Maahtiyo 27
27
Ciisahs ekii'-ishiwicikaniwitc Paailatonk
(Mark 15.1; Luke 23.1-2; John 18.28-32)
1Wiipa kikishep, kahkina Kihcianami'ewikimaak, kaaniikaanisiwaatc kaye onahshowewinink okii'-onentaanaawaa cinihsimintc Ciisahsoon. 2Piiwaapihkweyaapiin tahsh kii'aapataniniwan ekiih tahtahkopinintc, weti hsa ekii'-ishiwicikaniwitc kaakii'ishi ayaanitc Paailatoon (Pilate), kihci'onahshowewikimaan Oroomink (Rome) kaaonci tipentaakosinitc.
Cootahs ekii'-akoonitisotc
(Acts 1.18-19)
3 #
Act 1.18-19. Ahpii tahsh Cootahs (Judas) kaakii'-mamishi'iwetc ekiih kihkentank ewii'-nihcikaniwinitc Ciisahsoon, kii'maanentam. Miitahsh kaa'ishi kiiwemiinaatc Kihcianami'ewikimaa', i'i kaye kaaniikaanisinitc onahshowewinink ini nihsimitana kihciwaapaapihko shooniyaanhsa'#27.3 nihsimitana kihciwaapaapihko shooniyaanhsa': waapantan 26.15. kaakii'-miinintipan. 4Miihsh kaa'inaatc: “Ninkii'-mamaashii hsa ekii'-mamishi'ak a'a inini kekoonini kaakii'ishi mamaashiihsik, cinihsintc,” okii'-inaa'.
O'o tahsh okii'ishi nahkwehtaakoo': “Kaawiin niinawint kekoon nintinentansiimin, aaniihsh kiin i'i kitishihcikewin,” okii'-ikoo'.
5Miitahsh Cootahs kaa'ishi piintike pahkihtehsakihshimaatc i'imaa Kihcianami'ewikamikonk i'i kihciwaapaapihko shooniyaanhsa', ekii'ani maacaatc ekii'awi akoonitisotc.
6Kihcianami'ewikimaak tahsh okii'-otaahpinaawaa' i'i shooniyaanhsa' ekii'-ihkitowaatc: “Mii hsa wa'a shooniyaa kaakii'-inaapatisitc cionci nihsintc awiya. Kaawiin hsa inahtehsinoon Onahshowewin ciahsankipan i'imaa anami'ewipakitinikewinink.” 7Miitahsh kaa'ishi onentamowaatc ewii'-inanohkaanaawaatc ini shooniyaan ciataawewaatc i'i ahki Otoonaakanihke otAhkiim#27.7 Otoonaakanihke otAhkiim: kii'ayaani hsa ahkiini kaakii'-nihtaaontinaawaatc waapikanan kaakii'-oshihtoowaatc kekoonan waapikanink kaakii'-onci oshihcikaatenikin. Miitahsh maawiin o'oweni kaakii'-ataawewaatc Kihcianami'ewikimaak. kaaishinihkaatenik. Miitahsh kaakii'onci ataawewaatc ke'ishi na'inimintc kaaniponitc piiwite'. 8Miitahsh kaa'onci ishinihkaatek i'i pankii ahkiini, Kaaishi miskwiiwahkamikaak, piinihsh o'o ahpii noonkom kaakiishikahk.
9 #
Zech 11.12-13. Miitahsh o'o kaa'onci ishihsek, ci‑ishihsenik hsa Kishemanitoo otipaacimowininiiman Ceramaaya (Jeremiah) kaakii'-ihkitonikopanen: “Okii'-otaahpinaawaa' i'i nihsimitana kihciwaapaapihko shooniyaanhsa' kaa'inakimaanitc Isriyala' (Israel) kaa'ishi‑inahsaawaatc ci‑inataawaakaniwinitc. 10Miitahsh kaa'inaapaci'aawaatc ini shooniyaan ekii'-ataawewaatc i'i pankii ahkiini kaakii'-ontinaawaatc waapikanan onaakanihkek, taapishkoo kaaTipenciketc kaakii'-ishihpan ci‑ishihcikenaaniwaninik.” Mii kaakii'-ihkitonikopanen.
Paailat kaakii'ishi kakwecimaatc Ciisahsoon
(Mark 15.2-5; Luke 23.3-5; John 18.33-38)
11Ciisahs itahsh kii'niipawi enaahsamiinitc ini Paailatoon (Pilate) kihci'onahshowewikimaan, ekii'-ikotc: “Kiin ina kitinow Coowak okihciokimaamiwaan?” okii'-ikoon.
