Mat 26
26
Lɛkpaaĩa Yesuzi
(Maa 14.1-2; Luk 22.1-2; Zãa 11.45-53)
1Kɛ́ Yesu yãpiɔ ò pii a làa, ɔ̃ a ò a iwaɔnɛ: 2Á dɔ̃ kɛ́ gɔɔpla gbɛa wa Gɛ̃amusu#Bɔa 12.1-11 dikpɛkɛ, wi Gbɛ̃nazĩn Nɛ kpamá wà aà pá líwa.
3Bee gbɛa sa'onkiaɔ ń Yuda gbɛ̃zɔ̃ɔɔ kɔ̃kã̀aa sa'onkia pɔ wì mɛ Kaaifa bɛ. 4Aa lɛkpàaĩ lá aa kɛ aa Yesu kṹ kpãi aa dɛ, ɔ̃ 5aa mɛ̀: Wásu kɛ dikpɛzĩo, kɛ́ bila su fɛlɛ ń zɔaoo yãi.
Tulalekaa Yesu miwa
(Maa 14.3-9; Zãa 12.1-8)
6-7Kɛ́ Yesu ku Bɛtani, àlɛ pɔble Simɔ kusude bɛ, ɔ̃ nɔɛe sɔ̃̀aazi, a tulale ɔde loona kũa. Ɔ̃ a kà Yesu miwa. 8Kɛ́ aà iwaɔ è, ɔ̃ an pɔ fɛ̀lɛ aa mɛ̀: Bɔ́n pɔ pãkɛa bee ũi? 9Dɔ̃ yãa wà tulalepi yìa ń ɔ zɔ̃ɔo, wi a ɔ̃a kpá taasideɔwa. 10Yesu dɔ̃̀má, ɔ̃ a ònɛ́: Bɔyãi álɛ ĩadai nɔɛpiwai? Yã pɔ a kɛ̀mɛɛ maaɛ. 11Taasideɔ ìɔ kuánɔ gɔɔpiiɛ,#Iko 15.11 ãma máɔ kuánɔ gɔɔpiio. 12Kɛ́ à tulalepi kà ma mɛwa, a kɛ̀ ma gɛkpɛlaa yãiɛ. 13Sĩana malɛ oɛ́: Gu pɔ wàlɛ ma bao kpau dũniau pii, waɔ yã pɔ nɔɛpi kɛ̀ o aà dɔngu yãiɛ.
Yudasi Yesu kpaamá
(Maa 14.10-11; Luk 22.3-6)
14Bee gbɛa gbɛ̃ɔn kuɛplaɔ do pɔ wì mɛ Yudasi Isaliɔti gɛ̀ sa'onkiaɔ kĩi 15à mɛ̀: Tó ma Yesu kpàwá, bɔ́ á kpaai? Ɔ̃ aa ãnusu ɔwatɛ̃ baakwi#Bɔa 21.32 nào aa kpàwà. 16Za gɔɔ bee ɔ̃ àlɛ zɛwɛɛlɛ à aà kpamá.
Gɛ̃amusu blɛblea
(Maa 14.12-31; Luk 22.7-23; Zãa 13.21-38; 1 Kln 11.23-25)
17Kaaso dikpɛgɔɔ sɛ̃ia zĩ́ Yesu iwaɔ mɔ̀ aa aà là aa mɛ̀: Makĩi ń ye wà Gɛ̃amusu blɛ sɔukɛunɛi? 18A wèmá à mɛ̀: À gɛ́ wɛ̃lɛdau gbɛ̃e kĩi, í oɛ̀ Mɛtulu mɛ̀ a gɔɔ kà kãi. Aà bɛ á Gɛ̃amusu blɛ bleu ń a iwaɔ. 19Yesu iwaɔ kɛ̀ lá a dànɛ́wa, aa Gɛ̃amusu blɛble sɔukɛ̀. 20Kɛ́ oosi kɛ̀, Yesu zɔ̃̀lɛ taabũnui ń a gbɛ̃ɔn kuɛplapiɔ. 21Gɔɔ pɔ aalɛ pɔble à mɛ̀: Sĩana malɛ oɛ́, á gbɛ̃do a ma kpamá. 22An pɔ yà maamaa, an baade fɛ̀lɛ aalɛ aà la dodo: Asa mamɛo yo, Dii? 23Yesu wèmá à mɛ̀: Gbɛ̃́ pɔ wálɛ ɔkãaa ta doũ mɛ́ a ma kpamá.#Soũ 41.10 24Gbɛ̃nazĩn Nɛ a ãnuato lá wà a yã'ò taalauwa,#Soũ 22.1-19; Isa 53.1-12 ãma waiyoo gbɛ̃́ pɔ a aà kpamápi. A maa wà aà ì yãao. 25Ɔ̃ Yudasi pɔ a aà kpamápi mɛ̀: Asa mamɛo yo, Mɛtulu? Yesu òɛ̀: Ɔ̃mɛ dɔ n lɛ́u we.
