Lukas 6
6
Panilew sabab ellew liꞌihin
(Mateo 12:1-8; Markus 2:23-28)
1Dambuwaꞌ Sabtuꞌ, ellew liꞌi meꞌ Yahudi, pabutas si Isa duk meꞌ tindegnen dem tanaꞌ. Paglabey meꞌ tindegnen, ngalupuꞌ siye buwaꞌ tanaꞌin duk pagubus puliyasde, inintaꞌ weꞌ de. 2Niyaꞌ laꞌi meꞌ Pariseo duk paꞌinde, “Weꞌey hinangbi tinaggahan saraꞌ si ellew liꞌihin?” 3Nambung si Isa, paꞌinne, “Gaꞌ ke bakas tabatsabi bang ine hininang Sultan Daꞌudin masaley paginusan iye duk meꞌ saweꞌnen? 4Padiyalem hep iye pī si lumaꞌ Tuhanin, duk ineddoꞌ weꞌ ne pan binettad laꞌi pangurung si Tuhanin, duk kinakan weꞌ ne, duk inurungan isab weꞌ ne meꞌ saweꞌnen. Bu tinaggahan hep weꞌ saraꞌ kinakan pan miyaꞌan, luwal hadja para si meꞌ imam. Saguwaꞌ gaꞌ du iye makaduse si hininangne miyaꞌan.” 5Duk paꞌin si Isa si siye, “Aku, Anak Manusiyaꞌin, taga kapatut ku magpaꞌin bang ine-ine mapatut hininang si ellew liꞌihin.”
Aꞌa masapik tangannen
(Mateo 12:9-14; Markus 3:1-6)
6Dambuwaꞌ isab ellew liꞌi, pī si Isa padiyalem si langgal magusihat. Niyaꞌ laꞌi aꞌa sapik tanganne kanawanin. 7Niyaꞌ isab laꞌi meꞌ guru si saraꞌ āgama duk meꞌ Pariseo. Miha siye jān duk niyaꞌ panuntutande si Isa hangkan pinateng-patengan iye weꞌ de bang makoleꞌ ke iye si ellew liꞌi. 8Saguwaꞌ kataꞌuhan si Isa bang ine pinikilden duk paꞌinne si aꞌa masapik tangannen, “Pitu kew nengge tuꞌu.” Manjari kuwat iye duk nengge iye laꞌi. 9Manjari paꞌin si Isa si meꞌ aꞌahin, “Tilewte kaꞌam, bang dem saraꞌ, ine mapatut hininang si ellew liꞌihin, hinangan makahāp atawa hinangan makalaꞌat? Nimbul aꞌa atawa mapatey?” 10Pinayaman siye kēmon weꞌ si Isa paliput. Manjari paꞌinne si aꞌahin, “Pahintengun tangannun.” Na, pinahinteng weꞌ ne, manjari kawuliꞌan ne tangannen.
11Saguwaꞌ astel teꞌed manamal meꞌ Pariseohin duk meꞌ guru si saraꞌ āgamahin hangkan magisun siye bang inumeyde pu si Isahin.
Pameneꞌ si Isa tindegne sampūꞌ duk duwehin
(Mateo 10:1-4; Markus 3:13-19)
12Masa īꞌ, pataked si Isa pī si kakūdan missā si Tuhan. Laꞌi iye kellawan ngampun si Tuhan. 13Pagellew ne, ilinganan weꞌ ne meꞌ tindegnen pī si iye duk meneꞌ iye sampūꞌ duk duwe, ēnanne siye meꞌ aꞌa kawakilan. 14Meꞌ aꞌa tapeneꞌnen inin: si Simon, inēnan isab Petros weꞌ si Isa, duk Andariyas pungtinaꞌi si Simonin, si Yakub duk si Yahiya, si Pilip duk Bartolome, 15si Mateo duk si Tomas, si Yakub anak Alpahin duk si Simon iye ēnande Pangangatuhin, 16si Judas anak si Yakub duk si Judas Iskariyot, iye mamuddihan si Isahin si pasōngan.
Magtoloꞌ duk magpakawuliꞌ si Isa
(Mateo 4:23-25)
17Manjari puwas miyaꞌan padurul si Isa duk meꞌ tindegne bakas kawakilannen. Nengge iye laꞌi si kadatagan. Banes meꞌ tindegne sinduwehin tipun laꞌi duk banes isab aꞌa ngagad-ngagad laꞌi amban kēmon kalahat-lahatan si Yahudiya duk amban puweblo Awrusalam duk amban meꞌ puweblo Tiros duk Sidon si higad tahikin. 18Pī siye pakale si meꞌ panoloꞌ si Isahin duk makipakawuliꞌ meꞌ sakiden. Duk sasuku isab siye pasayedan seyitanin, pinaluwas weꞌ si Isa seyitanin. 19Duk kēmon meꞌ aꞌa mabanesin, inapas ne paꞌin weꞌ de si Isa inabut duk tangande, peggeꞌ niyaꞌ balakat paluwas amban baranne hangkan kawuliꞌan siye kēmon.