Ciisahs tahsh kii'ishi nahkwehtam: “Kitepwe kaaihkitoyan,” okii'-inaan. 12I'i tahsh Kihcianami'ewikimaa', i'i kaye kaaniikaanisinitc onahshowewinink okii'-anaamimikoo' sesik ekii'-ishihcikehsik, kaawiin tahsh kekoonini okii'ishi nahkwehtawaahsii' i'i kaakii'ishi anaamimikotc.
13Paailat tahsh okii'-inaan: “Kaawiin ina kinoontawaahsiik i'i kahkina eshi anaamimihkwaa?” okii'-inaan.
14Shaakooc tahsh Ciisahs kaawiin awaac pankii kiihkiikitohsii, ekii nahkwehtansik aapiinc iko peshik kaakii'ishi anaamimintc. Aahpici tahsh kihci'onahshowewikimaa kiihkihcimaamahkaatentam.
Ciisahs ekii'-inaahkonikaniwitc cinipotc
(Mark 15.6-15; Luke 23.13-25; John 18.39—19.16)
15A'a tahsh kihci'onahshowewikimaa kii'nihtaa ishihcike ekiih pakitinaatc peshik kipa'waakanan. Kiishaac awiyan okii'-onenimaawaan awenenan kepakitinimintc. Mii hsa 'o kaanihtaa'ishihciketc entahswaa kaaPimaaci'ikoowi Wiihkwantink. 16I'i tahsh ahpii kii'ayaa peshik kipa'waakan Paraapahs (Barabbas) ekii'-ishinihkaasotc. Kahkina hsa awiya' okiih kihkenimikoo'. 17Ekii'-ohkwiinonitc tahsh awiya', Paailat (Pilate) okiih kakwecimaa': “Awenen entawenimiyek cipakitinamawinakook? Paraapahs ina? komaa kaye Ciisahs, ini Kishemanitoo kaa'onaapamaatc kaainintc?” okii'-inaa'. 18Okiih kihkenimaa' aaniihsh i'i kaaniikaanisinitc Coowa' ekii'-mihciontenimaanitc Ciisahsoon. Miitahsh kaakii'onci piitamawintc Ciisahsoon.
19Mekwaa tahsh e'namatapitc tipaahkonikewapiwinink, awiyan okiihpi kanoonikoon ekii'-inwehtamawaanitc wiiwan: “Keko papaamenimaahken a'a kwayahk inini, aaniihsh niipiwa' ninkiih kakwaatakihtoo ekiih pawaanak tipihkonk.”
20 Kihcianami'ewikimaak, iki kaye kaaniikaanisiwaatc, okii'-ompwe'aawaa' i'i kaapaahtiinonitc o'o ekii'-ihkitowaat: “Wiintamawihk Paailat cipakitinaatc ini Paraapahsan, meshkwac itahsh cinihsimintc Ciisahsoon.” 21Paailat tahsh okiih kakwecimaa': “Awenen hsa kepakitinak iki kaaniishiwaatc?”
Miitahsh kaa'-ikotc: “Paraapahs pakitin!”
22Paailat tahsh kii'ishi kakwetwe: “Aaniin tahsh wiin ketootawak Ciisahs, Kishemanitoo Kaaonaapamaatc kaaicikaniwitc?”
Miitahsh kaa'ihkitonitc kahkina awiya': “Ta‑akosaka'waa!”
23Paailat hsa miinawaa kii'ishi kakwetwe: “Aaniin tahsh kaa'ishi mamaashiitc?”
Miitahsh aanciko enikohk kaa'ishi maaciishaahshaakowenitc: “Ta‑akosaka'waa!” kii'ishi shaakowewa'.
24Ahpii tahsh Paailat ekii'-waapantank awahshime kekoonini ci‑ishihcikehsik, ekii'-naniisaanentank kaye cikihci‑inahkamikisinitc kaakii'-ohkwiinonitc, miitahsh kaa'ishi otaahpinank nipiini ekiih kisiininciitc enaahsamiinitc ekii'-ihkitotc: “Keko tahsh niin kekoon ninka pakamishkaakohsiin wa'a kaawii'-nihsek inini! Kiinawaa aaniihsh i'i kitishihcikewiniwaa.”
25Miitahsh o'o kahkina kaa'ishi nahkweshaakowaanikotc: “Taka niinawint pisaan ninka inakimikoomin, ekii'-nihsankitc, niniicaanihsinaanik kaye,” okii'-ikoo'.
26Miitahsh Paailat kaa'ishi pakitinamawaatc i'i Paraapahsan. Ekii'-ishkwaa pahpahshanshe'omintc tahsh Ciisahsoon, miitahsh kaa'ishi pakitinamawaatc shimaakanihsa' ciakosaka'waanitc.
