Mat 11
11
Zãa Da'ilɛna zĩnaɔ
(Luk 7.18-35)
1Kɛ́ Yesu yãpiɔ dà a iwa gbɛ̃ɔn kuɛplaɔnɛ a làa, à bɔ̀ we à gɛ̀ waasokɛi an wɛ̃lɛɔ guu, àlɛ yãdanɛ́.
2Zãa kua kpɛ́u à Kilisi yãkɛaɔ mà, ɔ̃ à a iwaeɔ zĩ̀ 3aa aà laɛ, tó ɔ̃mɛ gbɛ̃́ pɔ a mɔ ũ, ge wàɔ wɛdɔ gbɛ̃pãleziɛ? 4Ɔ̃ Yesu wèmá à mɛ̀: À gɛ́, à yã pɔ álɛ ma mɛ́ álɛ e o Zãaɛ à mɛ:
5Vĩ̀aɔ lɛ́ gu'e, kɔ̃̀ɔɔ lɛ́ taa'o,
wàlɛ gbãbɔ kusudeɔnɛ,
swãdoɔ lɛ́ yãma, gɛɔ lɛ́ vu,
mɛ́ taasideɔ lɛ́ baona waaso ma.#Isa 35.5-6, 61.1
6Baaaden gbɛ̃́ pɔ lí fu ma yãwao ũ.
7Kɛ́ gbɛ̃́piɔ tà, Yesu nà Zãa yã'oa bilaɛwa à mɛ̀: Bɔ́ a gɛ gwai gbáaui? Fee pɔ ĩana lɛ́ deedee yã? 8Bɔ́ a gɛ gwai sai? Gbɛ̃́ pɔ pɔkasa zãɛ naaazi yã? Pɔkasa maa danaɔ ìɔ ku kibɛɛ. 9Bɔ́ a gɛ gwai wei? Ãnabi yã? Ao! Malɛ oɛ́, a dɛ se ãnabia. 10Asa Zãa yã wa kɛ̃̀ láu wà mɛ̀:
Má a zĩna gbaɛ
aà dɔaa aà zɛkɛkɛnɛ.#Mal 3.1
11Sĩana malɛ oɛ́, nɔɛ nɛ'ia guu ãnabie i bɔ à kà Zãa Da'ilɛnawao. Ń beeo gbɛ̃́ pɔ dɛ gbɛ̃́ kpɛɛ ũ kpala pɔ Lua kpà guu dɛaala. 12Za gɔɔ pɔ Zãa Da'ilɛna waaso dàalɛ e gbã, kia pɔ Lua kpà yã lɛ́ gɛ́ aɛ ń gbãao, mɛ́ gbɛ̃́ gbãaɔ lɛ́ kpakpaɛ̀. 13Mɔizi ń ãnabiɔ pii dɔ̀aa a yã'ò e à gɛ̀ pɛ̀ Zãawa. 14Tó á yei, à sí, Zãapi mɛ́ Ɛlia pɔ wà mɛ̀ a mɔ ũ.#Mal 3.23 15Gbɛ̃́ pɔ nɔ̀sɛ vĩ aà yãpi ma.
16Bɔ́ má gbãgbɛ̃ɔ lɛɛũòi? Aa dɛ lan nɛ pɔ aa ku gãaɛ aalɛ lɛzukɔ̃iɔwaɛ 17aalɛ mɛ:
Wa kulɛpɛ̀ɛ́, i ɔ̃wão.
Wa wɛ̃nalɛ sìɛ́, i ázĩa gbɛ̃gbɛ̃o.
18Kɛ́ Zãa mɔ̀, ìli pɛ̃ɛsoo, ìli vɛ̃ɛmio, ɔ̃ wà mɛ̀ tãadeɛ. 19Kɛ́ Gbɛ̃nazĩn Nɛ mɔ̀, ì pɔble, ì imi, ɔ̃ wà mɛ̀: Asiade wɛ̃minaɛ, ɔsinaɔ ń luayãdansaiɔ gbɛ̃naɛ! Ãma wì ɔ̃nɔ dɔ̃ ɔ̃nɔna yãkɛa gbɛwaɛ.
Yesu zɔadɔa wɛ̃lɛeɔ deɔwa
(Luk 10.13-15)
20Ɔ̃ Yesu fɛ̀lɛ, à zɔadɔ̀ wɛ̃lɛ pɔ à dabudabu daside kɛ̀uɔ gbɛ̃́ɔwa, kɛ́ aai nɔsɛlilɛo yãi. 21À mɛ̀: Waiyoo Kɔlazɛnideɔ! Waiyoo Bɛsaidadeɔ! Tó wà dabudabu pɔ má kɛ̀ɛ́ kɛ̀ Tii ń Sidɔ̃o yãa,#Isa 23.1-18 dɔ̃ wɛ̃lɛpideɔ ulakasaɔ dà, aa busu kà ń miu nɔsɛlilɛa seela ũ à gɛ̃̀gɛ̃. 22Malɛ oɛ́, yãkpalɛkɛgɔɔzĩ á ĩadama a dɛ Tiideɔ ń Sidɔ̃deɔ pɔa. 23Á Kapɛnaũdeɔ sɔ̃, á fɔ̃ gbã à zɔ̃ luawa yã? Wa ɔzɔ̃áziɛ e bɛdau.#Isa 14.13-15 Asa tó wà dabudabu pɔ má kɛ̀ɛ́ɔ kɛ̀ Sɔdɔũ yãa, dɔ̃ a ku e ń a gbão.#Daa 19.24-28 24Malɛ oɛ́, yãkpalɛkɛgɔɔzĩ á ĩadama aɔ dɛ Sɔdɔũ pɔa.
Kãmaboa Yesu kĩi
(Luk 10.21-22)
25Zĩ bee Yesu mɛ̀: Baa, musu ń zĩlɛo Dii, ma n saaukɛ̀, kɛ́ n yãɛ beeɔ ùlɛ yãdɔ̃naɔnɛ ń ɔ̃nɔdeɔ, mɛ́ ń ɔlɔ̀ ladɔ̃nsaiɔnɛ. 26Ao, Baa, à kàngu màaɛ. 27Ma Mae pɔpii nàmɛɛ ma ɔzĩ. Gbɛ̃e Lua Nɛ dɔ̃o, mɛ́ i kɛ Mae Lua baasio, mɛ́ gbɛ̃e Mae Lua dɔ̃o, mɛ́ i kɛ aà Nɛ ń gbɛ̃́ pɔ Nɛpi yei à aà ɔlɔnɛ́ɔ baasio.
28À mɔ ma kĩi á gbɛ̃́ pɔ á aso sɛa a kpasaɔ pii, mí tó à kãmabo. 29À ma zuu sɛ́, í yãdada ma kĩi, á laai i kpalɛ, asa má busɛɛ mɛ́ ma nɔ̀sɛ niɛ. 30Asa ma zuu ĩao, mɛ́ ma aso gbiao.
ទើបបានជ្រើសរើសហើយ៖
Mat 11: Boo2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Boko Bible © SIM International, 2024.
