ܡܪܩܘܣ 14
14
ܝܗܘܼܕܵܝܹ̈ܐ ܒܸܒܥܵܝܵܐ ܕܩܵܛܠܝܼ ܠܝܼܫܘܿܥ
ܡܬܝ 26:1‐5؛ ܠܘܩܐ 22:1‐2؛ ܝܘܚܢܢ 11:45‐53
1ܡ̣ܢ ܒܵܬ݇ܪ ܬܪܹܝ ܝܵܘܡܵܢܹ̈ܐ ܗܘܹܐ ܠܹܗ ܥܹܐܕܵܐ ܕܦܲܛܝܼܪܹ̈ܐ،#ܡܦܩܢܐ 12:1‐27 ܘܒܥܹܐ ܠܗܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܒܦܸܠܡܵܐ ܕܵܒ݂ܩܝܼ ܗ݇ܘܵܘ ܠܝܼܫܘܿܥ ܘܩܵܛܠܝܼ ܗ݇ܘܵܘ ܠܹܗ. 2ܐܝܼܢܵܐ ܐ݇ܡܝܼܪܗܘܿܢ، ”ܠܵܐ ܒܥܹܐܕܵܐ، ܕܠܵܐ ܗܵܘܹܐ ܫܓ݂ܘܼܫܝܵܐ ܓܵܘ ܥܲܡܵܐ.“
ܝܼܫܘܿܥ ܦܝܵܫܵܐ ܡܫܝܼܚܵܐܒܝܲܕ ܡܲܪܝܲܡ
ܡܬܝ 26:6‐13؛ ܝܘܚܢܢ 12:1‐8
3ܟܲܕ ܝܼܫܘܿܥ ܓܵܘ ܒܹܝܬ ܥܲܢܝܵܐ ܝܗ݇ܘܵܐ ܓܵܘ ܒܲܝܬܵܐ ܕܫܸܡܥܘܿܢ ܓܸܪܒ݂ܵܢܵܐ، ܘܝ݇ܬܝܼܒ݂ܵܐ ܠܣܘܼܦܪܵܐ، ܐ݇ܬܹܐ ܠܵܗ̇ ܚܕܵܐ ܒܲܟ݂ܬܵܐ ܕܐܝܼܬ ܗ݇ܘܵܐ ܠܵܗ̇ ܫܵܛܝܼܦܬܵܐ ܕܒܸܣܡܵܐ ܕܢܵܪܕܝܼܢ ܪܹܫܵܝܵܐ ܘܡܵܪܹܐ ܛܝܼܡܵܐ ܪܵܒܵܐ، ܦܬܝܼܚܵܐ ܠܵܗ̇ ܫܵܛܝܼܦܬܵܐ ܘܫܘܼܦܸܟ݂ ܠܵܗ̇ ܒܸܣܡܵܐ ܥܲܠ ܪܹܫܵܐ ܕܝܼܫܘܿܥ. 4ܐܝܼܢܵܐ ܐ݇ܢܵܫܹ̈ܐ ܕܝܼܗ݇ܘܵܘ ܬܵܡܵܐ ܟܪܝܼܒ ܠܗܘܿܢ ܘܐ݇ܡܝܼܪܗܘܿܢ، ”ܩܵܡܘܿܕܝܼ ܐܵܗܵܐ ܚܘܼܣܪܵܢܵܐ ܕܒܸܣܡܵܐ؟ 5”ܟܹܐ ܡܵܨܹܐ ܗ݇ܘܵܐ ܦܵܐܹܫ ܗ݇ܘܵܐ ܙܘܼܒܢܵܐ ܙܵܘܕܵܐ ܡ̣ܢ ܬܠܵܬܡܵܐܐ ܕܝܼܢܵܪܹ̈ܐ ܘܝܘܼܗ݇ܒ݂ܵܐ ܠܡܸܣܟܹܢܹ̈ܐ،“ ܘܛܲܪܛܸܡܝܼ ܗ݇ܘܵܘ ܥܲܠܘܼܗ̇. 6ܐܝܼܢܵܐ ܝܼܫܘܿܥ ܐ݇ܡܝܼܪܹܗ ܐܸܠܲܝܗܝ، ”ܫܒ݂ܘܿܩܘܼܢ ܠܵܗ̇، ܩܵܡܘܿܕܝܼ ܡܲܠܝܘܼܨܹܐ ܝܬܘܿܢ ܐܸܠܘܼܗ̇؟ ܦܘܼܠܚܵܢܵܐ ܛܵܒ݂ܵܐ ܥܒ݂ܝܼܕ ܠܵܗ̇ ܐܸܠܝܼ. 7”ܡܸܣܟܹܢܹ̈ܐ ܒܟܠ ܥܕܵܢܵܐ ܐܝܼܬ ܥܲܡܵܘܟ݂ܘܿܢ، ܘܐܝܼܡܲܢ ܕܒܵܥܹܝܬܘܿܢ ܡܵܨܹܝܬܘܿܢ ܥܵܒ݂ܕܝܼܬܘܿܢ ܛܵܒ݂ܬܵܐ ܐܸܠܲܝܗܝ، ܐܝܼܢܵܐ ܐܵܢܵܐ ܠܹܐ ܝܘܸܢ ܒܟܠ ܥܕܵܢܵܐ ܠܟܸܣ ܠܵܘܟ݂ܘܿܢ.