Lukas 3
3
Pagmahalayak Yahiya magpandi-pandi meꞌ aꞌahin
(Mateo 3:1-12; Markus 1:1-8; Yahiya 1:19-28)
1-2Pagsampūꞌ duk limen tahun ne pagsultan si Tiberus, Sultan Nakuraꞌ bangsa Romahin, manjari tekka lapal Tuhanin pī pu si Yahiya anak Jakariyahin. Laꞌi si Yahiya si lahat makagindew-gindew. Masa miyaꞌan si Pontiyus Pilatus gubnul si lahat Yahudiya, si Herod gubnul si lahat Jalil duk pungtinaꞌinen si Pilip gubnul si lahat Ituriya duk lahat Tarakuniti, duk Lisani gubnul si lahat Abilen. Meꞌ imam nakuraꞌin si Annas duk si Kayapas. 3Ubus lumengngan Yahiya ngalatag kalahat-lahatan mapaliput si boheꞌ Jordanin magmahalayak si meꞌ aꞌahin weꞌ sasuku magsusun ne duk ngalebbahan meꞌ hinanganne malaꞌatin, subey iye pinandi duk ampun Tuhanin du iye. 4Hinang Yahiya inin, andang pinaꞌal dem sulat Nabi Isaya awwalley. Pinaꞌin laꞌi:
“Niyaꞌ aꞌa maglingan dem lahat makagindew-gindew. Iye inin paꞌinne: ‘Sōng tekka ne Panuhutanin. Palanuꞌun bi lān palabeyannen. Pabentelun bi lān tinuhutnen.
5Kēmon lebbakin subey pinennoꞌan duk kēmon punu duk kūdin subey dinatagan, mabingkokin pinabentel, lān maglettud-lebbakin pinalanuꞌ.
6Manjari takite meꞌ manusiyaꞌin du kēmon bang saꞌingge panimbul Tuhan siyehin.’ ”
7Banes teꞌed aꞌa pī pu si Yahiya makipandi si iye. Hangkan paꞌinne si siye, “Kaꞌam iyan, addatbin kuweꞌ addat sawe pangakkal. Weꞌey kaꞌam pitu? Kannalbi hatu weꞌ gaꞌi kaꞌam tewwaꞌ mulkaꞌ Tuhan sōng matekkahin bang kaꞌam pinandi. 8Hinangun bi hinangan mahāpin duk takite weꞌ tayikutanbi ne dusebin. Daꞌa kaꞌam ngandel weꞌ gaꞌi kaꞌam legga Tuhanin sewukat ne kaꞌam tubuꞌ Apuꞌ Ibrahim. Akahante kaꞌam, bisan meꞌ batu inin tahinang Tuhanin du meꞌ tubuꞌ Apuꞌ Ibrahim. 9Kuweꞌ dalil kayu kaꞌam sōng tinebbengan si gamutne. Kēmon kayu manggaꞌi magbuwaꞌ mahāpin tinebbengan duk ilakasan dem ebbut ineggas.” 10Tinilew iye weꞌ meꞌ aꞌa mabanesin, paꞌinde, “Na, ine subey hinang kami?” 11Sambunganne siye, paꞌinne, “Taga badjuꞌ duwehin subey urunganne manggaꞌ niyaꞌ badjuꞌnen. Damikkiyan taga kinakanin subey isab bahagiꞌanne manggaꞌ niyaꞌ kinakannen.”
12Niyaꞌ isab meꞌ aꞌa magpāku-pāku sukey para si gubelno pī pu si Yahiya makipandi duk paꞌinde si iye, “Tuwan, kami inin, ine subey hinang kami?” 13Nambung iye, paꞌinne, “Daꞌa kaꞌam māku sukey labi amban pangandaꞌakan kaꞌamin.” 14Niyaꞌ isab meꞌ sundalu nilew iye, paꞌinde, “Na, kami, ine subey hinang kami?” Paꞌinne si siye, “Daꞌa kaꞌam makitalew atawa nuntut gaꞌi bennal supaya kaꞌam kaꞌurungan pilak. Duk magsukul kaꞌam si suweldobin.”
15Pagkale meꞌ aꞌahin usihat Yahiyahin, kuweꞌ ngase-ngase siye saguwaꞌ kuweꞌ duwe-duwehan du isab dem ateyden bang si Yahiya miyaꞌan asal Almasihin ne ke. 16Saguwaꞌ paꞌin Yahiya si siye kēmon, “Pinandi kaꞌam weꞌ ku duk boheꞌ saguwaꞌ niyaꞌ dambuwaꞌ lella sōng pitu asal balakatan iye amban aku, gaꞌi ku bisan matalep ngalekkahan ingket tehompaꞌnen. Iye inin seddili pamandine kaꞌamin. Niyaꞌ kaꞌam papīhanne Niyawa Sutsihin duk sinduwehin pandine duk ebbut. 17Pagpaꞌilne meꞌ aꞌa mahāpin duk meꞌ aꞌa malaꞌatin. Kuweꞌ iye dalil aꞌa magpalid paley, pagpaꞌilne linggasin duk apahin. Meꞌ linggasin ennaꞌne pinadem lukung saguwaꞌ apahin eggasne dem ebbut gaꞌ niyaꞌ kapalemne.”
