Say Ononan Libro na SARAY MACABEO 9
9
Say Impatey nen Judas
1Nen nadngelan nen Demetrio a si Nicanor tan saray sondalo to et naandipat la ra, imbaki to ra lamet di Bakides tan Alcimo ed dalin na Judea, a natan kaiba da ray sondalo na Siria. 2Nankurang ira ed Dalan na Gilgal, dinogpaan day Mesalot diad Arbela, adakep da, tan amayamay so pinapatey dan totood man. 3Diad ononan bulan na taon 152,#9:3 TAON 152: Kapara to yay 160 K.C. inlira day kampo ra ed kasumbaliwan na Jerusalem. 4Manlapud man amaarap ira ed Berea a kaiba ray duamplon libo a sondalon akaran tan duan libon akakabayo.
5Nankampod Elasa si Judas a kaiba toy talon libon sondalon asalsali da lay akibakal. 6Balet nen anengneng day ontan lan karakel na sondalon kalaban da, mapalaloy inkataktakot da. Lapud saya, amayamay ed sikaray tinmaynan tan walwalon lasus a sondalon Judio so atilak. 7Nen anengneng nen Judas a saray sondalo to et mandaiset la ra tan ngalngali la onggapo so bakal, apagaan ta anggapo lay panaon a panipon tod saray sondalo to. 8Binmetel so liknaan to, balet kuantod saray atilak nin kakaiba to, Paraanan tayo so bakal; nayarin taloen tayo ni ra.
9Sinali na saray totoo to ya omanen so kanunotan to, Aliwan magenap so biskeg tayo. Onsener itayo la, pian niligtas tayoy bilay tayo. Insan tayod satan ompawil ya aparakel tan bakalen iray kalaban. Anggapoy magenap a totoo tayo natan.
10Inmebat si Judas, Ag komun balut nasalita a tinmalaw ak a mibakal. No talagan asabi lay oras tayo, matalek tayon ompatey a pangyagel ed saray kadalaan tayo tan ag tayon balut nadotakan so kagalangan tayo.
11Pinmaway iray sondalon Siriano ed kampo tan namparaan iran mibakal ed saray Judio. Nankadwan olup ira may akakabayon sondalo. Walad arap iray sondalon dugay inkapasal da, balet walad onaan iray pumapana tan bumabansut. 12Si Bakides walad bandad kawanan. Sinmulong iray sondalon akaran, ya asalimbengan irad nantopag na saray sondalon akakabayo, tan apaknul iray trumpita a mangibawag na bakal. Pinaknul met na saray sondalo nen Judas iray trumpita ra. 13Ginmalaw so dalin lapud ingal nen nanabet iray sondalo, tan nanlalaban ira manlapud kabwasan ya anggad labi.
14Nen anengneng nen Judas a walad nikawanan si Bakides tan say kabalgay olup na saray sondalo na Siria, inibaan na amin da ray sankasebegan a totoo to, 15et binalatar da ray Sirianon walad nikawanan. Inosilan da ra ya anggad saray alusadsar na pokdul.#9:15 Say sankanayarian a tiksto saray alusadsar na pokdul; diad tikston Grigo Palandey na Asdod. 16Balet nen anengneng na saray Sirianon walad nikawigi ya atalo la ray walad nikawanan, pinmoliktar iran dinmogpa ed kinen Judas tan saray totoo to diad benegan da. 17Inmalibogbog a mapalalo so labanan, tan amayamay iray inaatey a Judio tan Siriano. 18Insan apatey met si Judas. Batik lad satan iray amin a totoo to. 19Inala di Jonatan tan Simon imay bangkay na agi ra tan imponpon da ed lobuk na pamilya ra diad Modin, 20tan diman ed lobuk nannangis ira. Amin ya Israelita et inermenan da na mapalalo a pigay agew. Inkuanda, 21Ag ya nayarin nagawa! Apatey so makapanyarin palbayani tan manangilaban na Israel!
22Saray arum a ginagawa nen Judas, saray bakal ya akilabanan to, saray ginagawa to lapud inkapuso to, tan saray ankakabaleg ya asumsumpal to, et dakel iran tuloy ya ikorit.
Sinalatan nen Jonatan si Judas
23Kayariy impatey nen Judas, ginmapon pinmaway lamet ed nandoroman pasen na Judea iray traidor a totoon ag mangingalngalep ed ganggan. Pinmawil met ya amin iray totoon maoges. 24Ontan met, walad saman a panaon so mapalalon eras, kanyan akigampid saray traidor so intiron bansa. 25Ginagala nen Bakides a tinoron manoley ed bansa iray traidor. 26Inanap na sarayan totoo iray kakaaro nen Judas tan inyarap da ra ed kinen Bakides, tan pinapairap to ra tan pinapaabeba toy kagalangan da. 27Panaon ya na baleg a gunigon ed Israel; mapalalo ni nen say antokaman ya agawad sikara nanlapud samay panaon a tinmondan linmetaw ed sikara iray propita.
