Roma 3
3
1Ya an vaski na, də mi Yahudiyenɗe adayaŋ kiyit ɗii məs Yahudiyenɗeŋ ɓa di? Wəskəl awra net tay də sləman sa? 2Gesiŋ, tay də sləman diiɗa. Dabəŋ nani, Maŋgəlva apanək wəpel nan mogon aveti. 3An ɗii meɓɓet suweleŋgit tahəŋ də goŋga ɓana, watak goŋga na Maŋgəlva sa? 4Atak na ɓa sam! Maŋgəlva warban na də goŋgay, ko an ɗii pak akpaŋgaŋgək məwaŋ tepelke. Va ɗerewel anah na:
Say ɗii dəsənən gən təstəs noko, də wəpel noko,
wakədayki ɗəf məs dədaw yuk aka kita.
5Ya an mambray məs mədaɗɗaŋ arbanək na Maŋgəlva tay təstəs ɓa, ya mbar mədaw nah kan di? Maŋgəlva tay təstəs ɓa, vi adaw taw kita akam sa? Əntatə sohon va ɗii ada sohoŋ. 6Tay vas ɓa sam! Va Maŋgəlva təstəssi ɓana mbarmbari adawtaw kita aka dələv gboŋ pak di?
7Amma an tepelke məs nədawa tayərbanən gakdak na Maŋgəlva, də goŋga nan pak dəl gən abe na, ya vi mi Maŋgəlva adawtaw kita akaw kakaŋ va məgəɗ mambray di? 8Mbari an mənahək na: Məgəɗ səm mambraya ka mogon dəde gini di. Ɗii meɓɓet tay waŋ suwən tepelke, tay nahaŋ na, in nənahə. Midi, haya, warəhaŋ kita gala wəza neti.
Ɗəf tay məgəɗ mogon sən Maŋgəlva ko taka ɓa
9Ya mbari kakaŋ kandi? Mənam Yahudiyenɗe na də mi məday kiyit ɗii meɓɓet di? Məday ɓa sam! Va nənah dabəŋ, Yahudiyenɗe dit ɗii məza Yahudiyenɗeŋ ɓa pak dakadakaŋ, vi mambray adayək kiyit pakə. 10Apprəm va ɗerewel anahə:
Ɗəf tay məgəɗ mogon ɓa, ko taka zlaŋ tay ɓa.
11Ɗəf tay məs maɗulan məsən zəga ɓa, ko məzu kayan Maŋgəlva tay ɓa.
12Ɗii pak amzlahaŋgək ki tive faraɗa də Maŋgəlva, azaŋgək pak giti.
Ɗəf tay məgəɗ mogon ɓa, ko taka zlaŋ tay ɓa sam.
13Guyorguyor na wəllet tay va magamas məkol mani,
ərzləmit tay pel naw zet ɗiiyi,
wənna bay ɗii tay gilyan səmba sleyit va muwən na barway.
14Met aknahək də wəray gən diiɗa.
15Tilit tay mbat də kakara wədaw zi mbeli.
16Kəti ambataŋ pak ɗii tahəŋ wəɗəkaŋ də wəraya.
17Dəsənən tive na zam ɓa.
18Geslne na Maŋgəlva taya zit ɓa.
19Məsənək na, mogoni an məs ma henziŋ adawnah pakə, tay nah sit ɗii məs məpsit ma henziŋ, vi ɗəf adawrəh tive nawkoh gən kini, vi kita na Maŋgəlva dəde gən aket ɗii naka dələv pakə. 20Ɗəf arah na wəsuwa təstəs aba Maŋgəlva də wəsban ma henziŋ ɓa. Wəza na ma henziŋ na, warban sən ɗəf na də mambray kənani kaaka'ə.
Mbarmbari ɗii adasoŋ təstəs aba Maŋgəlva di
21An məs ma henziŋ dit məs kleŋɗe arbanən daga far pakə, kakaŋ agəɗka: Maŋgəlva sən kiyən arbanək tive va ɗii adasoŋ təstəs abani, məza də ma henziŋ ɓa. 22Maŋgəlva wataf ɗii dəsoŋ gən təstəs abani, an atafənək Zezu Krestu. Ko naway dətaf Krestu wasan təstəs aba Maŋgəlva vi aza Maŋgəlva na, ɗii pak dakadakaŋ. 23Ɗii pak aɗɗaŋgək mambraya, dərəhaŋ gakdak məs Maŋgəlva aynan napsitiŋ ɓa. 24Amma Maŋgəlva awələk saha aketi, wapsit təstəs nan na mekeleŋ. Də Zezu Krestuwi amet səza sembe na mambraya. 25-26Maŋgəlva aɗiyək aban ka ɗəf nawsleren dit ɗii na duniya pakə. Mbel nan məs dənzuwaŋ aka wəlaŋga məzliwrihe ndəɗaŋgəŋ dəda kpaŋgetin ɗii məs dətafaŋ təstəs aba Maŋgəlva. Daga far laŋka Maŋgəlva aɓəsəka dətaw kita aka mambray net ɓa. Amma kakaŋ na, tay əviyan sit mambray neti. Vaski kan arban təstəs nani. Gesiŋ də payan nam kakaŋki aŋgəl wərban vaska. Maŋgəlva təstəssi, tay ɗi ɗii məs dətafən Zezu pak ka ɗii təstəssə.
27Ya tive tay dəmbər səm ka məkaɓ gən əmpa sa? Tay dəmbər ɓa! Ya vi mi di? Vi Maŋgəlva aŋɗan wəza na ɗəf ɓa, say wətaf nani. 28Məsənka, Maŋgəlva aɗi ɗəf ka ɗəf təstəs vi wənna wəza na ma henziŋ ɓa, say vi ataf Zezu Krestu. 29Ya vasna, Maŋgəlva nan tay kanet Yahudiyenɗe kaaka sa? Maŋgəlva net ɗii məs Yahudiyenɗeŋ ɓa ndən ɓa sa? Vaski, Maŋgəlva net ɗii meɓɓeti pakə. 30Maŋgəlva takayi, ɗii məs dətafən Zezu Krestu pak waɗi ka ɗii təstəssə, ko məskəl awreɗeŋ, ko məs dəsklaŋ awreɗeŋ ɓa pakə. 31An nənahək vasna, ma henziŋ nədaw zelen sa? Tay vas ɓa! Əntatə ɗi ki ma henziŋ.
ទើបបានជ្រើសរើសហើយ៖
Roma 3: GDRNT85
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Gidar New Testament © Bible Society of Cameroon, 1985.
