Roma 11
11
Maŋgəlva dəppet ɗii na Israyel ɓa
1Vi wən aŋki nəssohu: Maŋgəlva andolik ɗii nan sa? Tay vas ɓa! Vi in sən kiwa ɗəf na Israyel nani zev Benyamin nani. 2Maŋgəlva də ndol ɗii məs awel daga wətəŋ nanəŋ ɓa. Məɗumon wən məs ɗerewel məsvan anahə: Eliyas ahəm sənək Maŋgəlva, vi wənnet Israyelɗe. 3Amna: Aw Ɗəfdaya abeyinik məs kleŋɗe noko, aɓzluwənək kəti nawtaw suk wəla zəga. In katərgu nəpelə, naw bo tahəŋ wəkayawən kaw baywa. 4Mbarmbari Maŋgəlva azlan sən di? Apsəna: Nəpələk ɗii heret nawa, tahəŋ uzine buhul məs agakdakanən Ba'al ɓa. 5Vaski bo kakaŋka'a, Maŋgəlva apələk ɗii heret nani məs awel suɗike, vi wənna ula saha nani. 6Uwel məs aweləŋ na, vi wənna wəza neti ɓa. Vi uwel na Maŋgəlva adaw san vi wəza net ɗii ɓa, vi ula saha nan adawsan ɗar ɓa.
7Ya mbari kan kakaŋ di? An məs Israyelɗe akayanənni, amma dərəhən ɓa. Say ɗii məwelit səret dərəhəni. Vadaysa net ki ɓəɓəlɗeŋ dəŋgəmaŋ wəpprəm iya na Maŋgəlva ɓa. 8Va məver wənnani:
Maŋgəlva apsitik maɗula məs napprəmi ɓa.
Ha gap pay dəpaŋka, aɓapənna ulaŋ də heret ɓa.
Apprəmaŋ na də sləmet ɓa.
9Davit bo amna:
Wəzəm metiŋgin akpaŋgək tallaw abeti dətoŋgoŋ gən adəvən.
Say dəsbəraŋ gəni dərəhaŋ gən riba na mambray neti. 10Atip hereti vi adawlaŋ.
Gəɓet wasan ɓee'e pay pakə vi zəga məs adawslaŋ.
Tive tay ɗəf dəkaɓ gən ɓa
11Vini nəssoh na: Wən nan akpaŋgək nasbər git ɗii na Israyel sa? Tay vas ɓa! Ndəɗaŋ dəɗɗaŋ mambraya. Ndəni wəkoh akpaŋ azet ɗii məs Yahudiyenɗeŋ ɓa. Maŋgəlva aɗɗa vas na, vi kaw sil gən katorok net Israyelɗe. 12Mambray net aki sitik zəzay diiɗa sit ɗii məs Yahudiyenɗeŋ ɓa, əray net aki sitik arya sit ɗii məs Yahudiyenɗeŋ ɓa. Ya va zəgay Israyelɗe pak atubiyaŋgək na, asna zəzay nan wadayki as sawɓa.
13Munokum məs Yahudiyenɗe kənanaŋ ɓa, kakaŋ na wanənah sukum: Nəkpaŋgək masləŋ azet ɗii məs Yahudiyenɗeŋ ɓa, əntatə gakdakan wəza nawa. 14Kuzuŋ wanərah wəsil gən kotorok azet əlfiŋgiɗwa ka nəkohgit gən ɗii meɓɓeti. 15Səza məndolti, duniya pak arahək əŋgla na Maŋgəlva. Ya vasna midədaɗɗa kan an Maŋgəlva aməsək ətefit əmpa di? Wasan azet va asilyoŋ səkəti əmta!
16An ɗəf apsənək memteke an dabəŋ sən Maŋgəlva, memtekeɗ pak wasoŋ salala. An siwer wəlaŋga na Maŋgəlvayi, asna ki van bo nani. 17Kiva wəlaŋga maɓɓan məngohni səza hereme na weleŋgit wəleŋɗe. Ndəni mətipkum agəlani va meleketekum məs dəzoŋ səza hereme nawra. Kəsapaŋgək dit dembərgit Israyelɗe, munokum tatərəhaŋ sembe səza siwere na hereme ana waleŋgit wəleŋɗe məsgilti. 18Də vas zlaŋ kədaw zelenən kivan məs məŋgoh nəŋ ɓa. Tive tay kədaw kaɓaŋ ɓa. Vi munokumtə kədawziw gənən siwerin ɓa, amma siwerini dədawziw gukum.
