1 Korintiyen 2
2
Ərban Krestu məkpa'ən aka wəlaŋga
1Milmiŋgiɗwa, gala ndaw anokumda na, nənah sukum wən maɓɓan ɓa, say goŋga na Maŋgəlva məs də ɗamə, nəpel sukum də wən tattuwãh ɓa, walla də əpel nawsən zəga ɓa. 2Vi ənziya naw nəsaw anokumda na, nəŋgəl əsən zəga mbərən awalaŋkum ɓa, say Zezu Krestu an məkpa'ən aka wəlaŋga. 3Nədek azokum va mədaku də ikker vi geslne diiɗa. 4Əpel nawa də zega an nərbə, tay va na ɗəf məzu mbəɗan ɗəf ɓa, amma də sembe na Əmpəs na Maŋgəlvayi nədarban wənnani. 5Vi ətaf nokum adawziw aka əsən net ɗii ɓa, amma dəziw gən də sembe na Maŋgəlva.
Əmpəs asənək məɗama na Maŋgəlva
6Intatərban zəga sit ɗii na Maŋgəlva məs dəsoŋ ɗii gugiriɗ də Əmpəs na Maŋgəlva. Amma əsən nan na duniyaŋki ɓa, walla sembe net ɗii məzəmaŋ məlĩn məs məɗiyit ka dəzaŋ gənəŋki ɓa. 7Intatərban wən məɗama na Maŋgəlva an dəɗam ama heret ɗiiyi, Maŋgəlva azaɓan səmək ka dəsan gən gakdak nam dabəŋ ki əɗɗa dəlva fuŋ. 8Ko ɗəf taka səmbet ɗii gakdakɗe, tay dəsən sembe nan ɓa. Va asənənək na akpa'ən na Ɗəfdaya na gakdak na Maŋgəlva aka wəlaŋga məzliwrihe ɓa. 9Va ɗerewel anah na:
Zega məs hara ɗəf dula ɓa, məs sləma ɗəf dəpprəm ɓa,
ɗəf tay naɗum wənnan ɓa.
Maŋgəlva azaɓan sitik ɗiiyen dəŋgluwəni.
10Amma səmi Maŋgəlva arban səm wən məɗamaŋka, də Əmpəs nani. Vi Əmpəs Salala* waɓap wəkayan gabba wəɗum na Maŋgəlva an hədək diiɗa, də an məs dəɗam pakə. 11Wən na makra ɗəf na, say əmpəs nani dəsən wənna makran katər gəni. Vaski bo say Əmpəs na Maŋgəlvayi dəsən wənna Maŋgəlva. 12Nam əmpəs nadəv dəlvəŋ mərah ɓa, amma əmpəs an dəde səza Maŋgəlva mərahə, vi məsən gən an Maŋgəlva apsəm pakə.
13Wən məs nədawpeliŋka, əntatə pel an məs ɗii arbaŋ suwən ɓa, amma əntatə pel də an məs Əmpəs na Maŋgəlva arbani, vi kaw boton gabba goŋga na wən məs əmpəs apsit ɗii məs də Əmpəs na Maŋgəlva. 14Ɗəf an tay də Əmpəs na Maŋgəlva ɓa, aɓap na ətaf wən an gesiŋ məs Əmpəs na Maŋgəlva adarban ɓa. Aza ɗəf nan na zəga na dərway, aɓəsna əpprəm gabba wənnan ɓa, say Əmpəs na Maŋgəlva dədarban sən ɗəffa, dəpprəm gən gabbani. 15Amma ɗəffan də Əmpəs na Maŋgəlva, wagohon wənnan pakə, amma nan ɗəf tay naw ɓap wəgohon wən akan anan ɓa. 16Va məver wənnan na:
Naway dəsən əɗum na Ɗəfdaya di?
Naway naw ɓap əzaɓan wən sən Maŋgəlva di?
Amma namə, də wəɗum na Krestu mənani.
ទើបបានជ្រើសរើសហើយ៖
1 Korintiyen 2: GDRNT85
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Gidar New Testament © Bible Society of Cameroon, 1985.