Shimaakanihshak ekii'-maanenimaawaatc Ciisahsoon
(Mark 15.16-20; John 19.2-3)
27Paailat (Pilate) oshimaakanihshiima' okii'-ishiwinaani Ciisahsoon otoonahshowewi waahkaa'ikanink. I'i tahsh shimaakanihsha' i'imaa kaakii'-ayaanitc okii'-waahkaashkawaani Ciisahsoon. 28Miitahsh iki shimaakanihshak kaa'ishi kiicihkonayepinaawaatc ekiih pihsihkamo'aawaatc e'miskwekaninik naapishkikan. 29Okaawiminakashiink kaye ekii'onci oshihtoowaatc pahsihkwepison ekii naapinaakohtoowaatc kihciokimaawipahsihkwepisonink, ekiih pihsihkamo'aawaatc. Mihtikonhsini kaye okii'-miinaawaan citahkonaminitc okihcinihkink. Miitahsh kaa'ishi ociciinkwanapiihtawaawaatc ekii'-maanenimaawaatc ekii'-ihkitowaatc: “Kikihci‑inenimikoo, kaakihciokimaahkantawatwaa Coowak!” 30Miitahsh kaa'ishi sasiihkwaanaawaatc, ekii'-mahkamaawaatc i'i mihtikoonhs kaakii'-miinaawaahpan, ekiih pahpahkihteyaahkohtikwaane'waawaatc. 31Miitahsh ekiih temiihkinci'aawaatc ekiih kiicihkonayepinaawaatc naapishkikan, kaa'ishi kiiwepihsihkamoonaawaatc ini okikishkikanini. Miitahsh kaa'ishi maaciinaawaatc ewii'-akosaka'waawaatc.
Ciisahs ekii'-akosaka'ontc
(Mark 15.21-32; Luke 23.26-43; John 19.17-27)
32Ekii'ani maacaawaatc itahsh, okii'-nakishkawaawaan ininiwan Saaiman (Simon) ekii'-ishinihkaasonitc, Saairiiniink (Cyrene) ekii'-onciinitc. Miitahsh ini shimaakanihshak kaa'ishi'-aawaatc cipimiwitamawaanitc Ciisahsoon otaashiteyaahtikomini.#27.32 Ciisahsoon otaashiteyaahtikomini: Mii hsa kahkina awiya kaakii'-inaahkonintc cinihsintc, ci‑ishiwanetc otaashiteyaahtikoman, ci‑ishiwinaatc aanti waahtashiakosaka'ontc. Kaakiih pimitaahkwakoocininitc ehta kaakiih pimiwane'intc. Waapantan John 19.17. 33Weti tahsh eni otihtamowaatc hsa Kaalkahtaa (Golgotha) kaakii'-icikaatek. Mii hsa 'iwe Ohtikwaanikekan kaaicikaatek. 34Miitahsh i'imaa kaakii'ishiwii'-mina'aawaatc Ciisahsoon shoominaaponi kaakiih takwaakaminikaatek kekoonini kaawiihsakaninik. Ekii'-mansihpitank tahsh kaawiin kiiwii'-minihkwehsii.
35 #
Psa 22.19. Miitahsh kaa'ishi akosaka'waawaatc i'imaa aashiteyaahtikonk, shikwa ekii'-nenaawinamaatiwaatc okikishkikanini ekii'-ahpakicikewaatc ekii'anta pana'amowaatc awenen keayaatc i'i okikishikanini. 36Miitahsh kaa'ishi onapiwaatc ekiih kanawenimaawaatc. 37Enihkwekoocink itahsh kii'-akooteni oshipii'ikan otanaamimikoowin ekii'-ishipii'ikaatenik: “Mii hsa wa'a Ciisahs kaakihciokimaahkantawaatc Coowa'.” 38Niishin (2) hsa okiimoocishka' okiih takowiici akosaka'okoomaa', peshik okihcinihkink inahke ekii'ishi akoocininitc, kotak tahsh onamantinihkink.
39 #
Psa 22.8. Awiya' hsa kaakii'-mayaashkaakotc kii'wewepihkwepani'owa' ekiih kakaansomikotc 40#Mat 26.61; Jhn 2.19. ekii'-ikotc: “Kiin ihsa kaawiih piikopitooyampan i'i Kihcianami'ewikamik, kaawiih kiishahkitooyampan kaye nihsokiishikwakaak! Pimaaci'itison! Kiishpin Kishemanitoo oKosihsan tenowiwanen, niihsaantawen i'imaa aashiteyaahtikonk!” okii'-ikoo'.