28Insan amin a kakaaro nen Judas et nantitipon ira tan kuandad kinen Jonatan, 29Nanlapu lad impatey nen agim a Judas, anggapoy singa sikaton mangipangulod sikatayo sumpad saray kalaban tayo, sumpad kinen Bakides tan sumpad saray kadalaan tayon onsusumlang ed sikatayo. 30Kanyan, natan, pilien mi kan onsalat ed sikato a manoley tan mangipangulod sikami a mangituloy na pibakal tayod saray kalaban. 31Inawat nen Jonatan ed saman ya agew so kipapasen a pangulo tan sinalatan toy kuya ton Judas.
Saray Impibakal nen Jonatan
32Nen nadngelan ya nen Bakides, ninunot ton pateyen si Jonatan. 33Balet nen sinmabi yan balita ed kinen Jonatan, batik a kaiba toy agi ton Simon tan saray totoo ra. Linma rad kalawakan na Tekoa tan inlira rad kawalaay dipositoway danum ed Asfar so kampo ra. ( 34Agew na Panagpainawa nen nadngelan ya nen Bakides tan binaliw toy Ilog na Jordan a kaiba ton amin iray sondalo to.#9:34 Aliwa angangkoy akaliraan na birsikulo 34; kabyangan angangko na birsikulo 43.) 35Imbaki nen Jonatan si agi ton Juan, a sikatoy makaoley ed saray pamilya ray sondalo, ta pikasian da ray Nabateano ta kaaro to ra. Kerewen to a dimay pangisinupan da ray awit dan amayamay. 36Balet saray Jambrita na Medeba et dinogpaan day Juan, dinakep dan priso, tan imbatik dan amin iray awit da. 37Kayari to yan agawa, akabatan nen Jonatan tan si agi ton Simon a saray Jambrita et mampabansal ira na totoon matalona, tan walay libot na nubia tan saray mangolup manlapud baley na Nadabat. Anak na sakey ed saray matalonggaring a prinsipi na Canaan so nubia. 38Labay di Jonatan tan Simon so ombawi lapud impatey na agi ran si Juan, kanyan sikara tan saray totoo ra et linma rad toktok na sakey ed saray palandey tan inmamut irad man. 39Tinalaranan da ra tan anengneng day maingal ya olup na totoon dakel so awit dan balkut. Say nubio, saray kakaaro to, tan saray kakanayon to et mamapaarap iran mangabet ed nubia tan saray angolup ed sikato. Akaarmas ira na susto tan totogtogen da ray kagawaan na musika tan saray tambol. 40Dinogpaan ira na saramay Judion akaamut, et apatey so amayamay ed sikara; akabatik ed kapalandeyan iray nakdaan ed sikara, kanyan inaala na saramay Judio iray kayaryan da. 41Saman sirin so bansal et nagmaliw a panaon na panagermen tan nagmaliw a kantan para tolur ira may malikeliket a togtog da. 42Akabawi si Jonatan tan si Simon ed impatey na agi ra, insan pinmawil ira ed karanuman diad gilig na Jordan.
43Nadngelan ya nen Bakides. Nen sakey ya Agew na Panagpainawa linmad pandel na Ilog na Jordan a kaiba toy amayamay a sondalo. 44Inkuanen Jonatan ed saray totoo to, Natan nepeg a mibakal tayo diad pangyagel tayod saray bilay tayo. Maatap ni so kipapasen tayo natan nen say dinanman a kipapasen ya asagmak tayo nen saman. 45Walad arap tayo ray kalaban, walad beneg tayo so ilog, tan walad nantopag a diking tayo ray karanuman tan say makdel a karikaan; anggapoy napawayan tayo. 46Kanyan ipikasi yod Katawan ya iyagel to itayod saray kalaban tayo.
47Ginmapo so bakal tan ngalngali la napatey di Jonatan tan saray totoo to si Bakides, balet akabatik ed bandad beneg na saray sondalo 48to et tinmiblong irad Ilog na Jordan tan binmaliw ira, pian makabatik ira. Ag la inmosil a binmaliw ed ilog iray sondalon Siriano. 49Diad saman ya agew, sakey a sanlibon sondalo nen Bakides so inatey.