18Ekka pe usihat seddili guna Yahiya pagmahalayakne aka-aka mahāpin si meꞌ aꞌahin, duk binuyuꞌ-buyuꞌ siye weꞌ ne dinaꞌak ginantiꞌan kawul-piꞌilden. 19Inamāhan isab weꞌ Yahiya Gubnul Herod sabab maganda iye pu si Herodiyas, bakas anda pungtinaꞌinen, duk sabab hinanganne sinduwe malaꞌatin. 20Ubus tambahan si Herod pe meꞌ hinanganne malaꞌatin, kinalabusu weꞌ ne Yahiya.
Pamandi pu si Isahin
(Mateo 3:13-17; Markus 1:9-11)
21Masa pamandi Yahiya meꞌ aꞌahin kēmon, pinandi isab si Isa weꞌ ne. Pagubus si Isa pinandi, ngampun iye duk sasangne mangampunin, luka langitin, 22duk duwaꞌi Niyawa Sutsihin pī si iye kuweꞌ bantuk assang. Duk niyaꞌ suwala amban surgaꞌ magpaꞌin, “Anakte kew kalasahanku. Kasulutan ku teꞌed si kaꞌu.”
Meꞌ kapapuꞌan si Isahin
(Mateo 1:1-17)
23Manjari nagnaꞌ si Isa magusihat, niyaꞌ meꞌ tellumpūꞌ tahun ne umulnen. Kannal meꞌ aꞌahin anak si Yusup iye, si Yusup inin anak si Heli. 24Si Heli anak si Mattat, si Mattat anak si Libi, si Libi anak si Malki, si Malki anak si Janni, si Janni anak si Yusup. 25Si Yusup inin anak si Mattati, si Mattati anak si Amos, si Amos anak si Nahum, si Nahum anak si Esli, si Esli anak si Naggay. 26Si Naggay anak si Maꞌat, si Maꞌat anak Mattati, si Mattati inin anak si Semeꞌin, si Semeꞌin anak si Yosek, si Yosek anak si Joda. 27Si Joda anak si Joꞌanan, si Joꞌanan anak si Resa, si Resa anak si Serubbabel, si Serubbabel anak si Salati, si Salati anak si Neri, 28si Neri anak si Malki, si Malki inin anak si Addi, si Addi anak si Kosam, si Kosam anak si Elmadam, si Elmadam anak si Er. 29Si Er anak si Yussaꞌ, si Yussaꞌ anak Eleeser, si Eleeser anak si Jorim, si Jorim anak si Mattat, si Mattat anak si Libi, 30si Libi anak si Simiyun, si Simiyun anak si Yuda, si Yuda anak si Yusup, si Yusup inin anak si Jonam, si Jonam anak Eliyakim. 31Si Eliyakim anak si Meleya, si Meleya anak si Menna, si Menna anak si Mattata, si Mattata anak si Natan, si Natan anak Sultan Daꞌud. 32Si Daꞌud anak si Jesse, si Jesse anak si Obed, si Obed anak si Bowas, si Bowas anak si Salmon, si Salmon anak si Nasson. 33Si Nasson anak Amminadab, si Amminadab anak si Admin, si Admin anak si Arni, si Arni anak si Hesdon, si Hesdon anak si Peres, si Peres anak si Yuda. 34Si Yuda anak si Yakub, si Yakub anak si Isahak, si Isahak anak si Ibrahim, si Ibrahim anak si Tera, si Tera anak si Nahor. 35Si Nahor anak si Serug, si Serug anak si Raga, si Raga anak si Peleg, si Peleg anak si Eber, si Eber anak si Sela. 36Si Sela anak si Kainan, si Kainan anak si Arpaksad, si Arpaksad anak si Sem, si Sem anak si Nu, si Nu anak si Lamek, 37si Lamek anak Metusela, si Metusela anak si Idris, si Idris anak si Jared, si Jared anak si Mahalalel, si Mahalalel anak si Kenan. 38Si Kenan anak si Enos, si Enos anak si Set, si Set anak Apuꞌ Adam duk si Apuꞌ Adam anak Tuhanin.
ទើបបានជ្រើសរើសហើយ៖
Lukas 3: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.
