Hinangan 15
15
Mitingde si Awrusalamin
1Manjari inin, niyaꞌ meꞌ aꞌa amban Yahudiya hap pī si Antiyok. Magtoloꞌ siye si meꞌ masandel pu si Isa malaꞌihin. Paꞌinde, “Gaꞌi kaꞌam makajari timbul bang gaꞌi kaꞌam inislam sa pangandaꞌakan si Musahin.” 2Jinawab teꞌed weꞌ si Paul duk Barnabas meꞌ aꞌa miyaꞌan duk magpasuweyan teꞌed siye sabab toloꞌde miyaꞌan. Hangkan magisun meꞌ katindegan si Isa si Antiyokin weꞌ subey si Paul duk Barnabas duk sinduwe meꞌ kapungtinaꞌihanin hap Awrusalam, nilew meꞌ kawakilanin duk meꞌ bahiꞌin sabab palkalaꞌ miyaꞌan.
3Pinalengngan ne siye weꞌ meꞌ masandel pu si Isa si Antiyokin. Pabutas siye amban lahat Penisiya duk amban Samariya. Sābude mapabutasin, inaka-aka weꞌ de weꞌ meꞌ bangsa dumaꞌin Yahudihin sandel ne pu si Isa. Kēgan teꞌed meꞌ masandel pu si Isahin kēmon pagkalede inin. 4Pagtekka disi Paul si Awrusalam, sinampang siye weꞌ meꞌ masandelin duk meꞌ kawakilanin duk meꞌ kabahiꞌanin. Inaka-aka ne weꞌ disi Paul si siye kēmon bakas tahinangde weꞌ tabang Tuhan si siyehin. 5Saguwaꞌ niyaꞌ meꞌ Pariseo masandel pu si Isahin nengge laꞌi missā. Paꞌinde, “Meꞌ masandel pu si Isa amban meꞌ bangsa seddili miyaꞌan subey inislam dahuꞌ duk subey isab tuhutde saraꞌ si Musahin.”
6Manjari magtipun meꞌ kawakilanin duk meꞌ kabahiꞌanin mikil bang inumey palkalaꞌ miyaꞌan. 7Pagtiggel-tiggel ne siye magisun, nengge si Petros duk paꞌinne, “Meꞌ kapungtinaꞌihanku, kataꞌuhanbi du weꞌ matuꞌuhin pe, tapeneꞌ ku weꞌ Tuhanin amban kaꞌam dinaꞌak magmahalayak pī si meꞌ kabangsahan seddili supaya takalede duk kahagadde aka-aka mahāp sabab si Isahin. 8Duk Tuhanin, mangataꞌuhan diyalem atey manusiyaꞌin, pakitehanne weꞌ meꞌ kabangsahan seddilihin sukuꞌ si iye du isab, sabab pinangurung isab weꞌ ne si siye Niyawa Sutsihin sa si kitehin bi. 9Gaꞌ siye pagbiddaꞌne duk kite bi,” paꞌin si Petros. “Inampun du isab weꞌ ne meꞌ duseden peggeꞌ sandel siye pu si Isa. 10Na,” paꞌin si Petros, “weꞌey batang paꞌastelbi Tuhanin sabab pahunitanbi pe meꞌ masandel pu si Isahin. Daꞌakbi siye nuhut saraꞌin bu bisan meꞌ kapapuꞌante bi ley duk sampay kite bi gaꞌ du tahinangte bi. 11Daꞌa ne. Sandel kite bi pu si Isa, Panuhutanin, duk pinaluwas ne kite bi amban duseten bi peggeꞌ malasa duk maꞌaseꞌ iye si kite bi. Damikkiyan isab meꞌ aꞌa amban kabangsahan seddilihin.”
12Pagkalede pinaꞌin si Petros miyaꞌan, gaꞌ siye kēmon kumebbut. Duk pinakale weꞌ de Barnabas duk si Paul magaka-aka sabab meꞌ hinangan balakatan duk makaꞌulaliꞌ tahinangde weꞌ balakat Tuhanin laꞌi diyaleman meꞌ kabangsahan dumaꞌin Yahudihin. 13Pagubus siye missā, pagantiꞌ missā si Yakub. Paꞌinne, “Meꞌ kapungtinaꞌihanku, pakale kaꞌam si aku. 14Bakas pahāti si Petros ne magbaꞌahu miyaꞌan si kaꞌam sabab tagnaꞌ pamakite Tuhan lasane si meꞌ kabangsahan dumaꞌin Yahudihin, supaya isab niyaꞌ amban siye meꞌ aꞌa sukuꞌ si Tuhan. 15Maguyun bissā si Petros miyaꞌan duk tasulat meꞌ kanabi-nabihan awwalley. Tasulat hep dem kitab, pinaꞌin,
16‘Puwas inin, balik du ku, paꞌin Tuhanin, duk patenggeku du balik lumaꞌ si Daꞌud bakas mahebbaꞌin. (Hāti lumaꞌ Daꞌudin pagsultanannen.) Pahāpku du malarakin duk hinangku lumaꞌ balik. 17Ubus kēmon meꞌ aꞌa amban kabangsahan seddilihin, pihade du ku isab peggeꞌ tapeneꞌku isab siye, paꞌin Tuhanin. 18Inin lapal Tuhanin, pinakataꞌu weꞌ ne kemuwe awwalley.’
