Maahtiyo 17
17
Ekii'-waahsenaakositc Ciisahs
(Mark 9.2-13; Luke 9.28-36)
1 #
2Pe 1.17-18. Paanimaa tahsh ninkotwaahsokiishik e'ishihsenik Ciisahs okii'-maaciinaan Piitaroon (Peter), iniweniwa' kaye kaawiicihkiwentinitc Ciimisan (James) shikwa Cwaanan (John), wakitatin tahsh ekii'-ishiwinaatc, wiinehtawaa weti ekii'-ishaawaatc kaakii'ishi ishpatinaanik. 2Mekwaa tahsh ehkanawaapamikotc, pahkaan kii'ani ishinaakosi taapishkoo kiisihs kaa‑ahpiihci waahsenaakositc, miihshi'i kaa'‑ahpiihci waahsenaakositc a'a Ciisahs. Okikishkikanan kaye wiinke kii'waapishkiwaahsenaakwaniniwan. 3Iki kaye nihsin kihkino'amawaakanak okii'-waapamaawaan Moosihsoon (Moses) shikwa Ilaaicawan (Elijah) ekii'-wiiciiwaanitc Ciisahsoon, ehkakanoonitinitc. 4Piitar tahsh okii'onci kanoonaan Ciisahsoon: “Tepencikeyan, aahpici hsa mii'i kwayahk o'omaa kaa‑ayaayank, kiishpin ishi mihsawentaman, nihsin akawaahte'ikanan ninka patahkitoonan, kiin peshik ciayaayan, Moosihs kaye peshik, Ilaaica kaye peshik,” kii'‑ihkito.
5 #
Gen 22.2; Deu 18.15; Psa 2.7; Isa 42.1; Mat 3.17; 12.18; Mrk 1.11; Luk 3.22. Mekwaa tahsh ehkakitotc, waahsewahkwiini okii'-aakawishkaakonaawaa. Miitahsh i'imaa kaakii'onci noontawimintc awiyan ehkiikitonitc: “Mii hsa a'a tipinawe ninKosihs kaasaaki'ak, kaaminwaapamak kaye. Pisintawihk.”
6Ekii'-noontawaawaatc tahsh awiyan ehkiikitonitc, wiinke kiihkihci sekisiwak kihkino'amawaakanak. Miitahsh kaa'ishi animihkopani'owaatc i'imaa mihtahkamik. 7Ciisahs okiih pinaasihkawaa' ekiih saaminaatc ekii'-inaatc: “Pasikwiik. Keko sekisihkek,” okii'-inaa'. 8E'inaapiwaatc itahsh, kaawiin pahkaan awiyan okii'-waapamaahsiwaawaan, Ciisahsoon ehta.
9Ehpi niihsaamaciwewaatc tahsh Ciisahs okii'-inaa': “Keko wiin wiintamawaahkek awiya o'owe kaa'ishi waapanta'ikoowisiyek, paanimaa hsa kiikiiwepimaatisi'imintc ini Inini oKosihsan.”
10Kihkino'amawaakanak itahsh okiih kakwecimaawaan Ciisahsoon: “Wekonenini wenci ihkitowaatc iki kaakihkino'amaakewaatc Onahshowewin, Ilaaica pinamaa tatakohshin?”
11Ciisahs tahsh okii'-inaa': “Ilaaica hsa nihtam tatakohshin cipi onahtootc kahkina kekoonini. 12#Mat 11.14. O'owe tahsh kiwiintamawininim: Ilaaica hsa aasha kiihtakohshin, pemaatisiwaatc tahsh kaawiin okii'-nihsitawinawaahsiwaawaan, okiih tootawaawaan kaye wiinawaa aaniin kaakii'ishi mihsawentamowaatc. Miitahsh peshikwan ketootawaawaatc ini Inini oKosihsan.”
13Kihkino'amawaakanak itahsh kii'onci nihsitohtamook Cwaan (John) Siika'antaakewininiwan ihsa kaakiih tashimimintc.
Ciisahs ekii'onci saakicinisha'waatc maciahcaahkwan i'imaa kwiiwisenhsink
(Mark 9.14-29; Luke 9.37-43)
14Ahpii tahsh ekiih pinaasihkawaawaatc i'i kaapaahtiinonitc, inini okiih pinaasihkawaan Ciisahsoon ekii'-ociciinkwanapiihtawaatc, 15ekii'-inaatc: “Tepencikeyan, kohpaatenim ninkosihs! Ocipinikowaahpine ohsha, kaye mooshak ehkihci ishiayaatc. Macohtehse mooshak, pahkopiihse kaye mooshak. 16Nintaa nakiihpiitamawaak ihsa iki kikihkino'amawaakanak, kaawiin tahsh okiih kashki'aahsiwaawaan ciminoayaanitc.”
17Ciisahs tahsh kii'‑ihkito: “O'omaa kahkina eyaayek, etatawe kaawiin kitepwehtansiim, kaawiin kaye kwayahk kitishi ayaahsiim! Kaanaka naa minihk kewiiciiwinakookipan? Kaanaka naa mii na kitaa shashiipenimininim! Piitamawihshin o'omaa a'a kwiiwisenhs!” 18Ciisahs tahsh okiih kanoonaan ini maciahcaahkwan, miitahsh shemaak kaa'ishi saaka'aminitc. Shemaak tahsh wiinke kii'minoayaa a'a kwiiwisenhs.
