Maahtiyo 12
12
Aaniin kekii ishihcikenaaniwankipan e'Anwepiiwi kiishikahk
(Mark 2.23-28; Luke 6.1-5)
1Ninkotink itahsh e'ani ishihsenik, Ciisahs okihkino'amawaakana' kaye ehpimohsewaatc i'imaa pahkweshikani kihtikaanink okii'-maaci ociihshipitooni pahkweshikani mashkohsiwan ekii'onci wiihsininitc, aaniihsh kii'noonteskatewa' i'i ahpii. Kii'Anwepiiwi kiishikanini tahsh. 2Ahpii tahsh Perahsiik (Pharisees) kaawaapankewaatc okii'-inaawaan Ciisahsoon: “Inashke kikihkino'amawaakanak opiikonaanaawaa Onahshowewin, aaniihsh Anwepiiwi kiishikan noonkom.”
3Ciisahs tahsh okii'-inaa': “Kaawiin ina wiihkaa kitanamihtoohsiim aaniin Tepit (David) kaakii'-ishihciketc i'i kaye kaakii'-wiiciiwikotc ahpii ewii wiihsiniwaatc? 4Ekiih piintiketc i'imaa pakwaanekamikonk Kishemanitoon kaaishi anami'ehtawimintc,#12.4 pakwaanekamikonk Kishemanitoo kaaishi anami'ehtawintc: mii hsa 'owe kaakii'-icikaatek kihcipakwaanekamikonk kaakiih tanentaakositc kaaTipenciketc. Ninkotink kaye kaaTipenciketc oWaahka'ikan ishinihkaateni. ekii'-amwaawaatc pahkweshikana' kaakii'-miinimintipan ini Kishemanitoon, aanawiin ekiih piikonamowaatc Onahshowewinini. Aaniihsh anami'ewikimaak ehta kiihpakitinaawak ciamwaawaahpan i'i pahkweshikana'. 5Kaawiin ina kitanamihtoohsiim Moosihs (Moses) otOonahshowewin e'ishipii'ikaatenik, anami'ewikimaak ehpiikonamowaatc Anwepiiwi kiishikani Onahshowewin i'imaa Kihcianami'ewikamikonk entahso Anwepiiwi kiishikaninik, shikwa tahsh kaawiin kekoon inaahkonikaniwihsiiwak. 6Kiwiintamawininim, kekoon o'omaa ayaa nawac ehkihci inentaakwahk ahpiihc wiin i'iwe Kihcianami'ewikamik. 7#Hosea 6.6; Mat 9.13. O'o aaniihsh ishipii'ikaate: ‘Kaawiin iki awahkaanak cipakitinaahswaaniwiwaatc ninantawenimaahsiik, i'i tahsh kaa‑antawentamaan, ciminotootaakeyekipan.’ Kiishpin kihkentamekipan aaniin o'o ehkitoomakahk, kaawiin kitaa maci inaahsiwaawaak iki kekoon kaakii'-ishi mamaashiihsikwaa. 8Inini oKosihsan ohsha otipentaan kaaAnwepiiwi kiishikaninik.”
Inini kaakii shiikoshkaanik oninc ekii'-minoayaa'intc
(Mark 3.1-6; Luke 6.6-11)
9Ciisahs kii'anionci maacaa ekii'ani piintiketc i'imaa anami'ewikamikonk. 10Inini tahsh i'imaa kii'ayaa ekiih shiikoshkaanik oninc. Kii'ayaawak kaye ininiwak ekii'-mihsawentamowaatc ewii anaamimaawaatc Ciisahsoon cimacitootaminitc. Miitahsh kaakii'-inaawaatc: “Mii na 'i cipiikonikaatekipan kitOonahshowewininaan kiishpin awiya minoayaa'intc e'Anwepiiwi kiishikaninik?”
11 #
Luk 14.5. Ciisahs tahsh kii'ishi nahkwehtam: “Kiishpin awiya piintaanihkaanehsenitc, pwaanawi'onitc omaanahcaanihshiman e'Anwepiiwi kiishikaninik, kaawiin ina otaatepinaahsiin cikitaanihkaanepinaatc? 12Inini tahsh nawac ishpentaakosi ahpiihc wiin a'a maanahcaanihsh! Miitahsh pisaaniko Onahshowewinink eshi pakitinikaatek ciwiici'intc awiya Anwepiiwi kiishikaninik.” 13Miitahsh kaa'inaatc ini ininiwan: “Niiminihkenin!”
