Lukas 4
4
Panassat pu si Isahin
(Mateo 4:1-11; Markus 1:12-13)
1Manjari pagubus si Isa pinandi weꞌ Yahiya, tahalaꞌ iye amban boheꞌ Jordan. Pagbayaꞌan iye weꞌ Niyawa Sutsihin duk binoꞌo iye weꞌ Niyawa Sutsihin hap lahat makagindew-gindew. 2Ampatpūꞌ bahangi iye laꞌi duk sinassat iye laꞌi weꞌ nakuraꞌ seyitanin. Tiggelanne malaꞌihin gaꞌ iye mangan duk pagpuwas miyaꞌan inusan ne iye. 3Manjari paꞌin nakuraꞌ seyitanin si iye, “Bang bennal kew teꞌed Anak Tuhanin, daꞌakun batu inin manjari kinakan.” 4Sambungan si Isa iye, paꞌinne, “Tasulat dem kitab, pinaꞌin, ‘Dumaꞌin hadja kinakan makaꞌellum manusiyaꞌin.’ ”
5Manjari binoꞌo si Isa weꞌ nakuraꞌ seyitanin padiyataꞌ pī si lugal langkew manamal bu pinakitehan weꞌ ne si iye dem da kilep mata kēmon kalahatan si dunyahin. 6Paꞌin nakuraꞌ seyitanin si iye, “Urungte kew kapatut duk kew kapagbayaꞌ si meꞌ kalahatan inin duk si meꞌ alataꞌden. Peggeꞌ bakas sinōngan inin si aku duk makajari pangurungku pu sine-sine kabayaꞌanku. 7Bang kew pasujud si aku, si kaꞌu ne inin kēmon.” 8Sambungan si Isa iye, paꞌinne, “Tasulat dem kitab, pinaꞌin, ‘Subey kaꞌam pasujud si Tuhan Panuhutanbin duk subey hadja iye dendangan sinambahayangbin.’ ”
9Ubus miyaꞌan binoꞌo iye weꞌ nakuraꞌ seyitanin hap Awrusalam duk pinatengge iye diyataꞌ būngan langgal hadjehin, duk paꞌinne si iye, “Bang bennal kew teꞌed Anak Tuhanin palaboꞌ kew bittuꞌu, 10peggeꞌ tasulat du dem kitab, pinaꞌin, ‘Daꞌakne kew inipat si malaꞌikatnen supaya gaꞌ niyaꞌ baya-bayanu.’ 11Duk tasulat du isab, pinaꞌin, ‘Tayak meꞌ malaꞌikatin kew supaya bisan bettisnun gaꞌi peddiꞌan weꞌ batu.’ ” 12Sambungan si Isa iye, paꞌinne, “Paꞌin kitabin, ‘Daꞌa suleyanun Tuhan Panuhutannun.’ ”
13Pagubus ne kēmon bayuꞌan panassat nakuraꞌ seyitan pu si Isahin, tahalaꞌ dahuꞌ iye amban si Isa.
Tinagnaꞌan weꞌ si Isa hinangnen laꞌi si lahat Jalil
(Mateo 4:12-17; Markus 1:14-15)
14Manjari balik si Isa pī hap Jalil. Laꞌi si iye balakat Niyawa Sutsihin, duk aka-aka sabab iyehin palatag si meꞌ kalahat-lahatan mapaliputin. 15Magusihat iye si meꞌ kalanggal-langgalanden duk sinanglitan iye weꞌ meꞌ aꞌahin kēmon.
Astel meꞌ aꞌa Nasaretin pu si Isa
(Mateo 13:53-58; Markus 6:1-6)
16Hap pī si Isa si Nasaret, lahat kasuligannen. Pagtaꞌabut ellew Sabtuꞌ, ellew liꞌi meꞌ Yahudihin, pī iye si langgal sa hinangannen. Manjari nengge iye supaya iye makabatsa amban dem kitab. 17Sinōngan si iye kitab sinulat Nabi Isayahin. Iluka weꞌ ne kitabin duk takasuwaꞌ weꞌ ne meꞌ ayat inin bu binatsa weꞌ ne inin, pinaꞌin,
18“Pagbayaꞌan ku weꞌ Niyawa Tuhanin, peggeꞌ tapeneꞌ ku weꞌ ne magmahalayak aka-aka mahāpin si meꞌ aꞌa makaꞌaseꞌ-aseꞌin. Dinaꞌak ku weꞌ Tuhanin pitu ngakahan meꞌ pilisuhin weꞌ pinaluwas ne siye, meꞌ mapessekin weꞌ makakite ne siye balik, duk maluwas ku meꞌ tiniksaꞌin. 19Dinaꞌak ku isab pitu magpalataꞌ weꞌ taꞌabut ne tahun pagtimbul Tuhan meꞌ aꞌanen.”
20Ubus tinambel weꞌ ne kitabin duk pinangurung weꞌ ne balik pī si bilalin bu ningkoloꞌ iye. Kēmon aꞌa dem langgal miyaꞌan ngadendengan iye. 21Manjari nagnaꞌ iye missā si siye. Paꞌinne, “Ellew inin meꞌ ayat binatsaku miyaꞌan tuman ne sasangbi mapakalehin.”