26Gɔɔ pɔ aalɛ pɔble, Yesu kàa sɛ̀, à baaadàu, ɔ̃ a ɛ̀'ɛ a kpà a iwaɔwa à mɛ̀: À si à só. Kɛ́ beeá ma mɛɛ. 27Ɔ̃ à imibɔ sɛ̀ lɔ. À saaukpà, ɔ̃ a kpàmá à mɛ̀: À mi ápii. 28Kɛ́ bee sɔ̃, ma auɛ. A dɛ Lua bàa kua ń dasio au#Bɔa 24.8; Zel 31.31-34 pɔ a bɔlɛa an duunakɛ̃amá yãi ũɛ. 29Malɛ oɛ́, za gbã má vɛ̃ɛbɛ'i mi lɔo. E kpala pɔ ma Mae kpà gɛ bɔò gupuau, mí a dafu miánɔ. 30Kɛ́ aa lɛsì, ɔ̃ aa bɔ̀lɛ, aa gɛ̀ Kukpɛ sĩsĩpɔlɛu.
31Bee gbɛa Yesu ònɛ́: Ápii á ma to we gwãasĩnaa, asa a kɛ̃a wà mɛ̀, Lua a pɔdãna lɛ́, aà kpàsa pɔɔ i fãaa.#Zkl 13.7 32Ma vua gbɛa má dɔaaɛ́ Galile. 33Ɔ̃ Piɛɛ òɛ̀: Baa tó ma gbɛ̃́ɔ n to we mpii, má n to we bauo. 34Yesu òɛ̀: Sĩana malɛ onɛ, gwãasĩnaa e ko àɔ gɛ́ lɛzui, ńyɔ̃ lelekpamazi gɛ̃n aaɔ̃. 35Piɛɛ òɛ̀: Baa tó má su gannɔ, má lelekpanzi bauo. Ɔ̃ aà iwaɔ ò màa sɔ̃ mpii.
Yesu wabikɛa Gɛsɛmani
(Maa 14.32-42; Luk 22.39-46)
36Bee gbɛa Yesu ń a iwaɔ kà gu pɔ wì mɛ Gɛsɛmani, ɔ̃ a ònɛ́: À zɔ̃lɛ la, má gɛ́ wabikɛi le. 37À Piɛɛ ń Zebede nɛ gbɛ̃ɔn plaɔ sɛ̀ gɛ̀ńnɔ. Aà pɔ siakũ̀, tolobi zùaagu. 38Ɔ̃ a ònɛ́: Pɔsia ma kũ gbãa e ma ka gaa. À zɛ la, í itɛ̃kɛmanɔ. 39Ɔ̃ à gɛ̀ aɛ yɔɔ, à wùlɛ a gbɛɛu à wabikɛ̀ à mɛ̀: Baa, tó a zɛkɛ, to kɛɛonaɛ bee dɔmazi. Ãma i kɛ lá má yeiwa no, sema lá ń yeiwa.