Shemaak itahsh kii'niiminihkeniwan. Miitahsh kaa'ishi minoayaanitc oninciiniink taapishkoo i'i peshik kotak oninciini. 14Perahsiik (Pharisees) itahsh kii'ani maacaawak ekii'-naanaakatawentamowaatc aaniin kekii'ishi nihsaawaatc Ciisahsoon.
Kishemanitoo tipinawe otanohkii'aakanan
15Ciisahs tahsh okiih kihkentaan. Miihsh i'i kaa'ishi maacaatc. Aahpici kaye kiihpaahtiinowa' kaakiih piminisha'okotc. Okii'-minoayaa'aa' kaye kahkina otaahkosii'. 16Miitahsh kaa'inaatc awiya' citipaacimikohsik. 17Mii'iwe kaakii'onci tootank, ci‑ishihsenik mayaa piko Kishemanitoon kaakii'-ihkitonikopanen, Aaiseyawan (Isaiah) ekii'-aapaci'aanikopanen kaakiih kanootamaakonitc.
18 #
Isa 42.1-4. “Mii a'awe nintAnohkii'aakan,#12.18 nintAnohkii'aakan: Kishemanitoo otAnohkii'aakanan mii 'iwe kaye kaakii'-ishinihkaanimintc Kishemanitoo kaakii'-onenimaatc cipimaaci'iwenitc. kaakii'-onenimak,
mii 'awe kaasaaki'ak kaaminwentamo'itc.
Ninka pakitinamawaa nintAhcaahkwan,
oka wiintamawaa' nintinaahkonikewin kahkina entahswewaanakisinitc awiya'.
19Kaawiin takakwe shaakoosohtaakosihsii, kaawiin kaye tapiipaakihsii,
kaawiin kaye takishiiwehsii cimaamiihkwaanitisotc i'imaa miihkanaahkaank.
20I'i kaye kaapoohkoshkaanik mashkohsiiwaahtik kaawiin awahshime oka piikonansiin,
waahsahkonencikaneyaapiini kaye kaani aahtawenik
kaawiin oka aahtawe'ansiin.#12.20 I'i hsa kaapoohkoshkaak mashkohsiiwaahtik, i'i kaye waahsahkonencikaneyaap kaani aahtawek, mii hsa iki kaatashimintwaa kaakashkihtoohsikwaa ciwiici'itisowaatc, kaaniinamaatisiwaatc kaye.
Kaawiin tapakiciihsii paamaa kiikashkihtootc kwayahk inaahkonikewin misiwe ciayaanik.
21Kahkina tahsh entahswewaanakisiwaatc kaapimaatisiwaatc
oka ahpenimonotawaawaan.”
Ciisahs shikwa Pi'elsipol
(Mark 3.20-30; Luke 11.14-23)
22Ciisahs tahsh kiihpiitamawaa peshik awiyan e'waapihsinik, ehkiikitohsinik, aaniihsh okiih kikishkaakoni maciahcaahkoni. Shemaak itahsh okii'-minoayaa'aan. Miitahsh kaa'ishi waapinitc, ekiih kiikitonitc kaye. 23Aahpici tahsh kiihkihci maamahkaatentamook ehkihcipaahtiinowaatc awiyak, ekii'-ihkitowaatc: “Koonike mii wa'a Tepitink (David) kaaontahkaanesitc?”#12.23 Tepitink kaaontahkaanesitc: waapantan 9.27.
24 #
Mat 9.34; 10.25. Perahsiik (Pharisees) tahsh ekii'-noontamowaatc kii'‑ihkitowak: “Kihciokimaa maciahcaahkwan Pi'elsipoloon (Beelzebul) ohsha omiinikoon mashkawisiiwin cisaakiciwepinaatc maciahcaahkwa'.”
