Mat 25
25
Wɛ̃ndia gbɛ̃ɔn kwiɔ
1Gɔɔ bee kpala pɔ Lua kpà aɔ dɛ lan wɛ̃ndia gbɛ̃ɔn kwi pɔ aa ń filiaɔ sɛ̀ bɔ̀ò, aalɛ gɛ́ dai nɔsɛnalɛwaɛ. 2An gbɛ̃ɔn sɔoɔá laaisaideɔnɛ. An gbɛ̃ɔn sɔoɔ sɔ̃ laaideɔnɛ. 3A laaisaideɔ ń filiaɔ sɛ̀ nisi kũsũa saiɛ, 4a laaideɔ sɔ̃, aa ń filiaɔ sɛ̀ ń nisi kũsũao. 5Nɔsɛna i mɔ kpaao, ɔ̃ i ń lɛ́ mpii, aalɛ i'o. 6Wɛɛdo wà wiilɛ̀ wà mɛ̀: Nɔsɛna lɛ́ mɔ́! À fɛlɛ à gɛ́ daiaalɛ. 7Ɔ̃ wɛ̃ndiapiɔ vù mpii, aa ń filiaɔ kɛ̀kɛ. 8Ɔ̃ a laaisaideɔ ò a laaideɔnɛ: À wá gba nisi yɔɔe, wá filiaɔ lɛ́ gaɛ. 9Ɔ̃ a laaidepiɔ wèmá aa mɛ̀: A mɔwá ń apiɔ piio. À gɛ́ á pɔ lui a yianaɔ kĩiaɔ! 10Kɛ́ aa gɛ̀ lui, ɔ̃ nɔsɛna kà. Gbɛ̃́ pɔ an sɔu màɔ gɛ̃̀aanɔ nɔsɛ guu, ɔ̃ wà gbatà. 11Gbɛzã ɔ̃ wɛ̃ndia kĩnipiɔ sù, aalɛ lɛzu: Dii, Dii! Zɛwɛ̃wɛ̃ɛ! 12Ɔ̃ a wèmá à mɛ̀: Sĩana malɛ oɛ́, má á dɔ̃o. 13Ayãmɛto, à itɛ̃kɛ, asa á a gɔɔ ge a zaa dɔ̃o.
Ɔdakɛa zĩkɛnaɔnɛ
(Luk 19.11-27)
14Kia pɔ Lua kpà dɛ lan gbɛ̃́ pɔ ye à fɛlɛ ń táo, ɔ̃ à a zĩkɛnaɔ sìsi à a aizɛɛ nànɛ́ ń ɔzĩwaɛ. 15À ɔdakɛ̀ an gbɛ̃doɛ bãni sɔo, gbɛ̃ɔn plaade bãni pla, gbɛ̃ɔn aaɔ̃de bãni do. A kpà an baadewa a gbãa lɛu, ɔ̃ à fɛ̀lɛ ń táo. 16Bãnisɔode gɛ̀ zĩkɛ̀ ń ɔ̃apio gɔ̃̀ɔ, ɔ̃ à aikɛ̀ɛ̀ bãni sɔo. 17Bãniplaade kɛ̀ màa lɔ, ɔ̃ à aikɛ̀ɛ̀ bãni pla. 18Bãnidode sɔ̃, à gɛ̀ ɛyɔ̃̀ɛ, ɔ̃ à a dii ɔ̃api ùlɛu.
19Gɔɔplakɛa gbɛa zĩkɛnapiɔ dii sù, ɔ̃ àlɛ a ɔ̃a yãgɔ̃gɔ̃ńnɔ. 20Bãnisɔode mɔ̀ ń bãni sɔo pãle pɔ a èo à mɛ̀: Dii, bãni sɔo pɔ ń kpàa gwa, à aikɛ̀ bãni sɔo lɔ. 21Ɔ̃ aà dii òɛ̀: Ń kɛ̀ zĩkɛn maa naaide! Lá ń naai vĩ ń a yɔɔnao, má a zɔ̃ɔ nanɛ n ɔzĩɛ sa. Gɛ̃ ma pɔnakɛa guu.
22Bãniplaade mɔ̀ lɔ à mɛ̀: Dii, bãni pla pɔ ń kpàa gwa, à aikɛ̀ bãni pla lɔ. 23Ɔ̃ aà dii òɛ̀: Ń kɛ̀ zĩkɛn maa naaide! Lá ń naai vĩ ń a yɔɔnao, má a zɔ̃ɔ nanɛ n ɔzĩɛ sa. Gɛ̃ ma pɔnakɛa guu.
