Maa 6
6
Nazalɛtideɔ Yesu naaikɛsai
(Mat 13.53-58; Luk 4.16-30)
1Yesu bɔ̀ we à gɛ̀ gu pɔ à nɛblèu. Aà iwaɔ gɛ̀aanɔ. 2Kɛ́ kãmabogɔɔ kà, ɔ̃ àlɛ yãdanɛ́ luasisikpɛu. Gbɛ̃́ pɔ aa aà yãmàɔ bilikɛ̀ dasi aa mɛ̀: Makĩi gbɛ̃́pi yãpiɔ sɛ̀ui? Ɔ̃nɔ kpele a è, ɔ̃ àlɛ dabudabu bee taaɔ kɛi? 3Gbɛ̃́piá li'ãna nolo? Maliama nɛ nolo? Zaki ń Yosɛfuo ń Yudao ń Simɔo vĩin weo lò? Aà dãeɔ kuwanɔ kɛo le? Ɔ̃ bee tò aai aà naaikɛo. 4Ɔ̃ Yesu ònɛ́: Ãnabi líɔ bɛɛɛsaio, mɛ́ i kɛ aà bɛ wɛ̃lɛu ń aà daɛɔ ń aà uadeɔ kĩio baasio. 5Yesu i e dabudabue kɛ̀ weo, sema gyãe pɔ à ɔnàmá à ń gbãgbãeɔ baasio. 6Lá aai aà naaikɛo, an yã bɔ̀ aà saɛ maamaaɛ.
Yesu a iwa gbɛ̃ɔn kuɛplaɔ zĩa gbɛ̃ɔn plapla
(Mat 10.5-15; Luk 9.1-6)
Ɔ̃ à gɛ̀ wɛ̃lɛ ń wɛ̃lɛo, àlɛ yãdadanɛ́. 7Ɔ̃ à a gbɛ̃ɔn kuɛplaɔ sìsi à ń zĩ́ gbɛ̃ɔn plapla, à tãagoamá iko kpàmá. 8A ònɛ́ aasu pɔe sɛ aa gɛ́òo, kũsũa ge babalabɔɔ ge ɔsɔ̃gbɛna, sema gopana. 9À mɛ̀ aa kyalekpa, ãma aasu ulada mɛn plao. 10A ònɛ́ lɔ: Gu pɔ a pilàu, àɔ ku we e à gɛ bɔò wɛ̃lɛpiu. 11Gu pɔ wi gbãakpauázio, mɛ́ wi á yãmao, tó álɛ tá, à kɔɔlɛmá an toa ń Luao seela ũ. 12Ɔ̃ aa dà zɛ́u. Aa nɔsɛlilɛa kpawakɛ̀ gbɛ̃́ɔnɛ, 13aa tãagònɛ́ dasi, aa nisimàma gyãeɔwa aa ń gbãgbã̀ dasi.
Zãa Da'ilɛna gaa
(Mat 14.1-12; Luk 9.7-9)
14Ki Helodi yãpiɔ mà, asa Yesu tɔ́ lìguaɛ. Gbɛ̃eɔ mɛ̀ Zãa Da'ilɛna mɛ́ bɔ̀ gau. Bee yãi à gbãa'è, àlɛ dabudabukɛ. 15Gbɛ̃eɔ lɛ́ mɛ Ɛliaɛ, gbɛ̃eɔ lɛ́ mɛ ãnabiɛ lan ãnabi yãaewa. 16Kɛ́ Helodi mà à mɛ̀: Zãa pɔ ma aà mizɔ̃̀ mɛ́ vù.
17-18Helodi doũpi mɛ́ a dãuna Filipi nɔ Helodia sìwà a sɛ̀ yãa. Kɛ́ Zãa ìɔ oɛ̀ aà dãuna nɔ siawà maao,#Lev 20.21 ɔ̃ Helodipi tò wà Zãa kũ̀ wà mɔkàwà, wà aà dà kpɛ́u Helodia yãi. 19Helodia sɔ̃ a Zãa kpɛ̃nɛ kũa, a ye à aà dɛ, ãma i zɛ'eo, 20asa Helodi dɔ̃̀ kɛ́ Zãaá Lua gbɛ̃́ zalalaɛ, ɔ̃ ìɔ vĩakɛɛ̀, ìli to wà ĩadawào. Tó à gɛ̀ aà yãmai, laasoo ì gɛ̃aaguɛ. Ń beeo ìɔ ye faaiboaaanɔi.