#ܬܢܝܢ ܢܡܘܣܐ 15:11 8”ܐܵܗܵܐ ܒܲܟ݂ܬܵܐ ܥܒ݂ܝܼܕ ܠܵܗ̇ ܗ̇ܘ ܡܸܢܕܝܼ ܕܡܨܹܐ ܠܵܗ̇. ܐܲܝܟ݂ ܠܩܒ݂ܵܪܬܝܼ ܡܫܝܼܚ ܠܵܗ̇ ܦܲܓ݂ܪܝܼ ܡ̣ܢ ܩܵܕ݇ܡ ܥܕܵܢܵܐ. 9”ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܒܟܠ ܕܘܼܟܵܐ ܕܦܵܐܹܫ ܡܘܼܟܪܸܙܵܐ ܐܵܗܵܐ ܐܹܘܲܢܓܲܠܝܼܘܿܢ ܒܟܠܵܗ̇ ܒܪܝܼܬܵܐ، ܒܸܬ ܦܵܐܹܫ ܗܘܼܡܙܸܡܵܐ ܐܵܗܵܐ ܡܸܢܕܝܼ ܕܥܒ݂ܝܼܕ ܠܵܗ̇، ܠܕܟ݂ܵܪܵܐ ܐܸܠܘܼܗ̇.“
ܝܼܗܘܼܕܵܐ ܣܟܲܪܝܘܿܛܵܐܣܲܦܘܼܝܹܐ ܠܝܼܫܘܿܥ
ܡܬܝ 26:14‐16؛ ܠܘܩܐ 22:3‐6
10ܗ̇ܝܓܵܗ ܝܼܗܘܼܕܵܐ ܣܟܲܪܝܘܿܛܵܐ، ܚܲܕ ܡ̣ܢ ܬܪܸܥܣܲܪ ܬܲܠܡܝܼ̈ܕܹܐ، ܐ݇ܙܝܼܠ ܠܹܗ ܠܟܸܣ ܓܘܼܪ̈ܵܢܹܐ ܕܟܵܗܢܹ̈ܐ ܕܣܲܦܹܐ ܗ݇ܘܵܐ ܠܹܗ ܝܼܫܘܿܥ ܐܸܠܲܝܗܝ. 11ܘܐܝܼܡܲܢ ܕܫܡܝܼܥ ܠܗܘܿܢ ܐܵܢܝܼ ܚܕܹܐ ܠܗܘܿܢ، ܘܥܒ݂ܝܼܕ ܠܗܘܿܢ ܩܵܘܠܵܐ ܥܲܡܹܗ ܕܝܵܗ݇ܒ݂ܝܼ ܠܹܗ ܙܘܼܙܹ̈ܐ. ܘܗ̇ܘ ܛܵܥܹܐ ܗ݇ܘܵܐ ܒܵܬ݇ܪ ܦܸܪܣܲܬ ܠܣܲܦܘܼܝܹܗ.
ܦܸܨܚܵܐ ܥܲܡ ܬܲܠܡܝܼ̈ܕܹܐ
ܡܬܝ 26:17‐25؛ ܠܘܩܐ 22:7‐14، 22:21‐23؛ ܝܘܚܢܢ 13:21‐30
12ܒܝܵܘܡܵܐ ܩܵܕ݇ܡܵܝܵܐ ܕܦܲܛܝܼܪܹ̈ܐ، ܐܝܼܡܲܢ ܕܝܗܘܼܕܵܝܹ̈ܐ ܟܹܐ ܕܵܒ݂ܚܝܼ ܦܹܐܪܵܐ ܕܦܸܨܚܵܐ، ܐ݇ܡܝܼܪܗܘܿܢ ܬܲܠܡܝܼ̈ܕܹܐ ܠܝܼܫܘܿܥ، ”ܐܲܝܟܵܐ ܒܵܣܡܵܐ ܠܘܼܟ݂ ܕܐܵܙܲܠ݇ܚ ܘܗܲܕܪܲܚ ܩܵܬܘܼܟ݂ ܕܘܼܟܵܐ ܕܦܸܨܚܵܐ؟“ 13ܘܫܘܼܕܸܪܹܗ ܬܪܹܝ ܡ̣ܢ ܬܲܠܡܝܼܕܘܼ̈ܗܝ ܘܐ݇ܡܝܼܪܹܗ ܐܸܠܲܝܗܝ، ”ܙܹܠ݇ܡܘܼܢ ܠܡܕܝܼܢ݇ܬܵܐ ܘܒܸܬ ܬܵܦܹܩ ܒܝܼܵܘܟ݂ܘܿܢ ܚܲܕ ܐ݇ܢܵܫܵܐ ܛܥܝܼܢܵܐ ܬܲܠܡܵܐ ܕܡ̈ܝܼܵܐ؛ ܙܹܠ݇ܡܘܼܢ ܒܵܬ݇ܪܹܗ. 14”ܘܠܐܲܝܟܵܐ ܕܥܵܒܹܪ ܐ݇ܡܘܿܪܘܼܢ ܠܡܵܪܵܐ ܕܒܲܝܬܵܐ، ’ܪܲܒܝܼܲܢ ܒܹܐܡܵܪܵܐ ܝܠܹܗ، ܐܲܝܟܵܐ ܝܠܵܗ̇ ܕܘܼܟܵܐ ܕܐܵܟ݂ܠܹܢ ܦܸܨܚܵܐ ܥܲܡ ܬܲܠܡܝܼܕܝܼ̈؟‘ 15”ܘܗ̇ܘ ܒܸܬ ܡܲܚܙܹܐ ܠܵܘܟ݂ܘܿܢ ܥܸܠܝܼܬܵܐ ܓܘܼܪܬܵܐ، ܫܘܼܘܝܼܬܵܐ ܘܗܘܼܕܸܪܬܵܐ؛ ܬܵܡܵܐ ܗܲܕܪܘܼܢ.“ 16ܘܦܠܝܼܛ ܠܗܘܿܢ ܬܲܠܡܝܼܕܘܼ̈ܗܝ ܘܐ݇ܬܹܐ ܠܗܘܿܢ ܠܡܕܝܼܢ݇ܬܵܐ ܘܚܙܹܐ ܠܗܘܿܢ ܕܵܐܟ݂ܝܼ ܕܐ݇ܡܝܼܪܹܗ ܐܸܠܲܝܗܝ، ܘܗܘܼܕܸܪܗܘܿܢ ܦܸܨܚܵܐ.
