Say Ononan Libro na SARAY MACABEO 5
5
Saray Bakal a Sumpad Saray Kakaabay a Bansa
(2 Mac. 10:14-33; 12:10-45)
1Nen nadngelan na saray kakaabay a bansa ya angipaalagey iray Judio na altar tan impawil day gendat a kipapasen na Timplo, mapalaloy pasnuk da, 2kanyan ninunot da a deralen ya amin iray Judion manaayam ed pegley da. Kanyan ginapwan dan pateyen iray totoo tayo.
3Saray taga Idumea et sasabaten da ray Israelita, kanyan linman mibakal ed sikara si Judas diad Akrabattene, tinalo to ra, tan sinamsaman to ra. 4Binakal to met iray totoo ed Baean a lawas tatakotan ira na saray Israelita, lapud sasaneben da ray bumabiahin Israelita. 5Kinolung tod saray tirinsira ra iray taga Baean, sinambaan ton pateyen ira, tan pinoolan to ray tirinsira ra a wadman ya akolung iray taga Baean. 6Insan si Judas sinmulong a mibakal sumpad dalin na Ammon, a diman to nabet so baleg tan makapanyarin olup da ray sondalon ipapangulo na sakey a lakin manngaran na Timoteo. 7Amimpiga-pigan tinalo to rad bakal, et sigput a tinalo to ra diad kaonuran. 8Dinakep toy baley na Jazer tan saray kaliber-liber ton bario, insan amawil ed Judea.
9Nantitipon ed Galaad iray Hintil, ta dogpaan tan deralen da ray Israelitan manaayam ed dalin da. Balet batik ed tirinsirad Datema iray Israelita. 10-11Tan angyakar iray sulat ed kinen Judas tan saray agagi to. Saya so logan na sulat: Saray Hintil ed kaliber-liber mi et mititipon irad sondalo nen Timoteo. Batik kami diad sayan tirinsira ya onsalimbeng, balet natan mampaparaan iran manakep ed kawalaan mi tan mamatey ed sikami. 12Dakerakel la ray apatey ed sikami. Gali dia kari, ta iyagel yo kami. 13Amin da ray lalakin Judio a manaayam ed Tob et apatey ira; saray kaasawaan da tan saray anak da et adakep ira, tan nibatik ya amin iray kayaryan da. Sakey a sanlibon lalaki so apatey diman.
14Babasaen ni yan sulat nen sinmabi ray arum ya ibabaki a pinipilat da ray kawes da a pangipatnag na ermen da, a taruk day balita a nanlapud Galilea. 15Inkuanda, Saray sondalon taga Tolemaida, Tiro, Sidon, tan say intiron Galilea et sinmabi ran mamatey ed sikami.
16Nen nadngel yan amin nen Judas tan saray totoo, nantitipon iray amayamay a totoo ta aralen da no antoy nepeg dan gawaen ya itulong ed sarayan kabansaan da a nanairapan lapud panagdogpa na saray kalaban da. 17Inkuanen Judas ed agi ton Simon, Mamili ka na pigaran lalaki, ta iyagel yo ray kapara tayon Judio ed Galilea; onla kami nen Jonatan ya agi ta ed Galaad. 18Intilak nen Judas iray nakdaan a sondalo, ta sikaray mangguardiad Judea, tan impasen ton makaoley ed saray totoo iray duaran pangulo a di Azarias tan Jose a lakin anak nen Zacarias. 19Inkuantod sikara: Itilak ta kayon mangipangulo dia, balet ag kayo ompapaway a mibakal ed saray Hintil ya anggad ipawil mi. 20Talon libon lalaki so akilad kinen Simon ya onlad Galilea tan walon libo so akilad kinen Judas ya onlad Galaad.
21Linmad Galilea si Simon tan amayamay so bakal ya akilabanan tod saray Hintil. Tinatalo to ra 22tan inosilan to ra ya anggad siudad na Tolemaida; apatey toy sakey a talon libo ed sikara tan sinasamsaman to ra. 23Insan to inaala ray Judion walad Galilea tan Arbatta, pati saray kaasawaan da, saray anak da, tan amin a kayaryan da, tan inawit to rad Judea. Lapud saya, baleg so liket da.