21Helodia zɛ'è Helodi iwɛ̃ dikpɛgɔɔzĩ. Helodi gbãadeɔ ń sosa gbɛ̃zɔ̃ɔɔ ń Galile gbɛ̃́ gbiaɔ kã̀aa pɔnablɛwa. 22Ɔ̃ Helodia nɛnɔɛ gɛ̃̀ ɔ̃wã̀. À kɛ̀ Helodiɛ na ń a nibɔɔ pii, ɔ̃ kiapi ò nɛpiɛ: Pɔ pɔ ń yei ǹ a wabikɛa, má n gba. 23Ɔ̃ à ɛ̀a òɛ̀: Ń ma iao pɔ pɔ ń a wabikɛ̀a pii, má n gbaɛ, baa ma busu guoɛ. 24Ɔ̃ nɛpi bɔ̀ gɛ̀ à a da là à mɛ̀: Bɔ́ má a wabikɛwài? Ɔ̃ aà da òɛ̀, Zãa Da'ilɛna miɛ. 25Wegɔ̃ɔ à ɛ̀a sù kpakpa, a ò kiaɛ: Zãa Da'ilɛna mi má ye ǹ ma gba pɛlɛntiu la tiatia.
26Ɔ̃ kia pɔ yà dúuduu, i fɔ̃ gì lɔo lɛ́ pɔ a gbɛ̃̀ nibɔɔ wáa yãi. 27Ɔ̃ kiapi a dɔaie zĩ̀ gɔ̃̀ɔ, a òɛ̀ aà gɛ mɔ́ ń aà mio. Ɔ̃ à gɛ̀ à aà mizɔ̃̀ kpɛ́u, 28a dà pɛlɛntiu, à mɔ̀ a kpà nɛpiwa, ɔ̃ à gɛ̀ a kpà a dawa. 29Kɛ́ Zãa iwaɔ yãpi mà, ɔ̃ aa mɔ̀, aa aà gɛ sɛ̀ aa vĩ̀.
Blɛkpaa bilawa sɛ̃ia
(Mat 14.13-21; Luk 9.10-17; Zãa 6.1-15)
30Zĩnapiɔ sù Yesu kĩi, ɔ̃ aa yã pɔ aa kɛ̀ɔ ń yã pɔ aa dànɛ́ɔ òɛ̀ pii. 31Wàlɛ mɔ́, wàlɛ tá, ɔ̃ Yesu ń a gbɛ̃́ɔ aai zɛ'e baa aa pɔblèo dasi yãi. Ɔ̃ a ònɛ́: À mɔ wà gɛ́ gusaɛna watɛ̃ɛ, wí kãmabo yɔɔ. 32Ɔ̃ aa gɛ̃̀ go'ilɛnau aa dà zɛ́u, aalɛ gɛ́ gusaɛna ntɛ̃ɛ. 33Kɛ́ wà ń gɛa è, wà ń dɔ̃́, ɔ̃ bɔa wɛ̃lɛ pii guu wà baalɛ̀ wà dɔ̀aanɛ́ we kɛsɛ. 34Kɛ́ Yesu bɔ̀ gó guu, à bila è, ɔ̃ aa kɛ̀ɛ̀ wɛ̃naũ, asa aa dɛ lan sã pɔ aa dãna vĩoɔwaɛ.#Nao 27.17; 1 Kia 22.17 Ɔ̃ àlɛ yãdadanɛ́ maamaa.
35Kɛ́ ĩatɛ̃ bùsa, ɔ̃ aà iwaɔ sɔ̃̀aazi aa mɛ̀: Guɛá sɛ̃gbãɛ mɛ́ ĩatɛ̃ i gɔ̃ bila lɔo. 36Gbɛ̃́ɔ gbaɛ aa ta bualoũɔ ń zɔ̃ɛwia pɔ ku kãikãi laɔu, aai pɔ wɛɛlɛ aa lu aa ble. 37Ɔ̃ Yesu a zãsìmá à mɛ̀: À pɔ kpamá aa ble. Ɔ̃ aa òɛ̀: Ń ye wà gɛ wà pɛ̃ɛ lu ãnusu ɔwatɛ̃ ɔaa do, wí mɔ́ wà kpamá aa so yã? 38Ɔ̃ Yesu ń lá à mɛ̀: Pɛ̃ɛ mɛn ũma á vĩi? À gɛ gwa. Kɛ́ aa kà, aa mɛ̀: Pɛ̃ɛ ku mɛn sɔo ń kpɔo mɛn pla.