17ܐܝܼܡܲܢ ܕܗܘܹܐ ܠܹܗ ܪܲܡܫܵܐ، ܐ݇ܬܹܐ ܠܹܗ ܝܼܫܘܿܥ ܥܲܡ ܬܪܸܥܣܲܪ ܬܲܠܡܝܼܕܘܼ̈ܗܝ. 18ܘܟܲܕ ܝ݇ܬܝܼܒܹܐ ܝܗ݇ܘܵܘ ܒܹܐܟ݂ܵܠܵܐ، ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ: ܚܲܕ ܡܸܢܵܘܟ݂ܘܿܢ ܕܒܹܐܟ݂ܵܠܵܐ ܝܠܹܗ ܥܲܡܝܼ ܒܸܬ ܣܲܦܹܐ ܠܝܼ.“#ܡܙܡܘܪ̈ܐ 41:9 19ܗ̇ܝܓܵܗ ܐܵܢܝܼ ܫܘܼܪܹܐ ܠܗܘܿܢ ܠܸܦܫܵܡܵܐ، ܘܐ݇ܡܝܼܪܗܘܿܢ ܐܸܠܹܗ ܚܲܕ ܒܚܲܕ، ”ܩܵܡܘܿ ܐܵܢܵܐ ܝܘܸܢ؟“ 20ܐܝܼܢܵܐ ܗ̇ܘ ܓ̰ܘܼܘܸܒ ܠܹܗ، ”ܚܲܕ ܡ̣ܢ ܬܪܸܥܣܲܪ ܕܒܸܛܡܵܫܵܐ ܝܠܹܗ ܥܲܡܝܼ ܒܡܵܐܢܵܐ. 21”ܒܪܘܿܢܵܐ ܕܐ݇ܢܵܫܵܐ ܒܹܐܙܵܠܵܐ ܝܠܹܗ ܕܵܐܟ݂ܝܼ ܕܝܼܠܹܗ ܟܬܝܼܒ݂ܵܐ ܒܘܼܬ ܕܝܼܹܗ، ܐܝܼܢܵܐ ܘܵܝ ܠܗ̇ܘ ܐ݇ܢܵܫܵܐ ܕܒܐܝܼܕܹܗ ܦܵܐܹܫ ܣܘܼܦܝܵܐ ܒܪܘܿܢܵܐ ܕܐ݇ܢܵܫܵܐ. ܒܘܼܫ ܨܦܵܝܝܼ ܝܗ݇ܘܵܐ ܠܗ̇ܘ ܐ݇ܢܵܫܵܐ ܕܠܵܐ ܗܵܘܹܐ ܗ݇ܘܵܐ ܝ݇ܠܝܼܕܵܐ.“
ܐ݇ܟ݂ܵܠ݇ܪܲܡܫܵܐ ܕܡܵܪܲܢ
ܡܬܝ 26:26‐30؛ ܠܘܩܐ 22:15‐20؛ ܐ. ܩܘܪ̈ܢܬܝܐ 11:23‐25
22ܘܟܲܕ ܒܹܐܟ݂ܵܠܵܐ ܝܗ݇ܘܵܘ، ܫܩܝܼܠ ܠܹܗ ܝܼܫܘܿܥ ܠܲܚܡܵܐ، ܘܒܘܼܪܸܟ݂ ܠܹܗ، ܘܩܨܹܐ ܠܹܗ، ܘܝܘܼܗ݇ܒܸܠ ܠܹܗ ܐܸܠܲܝܗܝ، ܘܐ݇ܡܝܼܪܹܗ، ”ܫܩܘܿܠܘܼܢ، ܐܵܗܵܐ ܝܠܹܗ ܦܲܓ݂ܪܝܼ.“ 23ܘܫܩܝܼܠ ܠܹܗ ܟܵܣܵܐ، ܘܫܘܼܟܸܪܹܗ، ܘܒܘܼܪܸܟ݂ ܠܹܗ، ܘܝܘܼܗ݇ܒܸܠ ܠܹܗ ܐܸܠܲܝܗܝ، ܘܫܬܹܐ ܠܗܘܿܢ ܡܸܢܹܗ ܟܠܲܝܗܝ. 24ܘܐ݇ܡܝܼܪܹܗ ܐܸܠܲܝܗܝ، ”ܐܵܗܵܐ ܕܸܡܝܼ ܝܠܹܗ ܕܘܲܥܕܵܐ ܚܵܕ݇ܬܵܐ،#ܐܪܡܝܐ 31:31‐34 ܕܡ̣ܢ ܓܹܒܵܐ ܕܪܵܒܵܐ ܦܝܵܫܵܐ ܝܠܹܗ ܫܘܼܦܟ݂ܵܐ. 25”ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܐ݇ܚܹܪ݇ܢܵܐ ܠܹܐ ܫܵܬܹܝܢ ܡ̣ܢ ܛܥܘܼܢܬܵܐ ܕܓܸܦܬܵܐ ܗܲܠ ܗ̇ܘ ܝܵܘܡܵܐ ܕܫܵܬܹܝܢܵܗ̇ ܚܲܕܬܵܐ ܒܡܲܠܟܘܼܬܵܐ ܕܐܲܠܵܗܵܐ.“ 26ܘܡ̣ܢ ܒܵܬ݇ܪ ܕܫܘܼܒܸܚ ܠܗܘܿܢ، ܐ݇ܣܝܼܩ ܠܗܘܿܢ ܠܛܘܼܪܵܐ ܕܙܲܝ̈ܬܹܐ.
