Say Ononan Libro na SARAY MACABEO 1
1
Si Alejandro a Matalonggaring
1Ginmapo ra yan agawgawa nen si Alejandro a Matalonggaring, say lakin anak nen Felipe a taga Macedonia, et nampikal ed Macedonia tan dinmogpa ed kinen Dario ya ari na Persia tan Madian. Pinaawang nen Alejandro so Impirio na Grecia nen tinalo toy Dario tan sinamsam toy trono to. 2Amayamay so akibakalan to, dinakep to ray amayamay a siudad ya aliber na padir, tan pinatey to ray arari ed saray pasen a sinakop to. 3Diad isosolung tod amin a sokung na mundo, sinasamsaman to ray amayamay a bansa; nen adakep toy intiron mundo, nagmaliw a mapaatagey tan mapasirayew. 4Diad impangiletneg to na mabiskeg ya olup na sondalo, nipasilong tod pakayari to so intiron bansa tan saray manoley da, tan pinasoot to ran mambayar na buis ed sikato.
5-7Nen kumalabinduay taon na panooley ton impirador, nansakit tan alikas ton ngalngali la ompatey. Impatawag to ray kaogawan ton pangulo na saray sondalo to, inapag toy impirio, tan initdan toy balang sakey ed sikara na betang to. 8Kayari na impatey to, saramay pangulo so nanoley, 9tan kapag sakey ed sikara et impakoronaan ya ari na dilin dalin to. Saray kabyangan na sarayan arari so nanoley na andokey a panaon tan baleg a kairapan so inter dad sankamundoan.
Si Antioco Epifanes tan saray Judion Angikaindan na Inka-Judio ra
(2 Mac. 4:7-17)
10Say maoges a manoley a si Antioco Epifanes, a lakin anak nen Ari Antioco a Kumatlo na Siria, et kabyangan na boleg na sakey ed saray pangulo na sondalo nen Alejandro. Si Antioco Epifanes et sakey ed saray niakar a priso ed Roma kasakbayan a nagmaliw ya ari na Siria nen taon 137.#1:10 TAON 137: Bibilangen iray pitsa ed sayan libro manlapud inggapo na Nanarian na Siria nen taon 312 B.C. Say taon a 137 kapara toy 175 K.C.
11Diad saman a panaon linmetaw ed dalin na Israel so sakey a grupo na saray Judion traidor ya ag da italtalek so Ganggan tan maoges so impapatnag dad amayamay a totoo tayo. Inkuanda, Mikaaro tayod saray Hintil, ta golo labat so bunga na ag tayo pililimug ed sikara. 12Agustoan na amayamay a totoo so sayan kanunotan, 13tan diad mapalalon pampilalek dan nagawa ya, linma rad ari tan akerew da so abuloy a mangalig ed saray kaogaliyan da ray Hintil. 14Angipaalagey irad Jerusalem na baleg a panaggalawan, a singa saray walad saray siudad na Grecia. 15Nampapaopira ra, pian niamut day inkasegat da, inkaindan day masanton sipanan, ginapwan day milimug ed#1:15 ginapwan day milimug ed; odino mangasawad. saray Hintil, tan nanggagawa ray nandoroma nin arum a kaogsan.
Dinogpaan nen Antioco so Egipto
16Nen malet lay inliletneg na panaari nen Antioco, ginetma ton dakepen so Egipto tan oleyan to man a bansa, pati say Siria. 17Dinogpaan toy Egipto na baleg ya olup na saray bapor tan saray makapanyarin sondalo a pati saray karwahi, saray ilipanti, tan saray akakabayon sondalo. 18Nen dinmogpa si Antioco, batik si Ari Tolomeo na Egipto, tan amayamay so inaatey a sondalo to. 19Adakep nen Antioco iray siudad na Egipto ya aliber na padir tan sinasamsaman to man ya intiron dalin.
