Mat 10
10
Yesu iwaɔ
(Maa 3.13-19; Luk 6.12-16)
1Yesu a iwa gbɛ̃ɔn kuɛplaɔ sìsi, ɔ̃ à ń gbá iko aa tãaɔ gomá, aa gyãeɔ gbãgbã pii ń kɔ̃̀ɔɔ pii. 2Zĩna gbɛ̃ɔn kuɛplapiɔ tɔ́ɔn kɛ: Gbɛ̃́ sɛ̃ia Simɔ pɔ wì mɛ Piɛɛ, aà dãuna Ãndele, Zebede nɛ Zaki, aà dãuna Zãa, 3Filipi, Batelemi, Toma, ɔsina Matie, Alafe nɛ Zaki, Tade, 4Simɔ Ginzĩao ń Yudasi Isaliɔti pɔ bɔ̀ Yesu kpɛo.
Yesu a iwa gbɛ̃ɔn kuɛplaɔ zĩa
(Maa 6.7-13; Luk 9.1-6)
5Kɛ́ Yesu lɛ́ gbɛ̃ɔn kuɛplapiɔ zĩ, a ònɛ́: Ásu gɛ́ buipãleɔ kĩi oio. Ásu gɛ̃ Samali wɛ̃lɛɔ guuo. 6À gɛ́ Isaili pɔ aa sãsãa lan sãɔwaɔ kĩi. 7À gɛ́, íɔ waasokɛ àɔ gɛ́ò à mɛ: Kia pɔ Lua kpà ku kãi! 8À gyãeɔ gbãgbã, à gɛɔ vu, à gbãbɔ kusudeɔnɛ, à tãaɔ gomá. Lá á è pɔkpasai, à kɛnɛ́ pɔsisai. 9Ásu àɔ ɔ̃a kũao, baa ɔsɔ̃gbɛna. 10Ásu babalabɔɔ sɛo ge ula plaade ge kyale ge gopana, asa zĩkɛna kà à a blɛ e. 11Wɛ̃lɛ pɔ a kau pii, mɛɛwia ge zɔ̃ɛwia, à gbɛ̃maa kpakpa à pilawà, íɔ ku we e à gɛ bɔò. 12Tó a gɛ̃ ua, í fɔ baaade kpamá. 13Tó uadeɔ bɛɛɛ kà, á fɔ baaade a gɔ̃nɛ́. Tó an bɛɛɛ i kaoɛ̀ sɔ̃, á fɔ baaade a ɛa suwáɛ. 14Gu pɔ wi gbãakpauázio ge wi swãsɛ á yãio, à bɔ uapi ge wɛ̃lɛpiu, í kɔɔlɛmá. 15Sĩana malɛ oɛ́, yãkpalɛkɛgɔɔzĩ wɛ̃lɛpideɔ ĩadama aɔ dɛ Sɔdɔũ ń Gɔmɔɔo busudeɔla.#Daa 19.24-28
Yesu yã pɔ a a iwaɔ le oanɛ́
(Maa 13.9-13; Luk 12.2-9, 21.12-17)
16Malɛ á zĩ sãɔ ũ awalɛwanaɔ guuɛ. Àɔ laai vĩ lan mlɛɔwa, íɔ dɛ yãesaideɔ ũ lan felenaɔwa. 17À laaika gbɛ̃nazĩnaɔzi, asa aa á kṹ wà yãkpalɛkɛánɔ, aai á gbɛ̃ ń flaalao ń luasisikpɛɔ guu. 18Wa gɛ́ánɔ busu gbãadeɔ ń kiaɔ kĩi ma yãi. Bee a á gba zɛ́ àɔ dɛnɛ́ ma seeladeɔ ũ ń buipãleɔ. 19Tó wà á kpamá, ásu bilikɛ yã pɔ á o ge yã pɔ á líwao. Zĩ bee Lua mɛ́ a yã pɔ á o soso kaɛ́ á lɛ́u. 20I kɛ ámɛ á yã'oo, á Mae Nisĩna mɛ́ a soso káɛ́ á lɛ́u.
