ܣܘܥܪ̈ܢܐ 16
16
ܛܝܼܡܵܬܹܐܘܿܣ ܒܹܐܙܵܠܵܐ ܥܲܡ ܦܵܘܠܘܿܣ ܘܫܝܼܠܵܐ
1ܐ݇ܬܹܐ ܠܹܗ ܦܵܘܠܘܿܣ ܠܕܲܪܒܹܐ ܡܕܝܼܢ݇ܬܵܐ، ܘܡ̣ܢ ܬܵܡܵܐ ܠܠܘܼܣܛܪܵܐ. ܓܵܘ ܠܘܼܣܛܪܵܐ ܐܝܼܬ ܗ݇ܘܵܐ ܚܲܕ ܬܲܠܡܝܼܕܵܐ ܫܸܡܹܗ ܛܝܼܡܵܬܹܐܘܿܣ، ܒܪܘܿܢܵܐ ܕܚܕܵܐ ܒܲܟ݂ܬܵܐ ܝܗܘܼܕܵܝܬܵܐ ܡܗܘܼܡܸܢܬܵܐ، ܐܝܼܢܵܐ ܒܵܒܘܼܗܝ ܝܵܘܢܵܝܵܐ ܝܗ݇ܘܵܐ. 2ܐܲܚܘܿܢܘܵܬܹ̈ܐ ܕܓܵܘ ܠܘܼܣܛܪܵܐ ܘܐܝܼܩܵܢܘܿܢ ܟܹܐ ܗܲܡܙܸܡܝܼ ܗ݇ܘܵܘ ܨܦܵܝܝܼ ܒܘܼܬ ܕܝܼܹܗ. 3ܦܵܘܠܘܿܣ ܒܥܹܐ ܠܹܗ ܕܠܲܒܸܠ ܠܹܗ ܥܲܡܹܗ. ܒܲܣ ܫܩܝܼܠ ܠܹܗ ܘܓܙܝܼܪܹܗ، ܣܵܒܵܒ ܐܝܼܬ ܗ݇ܘܵܘ ܝܗܘܼܕܵܝܹ̈ܐ ܒܗ̇ܝ ܕܘܼܟܵܐ، ܘܟܠܲܝܗܝ ܟܹܐ ܝܵܕܥܝܼ ܗ݇ܘܵܘ ܕܒܵܒܘܼܗܝ ܝܵܘܢܵܝܵܐ ܝܗ݇ܘܵܐ. 4ܐ݇ܙܝܼܠ ܠܗܘܿܢ ܡ̣ܢ ܡܕܝܼܢ݇ܬܵܐ ܠܡܕܝܼܢ݇ܬܵܐ ܒܹܐܡܵܪܵܐ ܠܐ݇ܢܵܫܹ̈ܐ ܕܢܵܛܪܝܼ ܦܘܼܩܕܵܢܹ̈ܐ ܕܦܝܼܫ ܠܗܘܿܢ ܡܘܼܬܒܹܐ ܒܝܲܕ ܫܠܝܼܚܹ̈ܐ ܘܚܘܵܪ̈ܕܸܩܢܹܐ ܕܓܵܘ ܐܘܿܪܸܫܠܸܡ. 5ܘܥܹܕܵܬܹ̈ܐ ܦܵܝܫܝܼ ܗ݇ܘܵܘ ܡܘܼܩܘܝܼܹܐ ܒܗܲܝܡܵܢܘܼܬܵܐ، ܘܙܵܝܕܝܼ ܗ݇ܘܵܘ ܟܠ ܝܘܿܡ ܒܡܸܢܝܵܢܵܐ.