24Ɔ̃ dode mɔ̀ sa à mɛ̀: Dii, má dɔ̃ kɛ́ gbɛ̃́ zĩ'ũn n ũ. Ni pɔkɛkɛ gu pɔ ni tɔ̃uoɛ, mɛ́ ni pɔkãaa gu pɔ ni gbɛ̃uo. 25Ɔ̃ vĩa ma kũ, ma gɛ ma n ɔ̃a ùlɛ ɛu. N pɔ kɛ́. 26Ɔ̃ aà dii òɛ̀: Zĩkɛn vãi màade! Ń dɔ̃̀ kɛ́ mi pɔkɛkɛ gu pɔ mi tɔ̃uo, mi pɔkãaa gu pɔ mi gbɛ̃uoo lò? 27Tó n dakɛ̀ò gbɛ̃eɛ yãa, lá ma suɛ́, dɔ̃ má sì ń a ío. 28À bãni dopi siwà, í kpa bãnisɔodewa. 29Asa gbɛ̃́ pɔ pɔ vĩ Lua a kãfĩɛ̀ e à fɛ̃ɛ. Gbɛ̃́ pɔ vĩ sɔ̃o, baa pɔ pɔ a vĩ Lua a siwàɛ.#Mat 13.12 30Zĩkɛn pãɛ bee sɔ̃, à aà zu bàasi gusiau. We a ɔdi a musu a ɔɔlɔ.#Mat 8.12, 22.13
Yãkpalɛkɛa Gbɛ̃nazĩn Nɛ mɔgɔɔ
31Tó Gbɛ̃nazĩn Nɛ mɔ̀ a gawi guu ń a malaikaɔ pii, a zɔ̃lɛ a báa gawidewa.#Mat 16.27, 19.28 32Dũnia buiɔ i kãaa aà aɛ pii, i ń kɛ̃aa lá pɔdãna ì sãɔ kɛ̃aa ń bleɔwa. 33A sãɔ kpa a ɔplaai, bleɔ ɔzɛɛi. 34Bee gbɛa Kiapi a o gbɛ̃́ pɔ aa ku a ɔplaaiɔnɛ: Á gbɛ̃́ pɔ ma Mae baaadàáguɔ, à mɔ à kiakɛ pɔ à a sɔukɛ̀ɛ́ za dũniakalɛgɔɔ ble. 35Asa kɛ́ nɔana lɛ́ ma dɛ, a blɛ kpàa. Kɛ́ imi lɛ́ ma dɛ, a ikpàa. Kɛ́ má dɛ nibɔ ũ, a ma dilɛ. 36Kɛ́ má bɛ bṹu, a uladàmɛɛ. Kɛ́ malɛ gyãkɛ, a ma gwa. Kɛ́ wà ma da kpɛ́u, a mɔ ma gwai.
37Gbɛ̃maaɔ i gbasa oɛ̀: Dii, bɔɛ wá è nɔana lɛ́ n dɛ, wa blɛ kpàmai, ge imi lɛ́ n dɛ, wa ikpàmai? 38Bɔɛ wa n e nibɔ ũ wa n dilɛi, ge ń bɛ bṹu wa uladànɛi? 39Bɔɛ wá è nlɛ gyãkɛ ge wà n da kpɛ́u, wa gɛ n gwaii? 40Kiapi i wemá: Sĩana malɛ oɛ́, gɔɔ pɔ á kɛ̀ ma gbɛ̃́ɛ beeɔ doɛ, baa an gbɛ̃́ pɔ kɛ̃sãańzi, mamɛ á kɛ̀mɛɛ.
41Bee gbɛa a o gbɛ̃́ pɔ aa ku a ɔzɛɛiɔnɛ: À gomɛɛ we luaginzideɔ! À tá tɛ́ gasai pɔ Lua kɛ̀kɛ Ibiisiɛ ń a iwaɔ guu. 42Asa kɛ́ nɔana ma dɛ, i blɛ kpaao. Kɛ́ imi ma dɛ, i í kpaao. 43Kɛ́ má dɛ nibɔ ũ, i ma dilɛo. Kɛ́ má bɛ bṹu, i uladamɛɛo. Kɛ́ malɛ gyãkɛ ge wà ma da kpɛ́u, i mɔ ma gwaio. 44Aai gbasa aa aà la: Dii, bɔɛ wa n e ń nɔanao ge imi ge nibɔ ũ ge bṹu ge gyãe ge dakpɛuna ũ, mɛ́ wi dɔnlɛo ni? 45Kia i wemá: Sĩana malɛ oɛ́, lá i kɛ gbɛ̃́ɛ beeɔ doɛo, baa an gbɛ̃́ pɔ kɛ̃sãańzi, mamɛ i kɛmɛɛo. 46Gbɛ̃́ beeɔ ta ĩadama laasai guuɛ, gbɛ̃maaɔ sɔ̃ aizãna guu.#Dan 12.2
ទើបបានជ្រើសរើសហើយ៖
Mat 25: Boo2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Boko Bible © SIM International, 2024.
