Say Ononan Libro na SARAY MACABEO 14
14
Pangidayew ed kinen Simon
1Nen taon 172,#14:1 TAON 172: Kapara to yay 140 K.C. tinipon nen Ari Demetrio a Kumadwa iray sondalo to tan linmad Media a mananap na arum nin tulong diad pibabakal to ed kinen Trifo. 2Nen nadngelan nen Ari Arsaces a Kumanem na Persia tan Media a linmoob si Demetrio ed sakop ton dalin, imbaki toy sakey ed saray pangulo na sondalo to a kaiba to ray pigaran sondalo, ta dakepen dan mabilay si Demetrio. 3Dinmogpa ra, et tinalo da ray sondalo nen Demetrio, inerel day Demetrio, tan inyakar dad kinen Ari Arsaces tan sikatoy angipriso ed sikato.
4Legan a mabilay si Simon, nanariy kareenan ed dalin na Judea. Legan na intiron impanoley to, inkana toy pakayari tan biskeg na kipapasen to ed panggawa toy pankaabigan na saray totoo to, tan makaliliket irad panooley tod sikara. 5Binmaleg so kagalangan to nen adakep toy daungan na Jope tan alokasan toy dalan a mamaarap ed saray isla na Grecia. 6Ag to labat pinaawang so dalin a nasasakopan na bansa to tan pinasilong tod pakayari to so intiron bansa, 7no ag ingen abawi to niy amayamay a Judion narel ed bakal tan adakep to so Geser, Bet-sur, tan tirinsirad Jerusalem. Nilinisan to onung ed ganggan so tirinsirad Jerusalem, tan anggapoy sinmumlang ed sikato.
8Dinalusan a mareen na saray Judio so dalin da; nambubungay tanaman ed kaalogan da tan nambubunga ray kakiewan da. 9Ipanpanta na saray tobun-balo iray marakep a kawes dan sondalo, tan saray mamasiken et kiyorung-yorung irad saray plasa na siudad tan tongtongtongen da ray matalonggaring ya agawad imbeneg a panaon. 10Iniitdan nen Simon na tagano iray siudad tan saray armas a pangyagel dad sikaran dili. Nibantug ed amin a pasen. 11Impanari toy kareenan ed siudad, tan manlepwas so liket na bansay Israel. 12Balang sakey a too et mareen so panagbilay to ya anggapoy anigensigen ed sikato diad impangasikaso tod saray kaubasan to tan saray kakiewan ton igos. 13Diad saraman a panaon, atalo la ray atilak ed dalin ya onlaban ed saray Judio. 14Tinulongan nen Simon iray totoon mairap so bilay tan, diad panangiwanwan na Ganggan nen Moises, pinaandi ton amin iray totoon maoges tan ag mangingalngalep ed ganggan. 15Pinano to na mararakep a kagawaan so Timplo tan amayamay so inaarum ton ikakana ed panangigalang ed Dios.
16Sinmabiy baleg ya ermen ed Roma tan Esparta nen nipasabid man so balita ya inatey si Jonatan. 17Balet nen nadngelan na saray taga Esparta a si Simon et sinalatan ton Pangulon Pari si agi to tan sikatoy manooley ed bansa tan saray baley to, 18intatak dad saray tapyak a gansa so impamasimbalo na impikaaro rad agagi ton Judas tan Jonatan, insan da ra impawit ed sikato. 19Nibasa ra ed tipon da ray totoo ed Jerusalem. 20Say onggendan et say kopia na sulat ya impawit na saray taga Esparta:
Saray totood Esparta tan saray pangulo so nanlapwan na sayan sulat a para si Simon a Pangulon Pari, saray pangulo tan saray papari da ray Judio, tan amin ya agagi min Judio. Awat yo pay maliket a pabano mi. 21Imbagad sikami na saray totoon imbaki yo so ontan lan panamagalang dad sikayo tan say inkabantug yo. Say imbisita ra et sengegan na liket mi, 22tan nikorit ed saray panagsulatan na bansa. Saray onggendan so nikorit: Si Numenio a lakin anak nen Antioco tan si Antipater a lakin anak nen Jason, a gagalangen iran angilaman na saray Judio, so pinmarontal ed sikami ya amasimbalo na paknaan na pikakaaro ra. 23Maliket ya inawat na tipon na totoo ira yan lalaki tan nagnap da ran pinagalangan. Maliket met iran angikorit na saray imbalita ra diad saray panagsulatan na bansa, pian saray taga Esparta et wala so pakabasaan da. Agawa so sakey a kopia na sayan kasulatan para si Simon a Pangulon Pari.
24Ag abayag, si Simon imbaki tod Roma si Numenio a walay awit ton rigalon balbaleg a balituk a samper tan mambelat na kapalduay tonilada. Niiter ya a pamaelet na pigagampi na saray Judio ed saray taga Roma.
25Nen nadngelan na saray Israelita so nipaakar ed saya, tinepet dad sikaran dili, Panoy pangipanengneng tayoy pisasalamat tayod Simon tan saray anak ton lalaki? 26Sikato, saray agagi ton lalaki, tan amin a kabyangan na pamilya nen ama to et mabiskeg iran tori na bansa tayo. Binabakal tan pinapagit da ray kalaban tayo tan impagmaliw dan walay kawayangan so bansa tayo.