Meꞌ pagkēgan duk pagkaꞌaseꞌan
(Mateo 5:1-12)
20Manjari pinayaman weꞌ si Isa meꞌ tindegnen duk paꞌinne,
“Hāp pe kaꞌam meꞌ makaꞌaseꞌ-aseꞌin, peggeꞌ pagbayaꞌan kaꞌam weꞌ Tuhanin.
21“Hāp pe kaꞌam meꞌ maꞌinusan kuweꞌituhin peggeꞌ dinuhulan du kaꞌam si pasōngan.
“Hāp pe kaꞌam meꞌ magtangis kuweꞌituhin peggeꞌ magsaye du kaꞌam si pasōngan.
22“Hāp pe kaꞌam bang kaꞌam kabunsihan aꞌa, duk bang gaꞌi kaꞌam tayimaꞌde, duk bang bissā-bissāhande duk pakaꞌatande kaꞌam si meꞌ saweꞌbin peggeꞌ nuhut kaꞌam aku, Anak Manusiyaꞌin. 23Sa iyan du hep isab hininang meꞌ kamatettoꞌahanden si meꞌ kanabihanin. Bang tekka ellew kaꞌumantagne inin si kaꞌam, magkēg kaꞌam manamal duk palaksu du kaꞌam hawal kēgbin peggeꞌ hadje panumbas kaꞌamin si surgaꞌ.
24“Saguwaꞌ kaꞌam, meꞌ madayahan kuweꞌituhin, makaꞌaseꞌ-aseꞌ kaꞌam peggeꞌ talabeybi ne pāsahan mahāpin tuꞌu si dunya.
25“Kaꞌaseꞌ-aseꞌ kaꞌam meꞌ magduhul kuweꞌituhin, peggeꞌ niyaꞌ iyan waktu si pasōngan kaꞌinusanan du kaꞌam.
“Kaꞌaseꞌ-aseꞌ kaꞌam meꞌ magsaye kuweꞌituhin peggeꞌ niyaꞌ iyan waktu si pasōngan magsugul kaꞌam duk magtangis.
26“Kaꞌaseꞌ-aseꞌ kaꞌam bang kēmon aꞌa nanglitan kaꞌam, peggeꞌ kuweꞌ du kaꞌam meꞌ nabi gaꞌi bennal matuꞌuley sinanglitan weꞌ meꞌ kapapuꞌanbin.”
Lasa si meꞌ bantahin
(Mateo 5:38-48; 7:12a)
27“Saguwaꞌ kaꞌam meꞌ mapakale si akuhin, inin paꞌinku si kaꞌam: Kalasahanun bi bantabin. Maghinang hāp kaꞌam si meꞌ mabunsi si kaꞌamin. 28Māku-māku kaꞌam kahāpan para si meꞌ manuknaꞌan kaꞌamin duk ngampun kaꞌam para si meꞌ mangalaꞌat kaꞌamin. 29Bang niyaꞌ nampak luwenun dambiyaꞌ, patampalun isab pī si iye dambiyaꞌin ambat sampakne. Bang niyaꞌ ngeddoꞌ jaketnun, pasagadanun bisan eddoꞌne badjuꞌnun. 30Sine-sine mākuhan kaꞌu, urunganun. Duk bang niyaꞌ ngeddoꞌ kēmonnun, daꞌa ne pākuhun balik. 31Duk ine-ine kabayaꞌanbi hinang aꞌa si kaꞌam, damikkiyan isab hinangun bi si siye.
32“Bang iye hadja kinalasahanbin meꞌ mamalasa si kaꞌamin, niyaꞌ ke pananglitan kaꞌam? Gaꞌ. Peggeꞌ bisan meꞌ aꞌa dusehanin, kalasahande du meꞌ mamalasa si siyehin. 33Duk bang iye hadja tinabanganbin meꞌ makatabangan kaꞌamin, niyaꞌ ke pananglitan kaꞌam? Gaꞌ. Peggeꞌ bisan meꞌ aꞌa dusehanin sa iyan du isab addatden. 34Duk bang iye hadja pinasambiꞌanbin meꞌ taꞌase-asebi maniyaꞌ pagbayedden, niyaꞌ ke pananglitan kaꞌam? Gaꞌ niyaꞌ. Peggeꞌ bisan meꞌ aꞌa dusehanin masambiꞌ du si pagkaside dusehan, ngase-ngase weꞌ kabayedan du siye balik pamasambiꞌden. 35Saguwaꞌ iye inin pamanoloꞌku si kaꞌamin: Kalasahanun bi bantabin duk tabanganun bi siye. Bang niyaꞌ ngutang si kaꞌam, paꞌutanganun bi, daꞌa kaꞌam ngase-ngase bayednen. Bang hinangbi inin, hadje pahalaꞌ tasangkabin duk manjari meꞌ anak Tuhanin ne kaꞌam. Peggeꞌ hāp iye bisan si meꞌ aꞌa malaꞌatin duk si meꞌ aꞌa manggaꞌi magsukulin. 36Subey kaꞌam maꞌaseꞌ kuweꞌ Samabin du isab maꞌaseꞌ.”