ܝܼܫܘܿܥ ܒܹܐܡܵܪܵܐ ܕܫܸܡܥܘܿܢܟܹܐܦܵܐ ܒܸܬ ܣܵܪܹܒ݂ ܠܹܗ
ܡܬܝ 26:31‐35؛ ܠܘܩܐ 22:31‐34؛ ܝܘܚܢܢ 13:36‐38
27ܘܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܟܠܵܘܟ݂ܘܿܢ ܒܸܬ ܫܵܒ݂ܩܝܼܬܘܿܢ ܠܝܼ، ܣܵܒܵܒ ܟܬܝܼܒ݂ܵܐ ܝܠܹܗ:
ܒܸܬ ܡܵܚܹܝܢ ܠܪܵܥܝܵܐ ܘܒܸܬ ܦܵܝܫܝܼ ܒܘܼܪܒܸܙܹܐ ܥܸܪ̈ܒܘܼܗܝ.#ܙܟ݂ܪܝܐ 13:7
28”ܐܝܼܢܵܐ ܡ̣ܢ ܒܵܬ݇ܪ ܕܩܵܝܡܹܢ، ܒܸܬ ܐܵܙܹܠ݇ܢ ܡ̣ܢ ܩܵܕ݇ܡ ܕܝܼܵܘܟ݂ܘܿܢ ܠܓܠܝܼܠܵܐ.“ 29ܐܝܼܢܵܐ ܫܸܡܥܘܿܢ ܟܹܐܦܵܐ ܐ݇ܡܝܼܪܹܗ ܐܸܠܹܗ، ”ܐܘܼܦ ܐܸܢ ܕܟܠܲܝܗܝ ܫܵܒ݂ܩܝܼ ܠܘܼܟ݂، ܐܵܢܵܐ ܠܹܐ ܫܵܒ݂ܩܹܢܘܼܟ݂.“ 30ܓ̰ܘܼܘܸܒ ܠܹܗ ܐܸܠܹܗ ܝܼܫܘܿܥ، ”ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܘܼܟ݂، ܐܸܕܝܘܿܡ ܒܐܵܗܵܐ ܠܲܝܠܹܐ، ܡ̣ܢ ܩܵܕ݇ܡ ܕܬܲܪܬܹܝ ܓܵܗܹ̈ܐ ܩܵܪܹܐ ܩܵܪܘܿܝܵܐ، ܬܠܵܬ ܓܵܗܹ̈ܐ ܒܸܬ ܣܵܪܒܹܬ ܠܝܼ.“ 31ܐܝܼܢܵܐ ܗ̇ܘ ܡܲܙܝܸܕ ܗ݇ܘܵܐ ܠܹܐܡܵܪܵܐ، ”ܐܘܼܦ ܐܸܢ ܕܗܵܘܝܵܐ ܕܡܵܝܬܹܢ ܥܲܡܘܼܟ݂، ܠܹܐ ܣܵܪܒܹܢܘܼܟ݂.“ ܘܗܲܕܟ݂ܵܐ ܐܘܼܦ ܟܠܲܝܗܝ ܬܲܠܡܝܼ̈ܕܹܐ ܐ݇ܡܝܼܪܗܘܿܢ.
ܝܼܫܘܿܥ ܓܵܘ ܓܲܕܣܹܡܵܢ
ܡܬܝ 26:36‐46؛ ܠܘܩܐ 22:39‐46
32ܐ݇ܬܹܐ ܠܗܘܿܢ ܠܕܘܼܟܵܐ ܕܦܝܵܫܵܐ ܝܠܵܗ̇ ܩܪܝܼܬܵܐ ܓܲܕܣܹܡܵܢ، ܘܐ݇ܡܝܼܪܹܗ ܝܼܫܘܿܥ ܠܬܲܠܡܝܼܕܘܼ̈ܗܝ، ”ܝ݇ܬܘܿܒ݂ܘܼܢ ܠܐܲܟ݂ܵܐ ܗܲܠ ܕܐܵܙܹܠ݇ܢ ܘܨܲܠܹܝܢ ܨܠܘܿܬܵܐ.“ 33ܘܠܘܼܒܸܠ ܠܹܗ ܥܲܡܹܗ ܠܫܸܡܥܘܿܢ ܟܹܐܦܵܐ ܘܠܝܲܥܩܘܿܒ݂ ܘܠܝܘܿܚܲܢܵܢ، ܘܫܘܼܪܹܐ ܠܹܗ ܠܸܦܫܵܡܵܐ ܘܠܸܥܒ݂ܵܪܵܐ ܒܥܵܘܩܵܢܵܐ. 34ܘܐ݇ܡܝܼܪܹܗ ܐܸܠܲܝܗܝ، ”ܦܫܝܼܡܬܵܐ ܝܠܵܗ̇ ܓܵܢܝܼ ܗܲܠ ܡܵܘܬܵܐ. ܦܘܼܫܘܼܢ ܠܐܲܟ݂ܵܐ ܘܗܘܹܝܡܘܼܢ ܪܥܝܼܫܹܐ.“ 35ܘܪܚܝܼܩ ܠܹܗ ܡܸܢܲܝܗܝ ܘܢܦܝܼܠ ܠܹܗ ܥܲܠ ܐܲܪܥܵܐ، ܘܫܘܼܪܹܐ ܠܹܗ ܠܨܲܠܘܼܝܹܐ ܕܐܸܢ ܡܵܨܝܵܐ ܥܵܒ݂ܪܵܐ ܡܸܢܹܗ ܐܵܗܵܐ ܣܵܥܲܬ. 36ܘܐ݇ܡܝܼܪܹܗ، ”ܐܲܒܵܐ، ܒܵܒܝܼ، ܟܠ ܡܸܢܕܝܼ ܡܵܨܹܝܬ ܥܵܒ݂ܕܹܬ، ܡܲܥܒܸܪ ܡܸܢܝܼ ܐܵܗܵܐ ܟܵܣܵܐ. ܐܝܼܢܵܐ ܠܵܐ ܐܲܝܟ݂ ܨܸܒ݂ܝܵܢܝܼ، ܐܸܠܵܐ ܐܲܝܟ݂ ܨܸܒ݂ܝܵܢܘܼܟ݂.“
