Hinangan 14
14
Laꞌi si Ikoni
1Laꞌi si lahat Ikoni saliꞌ du isab maꞌumantagin. Hap pī si Paul duk Barnabas dem langgal Yahudi magmahalayak lapal Tuhanin. Basag teꞌed pamahātide lapal Tuhanin hangkan banes teꞌed meꞌ Yahudi duk meꞌ aꞌa dumaꞌin Yahudi sandel ne pu si Isa. 2Saguwaꞌ meꞌ Yahudi manggaꞌi masandelin, kinawul weꞌ de meꞌ aꞌa dumaꞌin Yahudihin supaya kuntarahande meꞌ masandel pu si Isahin. 3Si Paul duk Barnabas patennaꞌ laꞌi si Ikoni tiggel-tiggel. Gaꞌ niyaꞌ talew-talewde missā si meꞌ aꞌa sabab si Isa, Panuhutanin. Duk pinabugtuꞌ weꞌ Panuhutanin si meꞌ aꞌahin weꞌ toꞌo lapal minahalayakde sabab lasanen, sabab inurungan siye weꞌ ne balakat maghinang meꞌ hinangan balakatan duk makaꞌulaliꞌ. 4Magpaꞌil meꞌ aꞌa si puweblo miyaꞌan. Sinduwehin binēbbegan weꞌ de meꞌ Yahudihin duk sinduwehin binēbbegan weꞌ de disi Paul.
5Manjari magisun meꞌ aꞌa bangsa seddilihin duk meꞌ Yahudihin magtuhut duk meꞌ nakuraꞌden, weꞌ papeddiꞌande duk pagtibagande disi Paul. 6Pagkataꞌuhan inin weꞌ disi Paul, lahi siye duwangan hap lahat Likaona. Paglaꞌi ne siye, hap pī siye si puweblo Listara duk si puweblo Derbe duk sampay si kalahatan mapaliputin, 7duk minahalayak weꞌ de laꞌi aka-aka mahāp sabab si Isahin.
Laꞌi si Listara
8Laꞌi si Listara niyaꞌ aꞌa kukuꞌ kemuwe amban dem betteng duk gaꞌ iye bakas makalengngan. 9Pakale teꞌed iye si meꞌ binissā si Paulin. Pinayaman iye pabentel weꞌ si Paul duk kataꞌuhan weꞌ si Paul dem ateyne weꞌ aꞌa kukuꞌ miyaꞌan ngandel weꞌ tapakawuliꞌ iye weꞌ si Isa. 10Manjari missā si Paul pinapales. “Nengge kew,” paꞌinne si aꞌa makukuꞌin. Magtawus pahulangkad aꞌahin nengge duk lumengngan ne iye. 11Pagkite meꞌ aꞌa mabanesin hininang si Paul miyaꞌan, magellang-ellang siye si bissāde Likaona, paꞌinde, “Magbantuk manusiyaꞌ ne meꞌ tuhanin duk tiyaꞌ ne siye duwaꞌi pitu si kite bi.” 12Inēnan siye weꞌ de ēn meꞌ tuhanden. Si Barnabas, ēnande si Seus duk si Paul ēnande si Hermes peggeꞌ iye luwal mamissāhin. 13Langgal si Seus tuhanden, laꞌi du si bukut tarangka puweblo miyaꞌan. Imam si langgal miyaꞌan, hap pī si tarangka nundan meꞌ sapiꞌ lella taga meꞌ sumping tinōtō diyataꞌ kellongde. Imam inin duk meꞌ aꞌa maꞌekkahin batang sumbaliꞌde meꞌ sapiꞌ miyaꞌan pagkulubande pu disi Paul.