25Ciisahs okiih kihkenimaa' aan enentaminitc. Miitahsh kaa'inaatc: “Kiishpin hsa tipencikewinink awiyak kaa‑ayaawaatc wiihpepahkaanihtoowaatc cimiikaatiwaatc, aahpici wiipa tanihshiwanaatanini i'i tipencikewin. Kiishpin kaye ootena komaa kaye taawin pepahkaani'itisoomakahkin, maamiikaatinaaniwank kaye, aahpici wiipa tanihshiwanaatanoon. 26Kiishpin Setan (Satan) kaatashiokimaawitc maamiikaatinaaniwaninik, aahpici wiipa tapankihsinini. 27Kitishim itahsh kaye e'miishitc Pi'elsipoloon mashkawisiiwin kaaonci saakiciwepinimak maciahcaahkwa'. Aanti tahsh kiinawaa wentinamowaatc iki kaapiminisha'onekwaa mashkawisiiwin cisaakiciwepinaawaatc maciahcaahkwa'? Iki hsa kaapiminisha'onekwaa onaakohtoonaawaa kiinawaa anihshaa e'ishiyek. 28Kishemanitoo otAhcaahkwan ohsha niin kaamiishimitc mashkawisiiwin cisaakiciwepinimak i'i maciahcaahkwa'. Miitahsh o'omaa eshinaakwahk Kishemanitoo oTipencikewin aasha ekii'-naasihkaakoyek.
29Kaawiin kaye awiya otaakashkihtoohsiin cipiintiketc cikii mahkamaatc otaya'iimini owaahkaa'ikaniniink ini kaamashkawisiinitc ininiwan. Pinamaa ehta tahkopinaatc ini ininiwan mii'i paamaa cikashkihtoohpan cikii mahkamaatc otaya'iimini owaahkaa'ikaniniink. 30#Mrk 9.40. Awenen ihsa kaawiiciiwihsik mii'i eshinaakositc e'nishkenimitc, awenen kaye kaawiici'ihsik kiimaawantoonikeyaan mii'i eshinaakositc kaaohswewepiniketc. 31Miitahsh kaaonci wiintamawinakook o'o: aaniiniko inini eshi maci ishihciketc, aaniiniko kaye eshi maci ihkitotc tapoonentamawaa. Awiya tahsh wiin maci inaatc Kishemanitoon otAhcaahkoni kaawiin tapoonentamawaahsii. 32#Luk 12.10. Awiya piko kemaci inaatc ini Kishemanitoon oKashki'ewisiimini, tapoonentamawaakaniwi. Awiya tahsh wiin maci inaatc Kishemanitoon otAhcaahkoni kaawiin tapoonentamawaahsii, kaawiin noonkom tapoonentamawaahsii kaye kaawiin wiihkaa tapoonentamawaahsii.”
Mihtik kaanihtaawikihtootc onci kihkencikaniwi
(Luke 6.43-45)
33 #
Mat 7.20; Luk 6.44. “Minomihtik onihtaawikihtoon minoshiiwimiicim. Macimihtik itahsh wiin onihtaawikihtoonan wiihsakiminan. Aaniihsh a'a mihtik aaniin eshi nihtaawikihciketc onci kihkencikaniwi awenen ehtinowaahtikowitc. 34#Mat 3.7; 15.18; 23.33; Luk 3.7; 6.45. Kiinawaa kinepikook! Aaniin itahsh kwayahk keonci ihkitoyekipan e'maci ininiiwiyek. Aaniihsh awiya kaaishi mooshkinenik ote' ishikiikito. 35Kwayahk inini otooncipiitoonan kwayahk kekoonan i'imaa kaaishi kanawenciketc ote'ink, kaye a'a maci inini otooncipiitoonan macikekoonan i'imaa kaaishi kanawenciketc ote'ink. 36Kiwiintamawininim, awiya kaatahso ishikiishwetc, mihsawaa ko tepinaahk e'ishikiishwetc tatakwakintamawaa ahpii tipaahkonikewikiishikaninik. 37Kitihkitowinan ohsha ta‑aapatanoon ahpii wiihtipaahkonikooyan. Komaa kaye kitihkitowinink kikaonci ikoo ehkwayahkwaatisiyan, komaa kaye kitihkitowinink kikaonci ikoo ekaa ehkwayahkwaatisihsiwan.”
E'antawenimintc Ciisahs cimaamahkaacihciketc
(Mark 8.11-12; Luke 11.29-32)
38 #
Mat 16.1; Mrk 8.11; Luk 11.16. Iki tahsh onahshowewi kihkino'amaakewininiwak, Perahsiik (Pharisees) kaye okii'-inaawaan: “Okihkino'amaake, kimihsawenimikoo ewii waapamikooyan cimaamahkaacihcikeyan.”