ܚܸܙܘܵܐ ܕܦܵܘܠܘܿܣ
6ܚܕܝܼܪܗܘܿܢ ܦܵܘܠܘܿܣ ܘܚܲܒ݂ܪ̈ܵܘܵܬܹܗ ܒܐܲܬܪܵܐ ܕܦܪܘܼܓ݂ܝܼܵܐ ܘܓܵܠܵܛܝܼܵܐ، ܣܵܒܵܒ ܡܘܼܟܠܝܼܲܝ ܠܹܗ ܪܘܼܚܵܐ ܕܩܘܼܕܫܵܐ ܡ̣ܢ ܠܡܲܟܪܘܼܙܹܐ ܓܵܘ ܐܵܣܝܼܵܐ. 7ܐܝܼܡܲܢ ܕܐ݇ܬܹܐ ܠܗܘܿܢ ܠܬܚܘܼܡܹ̈ܐ ܕܡܘܼܣܝܼܵܐ، ܓ̰ܘܼܪܸܒ ܠܗܘܿܢ ܕܥܵܒ݂ܪܝܼ ܠܒܹܬܘܿܢܝܼܵܐ، ܐܝܼܢܵܐ ܪܘܼܚܵܐ ܕܝܼܫܘܿܥ ܠܵܐ ܫܒ݂ܝܼܩ ܠܹܗ ܐܸܠܲܝܗܝ ܕܥܵܒ݂ܪܝܼ. 8ܗ̇ܝܓܵܗ ܥܒ݂ܝܼܪܗܘܿܢ ܡ̣ܢ ܡܘܼܣܝܼܵܐ ܘܨܠܹܐ ܠܗܘܿܢ ܠܛܪܘܿܐܘܿܣ. 9ܒܠܲܝܠܹܐ ܦܵܘܠܘܿܣ ܚܙܹܐ ܠܹܗ ܚܸܙܘܵܐ ܕܚܲܕ ܐ݇ܢܵܫܵܐ ܡܵܩܹܕܘܿܢܵܝܵܐ، ܟܸܠܝܵܐ ܦܲܪܦܘܼܠܹܐ ܒܝܼܹܗ ܘܒܹܐܡܵܪܵܐ، ”ܬܵܐ ܠܡܵܩܹܕܘܿܢܝܼܵܐ ܘܗܲܝܸܪܲܢ.“ 10ܡ̣ܢ ܒܵܬ݇ܪ ܕܚܙܹܐ ܠܹܗ ܦܵܘܠܘܿܣ ܐܵܗܵܐ ܚܸܙܘܵܐ، ܡܘܼܠܝܸܙ ܠܲܢ ܓ̰ܲܠܕܹܐ ܕܐܵܙܲܠ݇ܚ ܠܡܵܩܹܕܘܿܢܝܼܵܐ، ܣܵܒܵܒ ܩܛܝܼܥ ܠܲܢ ܕܐܲܠܵܗܵܐ ܩܸܪܝܲܢ ܝܼܗ݇ܘܵܐ ܕܡܲܟܪܸܙܲܚ ܐܸܠܲܝܗܝ.
ܬܵܘܲܒܬܵܐ ܕܠܘܼܕܝܼܵܐ
11ܘܡ̣ܢ ܛܪܘܿܐܘܿܣ ܛܪܹܐ ܠܲܢ ܘܐ݇ܙܝܼܠ ܠܲܢ ܬܪܘܼܨܵܐ ܠܣܵܡܘܿܬܪܵܩܹܐ، ܘܒܝܵܘܡܵܐ ܐ݇ܚܹܪ݇ܢܵܐ ܠܢܹܐܵܦܘܿܠܝܼܣ. 12ܘܡ̣ܢ ܬܵܡܵܐ ܐ݇ܙܝܼܠ ܠܲܢ ܠܦܝܼܠܝܼܦܘܿܣ، ܩܘܿܠܘܿܢܝܼܵܐ ܪܗ݇ܘܿܡܵܝܬܵܐ، ܘܡܕܝܼܢ݇ܬܵܐ ܩܵܕ݇ܡܵܝܬܵܐ ܒܐܘܼܚܕܵܢܵܐ ܕܡܵܩܹܕܘܿܢܝܼܵܐ. ܘܦܝܼܫ ܠܲܢ ܓܵܘ ܐܵܗܵܐ ܡܕܝܼܢ݇ܬܵܐ ܚܲܕ݇ܟܡܵܐ ܝܵܘܡܵܢܹ̈ܐ.