Kanyan inkorit da ya ed gansan tapyak tan inlira da rad saray lusek diad Palandey na Sion. 27Saya so inkorit da:
Diad kumalabinwalon agew na bulan na Elul diad taon 172,#14:27 TAON 172: Kapara to yay 140 K.C. salanti diad kumatlon taon na impanoley nen Simon a Pangulon Pari, 28diad baleg a tipon da ray papari, totoo, saray opisyal, tan saray pangulo na bansa, sarayay onggendan a katwaan et nipakabat ed sikami: 29Kapag tinmerak so bakal ed bansa, si Simon a lakin anak nen Matatias, sakey a pari a kabyangay pamilya na Joarib, tan saray agagi ton lalaki et mabetbet ya imposta ray bilay da sumpad saray kalaban tayo diad pangyagel dad bansa tayo, say Timplo tayo, tan say Ganggan tayo. Initdan da na baleg a kagalangan so bansa tayo. 30Impankakasakey nen Jonatan iray totoo tayo tan nagmaliw a Pangulon Pari kasakbayan na impatey to. 31Nankokomplut iray kalaban na Judio a looban day bansa tan dotakan da, onung ed ganggan, so Timplo. 32Insan nagmaliw a pangulo si Simon tan akibakal a para bansa to. Ginastos toy amayamay a kuarta to diad impangiter to na armas tan suildo na saray sondalo na bansa to. 33Niliber to na padir so Judea, tan nagkalalo lad Bet-sur diad ketegan a diman so akaisinupan nen saman na saray armas da ray kalaban. Angipasen diman na saray sondalo. 34Pinadir to so daungay bapor na Jope tan say siudad na Geser diad ketegan na Asdod a nanayaman nen saman na saray kalaban a sondalo. Impanayam to rad may Judio tan initdan to ray totood binaley-baley na amin a nakaukolan da.#14:34 na amin a nakaukolan da; odino na nakaukolan, pian makapanapiger ira. 35Nen anengneng na saray totoo so panangaro nen Simon ed bansa to tan say ontan lan pilalek ton naitdan na kagalangan so bansa, impagmaliw dan pangulo ra tan Pangulon Pari ra. Ginawa ra ya, makasengeg ed amin a ginagawa to lapud inkatoor to tan lapud impanari toy katonungan ed bansa tan ginawa toy anggaay nayarian to a mangiter na kagalangan ed bansa to.
36Lapud panangipangulo to, apagit ed dalin iray Hintil. Saray kalaban a sondalo et apasoot iran pinmaway ed nibaybay na Timplo a dimay amaalageyan da na tirinsira, tan dimay pinapawayan na saray sondalo a mandotak onung ed ganggan ed masanton Timplo. 37Impanayam nen Simon iray Judio ed tirinsira, pinabiskeg to, pian niarawid kaatapan so bansa tan say siudad na Jerusalem; pinaatagey to met iray padir na siudad. 38Lapud saya, si Ari Demetrio pinaletan toy kipapasen nen Simon a Pangulon Pari, 39initdan toy ngaran a Kaaro na Ari, tan pinagalangan to na mapalalo. 40Ginawa ya nen Demetrio, lapud nadngelan ton saray taga Roma et tatawagen da na kakaaro, kagampi, tan agagi iray Judio tan nagnap a panamagalang so impangawat dad saramay imbaki nen Simon.
41Lapud saya,#14:41 Lapud saya; diad pigaran manuskrito Tan diad onya. saray Judio tan saray papari ra et maliket iran si Simon tan saray kabyangay boleg to iray pangulo ra tan Pangulon Papari ra ya anggad isabi lay sakey a tuan propita. 42Si Simon so manoley ed bansa ra, sikatoy makaoley ed Timplo, tan sikatoy pangulo da ray sondalo. Sikatoy makaoley ed abasto na saray sondalo, saray tirinsira, tan saray kimey na karaklan. 43Nepeg ya onuren na saray totoo diad amin a bengatla. Amin a kontratay gobirno et nepeg a nagawad ngaran to. Walay kanepegan ton mangisolung na kawes na ari, pati say balituk a kibilya na takeb.
44Anggan siopa, pari man odino aliwan pari, et anggapoy kanepegan to a mamaandi na sarayan nisulat dia, mangoman odino manalat na dinanman a ganggan nen Simon, manipon na saray totoo inerman ed bansa ya anggapo yan abuloy, odino mangisolung na kawes na ari a pati balituk a kibilya na takeb. 45Nepeg a dusaen so siopaman ya onsumlang odino ag mangingalngalep ed sarayan totontonen.
46Saray katoowan et nankakasakey iran angabubon na pangiter ed kinen Simon na kanepegan a manggaway labay to onung na sarayan totontonen. 47Inmabubon si Simon tan inmabuloy a sikatoy sankatageyan a pangulo: Pangulon Pari, pangulo na saray sondalo, tan gobirnador na saray Judio tan saray papari.
48Apampapaknaan a sarayan bengatlan nibawag et nepeg a nitatak ira ed saray gansan tapyak tan ilira ra ed mapalaway a pasen diad dalin a kawalaay Timplo 49tan saray kopia et iyan ed panagsinupan na kayamanan ed Timplo, a diman nayarin nengnengen ira nen Simon tan saray anak ton lalaki.
ទើបបានជ្រើសរើសហើយ៖
Say Ononan Libro na SARAY MACABEO 14: PnPV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Philippine Bible Society New Testament © 1977, Bible © 1983