Sabab ngandiyawaꞌan saweꞌne
(Mateo 7:1-5)
37“Daꞌa kaꞌam ngandiyawaꞌan saweꞌbi duk kaꞌam gaꞌi hukum Tuhanin. Daꞌa kaꞌam magpaꞌin weꞌ saweꞌbin subey ilegga, duk kaꞌam gaꞌi legga Tuhanin. Ampunun bi saweꞌbin duk isab kaꞌam ampun Tuhanin. 38Ngurung kaꞌam duk kaꞌam urungan Tuhanin. Dalilnen takesan hāp, dinasek duk jinedjeg pe duk pinennoꞌan sampay māsey, iye pinabuꞌus piyu si kaꞌamin. Ekkahan pangurungbin iye du isab ekkahan pangurung Tuhan si kaꞌamin.”
39Inakahan isab siye weꞌ si Isa dambuwaꞌ dalilan, paꞌinne, “Makajari ke aꞌa pessekin nundan aꞌa pessek isab? Gaꞌi ke siye kaduwangan laboꞌ pī dem lowang? 40Mulidin gaꞌi palabi kataꞌunen amban gurunen. Saguwaꞌ bang jukup ne pangadjiꞌnen, magsaliꞌ ne iye duk gurunen. 41Kaꞌu mangandiyawaꞌan saweꞌnun,” paꞌin si Isa, “weꞌey iye tatīknun hapak-hapak dem mata saweꞌnun, bu kaꞌu batang kayu dem matanun, bu gaꞌi tatīknu. 42Saꞌingge kapagpaꞌinnu si saweꞌnun, ‘Bagay, tuhun koꞌ, ānante hapak-hapak dem matanu lu,’ bang gaꞌi kitenu batang kayu dem di matanun? Kaꞌu iyan magmā-mā hadja. Ānanun dahuꞌ batang kayuhin amban dem matanu iyan, ubus pastiꞌ ne pamayamnun ngānan hapak-hapak dem mata saweꞌnun.”
Pangataꞌuhan kayuhin si buwaꞌne
(Mateo 7:16-20; 12:33-35)
43Paꞌin si Isa pe, “Kayu mahāpin gaꞌi buwaꞌ gaꞌi hāp duk kayu manggaꞌi mahāpin gaꞌi buwaꞌ hāp. 44Kayuhin kataꞌuhan si buwaꞌne. Gaꞌi kite bi mageddoꞌ buwaꞌ biyabas amban puhung atawa buwaꞌ buwahan amban sampinit. 45Manusiyaꞌin kuweꞌ dalil kayuhin du isab. Aꞌa mahāpin hāp kawul-piꞌilnen duk hāp bissānen peggeꞌ hāp dem ateynen. Saguwaꞌ aꞌa malaꞌatin, peggeꞌ laꞌat dem ateynen hangkan gaꞌi hāp kawul-piꞌilnen duk bissānen. Ine-ine dem atey manusiyaꞌ, iye miyaꞌan mapaluwas amban behenen.”
Duwe bayuꞌan magpatengge lumaꞌ
(Mateo 7:24-27)
46“Weꞌey paꞌinbi weꞌ aku Panuhutanbin, bu gaꞌi du hinangbi meꞌ pangandaꞌakanku kaꞌamin? 47Sasuku pitu si aku duk pakalene meꞌ bissākun duk tuhutne, pahātihanku si kaꞌam bang kuweꞌ sine iye. 48Kuweꞌ iye aꞌa maghinang lumaꞌ. Ngalowang iye pinalalem sampay niyaꞌ batu taꞌabutne. Ubus pinatengge weꞌ ne meꞌ olom lumaꞌnen diyataꞌ batuhin. Pagubus lumaꞌin, dunuk boheꞌin duk taꞌabut lumaꞌin weꞌ lasey mabasagin saguwaꞌ gaꞌ usaꞌ lumaꞌnen peggeꞌ hāp pamatenggehan iyehin. 49Na, bang aꞌahin pakale si meꞌ bissākun bu gaꞌi du tuhutne, kuweꞌ iye aꞌa maghinang lumaꞌ, saguwaꞌ gaꞌ kalihanne meꞌ olomin duk gaꞌ patenggene diyataꞌ batu. Pagtekka lasey mabasagin, magtawus hebbaꞌ duk jadjag teꞌed lumaꞌin.”
ទើបបានជ្រើសរើសហើយ៖
Lukas 6: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.