37ܘܕܝܼܪܹܗ ܠܟܸܣ ܬܲܠܡܝܼܕܘܼ̈ܗܝ ܘܚܸܙܝܲܝ ܠܹܗ ܕܡܝܼܟܹܐ، ܘܐ݇ܡܝܼܪܹܗ ܠܫܸܡܥܘܿܢ ܟܹܐܦܵܐ، ”ܫܸܡܥܘܿܢ، ܕܡܝܼܟ݂ܵܐ ܝܘܸܬ؟ ܠܵܐ ܡܨܹܐ ܠܘܼܟ݂ ܥܵܒ݂ܕܹܬ ܗ݇ܘܵܐ ܫܵܗܲܪܬܵܐ ܚܕܵܐ ܣܵܥܲܬ؟ 38”ܪܥܘܿܫܘܼܢ ܘܨܲܠܹܝܡܘܼܢ ܕܠܵܐ ܥܵܒ݂ܪܝܼܬܘܿܢ ܠܓ̰ܘܼܪܵܒܵܐ. ܪܘܼܚܵܐ ܟܹܐ ܒܵܥܝܵܐ ܐܝܼܢܵܐ ܦܲܓ݂ܪܵܐ ܙܲܒܘܼܢ ܝܼܠܹܗ.“ 39ܘܐ݇ܙܝܼܠ ܠܹܗ ܡܸܢܕܪܸܫ ܘܨܘܼܠܹܐ ܠܹܗ ܡܐܲܝܟ݂ ܗ̇ܝ ܓܵܗܵܐ ܩܵܕ݇ܡܵܝܬܵܐ. 40ܘܕܝܼܪܹܗ ܡܸܢܕܪܸܫ ܘܚܸܙܝܲܝ ܠܹܗ ܕܡܝܼܟܹܐ ܣܵܒܵܒ ܥܲܝܢܲܝ̈ܗܝ ܝܘܼܩܪܸܢܹܐ ܝܗ݇ܘܵܘ ܒܫܸܢܬܵܐ، ܘܠܵܐ ܝ݇ܕܝܼܥ ܠܗܘܿܢ ܡܘܿܕܝܼ ܐܵܡܪܝܼ ܗ݇ܘܵܘ ܐܸܠܹܗ. 41ܘܓܵܗܵܐ ܕܬܠܵܬ ܐ݇ܬܹܐ ܠܹܗ ܘܐ݇ܡܝܼܪܹܗ ܐܸܠܲܝܗܝ، ”ܐܵܕܝܼܵܐ ܕܡܘܿܟ݂ܘܼܢ ܘܡܲܢܝܸܚܘܼܢ، ܡܛܹܐ ܠܵܗ̇ ܚܲܪܬܵܐ ܘܐ݇ܬܹܐ ܠܵܗ̇ ܣܵܥܲܬ. ܒܪܘܿܢܵܐ ܕܐ݇ܢܵܫܵܐ ܦܝܵܫܵܐ ܝܠܹܗ ܣܘܼܦܝܵܐ ܒܐܝܼܕܵܬܹ̈ܐ ܕܚܲܛܵܝܹ̈ܐ. 42”ܩܘܼܡܘܼܢ ܕܐܵܙܲܠ݇ܚ، ܗܵܐ ܩܘܼܪܒܸܢܹܗ ܗ̇ܘ ܕܣܲܦܹܐ ܠܝܼ.“
ܣܲܦܵܝܬܵܐ ܘܕܒ݂ܵܩܬܵܐ ܕܝܼܫܘܿܥ
ܡܬܝ 26:47‐56؛ ܠܘܩܐ 22:47‐53؛ ܝܘܚܢܢ 18:3‐12
43ܟܲܕ ܗ̇ܘ ܗܲܡܙܘܼܡܹܐ ܝܗ݇ܘܵܐ، ܐ݇ܬܹܐ ܠܹܗ ܝܼܗܘܼܕܵܐ ܣܟܲܪܝܘܿܛܵܐ، ܚܲܕ ܡ̣ܢ ܬܪܸܥܣܲܪ ܬܲܠܡܝܼ̈ܕܹܐ، ܘܥܲܡܹܗ ܟܸܢܫܵܐ ܪܵܒܵܐ، ܒܣܲܝܦܹ̈ܐ ܘܚܘܼܛܪܹ̈ܐ، ܦܝܼܫܹܐ ܫܘܼܕܪܹܐ ܡ̣ܢ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܘܚܘܵܪ̈ܕܸܩܢܹܐ. 44ܘܝܼܗܘܼܕܵܐ ܣܲܦܝܵܢܵܐ ܝܘܼܗ݇ܒ݂ܵܐ ܝܗ݇ܘܵܐ ܐܸܠܲܝܗܝ ܢܝܼܫܲܢܩܵܐ، ܒܹܐܡܵܪܵܐ، ”ܗ̇ܘ ܕܢܵܫܩܹܢܹܗ، ܗ̇ܘ ܝܼܠܹܗ. ܕܵܒ݂ܩܝܼܬܘܿܢ ܠܹܗ ܘܠܲܒܠܝܼܬܘܿܢ ܠܹܗ ܒܗܸܫܝܵܪܘܼܬܵܐ.