1 Korinto 1
1
1Sulat inin amban aku si Paul. Amban bayaꞌ Tuhan pineneꞌ ku duk kawakilan ku weꞌ Isa Almasi dinaꞌak magmahalayak lapalnen. Duk sulat inin amban Sostenes isab, dambuwaꞌ pungtinaꞌite masandel pu si Isa Almasihin. 2Pasampay kami sulat inin piyu si kaꞌam meꞌ pagtipunan meꞌ sukuꞌ si Tuhan luꞌu si puweblo Korintohin, si kaꞌam meꞌ aꞌa tapeneꞌ weꞌ Tuhanin hinangne meꞌ aꞌane sutsi peggeꞌ pinagdambuwaꞌ kaꞌam duk Isa Almasi kuweꞌ du isab kēmon aꞌa mangampun pu si Isa Almasi amban meꞌ kalahat-lahatanin. Si Isa Almasi hep Panuhutanden duk Panuhutanten bi isab. 3Karayaw kaꞌam ipat Samate bi Tuhanin duk Panuhutanten bi Isa Almasi. Karayaw isab pasanyangde dem ateybin.
Magsukul si Paul
4Luwal ku teꞌed magsukul si Tuhan sabab lasa duk aseꞌ Tuhan si kaꞌamin peggeꞌ sukuꞌ pu si Isa Almasi ne kaꞌam. 5Peggeꞌ sukuꞌ pu si Almasi ne kaꞌam, ekka kahāpan tekka si kaꞌam, tahātibi ne teꞌed meꞌ toloꞌnen, duk pandey ne isab kaꞌam magusihat sabab toloꞌnen. 6Toloꞌ sabab Isa Almasihin asal haget ne teꞌed dem ateybi. 7Hangkan hep jukup ne kahāpan pangurung Tuhan si kaꞌamin sābubi mangagad-ngagad pabalik Panuhutanten bi Isa Almasi. 8Pabasagne ne paꞌin sandelbin ngeregseꞌ ellew dambuli supaya asal gaꞌ du niyaꞌ dusebi bang tekka ellew papitu Isa Almasi, Panuhutanten bi ngahukum meꞌ manusiyaꞌin. 9Asal pabasag Tuhanin sandelbin peggeꞌ kapangandelan teꞌed Tuhanin duk tapeneꞌ kaꞌam weꞌ ne supaya kaꞌam magdambuwaꞌ duk Anaknen Isa Almasi, iye Panuhutanten bi.
Magpaꞌil meꞌ masandel pu si Isa Almasi si Korintohin
10Meꞌ kapungtinaꞌihanku, kaꞌurungan ku kapatut weꞌ Isa Almasi, Panuhutanten bi, hangkan junjungku si kaꞌam, magsulut-sulut be kaꞌam kēmon. Daꞌa kaꞌam magpaꞌil-paꞌil, saguwaꞌ subey kaꞌam magdambuwaꞌ isun duk pamikil. 11Hangkan inin tasubahatku, meꞌ kapungtinaꞌihanku, peggeꞌ bakas ku kaꞌakahan weꞌ meꞌ saweꞌ si Kaloyahin weꞌ magsaggaꞌ koꞌ kaꞌam luꞌu. 12Hātinen, gaꞌi magsaliꞌ pamikilbin, peggeꞌ niyaꞌ kaꞌam magpaꞌin, “Aku inin nuhut si Paul.” Niyaꞌ isab magpaꞌin, “Aku inin nuhut Apollos.” Niyaꞌ pe sinduwe paꞌinde, “Aku inin nuhut si Petros.” Sinduwehin isab paꞌinde, “Aku inin nuhut Almasi.” 13Na, gaꞌi hāp hinangbi iyan. Kuweꞌ binahagiꞌ-bahagiꞌ Almasi. Sine teꞌ bakas mamatey diyataꞌ olom para si kaꞌamin? Aku? Pinandi ke kaꞌam tandaꞌ weꞌ kaꞌam meꞌ tindegku?
14Magsukul ku teꞌed si Tuhan weꞌ gaꞌ du niyaꞌ seddili tapandiku luꞌu luwal hadja si Kirispus duk si Gayus. 15Hangkan gaꞌ niyaꞌ luꞌu kapagpaꞌin weꞌ tapandite kaꞌam duk kaꞌam manjari meꞌ tindegku. 16Taꞌessebku weꞌ tapandiku beꞌ isab si Estepanus duk meꞌ anak-andanen. Saguwaꞌ seddili amban siye gaꞌ ne niyaꞌ taꞌessebku bakas tapandiku. 17Peggeꞌ gaꞌ ku inin dinaꞌak weꞌ Almasi magpandi, saguwaꞌ dinaꞌak ku magmahalayak aka-aka mahāpin. Duk pagmahalayakkun dumaꞌin bissā lalem ginunakun, peggeꞌ bang ku ngangguna meꞌ bissā lalem, kaw iye kasinnahan meꞌ aꞌahin meꞌ bissāku malalemin duk gaꞌi asipde inusihatku sabab kamatey Almasi diyataꞌ olomin, manjari gaꞌi siye taboꞌoku sandel pu si Isa Almasi.