21Vĩi ń dãunaɔ kɔ̃ kpamá dɛa yãi. Màa maeɔ ń nɛɔ kpamá. Nɛɔ bɔ ń de ń ń daɔ kpɛ wà ń dɛ. 22Gbɛ̃pii a zaágu ma yãi, ãma gbɛ̃́ pɔ zɛ̀ gbãa e a gɔɔ lɛ́wa mɛ́ a bɔ. 23Tó wàlɛ ĩadawá wɛ̃lɛeu, à baalɛ ta a pãleu. Sĩana malɛ oɛ́, á e Isaili busu wɛ̃lɛɔ kɛɛlɛ piio, ɔ̃ Gbɛ̃nazĩn Nɛ a mɔ́. 24Iwae líɔ dɛ a yãdanɛdelao. Zɔblenae líɔ dɛ a diilao. 25Tó iwa a yãdanɛde lea lè, ge tó zɔblena a dii lea lè, bee mɔ̀wà. Tó wà tɔkpà uabeleɛ Beezebu, tɔ́ pɔ a vãi dɛ beea ɔ̃ wa kpa aà bɛdeɔnɛ.
26Ásu vĩakɛnɛ́o. Yã pɔ ulɛa a bɔ gupuau pii, mɛ́ asiiyãe ku kɛ́ wa gi dɔ̃io. 27À yã pɔ malɛ oɛ́ gusiau o gupuau. À yã pɔ álɛ ma bũnu guu kpawakɛ gãaɛ. 28Ásuli vĩakɛ gbɛ̃́ pɔ aaì gbɛ̃́ dɛ, aali fɔ̃ aa aà nisĩna dɛ̀oɔnɛo. Àli vĩakɛ Luaɛ, asa ɔ̃mɛ a fɔ̃ mɛ ń nisĩnao kaalɛ tɛ́ guu pii. 29Wìli golegolen mɛn pla yia dalao le? Kási an kee wá lí su tɔɔlɛ á Mae lɛ́ saio. 30Apiɔ sɔ̃, baa á mikã, a a lɛ́ dɔ̃. 31Ayãmɛto ásu vĩakɛo. Á bɛɛɛ dɛ golegolenaɔla dasi.
32Gbɛ̃́ pɔ zɛ̀manɔ gbɛ̃́ɔ aɛ, má zɛaanɔ ma Mae pɔ ku musu aɛ. 33Gbɛ̃́ pɔ lelekpàmazi gbɛ̃́ɔ aɛ, má lelekpaaazi ma Mae pɔ ku musu aɛ.
34Ásu àɔ e ma mɔ kɛ́ wàɔ na ń kɔ̃o dũniau yãi no. Mi mɔ kɛ́ wàɔ na ń kɔ̃o yãi no, sema fɛlɛa ń kɔ̃o. 35Ma mɔɛ, kɛ́ gɔ̃ɛ bɔ a de kpɛ, nɔɛ bɔ a da kpɛ, nɔzãe bɔ a zãda kpɛ. 36Gbɛ̃́ bɛdeɔ gɔ̃ aà ibɛɛɔ ũ.#Mis 7.6 37Gbɛ̃́ pɔ ye a de ge a dazi dɛ lá a yemazila i ka àɔ dɛ ma iwa ũo. Gbɛ̃́ pɔ ye a nɛgɔ̃ɛ ge a nɔɛzi dɛ lá a yemazila i ka àɔ dɛ ma iwa ũo. 38Gbɛ̃́ pɔ i a lipãakɔ̃a sɛ àɔ tɛòmazio i ka àɔ dɛ ma iwa ũo. 39Gbɛ̃́ pɔ a wɛ̃ni kũa, wɛ̃nipi a vũaawàɛ. Gbɛ̃́ pɔ gì a wɛ̃nizi ma yãi sɔ̃, ade mɛ́ a wɛ̃ni e.
40Gbɛ̃́ pɔ á dilɛ, ade ma dilɛɛ, mɛ́ gbɛ̃́ pɔ ma dilɛ gbɛ̃́ pɔ ma zĩ dìlɛɛ. 41Gbɛ̃́ pɔ ãnabi dìlɛ aà ãnabikɛ yãi a ãnabi asea e. Gbɛ̃́ pɔ gbɛ̃maa dìlɛ aà gbɛ̃maakɛ yãi a gbɛ̃maa asea e. 42Baa í niɛ, gbɛ̃́ pɔ dã̀ nɛɛ beeɔ doɛ ma iwakɛ yãi, sĩana malɛ oɛ́, a kua a aseawao.
ទើបបានជ្រើសរើសហើយ៖
Mat 10: Boo2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Boko Bible © SIM International, 2024.
