Wəza net Masləŋɗe 26
26
Pol anah sənək Agrippa na dəgəɗ mambray ɓa
1Agrippa apsən Pol na: An mokaka pel wənnok na apele. Pol aslanək van a disiŋ, atəŋgək wəpel ana makran tamə, amna:
2Aw məlĩ Agrippa zu anekək nawpel wənnaw abok dəpaŋka, aka wən məs Yahudiyenɗe awliwən pakə. 3Vi noko kəsənək matuya net Yahudiyenɗe də wən məs adawpeleŋ akan pakə. Vi ni nəkkomoko kəpprəm suwə gən an nədaŋgla wəpeliŋ ɗa.
4Yahudiyenɗe pak asənənək wənnaw daga səka muzliya nawa, asənənək va nəsaw aweleŋgit ɗii naw a Zerusalem. 5Asənənək wənnaw daga farə, waɗɗaŋ saydawa akaw an aŋglaŋka. Farisiyen nani, nəsbanək wənna Maŋgəlva an də tattuwãha. 6Kakaŋ bo aka kita nan nani, vi nədaw ga wən minan məs Maŋgəlva aynan sit dəhiŋgiɗmə. 7Ma əlfa nam klaw kiyən sula tay ga wən məs minanəŋka, vini adaw zuliyaŋ sənən Maŋgəlva dəfəɗ də kapaya. Vi wən məs adaw gaŋgəŋki Yahudiyenɗe awəliwəni. 8Munokum Yahudiyenɗe, vi mi kawtafən na Maŋgəlva wasil git ɗii mimtiti ɓa di?
9In sən kiyu bo nəgayək wəray gən wənna Zezu ɗəf na Nazaret də tive temtemi. 10As pak a Zerusalem nəɗɗa wənnani. Ɗii gugiriɗ net məs dəlveŋge apsuwənək tive nesget ɗii na Maŋgəlva diiɗa a daŋgay. Yaŋ atawən kita namta aketi, nətafək wənnani bo. 11Ɗayɗay nədawzəm git saha adəv gəla na zuli pakə, nəgəɗsitik dewle dəppanən gən wən məs atafaŋgəŋka. Nədan sitik gidivit sawɓa, ha nəmbatək aka dələv maɓɓan nəzəm gitik saha adaka.
Pol arbanək va ataf Zezu
(Wəza net Masləŋɗe 9.1-19; 22.6-16)
12Vi wənnani nəmbat a Damas, nərah tive nan səzet ɗii gugiriɗ net məs dəlveŋge, ndəɗaŋ dəslənwəni. 13Yas kan əntat aka tive tətaŋ paya, yas ləŋ nula təki babar daykiyən na paya, sə disiŋ ade, yaŋ akekeɓewa dit ɗii məs nədawmbat dənɗaŋ pakə. 14Mənam pak məsbərək afuŋ. Yaŋ nəpprəm wəlla ɗəf wəpel su də ma Yahudiyen: Sol, Sol, vimi kədaw kayan mamaw vaŋ di? Istatə bay zuk va wazli məzəslkər zleŋge na affəni. 15Nəssohonəka: Nawa kənan di Ɗəfdaya? Ɗəfdaya amna: Əntə Zezu məs kədaw kayan mawa. 16Amma asil ziwi. Nərban zu azok na nəwelkuk kəsok gən gawla nawa. Say kənah siti gin ɗii na kuluwək dəpaŋka, an məs nərban sukuŋ bo kənah siti gini. 17Wanəkoh guk səvet Israyelɗe dit ɗii məza Israyelɗeŋ ɓa, məs nəslənuk azeti. 18Vi kəkol sitigin hereti, kəgilgitigin səra guzliyo kəke gin ara təki babara, kəkohgitigin sədəv sembe na Satan, dətoŋgoŋ gən adəv sembe na Maŋgəlva, də wətaf neti, vi dərəhaŋ gən tive naviyan mambray neti, dətoŋgoŋ gən atəki neti aweleŋgit ɗii məs Maŋgəlva aweli də wətafwa.
Pol tay pel wənna wəza nani
19Vi vaski məlĩ Agrippa, nəɓap na kapan hənhən məs Maŋgəlva arban su daga sə disiŋgiŋ ɓa. 20A Damas si nətəŋ wərban wən dabəŋ gəm a Zerusalem, səbəɓərən kana aka dələv net Yahudiyenɗe pakə, də azet ɗii məza Yahudiyenɗeŋ ɓa. Nərban sitik wənnani də wəssohet də tubiyaŋ gəni vi mambray neti, də kpaŋgaŋ gən aza Maŋgəlva, dəɗɗaŋ gən wəza məs narban na atubiyaŋka. 21Vini kan Yahudiyenɗe arməwən sədəv gəla metiŋ naw zuliya*, aŋglaŋ wəbay wəni. 22Amma dəpaŋka, adan Maŋgəlva abaah suwəka, nəziwik karban goŋga abet ɗii pakə daga ɗii gugiriɗe ha gap azet kirni. Nənah wən maɓɓan ɓa, say an məs Moyis dit məs kleŋɗe anahaŋ na wagəɗə. Aɓɗaŋ na: 23Messiya* wasə bonoy, ndəni dədaw silyan dabəŋ sətəki əmta, vi karban təki babar nawkoh sit Yahudiyenɗe dit ɗii məza Yahudiyenɗeŋ ɓa pakə.
Pol anah sənək Agrippa na kətafək Zezu
24Adan Pol adawpel wənna koh gən zəni, yaŋ Festus anah sən Pol də wəlan dayadaya na: Pol dərwa kənani, wəsən zəga nokuŋ diiɗaŋ azanək maɗuloko!
25Pol azlan sənək na: Dərwa nan ɓa, məlĩya! Wən an gesiŋ nədawpele, gala nataf net ɗii məs nədawpel sit pakə. 26Məlĩ Agrippa geslne aduwna dawpel suk ɓa, vi kəsənək wənnamə, wənnəs pak zəga tay dəɗam azok kpeeh ɓa. Vi wənnan tay də məɗama ɓa. 27Məlĩ Agrippa kətafək wənnet məs kleŋɗe sa? Nəsənka kətafəka. 28Agrippa amna: Pol gu'ləŋ kəɗiyu vas ləŋ ka kretiyen? 29Pol azlanək na: Ko gu'ləŋgə, ko məza gu'ləŋ ɓa, əntatə kaman Maŋgəlva isi dit ɗii məzapprəmən pak kəsoŋ gən va ina, amma məza mə daŋgayɗe ɓa.
30Yaŋ məlĩ Agrippa də governer Festus dət Bernike, dit ɗii məs dəsoŋ adak pak asilyoŋ. 31Yaŋ adadoŋ, yaŋ kan adawnahaŋ na: Ɗəf ndaka dəgəɗ mbrayen gala nawbayən walla nawtoŋ gən a daŋgay ɓa. 32Yaŋ Agrippa anah sən Festus na: Vi aŋgəl kita nan dəgəɗ gən aba məlĩ na Roma ɓana waməppani.
ទើបបានជ្រើសរើសហើយ៖
Wəza net Masləŋɗe 26: GDRNT85
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Gidar New Testament © Bible Society of Cameroon, 1985.