19Kihkino'amawaakanak tahsh okiih kiimooci naasihkawaawaan ekii'-inaawaatc: “Wekonen kaa'onci pwaanawi'ankitc a'a maciahcaahk cisaakiciwepinankitc?”
20 #
Mat 21.21; Mrk 11.23; 1Co 13.2. Ciisahs tahsh okii'ishi nahkwehtawaa': “Aaniihsh onsaam pankii kitepweyentaam. Kiishpin ihsa saapiayaayek tepweyentamowin, taapishkoo kaaishi naakwahk i'i maawac kaa‑akaahsink kihtikaanenhs mastart (mustard), pisaaniko kitaakanootaam ehpihkwatinaak cikii'-ihkitoyekipan: ‘Taka o'omaa oncimaacaan, weti ishaan!’ Miitahsh iko keshi maacaamakahk. Kahkina kekoon kitaa ishihcikem,” okii'-inaa'. 21[“Awiya ohsha ehta anami'ehtawaatc Kishemanitoon, wiihsinihsik kiianami'aatc, mii ehta 'imaa keonci saakiciwepinaahpan ono tino maciahcaahkwan,” okii'-inaa'.]#17.21 O'owe kaaishi kihkinawaacipii'ikaatek [ ] 21 oshipii'ikanenhs, kaawiin kiihtakopii'ikaatehsinoon aaninta kehteoshipii'ikewinink. Waapantan Mark 9.29.
Ciisahs ekii'-niikaani wiintamaaketc keishihnipotc, keishih kiiwepimaatisitc kaye
(Mark 9.30-32; Luke 9.43-45)
22Ahpii tahsh iki kahkina kihkino'amawaakanak e'maawaci'itiwaatc i'imaa Kaalaliink (Galilee), Ciisahs okii'-inaa': “Niin Inini oKosihsan ninka pakitinikoo ciotaahpiniwaatc 23iki kaawii'-nihshiwaatc. Nihsokiishik itahsh ishihsek miinawaa ninka kiiwepimaatis,” kii'‑ihkito.
Kihkino'amawaakanak tahsh wiinke kii'maanentamook.
Ciisahs kiitashimaatc taakihs shooniyaan
24I'imaa tahsh ootenaank Kaparniyamiink (Capernaum) kiihpi ishi takohshinook. Piitar (Peter) tahsh okiihpi antawaapamikoo' i'i kaakiih tipa'ike'iwenitc shooniyaan Kihcianami'ewikamikonk kaakii'ishi aapatisinitc,#17.24 shooniyaan Kihcianami'ewikamikonk kaakii'-ishiaapatisinitc: Kahkina kaakiih tahshiwaatc Coowak kaakii'-ininiiwiwaatc oncitako kiihtipa'ike'aawak entahsopipoon keonci pami'itisoomakaninik i'i Kihcianami'ewikamik. Awiya hsa niishokiishik kiianohkiitc kihtikaanahkamik niisho‑waapaapihko shooniyaanhs kiihkashkihcike. Mii 'iwe minihk kaahtipa'ike'intwaa. miihsh o'o kaa'ikotc: “Kaakihkino'amawinek ina otipa'aan i'i kaatipa'ikaatenik Kihcianami'ewikamikonk?” okii'-ikoo'.
25“Miinanke,” tahsh Piitar kii'ishi nahkwehtam.
Ehpi piintiketc itahsh, cipwaa kiikitotc Ciisahsoon okii'-ikoon: “Saaiman (Simon), aaniin enentaman? Iki hsa kaa‑ataawaakewaatc kekoonan ishi'aawak citipa'amawaawaatc wekimaawaatisinitc. Kahkina hsa kaye entahshiwaatc awiyak otipa'amawaawaan wekimaawaatisinitc.#17.25 otipa'amawaawaan wekimaawaatisinitc: Kiihtipa'ike'aawak hsa i'i ahpii iki kaakii'-ataawaakewaatc kekoonan kiiani piintikatoowaatc kaakii wii'-ataawaakewaatc ootenaahkaank. Kahkina hsa kaye kaakiih tipenimikowaatc kihciokimaan kii'‑ishi'aawak citipa'amawaawaatc kihciokimaan taakihs (tax). Awenenak itahsh kaatipa'amawaawaatc o'oweni ahkiiwi kihciokimaa'? A'a na kihciokimaa okosihsa' owaahkaa'ikanink kaa‑ayaanitc tipa'ike'aawa', komaa kaye kotak awiyak?” okii'-ikoon.
26Piitar tahsh kii'‑ihkito: “Kotak ihsa awiyak tipa'ike'aawak.”
Ciisahs tahsh okii'-inaan: “Tepwe hsa, kihciokimaa okosihsa' kaawiin memwehc otipa'ansiini. 27Kaawiin tahsh wiin kinantawenimaahsiwaanaanik cimaanaapaminankwaa kaawiih tipa'ike'inankwaa Kihcianami'ewikamikonk kaaonciiwaatc. Maacaan itahsh, antakwaashkwepiciken weti saaka'ikaniink. Nihtam itahsh kekwaashkwepinatc kiikooy, okatahkwamaan shooniyaanhsan. Miitahsh citetipa'amank i'i anami'ewikamikonk kaawii'onci tipa'ike'ikooyank o'o kaaishi niishiyank. Ishiwitaaw ciawi miinatwaa i'iwe kitipa'ikewininaan,” okii'-inaan.
ទើបបានជ្រើសរើសហើយ៖
Maahtiyo 17: OJBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ojibwe Shorter Bible (Roman Script) © 2008 Canadian Bible Society