41 Kihcianami'ewikimaak, iki kaye onahshowewikihkino'amaakek, iki kaye kaaniikaanisiwaatc Coowak, mii hsa peshikwan kewiinawaa kaa'ishi miihkinsomaawaatc: 42“Ekiih pimaaci'aatc tahsh kotak awiya', shikwa tahsh kaawiin okashkihtoohsiin cipimaaci'itisotc. Wiin iitok inaa ehkihciokimaahkantawaatc i'i Isriyala'. Kiishpin hsa kashki'otc ciniihsaantawetc i'imaa aashiteyaahtikonk, mii hsa 'i payesh citepwehtawank. 43#Psa 22.9. Kishemanitoon iitok otahpenimonotawaan. Taka hsa shemaak oka naatamaakoon kiishpin entawenimikokwen. Mii iitok kaa'ihkitotc: ‘Kishemanitoo nintooKosihsimik,’ ” kii'‑ihkitowak.
44Iki hsa okiimoocishkak kaakii'-wiiciakoocinoomaawaatc, peshikwan okii'ishi miihkinsomaawaan.
Ciisahs inahke kaakii'ishi nipotc
(Mark 14.33-41; Luke 23.44-49; John 19.28-30)
45E'naawahkwek tahsh misiwe i'imaa ahkiink kiihkashkiitipihkan nihsotipa'ikan minihk. 46#Psa 22.2. E'nihsotipa'ikaneyaanik tahsh Ciisahs enikohk kii'‑ihkito: “Iilaai, Iilaai! Lamaa sapaahtaanii? (Eli, Eli, lama sabachtani?)” Mii hsa i'i kaa'icikaatek: “NinKishemanitoom, ninKishemanitoom! Wekonen kaakii'onci nakashiyan?”
47Iki tahsh aaninta i'imaa kaakii'-niipawiwaatc e'noontawaawaatc e'ihkitonitc kii'‑ihkitowak: “Ilaaicawan (Elijah) ohsha onantomaan#27.47 Ilaaicawan onantomaan: Coowak itahsh otishikiishwewiniwaank kekaa peshikwan kii'‑inihtaakwanoon ‘ninKishemanitoom’, ‘Ilaaica’ kaye. cipinaatamaakotc.” 48Peshik tahsh kii'ahpahtoo ekii'-otaahpinaatc iska'ipaanan, shoominaapo kaawentakintek tino ekiih shaapopanaatc ekiih cehkipiinaatc, ekii'-niimaahkwa'amawaatc Ciisahsoon, ekiih kakwemina'aatc.
49Kotak tahsh kii'‑ihkitowak: “Taka pii'imaataanin Ilaaicawan cipipimaaci'ikotc.”
50Ciisahs tahsh miinawaa enikohk kiihkishiiwe, miitahsh kaa'ishi poonipimaatisitc.
51 #
Exo 26.31-33. I'imaa tahsh Kihcianami'ewikamikonk piintik, kipiika'ikan#27.51 kipiika'ikan: kaakiih kipiikakootek nahsawaya'ii kaashi kohtaanentaakwahk piintik, i'imaa tahsh maawac kaakii'-ishi kohtaanentaakwahk piintik Kihcianami'ewikamikonk. kiihtashwekakoote, ekii'-aakawakootek kaashi kohtaanentaakwahk piintik. Mii hsa i'i ahpii i'i kaa'ishi taashkiikihsek, ishpimink ekii'onci maacitaashkihsek piinihsh tapashiihsh ekii'ishi taashkiikihsek. Mii kaye 'i ahpii kaakoshkwahkamikihsek. Ahsiniik kaye kiihtaahtaashkihsewak. 52Ciipekamikoon kaye kiihpaahkihsewan, niipowa' tahsh Kishemanitoo okwayahkwaatisiima' kaakii'-niponihpan kiihkiiwepimaatisi'aawa', 53ekiih saaka'amowaatc ciipekamikonk. Kiikiiwepimaatisi'imintc Ciisahsoon kii'ishi piintikewak i'imaa Kishemanitoo otootenaamink.#27.53 Kishemanitoo otootenaamink: Ceroosalamink (Jerusalem) hsa kaaicikaatek. Kiihpaahtiinowa' tahsh kaakii'-waapamikowaatc.
54Ahpii tahsh a'a shimaakanihshiiwikimaa, i'i kaye oshimaakanihshiima' kaakii'-wiiciiwikotc kaakiih kanawenimaanitc Ciisahsoon e'waapantamowaatc ahkiini ehkoshkohsenik, kahkina kekoonini kaye kaakii'-ishihsenik, wiinke hsa kiihkihcisekisiwak, ekii'-ihkitowaatc: “Tepwe hsa Kishemanitoo ini oKosihsan!”