24Diad sayan panaon, si Judas Macabeo tan si agi ton Jonatan et abaliw da lay Ilog na Jordan tan taloy agew iran binmeltang ed kalawakan. 25Akabet ira na saray makaaron taga Nabatea ya angibagad sikara na amin ya agawad saray Judio diad Galaad. 26Imbalita ra ya amayamay iray Judion apriso ed saray aliber na padir a siudad na Bozra, Alema, ma, Casfo, Maked, tan Karnaim, 27balet apriso ray arum ed saray ankelag a baley na Galaad. Imbalita ra met a nankakasakey iray kalaban ya ondogpad ontombuk ya agew ed saray tirinsira da ray Judio, tan iilaloan dan napatey ya amin iray Judio ed saksakey ya agew.
28Kanyan si Judas tan saray sondalo to et bigla ran amoliktar tan dinogpaan day Bozra a walad abay na dalan ed kalawakan, adakep da so baley, tan pinapatey dan amin iray totood man. Sinamsaman da so siudad, insan da pinoolan. 29Tinmaynan irad man tan nankurang iran sanlabi ya anggad tirinsira ed Datema. 30Nen palbangon anengneng di Judas tan saray totoo to so amayamay a sondalon ondodogpa ed tirinsira; ililira da ray takayan, saray plataporman panaglakub, tan saray panagbongbong na padir, pian nadakep da may tirinsira. 31Nen nadngel nen Judas so eyagan tan say tanul na saray trumpita a manlalapud siudad, naamtaan to la a ginmapo la so bakal, 32kanyan inkuantod saray totoo to, Mibakal kayod sayan agew para saray kapara yon Judio!
33Ingganggan ton nankatlon talonton ya onsulong iray totoo to tan dogpaan dad beneg iray kalaban da. Nen onsusulong ira, pinaknul da ray trumpita tan ineeyag day pikakasi ra. 34Nen anengneng na saray sondalon ipapangulo nen Timoteo iray sondalo nen Judas Macabeo, pinmoliktar ira tan batik ira. Tinalo ra nen Judas tan pinatey tod saman ya agew so sakey a walon libon lalaki.
35Insan tinmaynan diman si Judas, ta dinogpaan toy baley na Alema; adakep to tan pinatey ton amin iray totood man. Sinamsaman to may baley, insan to pinoolan. 36Manlapud man linma tan dinakep toy Casfo, Maked, Bosor, tan saray arum a baley ed Galaad.
37Kayari to ya, nantipon lamet si Timoteo na sondalo tan nankampo ra ed kasumbaliwan na Rafon, diad biek na sakey ya ilog. 38Angibaki si Judas na pigaran totoo to a manispia ed kampo, et imbalita rad sikato nen kapawil da ya amin da ray Hintil ed saman a pasen et akitipon irad kinen Timoteo, kanyan dakerakel la ran sondalo. 39Angupa si Timoteo na saray sondalon taga Arabia a mangibad sikato, tan nankampo ra ed biek na ilog ya akaparaan la ran ondogpa ed kinen Judas. Kanyan pinmaway si Judas tan inabet to ran pibakalan.
40Nen asingger lay Judas tan saray sondalo to ed abay na danum, inkuanen Timoteo ed saray opisyal to, No ituloy toy kurang to tan baliwen toy ilog, ag tayo la napaer so idogpa to, et taloen to itayo. 41Balet no antakot tan ontondad biek na ilog, ombaliw itayon ondogpad sikato, et taloen tayo. 42Nen asabi nen Judas so pandel na ilog, ingganggan to ray opisyal to ya ag da abuloyan ya ontonda so siopaman, no ag ingen dagdagen da so balang sakey a mibakal. 43Si Judas so akaonan binmaliw ed ilog a mibakal ed saray kalaban, tan tinombuk na amin a totoo to. Agewgew iray Hintil a walad arap da, imbabantak da ray armas da, tan batik irad paganon timplo diad Karnaim. 44Balet dinakep nen Judas tan saray totoo to so siudad tan pinoolan da may timplo, pati amin a totoon wadman. Lapud adakep la so Karnaim, ag la makalaban iray Hintil ed kinen Judas.