40Ɔ̃ à ɛ̀a sù à a iwaɔ lè, aalɛ i'o. Ɔ̃ a ò Piɛɛɛ: Màa yã? I fɔ̃ itɛ̃kɛ̀manɔ baa yɔɔoa? 41À itɛ̃kɛ àɔ wabikɛ, kɛ́ ásu fu yɔ̃awao yãi. Á nisĩna yei, ãma á mɛ mɛ́ busɛ. 42Aà kɛ̃amá gɛ̃n plaade, à wabikɛ̀ à mɛ̀: Baa, tó kɛɛona í a dɔmazi a misaio, to n pɔeã kɛ. 43Kɛ́ à ɛ̀a sù à ń lé, a è aalɛ i'o lɔ, asa an wɛ́ gbiakũ̀ɛ. 44Ɔ̃ à ń tó we lɔ, à gɛ̀ wabikɛi a gɛ̃n aaɔ̃de, à yãdoũpi ò lɔ. 45Ɔ̃ à ɛ̀a sù a iwaɔwa a ònɛ́: Àlɛ i'o álɛ kãmabo e tia yã? À gwa! Gbɛ̃nazĩn Nɛ kpaa duunkɛnaɔwa gɔɔ kà. 46À fɛlɛ wà tá. Gbɛ̃́ pɔ lɛ́ ma kpamá lɛ́ mɔ́.
Yesu kũa
(Maa 14.43-50; Luk 22.47-53; Zãa 18.3-12)
47Gɔɔ pɔ àlɛ yãpi o, ɔ̃ aà iwa gbɛ̃ɔn kuɛplaɔ do Yudasi kà ń bila pɔ aa bɔ̀ sa'onkiaɔ ń Yuda gbɛ̃zɔ̃ɔɔ kĩiɔ. Aa fɛ̃ndaɔ kũkũa ń goɔ. 48Gbɛ̃kpamadepi sɔ̃ à seela ònɛ́ à mɛ̀: Gbɛ̃́ pɔ masu lɛpɛ̀wà, aapin we. À aà kṹ. 49Ɔ̃ à taa'ò Yesuwa gɔ̃̀ɔ à mɛ̀: Fɔ Mɛtulu. Ɔ̃ à lɛpɛ̀wà. 50Yesu òɛ̀: Ma gbɛ̃́, ǹ n kɛa kɛ! Ɔ̃ wà mɔ̀ wà ɔpɛ̀lɛ Yesuwa, wà aà kũ̀. 51Ɔ̃ Yesu iwaɔ do a fɛ̃nda wò, à sa'onkia zĩkɛna lɛ̀ò, à aà swã gò. 52Ɔ̃ Yesu òɛ̀: Ǹ n fɛ̃nda pɛ a gbɛu. Asa gbɛ̃́ pɔ zɛ̀ ń fɛ̃ndao, fɛ̃nda mɛ́ a aà dɛ. 53Tó má ye ma Mae malaika zĩgɔ̃ɔ gbaɛmɛɛ gɔ̃̀ɔ dɛ gãli kuɛplaɔla, ń dɔ̃ má fua mà a wabikɛwà yã? 54Tó má kɛ̀ màa sɔ̃, kpelewa yã pɔ wa kɛ̃̀ láu wà mɛ̀ a kɛ a kɛi? 55Ɔ̃ Yesu ò bilaɛ: Kpãi wɛliwɛn ma ũ, ɔ̃ a mɔ ma kũi ń fɛ̃ndaɔ ń goɔa? Gɔɔpii miɔ zɔ̃lɛ Lua ua màɔ yãdanɛ́, i ma kũo. 56Ãma yãpi kɛ̀ pii, kɛ́ yã pɔ ãnabiɔ ò e pa yãiɛ. Ɔ̃ aà iwaɔ aà tò we mpii, aa baasì.
Yuda gbãadeɔ yãkpalɛkɛa ń Yesuo
(Maa 14.53-65; Luk 22.54-55, 63-71; Zãa 18.12-13, 18.19-24)
57Gbɛ̃́ pɔ aa Yesu kũ̀ɔ gɛ̀aanɔ sa'onkia Kaaifa bɛ. Mɔizi ikoyãdanɛdeɔ ń gbɛ̃zɔ̃ɔɔ kãaaa we. 58Piɛɛ tɛ Yesu kpɛ kãaa e sa'onkiapi bɛ. À gɛ̃̀ ua à zɔ̃̀lɛ ń dɔaiɔ, kɛ́ à yãpi midɛa e.