14Saguwaꞌ pagkataꞌuhan weꞌ si Paul duk Barnabas sōng hininangde inin, ginaret-garet weꞌ de semmekden, tandaꞌ weꞌ gaꞌi siye kasulutan. Magubas siye pī si tengngaꞌ meꞌ aꞌa mabanesin duk maggasud siye, 15paꞌinde, “Weꞌey inin hinangbi si kami? Manusiyaꞌ du hadja kami kuweꞌ kaꞌamin. Duk hangkan kami inin pitu, ngakahan kaꞌam aka-aka mahāpin supaya tayikutanbi ne meꞌ tuhanbi iyan, meꞌ manggaꞌ niyaꞌ kagunahanne iyan. Pitu kami supaya kaꞌam papinda nuhut Tuhan maꞌellumin, Tuhan mamapanjari langit duk bulakin, tahikin duk kēmon bayuꞌan diyalemnen. 16Masa awwalley, pinasagadan weꞌ Tuhanin meꞌ kabangsa-bangsahanin nuhut ine-ine kinabayaꞌanden. 17Saguwaꞌ bisan awwalley sampay maꞌin, niyaꞌ du tandaꞌ amban Tuhan supaya iye kataꞌuhan meꞌ manusiyaꞌin. Tandaꞌ miyaꞌan, meꞌ hinanganne mahāpin: urunganne kaꞌam ulan, pamanjarine meꞌ tinanembin si bulanne, urunganne kaꞌam kinakan duk pakēgne meꞌ ateybin.” 18Kuweꞌ miyaꞌan meꞌ bissā disi Paulin, saguwaꞌ agen gaꞌi tapagesde meꞌ aꞌahin duk siye gaꞌi magkuluban si siye.
19Manjari inin, niyaꞌ tekka pī si Listara meꞌ Yahudi amban Antiyok si Pisidiya duk amban Ikoni. Kabumbungan weꞌ de meꞌ aꞌa mabanesin pabēbbeg si siye nguntarahan si Paul. Pinagtibagan weꞌ de si Paul duk batu. Ubus bu ilalas iye weꞌ de binoꞌo paluwas amban puweblo miyaꞌan peggeꞌ kannalde matey ne iye. 20Saguwaꞌ sakaliꞌ magtipun meꞌ masandel pu si Isahin ngaliputan si Paul, kuwat iye duk balik iye pī dem puweblo miyaꞌan. Pagsasumuhin hap pī siye duk Barnabas si lahat Derbe.
Balik si Paul duk Barnabas pī si Antiyok si Siriya
21Paglaꞌi ne siye si Derbe, minahalayak weꞌ de aka-aka mahāpin si meꞌ aꞌa malaꞌihin. Ekka meꞌ aꞌa patindeg pu si Isa laꞌi. Ubus balik si Paul duk Barnabas pī si Listara, bu Ikoni, ubus bu palanjal siye hap Antiyok, iye Antiyok si lahat Pisidiyahin. 22Biniꞌat weꞌ de meꞌ tindeg si Isa si meꞌ puweblo papīhande miyaꞌan duk pinabasag weꞌ de sandelden. Dinaꞌak isab pinateteg si siye sandelden si Tuhan. “Peggeꞌ,” paꞌin disi Paul, “subey ekka kasusehan talabeyte bi meke kite bi sakup dem pagbayaꞌan Tuhanin.” 23Si meꞌ kalahatan papīhanden, antag-antag niyaꞌ meꞌ masandel pu si Isahin, meneꞌ disi Paul meꞌ aꞌa hinang bahiꞌde. Ubus, muwase disi Paul duk māku-māku si Tuhan para si meꞌ bahiꞌ miyaꞌan. Māku-māku siye weꞌ karayaw inipat du meꞌ masandel pu si Isahin weꞌ Panuhutanden, iye pangandelanden.
24Pagtabutas weꞌ disi Paul lahat Pisidiyahin, tekka siye si lahat Pampiliya. 25Pī siye hap puweblo Perga duk minahalayak weꞌ de lapal Tuhanin laꞌi. Ubus bu padurul siye hap Attaliya. 26Manjari patulak siye balik hap Antiyok. Laꞌi hep si Antiyok miyaꞌan pamāku-māku meꞌ masandel pu si Isahin weꞌ ipat Tuhanin disi Paul, sōng palumengngande magmahalayak aka-aka mahāpin. Duk kuweꞌitu taꞌubusde ne hinangde miyaꞌan.
27Pagtekka disi Paul laꞌi si Antiyok, tinipun weꞌ de kēmon masandel pu si Isahin. Inaka-akahan siye weꞌ de kēmon meꞌ tahinangden weꞌ tabang Tuhan si siyehin. Inaka-akahan isab siye weꞌ de, weꞌ kapagmahalayak ne siye si meꞌ bangsa dumaꞌin Yahudi sabab si Isa duk ekka ne siye sandel pu si Isa. 28Tiggel disi Paul patennaꞌ laꞌi duk meꞌ masandel pu si Isa si Antiyokin.
ទើបបានជ្រើសរើសហើយ៖
Hinangan 14: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.