39 #
Mat 16.4; Mrk 8.12. Ciisahs tahsh kii'‑ihkito: “Aahpici maci inahke, anoociko kaye ishipimaatisiwak noonkom kaapimaatisiwaatc, mii ehta ko eshihcikewaatc e'nanaantawaapantamowaatc maamahkaacihcikewinan. I'iweni tahsh ehta maamahkaacihcikewin kewaapantamowaatc, taapishkoo Coona (Jonah) kaakii'ishi maamahkaacihsetc. 40#Jon 2.1. Coona kaakiih piinsotc kihcikiikooyan omihsataaniink nihsokiishik (3) nihsotipihk kaye, mii taapishkoo Inini oKosihsan nihsokiishik nihsotipihk kaye keishi ayaanitc anaamahkamik. 41#Jon 3.5. Ahpii tahsh tipaahkonikewikiishikahk, Ninipe (Nineveh) ootenaank kaakiih taawaatc awiyak tapasikwiiwak cianaamiminekwaa, aaniihsh kiihkwehkaatisiwak wiinawaa ahpii ekii'-noontawaawaatc Coonawan ehkakiihkwenitc. Kitinininim itahsh, nawac kekoon ehkihci inentaakwahk ahpiihc wiin Coona o'omaa ayaa. 42#1Ki 10.1-10; 2Ch 9.1-12. Ahpii tahsh tipaahkonikewikiishikahk kihciokimaahkwe shaawanonk kaakii'-onciitc tapasikwii cianaamiminek. Aaniihsh wiin waahsa kiihpi ishaa ewii noontawaatc Swaalamanan (Solomon) kaakii'ishi kakiihtaawi kihkino'amaakenitc. Kiwiintamawininim itahsh nawac ehkihci inentaakwahk ahpiihc wiin Swaalaman o'omaa ayaa noonkom.”
Kekiihpi ishikiiwetc maciahcaahk kaakii'onci saakiciwepinikaniwihpan
(Luke 11.24-26)
43“Ahpii maciahcaahk kii'onci saakiciwepinikaniwitc ininiink, mii'i misiwe eshi papaami ayaatc pikwatahkamik kaaishi paahtenik ehkakwe mihkank aanti keishi anwepitc, kaawiin tahsh kekoonini omihkansiin. 44Miitahsh ehkitotc: ‘Ninka kiiwe niwaahkaa'ikanink aanti kaakii'onci saaka'amaan.’ Miitahsh eshi kiiwetc e'mihkank owaahkaa'ikan wiinke ehpishihshikwaanik, ekiih pehkihcikaatenik, ehsakahkihcikaatenik kaye. 45Miitahsh eshi kiiwe takohshink ehtakopiinaatc niishwaahso maciahcaahkwa' nawac e'macaatisinitc ahpiihc wiin. Miitahsh eshi piintikewaatc i'imaa e'ishitaawaatc. A'a tahsh inini nawac kihci ishi ayaa ahpiihc wiin kaakii'ishi ayaahpan nihtam. Miitahsh mayaa keshinaakosiwaatc oko kaamacaatisiwaatc noonkom kaapimaatisiwaatc.”
Ciisahs ehtipaacimaatc awenena' mayaa enawemaatc
(Mark 3.31-35; Luke 8.19-21)
46Mekwaa tahsh Ciisahs ehkakanoonaatc i'i kaamaamawenonitc, omaamaan, wiicihkiweya' kaye kiihpi takohshinoo' ewiih kanoonikotc. Akwaciink itahsh kii'niipawiwa'. 47Peshik itahsh awiyan okii'-ikoon: “Taka pinamaa, kimaamaa kiicihkiweyak kaye akwaciink niipawiwak ewiih kanoonihkwaa.” 48Ciisahs tahsh okii'-inaan: “Awenen itahsh nimaamaa, awenenak kaye niicihkiweyak?” 49Kii'‑ishinihkeni tahsh inahke eshi ayaanitc i'i okihkino'amawaakana', miitahsh kaa'ihkitotc: “Miiwak ohsha oko nimaamaa, niicihkiweyak kaye. 50Awenen itahsh kaaishihciketc kaashi antawenimikotc ninTeten kihcikiishikonk kaa‑ayaanitc, mii'i ohsha a'awe niicihkiwensi, nintawemaa, nimaamaa kaye.”
ទើបបានជ្រើសរើសហើយ៖
Maahtiyo 12: OJBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ojibwe Shorter Bible (Roman Script) © 2008 Canadian Bible Society
