Wəza net Masləŋɗe 20
20
Pol ambatək a Makedoniya də Akaya
1Adan wənnan aɓətə, Pol akkeletik ɗii na Maŋgəlva. Asəɓ sitike, yaŋ anah sit dəsoŋ gən zamə, ambatək a Makedoniya. 2Abalək aka dələv nani, asɓetik ɗii də wərban sit wənna. Yas kan agap a Antakiya. 3Asanək adak təla hoku, tay zaɓan zən nawmbat a Siriya, amma apprəmək na Yahudiyenɗe aslerinik meti vi kawbayən, vini kan amil a Makedoniya. 4Sopater wətən Pirrus, ɗəf na Bereya, ambataŋgək dəndən. Aristarkus də Sekundus, ɗii na Tesalonika, gəm Gayus ɗəf na Derbe, gəm Timote, dit maay Tikikus də Torofimus, net bo ɗii na Asiyaŋ, ndəɗaŋ pak ambataŋgək dəndən. 5Ambataŋgək dabəŋ kiyəm a Torowas, agəmənək adaka. 6Məpeŋgək bəlay sə Filipi dərɓaga wəzləra net dupeŋɗe məza wuɗo ɓa. Dərɓaga wəvoŋ sle, mərihik a Torowas, məgəɗək wəvoŋ buhul adaka.
Pol tayule ɗii na Torowas
7Pay Asawe də moskoyo, məkkalka, vi kawzəm way na Ɗəfdaya. Pol tayə pel sit ɗiiyi, apelik ha gap tətaŋ dəfɗa, vi pumpum nan na wambatə. 8Pitirleɗ tahəŋ diiɗa adəv gəla ana disiŋ atəki məs mədakkal vani. 9Wiyən gawla tay, iya nan na Ewtikus asanək ama manzatu. Pol tayə pele'e, ha Ewtikus ayəka, agəɗək dikziŋgi, asbərka, ha afuŋ, daga sədəv gəla ma hoko'ən na disiŋ. Amtəka, aslanənka. 10Amma Pol aprike, aɓe'ək akani, aslanəka, amna: Kədawhəmaŋ ɓa, dəmtəɓa. 11Yaŋ amil adəv gəla na disiŋ naka, awɗakək waya azəmək dənɗaŋ. Apelik dənɗaŋ ha bapumpum, yas ambatə. 12Yaŋ ambataŋ də wiyən naka, madarani, annekək zit sawɓa.
Pol asilik sə Torowas ambatək a Miletus
13Məpeŋgək adəv bəlay dabəŋ ki Pol, kambat a Assos adaki Pol aŋgəl wəpeŋ adəv bəlay. Amna: Məduwaŋ vi nan aŋgəl kawmbat də təlni. 14Yaŋ kan ade rəhəm a Assos, məpeŋ gənək adəv bəlay namə, məmbatək a Mitilene. 15Məsilik sədak də bəlay, məgapək aka mətuwəra a Kiyos, vit pumpum nani, də zaya nani, məgapək a Samos, vit zaya nan andak kan ndəni məgap a Miletus. 16Pol aŋgələk kətana kawtoŋ a Efesus məza wəprike ɓa. Vi man tayaka wəvoŋ diiɗa aka dələv na Asiya ɓa. Va wagəɗ na aŋgəl na dəgap gən a Zerusalem dabəŋ ki wəzləra na Pentekosta*.
Pol apel sitik ɗii gugiriɗ net kretiyenɗe a Efesus
17Daga sə Miletussi Pol aslən azet ɗii gugiriɗ net kretiyenɗe na Efesus dəzoŋ gəni. 18Yaŋ azoŋ, apsit na: Kəsəŋgənək va nəsaw də munokum aka dələv na Asiya, va nəbal awaloŋkum. 19Nəgəɗ sənək wəza sən Ɗəfdaya də makraw taka də sin arawa, də adəv bonoy məs dərəwa. Yahudiyenɗe aɗumoŋguk mbrayen akawa. 20Kəsəŋgənək adəv wən məs nədawpel sukum nəɗaman wən maɓɓan məs naw tər sukum wəray ɓa, vi nərban sukumək ko atəki wəkkala, ko eŋgil anokumda. 21Nəpel sitik Yahudiyenɗe dit ɗii məs Yahudiyenɗeŋ ɓa pak də sembe, say dəppanən gən mambray neti, dəkpaŋgaŋ gən aza Maŋgəlva dətafən gən Ɗəfdaya nam Zezu. 22Yaŋ kakaŋ na, əntatə mbat a Zerusalem vi Əmpəs Salala dədaw kuwa, nəsən an dəda rəhu adak ɓa. 23Amma zəga taka an nəsən harana: Əmpəs Salala tay nah su na, ko aŋga pak ngiyamɗe də bonoy tay narəwa. 24Amma naw azaw na, ko an əmtəka ko nəmtə ɓa, an nəɓapək wəgrak wəslən nawa də wəza naw məs Ɗəfdaya Zezu apəl suwəŋka, wəza nan ndəni wərban labara nenek aka wənna mbəlembəle na Maŋgəlva.
25Nəbalək awaloŋkum pakə, nərbanək labara nenek na məlĩ na Maŋgəlva. Kakaŋ nəsənəka, kulanən na ɗaah haraw əmpa ɓa. 26Ndəni kan nədarban sukum dəpaŋka: An ɗəf səmbokum azəka mbrayen nawi əmpa ɓa. 27Vi nərban sukumək wəŋgla na Maŋgəlva pakə, nəɗaman sukum ko mi ɓa samə. 28Məga zukum məga ngaɓa məs Əmpəs Salala apəl sukuməŋka. Məsoŋ məzuteɗeŋge net kretiyenɗe na Maŋgəlva, məs arah də əmta na Wətəni. 29Naw nəsənka, an nəmbatka, kra muyeŋɗe mbreyit watoŋgoŋ awaloŋkum, apanən na ngaɓa ɓa. 30Pay maɓɓan wade, ɗii səmbokum wawaŋ tepelke, vi ɗii na Maŋgəlva dəsbetin gəni. 31Asna, say məga məɗumon wəsva hoku məs nəgəɗ kapay də dəfəɗ pak əntatə səɓ sukum taka taka pak dit sin arawa.
32Kakaŋ na nəppokumək ava Maŋgəlva də mbəlembəle nani. Waɓap wəɓay gukum waɓap wəgəɗ sukum zəzay də zəzay məs azaɓan viyit ɗii nan pakə. 33Nəssoh təbəs net deleɗ ɓa, walla təbəs na meleŋge, walla lukut səva ɗəf ɓa. 34Munokum sən kikum kəsənənka nəgəɗək wəza sən kiwa, natər su wəray nawa də net ɗii məs dədasoŋ də ina. 35Zəga pak nərban sukumko say məbaah sit ɗii mədekti də zev wəzaska, məɗumon səm wənna Ɗəfdaya sən kiyən anah na: Ɗəf məs dəpsən zəga sən ɗəffa, ndəni zən nek dayki ɗəf məs dərah zəga.
36Adan Pol agrak wəpel nani, akdukuk afuŋ azulika. 37Ndəɗaŋ pak a həmaŋka arəŋ gənənka. Apsənənək tive də sin areti. 38Zit sahi sawɓa vi anah na kulanən na ɗaah haraw əmpa ɓaŋka. Yas kan alhanən atəki naw peŋ adəv bəlay.
ទើបបានជ្រើសរើសហើយ៖
Wəza net Masləŋɗe 20: GDRNT85
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Gidar New Testament © Bible Society of Cameroon, 1985.