13ܒܝܵܘܡܵܐ ܕܫܲܒܬܵܐ ܦܠܝܼܛ ܠܲܢ ܠܒܲܕܲܪ ܡ̣ܢ ܬܲܪܥܵܐ ܕܡܕܝܼܢ݇ܬܵܐ ܠܡܲܪܙܵܐ ܕܢܲܗܪܵܐ ܐܲܝܟܵܐ ܕܚܫܝܼܒ݂ ܠܲܢ ܕܐܝܼܬ ܗ݇ܘܵܐ ܕܘܼܟܵܐ ܕܨܠܘܿܬܵܐ. ܝ݇ܬܝܼܒ݂ ܠܲܢ ܬܵܡܵܐ ܘܗܘܼܡܙܸܡ ܠܲܢ ܥܲܡ ܒܲܟ݂ܬܵܬܹ̈ܐ ܕܓ̰ܡܝܼܥܹܐ ܝܗ݇ܘܵܘ. 14ܚܕܵܐ ܡ̣ܢ ܐܵܢܝܼ ܒܲܟ݂ܬܵܬܹ̈ܐ ܠܘܼܕܝܼܵܐ ܝܗ݇ܘܵܐ، ܙܲܒܢܵܢܬܵܐ ܕܐܲܪܓܘܵܢܵܐ، ܣܵܓ݂ܕܵܢܬܵܐ ܕܐܲܠܵܗܵܐ، ܡ̣ܢ ܡܕܝܼܢ݇ܬܵܐ ܕܬܹܐܘܿܛܝܼܪܵܐ. ܐܵܗܵܐ ܦܬܝܼܚ ܠܹܗ ܠܸܒܘܼܗ̇ ܡܵܪܝܵܐ، ܘܡܘܼܨܝܸܬ ܠܵܗ̇ ܠܡܸܢܕܝܼܵܢܹ̈ܐ ܕܗܲܡܙܘܼܡܲܝ ܝܗ݇ܘܵܘ ܦܵܘܠܘܿܣ. 15ܡ̣ܢ ܒܵܬ݇ܪ ܕܥܡܝܼܕ ܠܵܗ̇ ܗ̇ܝ ܘܟܠܹܗ ܒܲܝܬܘܼܗ̇، ܦܘܼܪܦܸܠ ܠܵܗ̇ ܒܝܼܲܢ ܒܹܐܡܵܪܵܐ، ”ܐܸܢ ܒܸܚܫܵܒ݂ܵܐ ܝܬܘܿܢ ܕܗܘܼܡܸܢܬܵܐ ܝܘܵܢ ܒܡܵܪܲܢ، ܬܹܝܡܘܼܢ ܘܦܘܼܫܘܼܢ ܓܵܘ ܒܲܝܬܝܼ.“ ܘܪܵܒܵܐ ܩܲܡ ܡܲܠܝܸܨܵܐ ܠܲܢ.
ܦܵܘܠܘܿܣ ܘܫܝܼܠܐܓܵܘ ܒܹܝܬ ܐܲܣܝܼܪܹ̈ܐ
16ܗܘܹܐ ܠܵܗ̇ ܟܲܕ ܒܹܐܙܵܠܵܐ ܝܘܲܚ ܗ݇ܘܵܘ ܠܕܘܼܟܵܐ ܕܨܠܘܿܬܵܐ، ܬܦܝܼܩ ܠܵܗ̇ ܒܝܼܲܢ ܚܕܵܐ ܚܵܡܬܵܐ ܕܐܝܼܬ ܗ݇ܘܵܐ ܠܵܗ̇ ܪܘܼܚܵܐ ܕܩܨܵܡܵܐ. ܟܹܐ ܡܲܝܬܝܵܐ ܗ݇ܘܵܐ ܪܵܒܵܐ ܙܘܼܙܹ̈ܐ ܩܵܐ ܡܵܪ̈ܵܘܵܬܘܼܗ̇ ܒܩܨܵܡܬܵܐ. 17ܐܵܗܵܐ ܒܪܵܬܵܐ ܒܹܐܬܵܝܵܐ ܝܗ݇ܘܵܐ ܒܵܬ݇ܪ ܦܵܘܠܘܿܣ ܘܒܵܬ݇ܪܲܢ ܡܲܩܘܘܼܚܹܐ ܘܒܹܐܡܵܪܵܐ، ”ܐܲܢܹܐ ܐ݇ܢܵܫܹ̈ܐ ܝܼܢܵܐ ܪܹ̈ܓܵܘܵܬܹܐ ܕܐܲܠܵܗܵܐ ܥܸܠܵܝܵܐ، ܘܡܲܟܪܘܼܙܹܐ ܝܢܵܐ ܐܸܠܵܘܟ݂ܘܿܢ ܐܘܼܪܚܵܐ ܕܦܘܼܪܩܵܢܵܐ.