꞌ bisan du kataꞌuhande weꞌ asal pataꞌ iye pinahadje peggeꞌ iye Tuhanin, gaꞌi iye pahadjede. Gaꞌi siye bisan magsukul si iye sabab meꞌ tahinangnen. Saguwaꞌ iye hadja pinikilden meꞌ manggaꞌ niyaꞌ gunanen. Lanab pikilanden hangkan gaꞌi tahātide mabennalin. 22Paꞌinde weꞌ lalem pikilanden bu paꞌin dupang hatiꞌ siye. 23Gaꞌi pahadjede Tuhan manggaꞌi mamateyin. Iye pinahadjeden limbagan manusiyaꞌ mamateyin duk limbagan manuk-manuk, limbagan hayep, duk limbagan meꞌ mapalele diyataꞌ bulakin.
24Hangkan hep pasagadan Tuhanin siye maghinang meꞌ kasabulan kinabayaꞌan ateyde hininangin. Magkahinangan siye makaꞌiyaꞌ-iyaꞌ duk meꞌ pagkasiden. 25Gaꞌi kahagadde mabennal sabab Tuhanin saguwaꞌ iye kinahagadden manggaꞌi mabennalin. Tuhanin magpapanjari kēmon-kēmonin saguwaꞌ gaꞌi iye pahadjede duk gaꞌi iye tuhutde. Iye pinahadjeden meꞌ bayuꞌan bakas pinapanjarinen. Saguwaꞌ Tuhanin subey pinudjihin salama-lama. Amin.
26Hangkan hep pinasagadan siye weꞌ Tuhanin maghinangan makaꞌiyaꞌ-iyaꞌ ngūtan napsu baranden. Bisan meꞌ dendehin gaꞌi mabayaꞌ si lella. Iye kinabayaꞌanden pagkaside dende duk magkahinangan siye laꞌat. Bu gaꞌi inin patut. 27Damikkiyan isab meꞌ lellahin gaꞌi ne mabayaꞌ si dendehin saguwaꞌ iye kinabayaꞌanden pagkaside lella duk magkahinangan siye laꞌat. Lella magkahinangan makaꞌiyaꞌ-iyaꞌ duk lella. Tumbas si siyehin matalep si hinangande malaꞌat inin.
28Peggeꞌ gaꞌi bayaꞌ essebde meꞌ toloꞌ mabennal sabab Tuhanin, manjari pinasagadan siye weꞌ ne magpikilan meꞌ malaꞌatin. Hangkan maghinang siye meꞌ hinangan manggaꞌi subey hininangden. 29Pennoꞌ dem ateyden weꞌ bayuꞌ-bayuꞌan duse duk sasuku malaꞌatin. Napsuhan siye duk maghinang siye laꞌat si saweꞌde. Luwal siye ngimbūhan saweꞌde. Mapatey siye. Luwal siye magsasaꞌ duk ngakkalan siye saweꞌde. Kabayaꞌanden laꞌat matekka si saweꞌden. Luwal siye magkoto-koto. 30Luwal siye ngalimutan saweꞌde. Bunsi siye si Tuhan duk ngandiyawaꞌ-ngandiyawaꞌan siye saweꞌde. Langkew teꞌed ateyden duk abbuhan siye. Luwal siye magpikil bang saꞌingge pamasōngde meꞌ hinangande malaꞌatin. Gaꞌi siye nuhut toloꞌ matettoꞌade. 31Meꞌ aꞌa dupang siye. Gaꞌi tumanande bang niyaꞌ bissāde. Gaꞌi siye malasa duk maꞌaseꞌ si pagkaside. 32Kataꞌuhande weꞌ paꞌin saraꞌ Tuhanin weꞌ sasuku maghinangan meꞌ duse inin asal pataꞌ matey. Saguwaꞌ bisan kataꞌuhande inin, magduse pe siye namba duk sinna isab siye bang niyaꞌ maghinangan kuweꞌ siyehin.
ទើបបានជ្រើសរើសហើយ៖
Roma 1: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.
