Ishihcikewinan 2
2
Kishemanitoo otAhcaahkwan kiiotihsikowaatc otepwehtamook
1Ahpii tahsh e'ocihcihsenik i'i Pentikwaast (Pentecost) Kiishikan#2.1 Pentikwaast Kiishikan: tahsosiikwan Coowak kiiWiihkwantii wahkamikisiwak emaamihkotamaatiwaatc mewihsha ekii‑ishi pimaaci'ikowaakopanen Kishemanitoon i'imaa Iicipahkiink (Egypt), Pimaaci'ikoowi Wiihkwantiwin ekii‑ishinihkaatenik. Miitahsh paanimaa naanimitana tahsokon kaaishkwaahkamikisiwaatc mii 'iwe kaaishinihkaatamowaatc Pentikwaast (Pentecost), miitahsh owe kaakii‑icikaatek “Naanimitana” (50). Mii 'iwe ekii Wiihkwantiwaatc oshki pahkweshikanan ekii amwaawaatc pahkweshikaniwikihtikewinink ekii ontinaawaatc nihtam kaakiishikinitc. kaakii'-icikaatenik, peshikwanonk kahkina kii'ishi maawaci'itiwak otepwehtamook. 2Ketahto itahsh kekoon kihcikiishikonk kiihpi'onci noontaakwan taapishkoo ekihci matwenoowek ekii'-inihtaakwahk, misiwe i'imaa waahkaa'ikanink kiimooshkinehtaakwan kaakii'ishi apiwaatc. 3Miitahsh kaakii'-waapantamowaatc kekoonan taapishkoo ishkotewitenaniwimaank e'ishinaakwaninikin, eniikateshkaanikin. Pepeshik tahsh okiihpi naasihkaakonaawaa ekiih saamishkaakowaatc kaakiih tahshiwaatc. 4Kahkina tahsh okii'-mooshkineshkaakowaan Kishemanitoon otAhcaahkonini. Miitahsh kaa'ishi maacii kakitowaatc pepahkaan ekii'-ishikiishwewaatc Kishemanitoon otAhcaahkoni ekii'-miinikowaatc o'o cishi kashkihtoowaatc.
5I'imaa tahsh Ceroosalamink (Jerusalem) kii'ishitaawa' Coowa' (Jews) ekii'-anami'ewaatisinitc misiwe e'onciinitc eshi pepahkaanwewaanakisinitc pemaatisinitc o'omaa ahkiink. 6Ahpii tahsh enoontaaminitc aaniin enihtaakwaninik, pemaatisinitc kaakiih paahtiinonitc kiimaamawi piishaawa' ekii'-wawaanentaminitc. Aaniihsh kahkina kaakiih tahshinitc okii'-noontaakowaa' e'ishikiishwewaatc tipinawe otishikiishwewininiink. 7Kahkina hsa ko kii'maamahkaatentamoo', ekii'-wawaanentaminitc e'ihkitonitc: “Kaawiin ina kahkina okoweniwak Kaalaliiwininiwak (Galilee) kaakaakiikitowaatc? 8Aaniin itahsh wenci noontawankitwaa e'ishikiishwewaatc kahkina okoweniwak pepahkaan kiinawint tipinawe kaaishi kiishweyank? 9Pepahkaan iitok kita'ayonciiwaamin: Paarhtiya (Parthia), Miitiya (Media), Iilam (Elam), iki kaye kaakii'-onciiwaatc Mehsopohtemiya (Mesopotamia), Cootiiya (Judea), Kaahpatoohsha (Cappadocia), Paantahs (Pontus), Eshiya (Asia), 10Pariciya (Phrygia), Paampiliya (Pamphylia), Iicip (Egypt), i'imaa kaye pepahkaan kaashi ayaaniwank pehsho Saairiini (Cyrene) ootenaank Lipiya (Libya) ahkiink. Iki tahsh kaye Oroomink (Rome) kaakiihpi onci kiiyootewaatc. Iki kaye aaninta Coowak kaakiih kwehkinintwaa cipiminisha'amowaatc Coowi anami'aawin. 11Aaninta tahsh Kariihtink, Arepiya ahkiink e'onciiyank. Wawiinke tahsh kinisitohtawaanaanik mayaa kitishikiishwewininaanink e'ishi tashintamowaatc Kishemanitoon eshi mashkawihcikenitc,” kii'ihkitowak. 12Kahkina tahsh kiimaamahkaatentamook ekii'-wawaanentamowaatc kaye. Miitahsh kaa'ihkitowaatc: “Kaanaka wekotokwen o'o wenci ishihsekwen?”
