1 Korinto 2
2
Usihat sabab Almasi ilansang diyataꞌ olomin
1Na aku, meꞌ kapungtinaꞌihanku, tagnaꞌku piyu magmahalayak si kaꞌam aka-aka mahāp amban Tuhanin, gaꞌ ku ngangguna meꞌ bissā lalem atawa meꞌ bissā meꞌ aꞌa malangkew pangadjiꞌden. 2Tiggelanku luꞌu si kaꞌam pagtuꞌuranku weꞌ gaꞌ niyaꞌ seddili usihatku si kaꞌam luwal hadja sabab Isa Almasi duk labi ne sabab kamateyne diyataꞌ olomin. 3Hangkan hep pagtekkaku luꞌu si kaꞌam, lamma ku, duk kebba-kebbahan ku peggeꞌ talew ku kaw gaꞌi tahinangku pangandaꞌakan Tuhan akuhin. 4Duk sakaliꞌ ne ku magusihat si kaꞌam, gaꞌ ku missā kuweꞌ meꞌ aꞌa mapandey mamissā-missā miyaꞌan ngangguna kataꞌu manusiyaꞌ, saguwaꞌ kahumatan kaꞌam weꞌ ku sabab balakat Niyawa Tuhanin hangkan ne kaꞌam kahagad. 5Sandel kaꞌam dumaꞌin sabab kataꞌu manusiyaꞌin saguwaꞌ sabab balakat Tuhanin.
Kataꞌu Tuhanin
6Saguwaꞌ bang si meꞌ aꞌa asal basag ne sandelde si Tuhanin, lalem du isab panoloꞌku si siyehin. Saguwaꞌ kataꞌu ginunakun dumaꞌin kuweꞌ kataꞌu si babew dunya inin duk dumaꞌin kuweꞌ kataꞌu meꞌ taga kapatut magbayaꞌ si dunya inin. Magtamanan du kapatutden. 7Meꞌ usihatku miyaꞌan sabab meꞌ garaꞌ Tuhan manggaꞌ kinataꞌuhan manusiyaꞌin. Gaꞌ pe dunya inin pinapanjari, tapikil ne weꞌ Tuhanin bang saꞌingge ne duk kite bi tapī si surgaꞌ. 8Saguwaꞌ meꞌ magbayaꞌ tuꞌu si dunyahin, gaꞌ tahātide pikilan Tuhanin peggeꞌ bang tahātide inin, gaꞌ siꞌ miyaꞌan daꞌakde ilansang diyataꞌ olom Isa Almasi, mabalakatan magbayaꞌin. 9Saguwaꞌ tasulat dem kitab, pinaꞌin, “Niyaꞌ panyap Tuhanin para si meꞌ malasa si iyehin. Pinanyapne inin gaꞌ niyaꞌ aꞌa bakas makakitene, atawa makakalene. Gaꞌ niyaꞌ bisan bakas makapikilne.” 10Saguwaꞌ kite bi, pinakataꞌu inin si kite bi weꞌ Niyawa Tuhanin. Peggeꞌ Niyawa Tuhanin, kataꞌuhanne kēmon-kēmonin, kataꞌuhanne bisan meꞌ pikilan Tuhan malalemin. 11Upama, gaꞌ niyaꞌ ngataꞌuhan dem pikilan aꞌahin luwal iye dihananne. Damikkiyan isab gaꞌ niyaꞌ ngataꞌuhan dem pikilan Tuhanin luwal Tuhanin duk Niyawa Tuhanin. 12Pamikil pangurung Tuhan si kitehin bi dumaꞌin hadja kuweꞌ pamikil manusiyaꞌ tuꞌu si dunyahin, saguwaꞌ pinatennaꞌ weꞌ Tuhanin si kite bi Niyawanen supaya kataꞌuhante bi kēmon meꞌ pinasukuꞌne si kitehin bi.
13Bang kami magusihat, gaꞌi guna kami kataꞌu amban manusiyaꞌin. Saguwaꞌ iye inusihat kamihin meꞌ panoloꞌ Niyawa Tuhan si kamihin. Duk panoloꞌ mabennal amban Niyawa Tuhanin iye inusihat kami si meꞌ aꞌa palaꞌihan Niyawa Tuhanin. 14Aꞌahin bang gaꞌ laꞌi si iye Niyawa Tuhanin, gaꞌi tayimaꞌne usihat amban Niyawa Tuhanin. Gaꞌi tahātine usihat miyaꞌan. Bang si iye, gaꞌ miyaꞌan niyaꞌ gunane peggeꞌ subey dahuꞌ Niyawa Tuhanin laꞌi si aꞌa miyaꞌan meke tahātine. 15Saguwaꞌ aꞌa palaꞌihan Niyawa Tuhanin, tahātine kēmon-kēmonin bang hāp ke atawa laꞌat. Saguwaꞌ aꞌa palaꞌihan Niyawa Tuhanin, gaꞌi iye tahāti weꞌ meꞌ aꞌa gaꞌi palaꞌihan Niyawa Tuhanin. 16Hangkan kite bi gaꞌi tahāti weꞌ meꞌ aꞌahin, peggeꞌ pamikilten bi kuweꞌ pamikil Almasihin. Tasulat hep dem kitab, pinaꞌin,
“Gaꞌ niyaꞌ aꞌa ngataꞌuhan bang ine dem pikilan Tuhanin. Duk gaꞌ isab niyaꞌ makajari noloꞌan iye.”
ទើបបានជ្រើសរើសហើយ៖
1 Korinto 2: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.