19“Bang si pikilanku,” paꞌin si Yakub, “subey gaꞌi sasewte bi meꞌ aꞌa amban kabangsahan seddili mapatuhut si Tuhanin. 20Saguwaꞌ subey siye paboꞌohante bi sulat ngakahan siye weꞌ subey siye gaꞌi mangan ine-ine bakas paglamas si meꞌ limbagan tuhan-tuhan, subey siye gaꞌi magjina, subey siye gaꞌi mangan hayep pikel, duk subey siye gaꞌi mangan lahaꞌ. 21Meꞌ saraꞌ si Musa inin kemuwe matuꞌuhin asal minahalayak du si kēmon kalahat-lahatan duk binatsa kahabaꞌ ellew Sabtuꞌ dem meꞌ kalanggal-langgalan bangsaten bi.”
Sulat pī si meꞌ masandel pu si Isa amban kabangsahan seddilihin
22Manjari magpikilan meꞌ kawakilanin duk meꞌ kabahiꞌanin sampay kēmon meꞌ masandel pu si Isahin, weꞌ meneꞌ siye meꞌ aꞌa amban siye pinatuhut pu si Paul duk Barnabas hap Antiyok. Pineneꞌ weꞌ de si Judas Barsabbas duk si Silas. Duwangan inin asal pinagaddatan teꞌed weꞌ meꞌ pagkaside tindeg si Isahin. 23Maboꞌo siye sulat duk inin pinaꞌin dem sulatin:
“Sulat inin amban meꞌ kapungtinaꞌihanbi matuꞌu si Awrusalamin, meꞌ kawakilanin, duk meꞌ kabahiꞌanin. Pinasampay inin weꞌ kami si kaꞌam kēmon meꞌ kapungtinaꞌihan kami amban kabangsahan seddilihin, meꞌ maglahat luꞌu si Antiyokin, si Siriyahin, duk si Kilikiyahin. 24Takale kami weꞌ niyaꞌ koꞌ meꞌ katindegan si Isa bittuꞌu amban kami bakas piyu nasew meꞌ pikilanbin sabab meꞌ panoloꞌden. Dumaꞌin miyaꞌan pangandaꞌakan kami siye. 25Hangkan magisun kami kēmon weꞌ meneꞌ kami meꞌ aꞌa tuꞌu daꞌak kami piyu si kaꞌam. Patuhut kami siye pu Barnabas duk si Paul, meꞌ bagay kinalasahan teꞌed. 26Disi Paul inin, meꞌ aꞌa gaꞌi ngayimanan umulden, bang si hinangde para si Panuhutanten bi, Isa Almasi. 27Manjari tiyaꞌ ne daꞌak kami piyu si kaꞌam si Judas duk si Silas patampak ngakahan kaꞌam sa sinulat kami inin. 28Peggeꞌ Niyawa Sutsihin duk kami maguyun weꞌ gaꞌi kaꞌam subey pinahunitan palabi amban meꞌ daꞌakan subey teꞌed tinuhut inin: 29daꞌa kaꞌam mangan ine-ine bakas paglamas si meꞌ limbagan tuhan-tuhan, daꞌa kaꞌam mangan lahaꞌ, daꞌa kaꞌam mangan hayep pikel, duk daꞌa kaꞌam magjina. Bang gaꞌi inin hinangbi, hāp hinanganbin. Taman inin ne hadja. Wassalam.”
30Manjari lumengngan ne meꞌ aꞌa dinaꞌakde mamoꞌo sulat miyaꞌan. Pī siye hap Antiyok duk pagtekkade laꞌi, tinipun weꞌ de meꞌ masandel pu si Isahin duk sinōngan weꞌ de si siye sulatin. 31Pagbatsade sulatin, kēgan teꞌed siye sabab sulat makaꞌasig-asig ateyde miyaꞌan. 32Si Judas duk si Silas inin, meꞌ aꞌa magpalataꞌ bissā Tuhanin. Tiggel pangusihatde meꞌ masandel pu si Isa malaꞌi si Antiyokin panabang siye, supaya ngabasag sandelden duk asig ateyden. 33Pagtiggel-tiggel ne disi Judas laꞌi, pinapoleꞌ ne siye weꞌ meꞌ masandel pu si Isa malaꞌihin. “Karayaw hāp du lengnganbin, gaꞌ baya-bayabi,” paꞌinde. 34Manjari balik ne disi Judas pī si meꞌ bakas mangandaꞌak siyehin. 35Saguwaꞌ si Paul duk Barnabas paꞌamban pe laꞌi si Antiyok. Magtoloꞌ siye duk magmahalayak lapal Tuhanin magtuhut duk meꞌ sinduwehin.
Magsapeꞌ si Paul duk Barnabas
36Pagpuwas bang piyem bahangi, paꞌin si Paul pu Barnabas, “Sūng kite balik pī nindew meꞌ pagkasite tindeg si Isa si kalahat-lahatan bakas pagmahalayakante lapal Tuhanin. Payamante bang saꞌingge du siye ley.” 37Bayaꞌ boꞌo Barnabas si Yahiya Markus. 38Saguwaꞌ pikilan si Paulin weꞌ gaꞌi si Markus patut binoꞌo peggeꞌ bakas inambanan hep siye weꞌ ne laꞌi si Pampiliya, duk gaꞌ iye makatatas nabangan siye sampay ubus hinangden. 39Magjawab teꞌed duwanganin hangkan magsapeꞌ ne siye. Binoꞌo weꞌ Barnabas si Markus duk patulak siye hap pūꞌ Kiprus. 40Si Paul isab tapeneꞌne hinang saweꞌin si Silas. Meꞌ katindegan si Isa malaꞌihin māku-māku si Tuhan para pu disi Paul weꞌ ipat Tuhanin du siye. Ubus bu lumengngan ne siye. 41Pabutas siye si lahat Siriya duk si lahat Kilikiya. Inusihatan weꞌ de meꞌ katindegan si Isa si meꞌ lahat miyaꞌan supaya haget sandelden.
ទើបបានជ្រើសរើសហើយ៖
Hinangan 15: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.