13Aaninta tahsh kiihpaahpinotaakewak ekii'-ihkitowaatc: “Onsaam ohsha niipiwa' minihkwewak oshki shoominaapooni,” kii'ihkitowak.
Piitar kaakii'ishikakiihkwetc
14Piitar (Peter) tahsh kiihpasikwii kaakii wiiciiwaatc i'i kotak mitaahshipeshik ishinisha'waakana'. Kiihkishiiwe tahsh o'o ekii'inaatc kaakiih paahtiinonitc: “Kiinawaa niiciCoowak, kahkina kaye o'omaa Ceroosalamink (Jerusalem) eshitaayek! Weweni pisintawihshik o'owe kaawii'wiintamawinakook. 15Kaawiin ohsha kiiwashkwepiihsiwak okoweniwak kiiwashkwepiiwak kaa'inenimekwaa. Payish iitok inaa shaankahso tipa'ikaneyaa ehkishepaawakahk.#2.15 shaankahso tipa'ikaneyaa ehkishepaawakahk: Coowak ekiih kishepaa anami'aawaatc kiihshaankahso tipa'ikaneyaanik. Eishkwaa anami'aawaatc itahsh mii 'iwe kaaishi kishepaa wiihsiniwaatc emitaahso tipa'ikaneyaanik. 16Mii hsa 'oweni kaa'ihkitokopanen Coowal (Joel) Kishemanitoon kaakiih kanootamawaatc:
17 #
Joel 3.1-5. ‘Tayishihse ishkwaac anikakiishikahk, ihkito Kishemanitoo,
cisiikinamawakwaa nintAhcaahkwan kahkina pemaatisiwaatc.
Kikosihsiwak, kitaanihsiwak itahsh kaye oka kanootamawaawaan Kishemanitoon
kitooshkiniikimiwak tahsh kekoonan oka waapantaanaawaan ishinamowinan,
kikihciaya'aamiwak tahsh wiin tapawaacikewak.
18Iki hsa kaye kitanohkii'aakanak kaaininiiwiwaatc, kaaihkwewiwaatc itahsh kaye,
weti anikakiishikaninik ninka miinaak kahkina cinaasihkaakowaatc nintAhcaahkwan.
Kahkina tahsh oka kanootamawaawaan Kishemanitoon.
19Ninka ishihcike tahsh kekoonan cimaamahkaasinaakwahkin ishpimink
tapahsaya'ii kaye ahkiink.
Tawaapancikaate miskwi, ishkote, takihci'-inaapahte tahsh kaye.
20Kiisihs tahsh takashkiitipihki'aa,
tipihkikiisihs miskwiink tashi miskonaakosi.
Mii'iwe tahsh keishiwepahk cipwaa ocihcihsenik ahpii
kaaTipenciketc okiishikanom kaawiikihci'-inentaakwaninik,
kaawiimashkawentaakwaninik kaye.
21Ta'ishihse tahsh, awenen iko kekanoonaatc kaaTipencikenitc cinaatamaakotc tapimaaci'aa.’