50Nen pinmawil ed Jerusalem si Bakides, saray Siriano et amaalagey ira na saray atatagey a padir tan binabalewetan a puirta ra. Ginawa da ya ed pigaran baley na Judea: Emaus, Bet-horon, Betel, Timna, Piraton, Tefon, tan say tirinsira ed Jerico. 51Diad amin da ra yan lugar, si Bakides angipasen na saray sondalon manggunigon lawas ed saray Judio. 52Pinaelet to met so tirinsira na baley na Bet-sur tan Baley na Gezer tan say tirinsira ed Jerusalem. Angipasen diman na saray sondalo tan nansinup diman na saray abasto. 53Insan to inaala ray lalakin anak na manonan totood bansa a pamasengegan na labay ton nagawa tan impripriso to ra ed tirinsira.
54Diad kumadwan bulan na taon 153,#9:54 TAON 153: Kapara to yay 159 K.C. ingganggan na Pangulon Pari a si Alcimo a gebaen so padir na patio ed dalem na Timplo. Sikato ya komuy pakaderal na ginagawa na saray propita; balet kagapo na kimey, 55naataki si Alcimo, et apatonda so kimey. Aparalitiko si Alcimo tan ag to makasangi, kanyan ag to makasalita odino anggan makagawa na kasulatan nipaakar ed ipatawir tod pamilya to. 56Inatey a mapalaloy impanirap to. 57Nen akabatan nen Bakides ya inatey lay Alcimo, pinmawil ed kinen Ari Demetrio, kanyan duay taon a nanariy kareenan ed dalin na Judea.
58Insan nantitipon ya amin iray traidor a Judio kuanda, Nengneng yo, mareen tan maimeng lay pambibilay nen Jonatan tan saray totoo to. No awiten tayo diay Bakides natan, nadakep to ra ed sanlabi labat. 59Linma ra sirin ed kinen Bakides tan nantotongtongan da ya. 60Imparaan nen Bakides so dakerakel a sondalo. Maamut ya angipawit na sulat ed saray kagampi tod Judea. Kinerew tod sikara ya erelen day Jonatan tan saray totoo to. Balet ag da agawaan so labay to, lapud akabatan so maamut a plano to. 61Adakep nen Jonatan tan saray totoo to so limamplo ed saramay traidor ya akibabalid samay komplut, tan pinapatey da ra. 62Insan di Jonatan, si Simon, tan saray sondalo ra et linma rad Betbasi diad kalawakan. Impaalagey da ray ageban padir tan pinaelet da ray tirinsira na baley. 63Nen akabatan nen Bakides so nipaakar ed saya, impantitipon ton amin iray sondalo to tan pinakabatan to ray kagampi tod Judea. 64Dinogpaan tod amin a dapag so baley na Betbasi tan amaalagey na saray plataporman panlakob. Nen abayag lay bakal, 65akapaway ed baley si Jonatan a kaiba toy pigaran totoo tan tinaynan ton makaoley ed baley si agi ton Simon. 66Tinalo nen Jonatan si Odomera tan saray totoo to, insan to dinogpaan tan dineral so kampo nen Fasiron. Nen atalo da ra, akigampi rad kinen Jonatan tan inibaan dan dinmogpa ed kinen Bakides. 67Diad saman met a bekta, pinmaway ed baley si Simon tan saray totoo to tan pinopoolan da ra may plataporman panlakob. 68Legay bakal adesdes a mapalalo si Bakides, kanyan anggapoy asumpal ed saray plano to; diad kaonuran, atalo. 69Mapalaloy pasnuk to ed saramay Judion traidor ya anagyat ed sikaton onlad Judea, kanyan impapatey toy amayamay ed sikara.
Insan ginetma la nen Bakides so ompawil ed dilin bansa to. 70Balet akabatan ya nen Jonatan, kanyan angibaki ed kinen Bakides na saray totoo to a kerewen day pankakaro ra tan say kipawil na saray adakep a Judio. 71Inmabubon si Bakides ed kinen Jonatan tan sinambaan to ya ag to la sigensigenen legan ton mambilay. 72Impalima nen Bakides iray Judion impriso to tan pinmawil la ed dilin bansa to. Ag to lan balut ginmatigatin ed dalin da ray Judio. 73Nansamput so bakal ed Israel. Nanayam ed Micmas si Jonatan tan ginapwan ton inoleyan iray totoo tan pinaandi tod Israel iray traidor a Judio.
ទើបបានជ្រើសរើសហើយ៖
Say Ononan Libro na SARAY MACABEO 9: PnPV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Philippine Bible Society New Testament © 1977, Bible © 1983