59Sa'onkiaɔ ń Yuda gbãadeɔ pii lɛ́ yã wɛɛlɛ wà dɔ Yesuwa wà e wà aà dɛ. 60Baa kɛ́ wà mɔ̀ wà yãdɔ̀dɔwà dasi, i kɛo. Gbɛzã gbɛ̃ɔn plaeɔ mɔ̀ 61aa mɛ̀: Dee mɛ̀ á fɔ̃ luakpɛ wí, í ɛa dɔ gɔɔ aaɔ̃ɛ sɛ́! 62Ɔ̃ sa'onkia fɛ̀lɛ zɛ̀ a ò Yesuɛ: Yã pɔ wàlɛ dɔdɔmapi dɛa ni? Ńyɔ̃ yãe zãsioa? 63Kɛ́ Yesu nilɛ kpɛ̃́, ɔ̃ sa'onkiapi òɛ̀: Ma nanɛ Lua bɛ̃́ɛi, tó Lua Nɛ pɔ wì mɛ Mɛsin n ũ, owɛ̃ɛ. 64Yesu wèwà à mɛ̀: Ɔ̃mɛ dɔ n lɛ́u we. Mapi sɔ̃ malɛ oɛ́, za gbã á Gbɛ̃nazĩn Nɛ e zɔ̃lɛa Gbãapiide ɔplaai,#Soũ 110.1 mɛ́ á aà e, àlɛ mɔ́ lounaau.#Dan 7.13 65Ɔ̃ sa'onkiapi a pɔkasaɔ gà a kɛ̃̀ à mɛ̀: À dɔ́ɛ ń Luao! Wá bàa ũma n seeladeɔ lɔi? Á mà lá à dɔ́ɛ ń Luao wea? 66Á è kpelewai? Ɔ̃ aa wèwà aa mɛ̀: Aà tàae kà wà aà dɛɛ.#Lev 24.16 67Ɔ̃ wà lɛ'ikà aà oawa,#Isa 50.6 wà aà lɛ̀ ń ɔkũo. Gbɛ̃eɔ aà sãnkɛ̀kɛ 68aa mɛ̀: Mɛsi, ãnabikɛkɛ ǹ gbɛ̃́ pɔ n lɛ owɛ̃ɛ.
Piɛɛ lelekpaa Yesuzi
(Maa 14.66-72; Luk 22.56-62; Zãa 18.15-18, 18.25-27)
69Piɛɛ zɔ̃lɛa ua, ɔ̃ nɔɛ zĩkɛnae mɔ̀ a òɛ̀: Mpi sɔ̃ iɔ sãnu ń Galile gbɛ̃́ Yesupioɛ. 70Ɔ̃ à lelekpà gbɛ̃pii wáa à mɛ̀: Má dɔ̃ yã pɔ nlɛ oo. 71Kɛ́ à gɛ̃̀ gɔ̃u, nɔɛ pãle aà è, ɔ̃ a ò gbɛ̃́ pɔ ku weɔnɛ: Gbɛ̃́ɛ bee sãnu ń Yesu Nazalɛtioɛ. 72Piɛɛ ɛ̀a lelekpà lɔ à mɛ̀: Má sì ń Luao má gbɛ̃́pi dɔ̃o. 73Kɛ́ à kɛ̀ sàa yɔɔ, gbɛ̃́ pɔ zɛa weɔ sɔ̃̀ Piɛɛzi aa mɛ̀: Sĩanaɛ, an gbɛ̃don n ũ, asa wá dɔ̃̀ n yã'oawaɛ. 74Ɔ̃ à fɛ̀lɛ à azĩa kà à mɛ̀: Ń Luao má gbɛ̃́pi dɔ̃o. Wegɔ̃ɔ ɔ̃ ko lɛzù. 75Ɔ̃ yã pɔ Yesu ò dɔ̀aagu kɛ́ à mɛ̀, e ko àɔ lɛzu, a lelekpaazi gɛ̃n aaɔ̃. Ɔ̃ Piɛɛ bɔ̀ bàasi, à ɔɔlɔ̀, à kɛ̀ wɛ̃na.
ទើបបានជ្រើសរើសហើយ៖
Mat 26: Boo2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Boko Bible © SIM International, 2024.