Pinairap nen Antioco iray Judio
20Nen taon 143,#1:20 TAON 143: Kapara to yay 169 K.C. kayariy impakadakep na Egipto, si Antioco sinmulong ya amaarap ed Israel tan diad siudad na Jerusalem a kaiba to ray amayamay a sondalo. 21Diad inkalangas to, nilooban toy Timplo tan inaala toy balituk ya altar, saray panangipatoonan na lamparaan a pati saray kagawaan to, 22say lamisaan a panagtapewan na saray tinapay a nibagat ed Katawan, saray kupa tan saray yaung, saray balituk a pananginay ngalab, saray kurtina, tan saray korona. Inokwap ton amin iray balituk a walad arap na Timplo 23tan imbatik to ray pilak tan balituk tan amin a bengatlan mabmabli, pati amin a kayamanan a nalmo ton akasinup diman. 24Insan to ra inawit ya amin ed dilin bansa to. Pinapatey to met iray amayamay a totoo, insan to ni ipanpanta yan ginawa to. 25Walay baleg ya ermen ed inerman a pasen ed dalin na Israel.
26Mandageyem lapud ermen iray manoley tan saray pangulo.
Kinmapoy iray tobun-balon lalaki tan bibii.
Kinmupas so ganggana da ray bibiin anak tayo.
27Amin a nubio nankanta na kantan para tolur,
tan amin a nubia manyodyorung a maermen ed kuarto to.
28Abalkut na kababaingan iray totoo tayo,
tan yenmegyeg so dalin tayo lapud sikara.
29Kalabas na duay taon si Antioco angibaki na amayamay a sondalon nanlapud Misia,#1:29 Say sankanayarian a tiksto amayamay a sondalon nanlapud Misia; diad tikston Grigo sakey a sumisingil na buis a kaiba to ray amayamay a sondalo. ta dogpaan da ray baley ed Judea. Nen akaloob ed Jerusalem iray sondalo, 30akisalitad saray totoo so pangulo ra. Imbaga ton kareenan so makasengeg na inyakar dad man, balet pinalikdo to ra. Biglan dinogpaan to na pinasya so siudad, tan amayamay a totooy pinapatey to. 31Sinasamsaman to so siudad, pinoolan to, tan inggegeba to ray paalagey tan saray padit. 32Si Antioco tan amin da ray sondalo et inaala dan dinakep iray bibii tan saray ogogaw tan ineerel da ray ayayep.
33Insan si Antioco tan saray sondalo to et angipaalagey ira na atatagey a padir tan saray mabibiskeg a tori diad nibaybay na Timplo, tan impagmaliw dan sakey a tirinsira. 34Angyakar ira na olup na saray traidor a Judio tan impasen da rad man. 35Angyakar met ira na saray armas tan saray abasto tan insinup dad tirinsira iray amin ya asamsam dad Jerusalem. Nagmaliw a makapataktakot yan tirinsira ed siudad.
36Say tirinsira et tatakotan nen saman na Timplo,
lawas sakey a maoges so iiter tod Israel.
37Pinapatey ed kaliber-liber na altar iray totoon anggapoy kasalanan;
dinotakan na saray managpatey na totoo so Masanton Pasen.
38Tinmaynan ed takot iray totood Jerusalem,
tan nagmaliw ya asakop na saray sangkaili so siudad.
Sangkailid dilin totoo to so Jerusalem,
saray totoo ton apasoot a kaindanan day siudad.
39Say Timplo to et anggapoy kargan singa kalawakan;
nagmaliw iran agew na panagermen iray pista to,
nagmaliw a kababaingan so liket na Agew na Panagpainawa.
Nagmaliw a balbalawen tan elek-elekan so kagalangan to.
40Nagmaliw a singa kabaleg na kagalangan to nen saman so kababaingan to,
tan nagmaliw a makapasinagem ya ermen so panagpaatagey to.