“ 45ܐ݇ܬܹܐ ܠܹܗ ܣܲܦܝܵܢܵܐ ܘܒܓ̰ܲܠܕܘܼܬܵܐ ܩܘܼܪܒܸܢܹܗ ܘܐ݇ܡܝܼܪܹܗ ܐܸܠܹܗ، ”ܪܲܒܝܼ، ܪܲܒܝܼ،“ ܘܢܫܝܼܩ ܠܹܗ. 46ܘܐܵܢܝܼ ܕܝܼܗ݇ܘܵܘ ܥܲܡܹܗ ܕܒ݂ܝܼܩ ܠܗܘܿܢ ܐܸܠܹܗ. 47ܗ̇ܝܓܵܗ ܚܲܕ ܡ̣ܢ ܐܵܢܝܼ ܕܝܼܗ݇ܘܵܘ ܥܲܡ ܝܼܫܘܿܥ ܓܪܝܼܫ ܠܹܗ ܣܲܝܦܵܐ ܘܡܚܹܐ ܠܹܗ ܠܪܹܓܵܐ ܕܓܘܼܪܵܐ ܕܟܵܗܢܹ̈ܐ ܘܦܪܝܼܡܵܐ ܠܹܗ ܢܵܬܹܗ. 48ܓ̰ܘܼܘܸܒ ܠܹܗ ܝܼܫܘܿܥ ܘܐ݇ܡܝܼܪܹܗ ܐܸܠܲܝܗܝ، ”ܐܲܝܟ݂ ܕܥܲܠ ܓܲܝܵܣܵܐ ܦܠܝܼܛ ܠܵܘܟ݂ܘܿܢ ܥܲܠܝܼ ܒܣܲܝܦܹ̈ܐ ܘܒܚܘܼܛܪܹ̈ܐ ܕܕܵܒ݂ܩܝܼܬܘܿܢ ܠܝܼ؟ 49”ܟܠ ܝܘܿܡ ܟܹܐ ܗܵܘܹܝܢ ܗ݇ܘܵܐ ܠܟܸܣ ܠܵܘܟ݂ܘܿܢ ܡܲܠܘܼܦܹܐ ܒܗܲܝܟܠܵܐ ܘܠܵܐ ܩܲܡ ܕܵܒ݂ܩܝܼܬܘܿܢ ܠܝܼ. ܐܸܠܵܐ ܗܘܹܐ ܠܵܗ̇ ܐܵܗܵܐ ܕܦܵܝܫܝܼ ܬܘܼܡܸܡܹܐ ܟܬܵܒܹ̈ܐ.“ 50ܗ̇ܝܓܵܗ ܬܲܠܡܝܼܕܘܼ̈ܗܝ ܫܒ݂ܝܼܩ ܠܗܘܿܢ ܐܸܠܹܗ ܘܥܪܝܼܩ ܠܗܘܿܢ. 51ܘܚܲܕ ܥܠܲܝܡܵܐ ܒܹܐܬܵܝܵܐ ܝܗ݇ܘܵܐ ܒܵܬ݇ܪܹܗ، ܕܸܪܝܵܐ ܟܸܬܵܢܵܐ ܠܦܲܓ݂ܪܹܗ ܫܘܼܠܚܵܝܵܐ. ܕܒ݂ܝܼܩ ܠܗܘܿܢ ܐܸܠܹܗ، 52ܐܝܼܢܵܐ ܗ̇ܘ ܫܒ݂ܝܼܩ ܠܹܗ ܟܸܬܵܢܵܐ ܘܥܪܝܼܩ ܠܹܗ ܫܘܼܠܚܵܝܵܐ.
ܝܼܫܘܿܥ ܩܵܕ݇ܡ ܓܘܼܪܵܐ ܕܟܵܗܢܹ̈ܐ
ܡܬܝ 26:57‐68؛ ܠܘܩܐ 22:54‐55، 22:63‐71؛ ܝܘܚܢܢ 18:13‐14، 18:19‐24
53ܠܘܼܒܸܠ ܠܗܘܿܢ ܠܝܼܫܘܿܥ ܠܟܸܣ ܓܘܼܪܵܐ ܕܟܵܗܢܹ̈ܐ، ܘܓ̰ܡܝܼܥ ܠܗܘܿܢ ܬܵܡܵܐ ܟܠܲܝܗܝ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܘܚܘܵܪ̈ܕܸܩܢܹܐ. 54ܘܫܸܡܥܘܿܢ ܟܹܐܦܵܐ ܒܹܐܙܵܠܵܐ ܝܗ݇ܘܵܐ ܒܵܬ݇ܪ ܝܼܫܘܿܥ ܡ̣ܢ ܪܸܚܩܵܐ ܗܲܠ ܓܵܘ ܕܵܪܬܵܐ ܕܓܘܼܪܵܐ ܕܟܵܗܢܹ̈ܐ، ܘܝ݇ܬܝܼܒ݂ ܠܹܗ ܥܲܡ ܢܵܛܘܿܪܹ̈ܐ ܒܸܫܚܵܢܵܐ ܩܵܕ݇ܡ ܢܘܼܪܵܐ. 55ܓܘܼܪ̈ܵܢܹܐ ܕܟܵܗܢܹ̈ܐ ܘܟܠܹܗ ܟܢܘܼܫܝܵܐ ܛܵܥܝܼ ܗ݇ܘܵܘ ܣܵܗܕܘܼܬܵܐ ܥܲܠ ܝܼܫܘܿܥ ܕܡܲܡܝܸܬܝܼ ܗ݇ܘܵܘ ܠܹܗ، ܘܠܵܐ ܡܘܼܫ݇ܟ̰ܸܚ ܠܗܘܿܢ. 56ܪܵܒܵܐ ܝܘܼܗ݇ܒܸܠ ܠܗܘܿܢ ܥܲܠܘܼܗܝ ܣܵܗܕܘܼܬܵܐ ܕܲܓܵܠܬܵܐ، ܐܝܼܢܵܐ ܣܵܗܕܘܵܬܲܝ̈ܗܝ ܠܵܐ ܕܒ݂ܝܼܩ ܠܗܘܿܢ ܥܲܡ ܥܘܼܕܵܠܹ̈ܐ.