Pu si Almasi takite balakat duk kataꞌu Tuhanin
18Bang inusihatan meꞌ aꞌahin sabab kamatey Isa Almasi diyataꞌ olomin, paꞌin meꞌ aꞌa tudju narkaꞌin, weꞌ kadupangan usihat miyaꞌan. Saguwaꞌ kite bi meꞌ aꞌa tudju surgaꞌin, kataꞌuhante bi weꞌ tuꞌu si usihat inin takite teꞌed balakat Tuhanin. 19Niyaꞌ tasulat dem kitab, paꞌin Tuhanin,
“Pakaꞌatanku kataꞌu meꞌ aꞌa malalem kataꞌunen, duk ānanku kataꞌu meꞌ aꞌa malangkew pangadjiꞌnen.”
20Na, bang iye ne inin, saꞌingge ne meꞌ aꞌa malalem kataꞌunen? Saꞌingge ne meꞌ aꞌa malangkew pangadjiꞌnen? Saꞌingge ne meꞌ aꞌa kinimmatan manusiyaꞌ mapandey magsuꞌalin? Gaꞌ du niyaꞌ gunane. Peggeꞌ pinahāti weꞌ Tuhanin weꞌ kataꞌu meꞌ manusiyaꞌin gaꞌ niyaꞌ gunane bang si iye.
21Asal lalem teꞌed kataꞌu Tuhanin. Iye kabayaꞌannen weꞌ meꞌ aꞌahin gaꞌi ngataꞌu sabab Tuhanin pinalabey amban kataꞌuden. Hangkan hep garaꞌ Tuhanin timbulne meꞌ makahagad si aka-aka mahāp minahalayak kamihin, bisan meꞌ manggaꞌi makahagadin paꞌinde weꞌ gaꞌ koꞌ niyaꞌ kagunahan meꞌ minahalayak kamihin. 22Weꞌey paꞌinde gaꞌ niyaꞌ kagunahan minahalayak kamihin? Peggeꞌ meꞌ bangsa Yahudihin kabayaꞌanden pinakitehan dahuꞌ siye meꞌ hinangan balakatan meke siye kahagad. Meꞌ bangsa Girikin isab iye inapasden weꞌ ngalalem kataꞌuden. 23Saguwaꞌ kami, minahalayak kamihin Isa Almasi matey diyataꞌ olom sabab duse meꞌ manusiyaꞌin. Meꞌ Yahudihin bunsi si minahalayak kami inin duk meꞌ dumaꞌin Yahudihin isab paꞌinde weꞌ gaꞌ koꞌ niyaꞌ guna minahalayak kami inin. 24Saguwaꞌ bang si meꞌ aꞌa tapeneꞌ Tuhanin hinangne meꞌ aꞌanen, Yahudi ke siye atawa bangsa seddili, kahagad siye weꞌ tuꞌu pu si Almasi inin takite teꞌed balakat Tuhanin duk kataꞌune malalemin. 25Peggeꞌ bisan paꞌin meꞌ aꞌahin weꞌ gaꞌ niyaꞌ kagunahan hininang Tuhanin panimbulne kitehin, saguwaꞌ pasōng pe teꞌed kataꞌu Tuhanin amban kataꞌu meꞌ manusiyaꞌin kēmon. Duk bisan pe magpaꞌin meꞌ aꞌahin weꞌ lamma Tuhanin peggeꞌ matey du Isa Almasi diyataꞌ olom, saguwaꞌ gaꞌ niyaꞌ aꞌa balakatan amban iye.
26Na, meꞌ kapungtinaꞌihanku, essebun bi bang saꞌingge pagaꞌabin masa gaꞌ pe kaꞌam tapeneꞌ weꞌ Tuhanin. Kulang du kaꞌam malangkew pangadjiꞌnen, kulang du kaꞌam taga kapatutin, duk kulang du kaꞌam mabangsahanin. 27Saguwaꞌ pagtuꞌuran weꞌ Tuhanin pineneꞌ meꞌ kinimmatan meꞌ aꞌa weꞌ gaꞌ niyaꞌ kataꞌunen supaya kaꞌiyaꞌ-iyaꞌan du meꞌ aꞌa maniyaꞌ kataꞌunen. Duk pineneꞌ isab weꞌ Tuhanin meꞌ kinimmatan meꞌ aꞌa weꞌ gaꞌ niyaꞌ basagnen supaya kaꞌiyaꞌ-iyaꞌan du meꞌ aꞌa maniyaꞌ basagnen. 28Tapeneꞌ weꞌ Tuhanin meꞌ diniyawaꞌan meꞌ aꞌa si dunyahin, meꞌ inudjiꞌden, meꞌ pinaꞌinde gaꞌ niyaꞌ kagunahannen, supaya kataꞌuhan meꞌ aꞌahin weꞌ ine-ine kimmatande mahalgaꞌ, bang si Tuhan gaꞌ niyaꞌ halgaꞌne. 29Hātine inin gaꞌ niyaꞌ aꞌa kapagabbu sabab dine si matahan Tuhan. 30Saguwaꞌ pinagdambuwaꞌ kaꞌam weꞌ Tuhanin duk Isa Almasi, duk Almasihin hininang weꞌ Tuhanin poꞌon kataꞌuten. Sabab Isa Almasi hangkan kinimmatan bentel kite weꞌ Tuhanin. Hinangne isab kite meꞌ aꞌane duk paluwasne kite amban hukuman duseten. 31Hangkan hep kuweꞌ pinaꞌin dem kitabin, “Sasuku mabayaꞌ magabbuhin, subey iye magabbu sabab meꞌ bakas tahinang Tuhanin.”
ទើបបានជ្រើសរើសហើយ៖
1 Korinto 1: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.