39Ɔ̃ a ònɛ́: À to aa zɔ̃lɛzɔ̃lɛ sɛ̃bɔlɔwa booloboolo. 40Ɔ̃ aa zɔ̃̀lɛzɔ̃lɛ gãgã, booloeɔ gbɛ̃ɔn basɔo, booloeɔ gbɛ̃ɔn blakwi. 41Ɔ̃ Yesu pɛ̃ɛ mɛn sɔo ń kpɔ mɛn plapiɔ sɛ̀, à wɛsɛ̀ musu à baaadàu. Ɔ̃ à pɛ̃ɛpi ɛ̀'ɛ a kpà a iwaɔwa, aa bìilɛnɛ́. Ɔ̃ à kpɔ mɛn plapiɔ kpaalɛ̀nɛ́ mpii. 42Ampii aa pɔblè kã̀. 43Ɔ̃ wà pɛ̃ɛ miɔnaɔ ń kpɔ kĩni pɔ gɔ̃̀ɔ sɛ̀lɛ gbi kuɛpla pai.#2 Kia 4.42-44 44Gɔ̃ɛ pɔ aa pɔblèɔ gbɛ̃ɔn ɔaasɔsɔo lɛɛ sɔoɛ (5 000).
Yesu taa'oa isidaa
(Mat 14.22-36; Zãa 6.16-21)
45Ɔ̃ Yesu nàɛ a iwaɔwa gɔ̃̀ɔ aa gɛ̃ gó guu aaɔ dɔaaɛ Bɛsaida isida baale e àɔ bila gbaɛ. 46Kɛ́ à lɛzàmá a làa, ɔ̃ à dɛ̀dɛ sĩ̀sĩwa, à gɛ̀ wabikɛi. 47Oosi lɛ́ kɛ mɛ́ go'ilɛna ku isidaa, ɔ̃ Yesu ku sĩsĩa ado. 48Ɔ̃ a è gofĩa lɛ́ ĩadamá, kɛ́ ĩan gbãa lɛ́ ginɛ́ yãi. Gufɛ̃nɛ ɔ̃ à gɛ̀ ń kĩi, àlɛ taa'o ía, ɔ̃ a kɛ̀ lá álɛ gɛ̃máwa. 49Kɛ́ aa aà è, àlɛ taa'o ía, aalɛ e gyaadeɛ, ɔ̃ aa wiilɛ̀. 50Kɛ́ aa aà è mpii, gili gɛ̃̀ńgu. Ɔ̃ Yesu ònɛ́ gɔ̃̀ɔ à mɛ̀: À sɔ̃dilɛ, mamɛ. Ásu to vĩa á kṹo. 51Kɛ́ à gɛ̃̀ gó guu, ɔ̃ ĩana làa, ɔ̃ yãpi ń kṹ gbãa, 52asa an wɛ́ i kɛ̃ pɛ̃ɛ yãmusuo, kɛ́ aa nɔ̀sɛ vĩo yãi.
53Kɛ́ aa bùa baa aa kà Gɛnɛzalɛti, ɔ̃ aa godɔ̀ we. 54Kɛ́ aa bɔ̀lɛ gó guu, wà Yesu dɔ̃̀ gɔ̃̀ɔ, 55ɔ̃ wà baalɛ̀ wà gɛ̀ wà busupi kɛ̀ɛlɛ, wà gyãeɔ sɛ̀lɛ ń makɛlɛo, gu pɔ wa mà a kuu pii wìɔ mɔòɛ̀. 56Gua pɔ à gɛ̀u pii, zɔ̃ɛwiaɔ ge mɛɛwiaɔ ge bualoũɔ, wìɔ mɔɛ̀ ń gyãeɔɛ, wìɔ ń kalɛ gãaɛ, ɔ̃ wì wabikɛwà aà to aa ɔkã baa aà ula lɛ́wa. Ɔ̃ gbɛ̃́ pɔ ɔkã̀wàɔ ì gbãgbã pii.
ទើបបានជ្រើសរើសហើយ៖
Maa 6: Boo2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Boko Bible © SIM International, 2024.