57ܘܩܝܼܡ ܠܗܘܿܢ ܣܵܗܕܹ̈ܐ ܕܲܓܵܠܹ̈ܐ ܘܐ݇ܡܝܼܪܗܘܿܢ، 58”ܐܲܚܢܲܢ ܫܡܝܼܥ ܠܲܢ ܕܐ݇ܡܝܼܪܹܗ، ’ܐܵܢܵܐ ܒܸܬ ܬܵܠܚܹܢܹܗ ܐܵܗܵܐ ܗܲܝܟܠܵܐ ܒܸܢܝܵܐ ܒܐܝܼܕܵܬܹ̈ܐ، ܘܒܬܠܵܬܵܐ ܝܵܘܡܵܢܹ̈ܐ ܒܸܬ ܒܵܢܹܝܢ ܚܲܕ ܐ݇ܚܹܪ݇ܢܵܐ ܠܵܐ ܒܸܢܝܵܐ ܒܐܝܼܕܵܬܹ̈ܐ.‘“ 59ܐܝܼܢܵܐ ܐܘܼܦ ܐܵܗܵܐ ܣܵܗܕܘܼܬܵܐ ܠܵܐ ܕܒ݂ܝܼܩ ܠܵܗ̇. 60ܗ̇ܝܓܵܗ ܩܝܼܡ ܠܹܗ ܓܘܼܪܵܐ ܕܟܵܗܢܹ̈ܐ ܒܹܝܬ݇ ܦܲܠܓܵܐ، ܘܒܘܼܩܸܪܹܗ ܡ̣ܢ ܝܼܫܘܿܥ، ”ܩܵܡܘܿܕܝܼ ܠܹܐ ܝܘܸܬ ܓ̰ܲܘܘܼܒܹܐ ܠܐܲܢܹܐ ܕܒܸܣܗܵܕܵܐ ܝܢܵܐ ܥܲܠܘܼܟ݂؟“ 61ܐܝܼܢܵܐ ܝܼܫܘܿܥ ܫܬܝܼܩܵܐ ܝܗ݇ܘܵܐ، ܘܡܸܢܕܝܼ ܠܵܐ ܓ̰ܘܼܘܸܒ ܠܹܗ. ܡܸܢܕܪܸܫ ܒܘܼܩܸܪܹܗ ܡܸܢܹܗ ܓܘܼܪܵܐ ܕܟܵܗܢܹ̈ܐ، ”ܐܲܢ݇ܬ ܝܼܘܸܬ ܡܫܝܼܚܵܐ، ܒܪܘܿܢܵܐ ܕܡܒܘܼܪܟ݂ܵܐ؟“ 62ܓ̰ܘܼܘܸܒ ܠܹܗ ܝܼܫܘܿܥ، ܒܹܐܡܵܪܵܐ، ”ܐܵܢܵܐ ܝܘܸܢ.
ܘܒܸܬ ܚܵܙܹܝܬܘܿܢ ܒܪܘܿܢܵܐ ܕܐ݇ܢܵܫܵܐ ܝ݇ܬܝܼܒ݂ܵܐ ܡ̣ܢ ܝܲܡܝܼܢܵܐ ܕܚܲܝܠܬܵܢܵܐ ܘܒܹܐܬܵܝܵܐ ܥܲܡ ܥܢܵܢܵܐ ܕܫܡܲܝܵܐ.“#ܕܢܝܐܝܠ 7:13
63ܘܓܘܼܪܵܐ ܕܟܵܗܢܹ̈ܐ ܟ̰ܘܼܢܟ̰ܸܪܹܗ ܓ̰ܘܼܠܘܼ̈ܗܝ، ܒܹܐܡܵܪܵܐ، ”ܩܵܡܘܿܕܝܼ ܐ݇ܚܹܪ݇ܢܵܐ ܣܢܝܼܩܹܐ ܝܘܲܚ ܠܣܵܗܕܹ̈ܐ؟ 64”ܗܵܐ ܫܡܝܼܥ ܠܵܘܟ݂ܘܿܢ ܡ̣ܢ ܦܘܼܡܹܗ ܓܘܼܕܵܦܵܐ. ܡܘܿܕܝܼ ܒܸܚܫܵܒ݂ܵܐ ܝܬܘܿܢ؟“ ܘܐܵܢܝܼ ܟܠܲܝܗܝ ܕܝܼܢܗܘܿܢ ܕܚܲܝܵܒ݂ܵܐ ܝܠܹܗ ܠܡܵܘܬܵܐ. 65ܫܘܼܪܹܐ ܠܗܘܿܢ ܐ݇ܢܵܫܹ̈ܐ ܒܸܪܵܩܵܐ ܥܲܠܘܼܗܝ، ܘܟܘܼܣܹܐ ܠܗܘܿܢ ܦܵܬܹܗ، ܘܩܲܪܦܸܚܝܼ ܗ݇ܘܵܘ ܠܹܗ ܘܐܵܡܪܝܼ ܗ݇ܘܵܘ، ”ܢܲܒܝܼ.“ ܘܢܵܛܘܿܪܹ̈ܐ ܡܵܚܝܼ ܗ݇ܘܵܘ ܠܹܗ ܒܟ̰ܵܦܘܿܠܹ̈ܐ.