22“Kiinawaa Isriyalak (Israel), pisintamok kaawii'-ihkitoyaan: Ciisahs (Jesus) Naasaritink (Nazareth) kaakii'-onciitc ininiink kii'inentaakosi ekii'-onaapamikotc Kishemanitoon. Kishemanitoo tahsh kikiih peteyaapanta'ikowaa ekii'-onaapamaatc Ciisahsoon, ekii aapaci'aatc cimaamahkaacihcikenitc, cimamaantaawihcikenitc, cikihkinawaacihcikenitc kaye. Kahkina iitok kikihkentaam o'o. 23#Mat 27.35; Mrk 15.24; Luk 23.33; Jhn 19.18. Kishemanitoo iitok niiyak kii'ishi onentamokopan, niiyak kaye kiikihkentamokopan pisaan cikaahcitinimintc. Kiinawaa tahsh kaakii'-akosaka'omek aashiteyaahtikonk ekii'-nihsimek, ekii'-wiici'inekwaa iki ininiwak peminisha'ansikwaa eshi antawentaminitc Kishemanitoon. 24#Mat 28.5-6; Mrk 16.6; Luk 24.5. Kishemanitoo tahsh okiihkiiwe pimaatisii'aan, ekiih kipihtinank cikakwaataki'ikohsinik i'i nipowin. Aaniihsh kaawiin kekoon otaa kashki'ikohsiini cikihciwinikonitc i'imaa nipowinink. 25#Psa 16.8-11. Tepit (David) tahsh wiin kii'ihkitokopan ehtashimaatc onoweniwan:
‘Nikanawaapamaa kaaTipenciketc mooshak e'oncishkawishkawitc.
Nikihcinihkink inahke e'ishi wiici'itc, kaawiin tahsh awiya ninka wahkawinikohsii.
26Miitahsh i'iwe wiinke misiwe ninte'ink wenci moocikentamaan,
maawac iko ehciihkentamaan o'o kaakakitoyaan.
Mihsawaa piko niwiiyaw cinipoomakahk,
tepwe hsa ninkehcina'aa Kishemanitoo i'iwe ci'ishihcike'itc.
27Kaawiin iitok awaac kikaishi nakashihsii anaamahkamik weti onipook kaaishi ayaawaatc.
Kaawiin kaye kiin Kishemanitoo kika pakitinihsii kaana'entami'inaan
citashiwanaatahk niwiiyaw i'imaa nipowinink.
28Kikiih kihkentamoo'ish keni'ina'atooyaan tepwe cipimaatisiyaan,
wiinke hsa kika tepimoocikentamo'ish e'wiiciiwiyan.’
29“Niici otepwehtamook, oncita iko kiwii'-wiintamawininim kikehteya'aaminaapan kaakiih kihtentaakositc Tepit (David) ekii'-nipotc, kaye tahsh ekii'-ninkwa'ontc. Kaakii'-ishi na'inintc keyaapi o'o ishiahpii e'ayaanik o'omaa. 30#Psa 132.11; 2Sa 7.12-13. Kewiin iitok kiihtinowi kaakanootamawaatc Kishemanitoon. Okiikihkentaan kaakii'ishi ahshotamaakotc Kishemanitoon, peshik opiiwesiiman ciani kihciokimaawinitc, taapishkoo Tepit kaakii'-ishikimaawitc. 31Tepit niiyak okii'-waapantaan aaniin waa'ishihcikenitc Kishemanitoon. Miitahsh kaakiih tashintank keshi kiiwe pimaatisi'imintc ini oPimaaci'iwen Kishemanitoonk kepi'-onciinitc. Miitahsh Tepit kaakii'-ihkitotc:
‘Kaawiin kii'nakanaahsii cinehpiciayaatc anaamahkamik eshi ayaanitc kaaniponitc,
kaawiin itahsh kaye owiiyaw tawanaatahsinini.’
32Miitahsh Kishemanitoon kaakiih kiiwe pimaatisi'ikotc. Niinawint iitok ninkii waapamaanaan a'a Ciisahs. 33Miitahsh kaakii'-ompinintc i'imaa nahke okihcinihkiniink Kishemanitoon cishikihci inentaakositc. Miihsh i'i kaakii'-miinikoowisitc Weyoosimimintc otAhcaahkoni kaakii ahshotamawintipan. Miitahsh i'iweni omiinikoowin kaasiikinank kiinawaa noonkom kaawaapantamek, kaanoontamek kaye. 34#Psa 110.1. Kaawiin iitok wiin Tepit (David) kihcikiishikonk kaakii'-ishi ompishkaatc, o'owe tahsh wiin kii'ihkito:
‘KaaTipenciketc okii'inaan ini kaaTipenimimitc:
I'imaa ishinamatapin ninkihcinihkink inahke,
35paanimaa hsa kika ishi'in cishaakooci'atwaa kaanishkenimihkwaa.’