45Insan tinipon nen Judas ya amin iray Judio a walad Galaad, ta awiten to ran amin ed Judea. Baleg ya olup ira a nandoroman klasin totoo, pati saray kaasawaan da, saray anak da, tan amin a kayaryan da. 46Linma ra ya anggad Efron, sakey a baleg tan aliber na padir a baley. Ag nayarin onsaliberber ira ed anggan dinan a diking, no ag ta nepeg ya ondalan irad baley. 47Balet ag ira palabasen na saray totood man; sinaraan da ingen na saray bato iray puirta na baley. 48Sinulat ira nen Judas na pikakaaro. Onyay logan na sulat: Palabas yo kami pa ed baley yo, ta onsempet kami la. Anggapoy mandiwit ed sikayo; onlabas kami labat. Balet siansian ag da lokasan iray puirta.
49Kanyan imbaga nen Judas ed balang sakey, likud ed saray lalakin mibabakal, a mankampo ra ed kawalaan da. 50Saray totoon mibabakal et niganggan iran mamparaan ya ondogpa ed baley. Akibakal iran sangew tan sanlabi anggad adakep da may baley. 51Impapatey nen Judas ya amin iray lalaki ed Efron, sinamsaman day baley, tan pinalanas da. Insan si Judas tan saray totoo to et dinmalan irad baley diad tapew da ray bangkay. 52Binaliw day Ilog na Jordan tan linma rad maawang a patar a kasumbaliwan na Betsan. 53Legan dan nankurang ed ipawil da, tinitipon nen Judas iray akabatik a kalaban tan pinapabiskeg toy linawa da ray totoo, anggad impakasabi rad Judea. 54Mapalaloy liket tan pisasalamat da diad intatdang dad Palandey na Sion. Insan angisaklang ira na saray bagat a popoolan, lapud anggapoy anggan sakey ya apatey tan akapawil iran amin.
55Nen walad Galaad si Judas tan si Jonatan, tan si agi ran Simon et dodogpaan toy Tolemaida diad Galilea, 56nadngelan di Jose tan Azarias a sikaray pangulo na saray sondalod Judea iray mabayanin impibakal da tan saray impanatalo ra. 57Inkuandad sakey tan sakey, Mibakal tayod saray Hintil a walad kaliber-liber tayo, pian magmaliw ta met a bantug. 58Kanyan sikara tan saray totoo ra et akibakal irad saray totood Jamnia. 59Pinmaway ed baley si Gorgias tan saray totoo to, ta abeten da ran pibakalan. 60Tinalo da ra di Jose tan Azarias tan inosilan da ra ya anggad saray ketegan na Judea. Sakey a duan libon Israelita so apatey ed saman ya agew. 61Agaway onyan baleg ya inkatalo, lapud saramay pangulon Judio et labay day magmaliw a palbayani tan ag da tinoluk si Judas tan saray agagi to. 62Sakey ni, ag ira kabyangan na pamilya na saray Macabeo, a sikaray pinili na Dios a mangiter na kawayangan ed saray Israelita.
63Balet si Judas Macabeo tan saramay agagi ton lalaki et baleg so impamagalang ed sikara na amin da ray Israelita tan amin da ray Hintil. Nen nadngelan na saray totoo so inkabantug da, 64dakerakel a totoo so nantitipon a mangidayew ed sikara.
65Insan akibakal si Judas tan saray agagi to ed saray taga Edom a walad abalaten. Dinogpaan toy Hebron tan saray kaliber-liber ton baley, dinederal to ray padir to, tan pinopoolan to ray tori ed kaliber-liber to. 66Insan sinmulong ed dalin da ray Filisteo tan dinmalan ed Marisa.#5:66 Diad pigaran dagdaan a patalus Marisa; diad tikston Grigo Samaria. 67Diad saman ya agew, dakel iray paparin apatey ed bakal lapud labay day magmaliw a palbayani, et akibabali ran pinmaway ya akibakal. 68Inarap nen Judas so Asdod diad Filistia. Inggegeba to ray altar, pinopoolan to ray talintao na saray diriyos da, sinasamsaman to ray baley da, insan pinmawil ed Judea.
ទើបបានជ្រើសរើសហើយ៖
Say Ononan Libro na SARAY MACABEO 5: PnPV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Philippine Bible Society New Testament © 1977, Bible © 1983