ܫܸܡܥܘܿܢ ܟܹܐܦܵܐܒܸܣܪܵܒ݂ܵܐ ܠܡܵܪܲܢ
ܡܬܝ 26:69‐75؛ ܠܘܩܐ 22:56‐62؛ ܝܘܚܢܢ 18:15‐18، 18:25‐27
66ܘܟܲܕ ܫܸܡܥܘܿܢ ܟܹܐܦܵܐ ܠܠܬܸܚܬ ܓܵܘ ܕܵܪܬܵܐ ܝܗ݇ܘܵܐ، ܐ݇ܬܹܐ ܠܵܗ̇ ܚܕܵܐ ܚܵܡܬܵܐ ܕܓܘܼܪܵܐ ܕܟܵܗܢܹ̈ܐ، 67ܘܚܙܹܐ ܠܵܗ̇ ܐܸܠܹܗ ܟܲܕ ܒܸܫܚܵܢܵܐ. ܚܝܼܪܵܗ̇ ܒܝܼܹܗ ܘܐ݇ܡܝܼܪܵܗ̇ ܐܸܠܹܗ، ”ܐܘܼܦ ܐܲܢ݇ܬ ܥܲܡ ܝܼܫܘܿܥ ܢܵܨܪܵܝܵܐ ܝܘܸܬ ܗ݇ܘܵܐ.“ 68ܐܝܼܢܵܐ ܗ̇ܘ ܣܪܝܼܒ݂ ܠܹܗ ܘܐ݇ܡܝܼܪܹܗ، ”ܠܹܐ ܝܘܸܢ ܒܝܼܕܵܥܵܐ ܘܠܵܐ ܦܲܪܡܘܼܝܹܐ ܡܘܿܕܝܼ ܒܹܐܡܵܪܵܐ ܝܘܲܬܝ.“ ܘܦܠܝܼܛ ܠܹܗ ܠܒܲܕܲܪ ܠܨܘܼܦܵܐ، ܘܩܪܹܐ ܠܹܗ ܩܵܪܘܿܝܵܐ. 69ܡܸܢܕܪܸܫ ܚܙܹܐ ܠܵܗ̇ ܐܸܠܹܗ ܗ̇ܝ ܚܵܡܬܵܐ ܘܫܘܼܪܹܐ ܠܵܗ̇ ܒܹܐܡܵܪܵܐ ܠܐܵܢܝܼ ܕܬܵܡܵܐ ܝܗ݇ܘܵܘ، ”ܐܘܼܦ ܐܵܗܵܐ ܡܸܢܲܝܗܝ ܝܠܹܗ.“ 70ܐܝܼܢܵܐ ܗ̇ܘ ܡܸܢܕܪܸܫ ܣܪܝܼܒ݂ ܠܹܗ. ܘܡ̣ܢ ܒܵܬ݇ܪ ܚܲܕ ܡܸܬܚܵܐ ܐܵܢܝܼ ܕܟܸܠܝܹܐ ܝܗ݇ܘܵܘ ܬܵܡܵܐ ܐ݇ܡܝܼܪܗܘܿܢ ܠܫܸܡܥܘܿܢ ܟܹܐܦܵܐ، ”ܫܲܪܝܼܪܵܐܝܼܬ ܐܲܢ݇ܬ ܡܸܢܲܝܗܝ ܝܘܸܬ، ܘܐܘܼܦ ܓܒܸܠܝܵܝܵܐ ܝܘܸܬ، ܣܵܒܵܒ ܗܲܡܙܲܡܬܘܼܟ݂ ܡܲܕܘܼܥܹܐ ܝܠܵܗ̇.“ 71ܐܝܼܢܵܐ ܗ̇ܘ ܫܘܼܪܹܐ ܠܹܗ ܠܡܲܚܪܘܼܡܹܐ ܘܠܸܡܝܵܝܵܐ، ”ܠܹܐ ܝܵܕܥܹܢ ܠܐܵܗܵܐ ܐ݇ܢܵܫܵܐ ܕܗܲܡܙܘܼܡܹܐ ܝܬܘܿܢ ܒܘܼܬ ܕܝܼܹܗ.“ 72ܘܗܲܪ ܒܗ̇ܝ ܥܕܵܢܵܐ ܩܪܹܐ ܠܹܗ ܩܵܪܘܿܝܵܐ ܓܵܗܵܐ ܕܬܲܪܬܹܝ. ܘܕܟ݂ܝܼܪܹܗ ܫܸܡܥܘܿܢ ܟܹܐܦܵܐ ܗܹܡܸܙܡܵܢ ܕܝܼܫܘܿܥ ܕܐ݇ܡܝܼܪܵܐ ܝܗ݇ܘܵܐ ܐܸܠܹܗ، ”ܡ̣ܢ ܩܵܕ݇ܡ ܕܩܵܪܹܐ ܩܵܪܘܿܝܵܐ ܬܲܪܬܹܝ ܓܵܗܹ̈ܐ، ܒܸܬ ܣܵܪܒܹܬ ܠܝܼ ܬܠܵܬ ܓܵܗܹ̈ܐ.“ ܘܫܘܼܪܹܐ ܠܹܗ ܠܸܒܟ݂ܵܝܵܐ.
ទើបបានជ្រើសរើសហើយ៖
ܡܪܩܘܣ 14: ABTAB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Aramaic Bible Translation Assyrian Bible © 2025 Aramaic Bible Translation