55 #
Luk 8.2-3. Kiihpaahtiinowak hsa kaye ihkwewak weti waahsa ekii'-onsaapiwaatc, Kaalaliink (Galilee) kaakiihpionci piminisha'waawaatc Ciisahsoon ekiihpi pimiwiici'aawaatc. 56Miiwak ihsa oko kaakiih takwiinowaatc i'imaa, Meri (Mary) Maakatala#27.56 Maakatala: mii hsa ootenawenhs kaakii'-ayaak ninkaa pii'anonk inahkekaam Kaalaliiwi Saaka'ikaniink. (Magdala) ootenaanhsink kaaonciitc, shikwa kotak Meri kaakii'-okosihsitc Ciimisan (James), Coosapoon (Joseph) kaye. Sepatii (Zebedee) tahsh wiiwan tahsh kaye i'imaa kii'ayaawan.
Ciisahs kaakii'ishi na'inintc
(Mark 15.42-47; Luke 23.50-56; John 19.38-42)
57Ahpii tahsh e'ani onaakohshininik,#27.57 e'anionaakohshininik: cipwaa pankihshimonik maawiin kiihtakohshin, aanihsh ehPahkweshikanikiishikahk kiipankihshimonk, mii hsa e'maacihsek Anwepiiwi kiishikan. kiihtakohshin e'wenootisitc inini Coosap (Joseph) ekii'-ishinihkaasotc, weti ekii'-onciitc ootenaank Eramahtiiya (Arimathea) kaakii'-icikaatenik. 58Okii'-naasihkawaan tahsh Paailatoon (Pilate) ekiih kakwetwetc cimiinintc i'i Ciisahsoon owiiyawini. Miitahsh kaa'ikotc pisaan iko cimiinintc. 59Okii'awi otaahpinaan tahsh wiiyawini ekiih tatipahpitootc oshki waapishkiikinooni ekii'-aapacihtootc. 60Miitahsh i'imaa kaakii'ishi na'inank na'initiiwikamikonk wiin hsa kaakii'-anoohkiikopanen cioshihtamawintc i'imaa kiishkaapihkaank. Kihciahsiniin hsa okii'ishi kipitihtipinaan i'imaa ishkwaantenk. Miitahsh kaa'ishi maacaatc. 61Kii'ayaawak itahsh i'imaa Meri Maakatalawihkwe (Mary Magdalene) a'a tahsh kotak Meri (Mary) ekii'-inaahsamapiihtamowaatc i'i ciipekamikoni.
Weweni ekiih kanawencikaatek i'i ciipekamik
62Ekii'ani waapaninik tahsh e'Anwepiiwi kiishikaninik, Kihcianami'ewikimaak, iki kaye Perahsiik (Pharisees), okii'-naasihkawaawaan Paailatoon (Pilate), 63#Mat 16.21; 17.23; 20.19; Mrk 8.31; 9.31; 10.33-34; Luk 9.22; 18.31-33. ekii'-inaawaatc: “Kehci‑inentaakosiyan, nimaamihkawimin hsa ekii'-ihkitotc a'a okakiinawishk mekwaa kiipimaatisitc. O'o hsa kii'‑ihkito: ‘Nihsokiishikwakaak (3) hsa ninka kiiwepimaatis.’ 64Inaahkoniken tahsh aahpici weweni cikanawencikaatek i'i ciipekamik piinihsh cinihsokiishikahk. Maakishaa hsa okihkino'amawaakana' takimootiwa' i'i wiiyaw ci‑inaacimonitc hsa ekiih kiiwepimaatisitc. I'i tahsh keishi kiiwanimonitc nawac iitok i'i tamaashipicikemakanini ahpiihc wiin nihtam i'i kaakii'-inwaanitisokopanen a'a okakiinawishk,” kii'‑ihkitowak.
65Paailat hsa kii'‑ihkito: “Ayaawak iitok kaakanawencikewaatc, miiwak iki aapaci'ihkwak ciaayiici kanawencikaatek aaniin i'i keahkokashkihcikaatek,” okii'-inaa'.
66Miitahsh kaa'ishi maacaawaatc ekii'-akwaskiwahsamowaatc awiyan cipaahkinansinik. Iki tahsh kaakanawencikewaatc shimaakanihshak weweni okiih kanawentaanaawaa.
ទើបបានជ្រើសរើសហើយ៖
Maahtiyo 27: OJBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ojibwe Shorter Bible (Roman Script) © 2008 Canadian Bible Society