19Kuzuŋ wakənahaŋ kakaŋ na: Məŋgoh kivan na, vi kawtipim agəlani. 20Gesiŋ, ya amma məŋgohən na, vi dəŋgereŋ ətaf ɓa yi. Nokum bo məntepekum na, vi kətafaŋgi, vi vaski kədaw kaɓaŋ ɓa, say məgeslne'i. 21Maŋgəlva dəŋgəm ula saha aket Israyelɗe ɓa, ko vi ndəɗaŋgəŋ kivan an zemve zlaŋ dəŋgəm ɓa, ya azokum na wawəl saha akokum sa? 22Mula va Maŋgəlva adarban mogon nani də wəhay nani, tay hayet ɗii məs dədapanənni, amma mogoni kla zokum adan munokum tatəsoŋ adəv mogon nani, an vaski ɓana, nokum bo, kawɓəlkumi va kivan annaka. 23An Israyelɗe amilyoŋko, atafənka, asna Maŋgəlva waməs itipit agleti. Vi tay də sembe na kpaŋgan kita nani. 24Munokum ɗii məs Israyelɗe kənanaŋ ɓa, munokum tat va hereme nawra. Yaŋ Maŋgəlva atipekum aza hereme məs gəlni atəki məs gəlokumi far ɓa.
Əkoh net Israyelɗe dit ɗii məs Israyelɗeŋ ɓa pakə
25Milmiŋgiɗwa nəŋgəl karban sukum goŋga məs dəɗamə, vi kədaw lanən zukum va məsənaŋ zəga pak ɓa. Maŋgəlva appetik Israyelɗe meɓɓet aŋkluwənək mekreti. Amma wənnan kadagrak na, an ɗiiyen məs Maŋgəlva awel suweleŋgit ɗii məs Israyelɗeŋ ɓa, azoŋguk azan pak arəhaŋgək əkoho. 26Asna Israyelɗe pak wakohoŋ va ɗerewel anahə:
Səka gərəm na Siyonayi Affən əkoh adazani.
Wagəm mambray net kirtin Zakub pakə.
27Ndəni wənnaw minan dənɗaŋ,
pay məs nəviyan sit mambray neti.
28Yahudiyenɗeŋ dəkpaŋgaŋ məzuzeleŋ na Maŋgəlva, ka vi munokum məs Yahudiyenɗe kənanaŋ ɓa kərəhaŋ gən əpprəm Labara Neneke. Amma Maŋgəlva awelik dəhiŋgiɗit en dabəŋ. Vini aŋliwe. 29An Maŋgəlva aɗɗak zəzay sit ɗii ko ɗii zemvit awet di pak məs aweli, aɗi marava viyin ɓa. 30Nokum kəpprəmən ma Maŋgəlva lahəŋ ɓa, də as pak kakaŋ na kərəhaŋgək ula sasah nani, vi Yahudiyenɗe aɓoŋgoŋguk dapprəm mani. 31Vaski net bo kakaŋka dəpprəmən ma Maŋgəlva vi awəl saha akokum ɓa. Amma agəɗ vasna vi ndəɗaŋ bo dərəhaŋ gən ula sasah nani. 32Maŋgəlva akpaŋgetik ɗii pak apprəmən man ɓa, vi kawla səsehti.
Gakdak na Maŋgəlva
33Kay! Arya na Maŋgəlva diiɗayi sawɓa. Maɗulani də wəsən nani, kawsəni ɓa. Naway dədawɓap wəboton wəɗum nan di? Naway dədawsən tive nan di? 34Ɗerewel amna:
Naway dəsən wəɗum na Ɗəfdaya di?
Naway məs adawtawan wənnan dəndən di?
35Naway dədawɓap wəpsən zəga dabəŋ vi
dəmndan gən əfaɗ sən di?
36Maŋgəlva azəməɗək zəga pakə, səzani zəga pak
ade azani adaw milyoŋ pakə bo.
Gakdak pak na Maŋgəlvayi ha faɗə.
Amin!
ទើបបានជ្រើសរើសហើយ៖
Roma 11: GDRNT85
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Gidar New Testament © Bible Society of Cameroon, 1985.