22Meꞌ aꞌa dem langgalin kahāpan teꞌed pu si Isa. Ulaliꞌ siye peggeꞌ pandey iye missā. Magbissā-bissā siye, paꞌinde, “Dumaꞌin ke inin anak si Yusupin?” 23Paꞌin si Isa si siye, “Bugtuꞌ bissābi si aku eliꞌan inin: ‘Doktol, pakoleꞌun dinun,’ duk paꞌinbi isab, ‘Hinangun isab tuꞌu si di lahatnu bakas takale kami hininangnu si lahat Kapernaumin.’ 24Sabennal akahante kaꞌam,” paꞌinne pe, “nabihin gaꞌi pagaddatan bang si di lahatne. 25Akahante kaꞌam, awwalley pe, masa Eliyas nabihin, gaꞌ hep ulan dem tellun tahun duk tengngaꞌ duk inunus teꞌed tibuꞌukan lahat inin. Bennal ekka dende balu tuꞌu si lahat Israꞌil masa unus miyaꞌan, 26saguwaꞌ dumaꞌin pī si siye pangandaꞌakan Tuhan Nabi Eliyasin saguwaꞌ dinaꞌak iye pī si dende balu dumaꞌin bangsa Israꞌil laꞌi si Sarepta, si lahat Sidon. 27Damikkiyan du isab masa si Elisa nabihin,” paꞌin si Isa. “Ekka aꞌa inipul si bangsa Israꞌil masa miyaꞌan saguwaꞌ gaꞌ niyaꞌ siye kawuliꞌan bisan dambuwaꞌ, luwal iye makawuliꞌanin aꞌa amban bangsa Siriya, ēnnen si Nayman.”
28Pagkalede inin, kēmon siye dem langgal miyaꞌan astel manamal. 29Kuwat siye duk sinōgadan weꞌ de si Isa bu binoꞌo weꞌ de paluwas amban puweblo pī diyataꞌ punu paglahatande miyaꞌan, supaya iye talaboꞌde pī si pampang. 30Saguwaꞌ si Isa lumabey amban tengngaꞌde duk tahalaꞌ iye.
Aꞌa pasayedan seyitan
(Markus 1:21-28)
31Padurul si Isa amban Nasaret pī si Kapernaum, dambuwaꞌ puweblo isab si lahat Jalil. Pagtaꞌabut ellew Sabtuꞌ, ellew liꞌi, magusihat iye si meꞌ aꞌahin dem langgal. 32Ulaliꞌ siye pagkalede usihatnen peggeꞌ taga balakat iye bang iye missā. 33Laꞌi dem langgal miyaꞌan, niyaꞌ aꞌa pasayedan seyitan. Magkilahap iye papales, 34paꞌinne, “Allo! Daꞌa kami sasewun, Isa aꞌa Nasaret. Gaꞌ niyaꞌ lamudnu si kami. Pitu ke kew makaꞌatan kami? Kataꞌuhanku du bang sine kew. Kaꞌu dambuwaꞌ-buwaꞌ masutsi mapitu amban Tuhanin.” 35Saguwaꞌ inamāhan weꞌ si Isa seyitanin. Paꞌinne, “Daꞌa kew mabehe. Paguwaꞌ kew amban aꞌa iyan!” Manjari hinantakan weꞌ seyitanin aꞌahin dem tengngaꞌ meꞌ aꞌahin duk pagubus, paguwaꞌ ne iye amban aꞌahin duk gaꞌ du makaꞌine aꞌahin.
36Bengngangan meꞌ aꞌahin kēmon duk magbissā-bissā siye, paꞌinde, “Meꞌ bissāhey inin? Taga balakat iye duk taga kapatut ngandaꞌak meꞌ seyitanin. Tuhutde pangandaꞌakannen duk paguwaꞌ siye.” 37Duk aka-aka sabab si Isahin palatag ne si meꞌ kalahatan mapaliputin.
Ekka aꞌahin pinakoleꞌ weꞌ si Isa
(Mateo 8:14-17; Markus 1:29-34)
38Puwas miyaꞌan, paluwas si Isa amban langgal duk pī iye padiyalem si lumaꞌ si Simon. Na, saki hep matoꞌa si Simon dendehin maglemmun manamal, duk pākude pu si Isa weꞌ pakoleꞌne iye. 39Pī si Isa nengge si bihing dende masakihin duk daꞌakne tahalaꞌ lemmunnen duk kawuliꞌan ne dendehin. Magtawus iye dongaꞌ duk pinakan siye weꞌ ne.
40Pagseddep ellewin, kēmon meꞌ taga bagay masakihin bisan saki ine-ine, binoꞌo siye weꞌ de pī pu si Isa. Binettad weꞌ si Isa tangannen si siye dangan-dangan, duk pakawuliꞌne siye. 41Duk ekka isab aꞌa paguwaꞌan seyitan duk kakilahap-kilahapan meꞌ seyitanin, paꞌinde, “Kaꞌu Anak Tuhanin!” Saguwaꞌ inamāhan siye weꞌ si Isa gaꞌi siye dinaꞌak mabehe, peggeꞌ kataꞌuhande weꞌ iye Almasihin.
Si Isa lumengngan magmahalayak si meꞌ kalahat-lahatan
(Markus 1:35-39)
42Pagellew ne, tahalaꞌ si Isa pī si lugal gaꞌ niyaꞌ aꞌane. Piniha iye weꞌ meꞌ aꞌahin duk pagtakasuwaꞌde iye, inohotan iye weꞌ de. 43Saguwaꞌ paꞌinne si siye, “Subey ku isab pī si meꞌ kalahatan seddilihin magmahalayak aka-aka hāp sabab pagbayaꞌ Tuhanin peggeꞌ iye inin puꞌunku pinapitu weꞌ Tuhanin si dunya.” 44Duk magmahalayak iye dem meꞌ kalanggal-langgalan laꞌi si Yahudiya.
ទើបបានជ្រើសរើសហើយ៖
Lukas 4: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.