36“Taka tahsh kahkina kiinawaa Isriyalak (Israel) kaatinowiyek kehcinaac kihkentamok, mii 'awe Ciisahs kaatashimak kaakii'-akosaka'wek aashiteyaahtikonk, okii'-onahsikoon Kishemanitoon cimaamawi Tipenciketc, wiin kaye okii'-onaapamikoon ciPimaaci'iwetc.”
37Aahpii tahsh pemaatisiwaatc enoontamowaatc o'o, kii'onci mikoshkaatentamook ekii'inaawaatc Piitaroon, i'i kaye kotak ishinisha'waakana': “Niici otepwehtamoominaanik, aaniin tahsh keishihcikeyaank?”
38Piitar (Peter) tahsh okii'ishi nahkwehtawaa': “Kwehkipimaatisik, siika'antaasok itahsh kaye kahkina kaatahshiyek otishinihkaasowinink Ciisahs, cipoonencikaatekin kimacitootamowiniwaan; miitahsh i'i cimiinikoowisiyek Kishemanitoo otAhcaahkwan. 39Mii 'oweni Kishemanitoo kaakii'-ahshotamawinek ewiimiininek, i'i kaye kiniicaanihsiwaa', i'i kaye waahsa eyaanitc. Kahkina hsa ko awiya' kaaTipenciketc kiKishemanitoominaan ke'antomaatc cipinaasihkaakotc,” kii'ihkito. 40Niipiwa' tahsh Piitar kii'ayihkito ekii'-ayenkwaamimaatc ekiih kakwe kashkimaatc: “Tapasiinotamowahk otishiwepisiwiniwaan kaamacaatisiwaatc, ci'-ishihsehsiwek keshihsewaatc.” 41I'i tahsh kaakiih tepwehtaakotc ehkitotc kiisiika'antaasowa' nihsink mitaahswaahk (3,000) ekiih tashinitc. Miihsh kaa'ishi takwakimimintc i'imaa eshi ayaanitc otepwehtamoo'. 42Miitahsh iko mooshak i'imaa kaa ayaanitc ekiih pisintaminitc eshi kihkinoamaakewaatc ishinisha'waakanak. Ekii'ishi wiitoohkaasonitc itahsh kaye eshi wiihsininaaniwaninik pehkihsh ekii'-anami'enaaniwaninik.
Otepwehtamook kaakii'ishiwaawiici'itiwaatc
43Kahkina tahsh pemaatisiwaatc kiimaamahkaatentamook ishinisha'waakana' niipiwa' ekiih tootaminitc maamahkaacihcikewinan, ini kaye kihkinawaacihcikewinan. 44#Act 4.32-35. Kahkina tahsh otepwehtamook kiimaamaawi'itiwak. Kahkina kaye otaya'iimiwaan pehpeshikwan ekii'ishi maamawihcikewaatc. 45Okii'-ataawaakenaawaan tahsh otaya'iimiwaan, tepentamowaatc kaye. Miitahsh kaa'ani ishi ayaanihke maamaawata'oonitiwaatc aaniin hsa ko awiyan eshi noontehsenitc. 46Entahsokiishik itahsh kii'nihtaa maawaci'itiwak piincaya'ii kihcianami'ewikamikonk. Otaawiniwaank ekiihtashi pahkwepinaatc pahkweshikanan ekii'-maamawi wiihsiniwaatc, wiinke ekiih ciihkentamowaatc ote'iwaank. 47Ekii'-nanaahkomaawaatc Kishemanitoon, kahkina kaye awiya' ekii'-minwaapamikowaatc. KaaTipenciketc tahsh okii'ani takwakimaa' i'i entahsokiishik kaakiih pimaaci'imintc.
ទើបបានជ្រើសរើសហើយ៖
Ishihcikewinan 2: OJBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ojibwe Shorter Bible (Roman Script) © 2008 Canadian Bible Society