41-43Angipaakseb na ganggan si Antioco ya amin a bansan nasasakopan na impirio to et nepeg ya ikaindan day dilin ogali ra tan magmaliw iran sakey a totoo. Tinmoluk ya amin iray Hintil tan saray amayamay ya Israelita ed sayan ganggan. Akinonung la rad paganon rilihion, nambagat la rad saray talintaoy diriyos, tan ag da la ngingilininan so Agew na Panagpainawa.
44Say ari angibaki met na saray totoon angipaamta ed Jerusalem tan amin da ray baley ed Judea na sakey a ganggan a saray totoo et tombuken da ray kaogaliyan na saray sangkailid bansa. 45Ingganggan tod sikaran ag ira mangisasaklang na saray bagat a popoolan, saray bagat a trigo, odino saray bagat ya alak ed Timplo, tan ingganggan to met ya ag da ngingilinay Agew na Panagpainawa tan saray agew na pista. 46Niganggan ni ingen ed sikara a dotakan day Timplo tan saray bengatlan masanto a wala rad dalem to.#1:46 saray bengatlan masanto a wala rad dalem to; odino saray papari. 47Niganggan ed sikara a mangipaalagey iray paganon altar, saray timplo, tan saray santuario tan mangibagat irad man na saray baboy tan saray arum a marotak ya ayayep onung ed ganggan. 48Nisebel ed sikara a segaten da ray lalakin anak da tan kinaukolan a gawaen day anggaay nayarian dan dotakan so sikaran dili onung ed ganggan, 49pian nalingwanan day Ganggan ya inter na Katawan diad panamegley nen Moises tan nasumlang da ray amin a bilin. 50Patey so dusa na ag itoluk ed sayan ganggan na ari.
51Say ari ag to labat impaakseb yan ganggan ed intiron impirio to, no ag ingen anoro met na saray opisyal a mambantay ed saray totoo. Ingganggan to met so balang baley ed Judea a mangisaklang na saray paganon bagat. 52Amayamay iray Judion sipaparaan a mangilingwan ed Ganggan tan mangonur ed sarayan opisyal. Dinotakan day dalin lapud kaogsan da, 53tan say kagagawa ra so makasengeg na inyaamut na amin da ray tuan Israelita diad iner man a pasen a naamutan da.
54Diad kumalabinliman agew na bulan na Kislev nen taon 145,#1:54 TAON 145: Kapara to yay 167 K.C. si Ari Antioco inlira to so Say Makapataktakot a Managderal diad tapew na altar na Timplo, tan nipaalagey iray paganon altar diad saray baley ed intiron Judea. 55Nisaklang iray paganon bagat ed arap na saray abung tan diad saray dalan. 56Amin da ray libro na Ganggan a nalmo et pinipilat tan pinopoolan, 57tan pinatey diad panangiganggan na ari so siopaman ya akalmoan na kopia na masanton libro odino angonur na Ganggan. 58Binulan a sarayan maoges a totoo et impakana ray pakayari ran sumpad saray Israelitan narel ed saray baley.
59Diad kumaduamplo tan liman agew na bulan, sarayan maoges a totoo et angisaklang ira na saray bagat ed tapew na paganon altar a nipaalagey ed tapew na altar diad dalem na Timplo. 60Saray inan inabuloyan dan asegat iray anak da et pinapatey ira, onung ed ganggan na ari. 61Insasabit ed beklew da iray anak dan mansususo, tan pinapatey met iray pamilya ra tan saray nansesegat ed sikara. 62Balet amayamay iray Israelitan mapeget ya anumlang ed ganggan na ari tan ag da nilabay so angan na kakanen a marotak onung ed ganggan. 63Kinaliktan da ni so ompatey nen say deralen da so masanton sipanan tan mangan ira na marotak a kakanen onung ed gangganamayamay a tuay inatey ed sikara. 64Lapud pasnuk na Dios, mapalaloy impamapairap tod Israel.
ទើបបានជ្រើសរើសហើយ៖
Say Ononan Libro na SARAY MACABEO 1: PnPV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Philippine Bible Society New Testament © 1977, Bible © 1983