“ 18ܥܒ݂ܝܼܕ ܠܵܗ̇ ܗܲܕܟ݂ܵܐ ܪܵܒܵܐ ܝܵܘܡܵܢܹ̈ܐ، ܒܚܲܪܬܵܐ ܣܩܝܼܕ ܠܹܗ ܦܵܘܠܘܿܣ ܘܕܝܼܪܹܗ ܘܐ݇ܡܝܼܪܹܗ ܠܗ̇ܝ ܪܘܼܚܵܐ، ”ܒܫܸܡܵܐ ܕܝܼܫܘܿܥ ܡܫܝܼܚܵܐ ܒܸܦܩܵܕܵܐ ܝܘܸܢ ܐܸܠܵܟ݂ܝ ܕܦܵܠܛܲܬܝ ܡܸܢܘܼܗ̇.“ ܘܗܲܪ ܒܗ̇ܝ ܥܕܵܢܵܐ ܦܠܝܼܛ ܠܵܗ̇ ܡܸܢܘܼܗ̇.
19ܐܝܼܡܲܢ ܕܚܙܹܐ ܠܗܘܿܢ ܡܵܪ̈ܵܘܵܬܘܼܗ̇ ܕܐ݇ܙܝܼܠ ܠܵܗ̇ ܡܸܢܘܼܗ̇ ܗܹܒ݂ܝܼ ܕܩܢܵܝܬܵܐ ܕܙܘܼܙܹ̈ܐ، ܕܒ݂ܝܼܩ ܠܗܘܿܢ ܠܦܵܘܠܘܿܣ ܘܠܫܝܼܠܵܐ ܘܓܪܝܼܫܲܝ ܠܗܘܿܢ ܠܫܘܼܩܵܐ ܩܵܕ݇ܡ ܓܘܼܪ̈ܵܢܹܐ. 20ܘܟܲܕ ܡܘܼܐܬܝܲܝ ܠܗܘܿܢ ܠܟܸܣ ܫܲܠܝܼܛܹ̈ܐ، ܐ݇ܡܝܼܪܗܘܿܢ، ”ܐܲܢܹܐ ܐ݇ܢܵܫܹ̈ܐ ܝܗܘܼܕܵܝܹ̈ܐ ܝܢܵܐ، ܘܒܸܚܒ݂ܵܛܘܼܗ̇ ܝܢܵܐ ܡܕܝܼܢ݇ܬܲܢ، 21”ܘܡܲܟܪܘܼܙܹܐ ܝܢܵܐ ܐܸܠܲܢ ܥܵܕܲܬܹ̈ܐ ܕܠܹܐ ܝܠܵܗ̇ ܩܵܢܘܿܢܵܝܬܵܐ ܐܸܠܲܢ ܕܩܲܒܠܲܚ ܠܗܘܿܢ ܘܠܵܐ ܕܥܵܒ݂ܕܲܚ ܠܗܘܿܢ، ܣܵܒܵܒ ܐܲܚܢܲܢ ܪ̈ܗ݇ܘܿܡܵܝܹܐ ܝܘܲܚ.“ 22ܨܦܝܼܚ ܠܹܗ ܥܲܠܲܝܗܝ ܟܸܢܫܵܐ ܪܵܒܵܐ، ܘܦܩܝܼܕ ܠܗܘܿܢ ܫܲܠܝܼܛܹ̈ܐ ܕܦܵܝܫܝܼ ܗ݇ܘܵܘ ܫܘܼܠܚܹܐ ܘܡܸܚܝܹܐ ܒܫܵܘܛܹ̈ܐ. 23ܘܡ̣ܢ ܒܵܬ݇ܪ ܕܡܸܚܝܲܝ ܠܗܘܿܢ ܪܵܒܵܐ، ܕܸܪܝܲܝ ܠܗܘܿܢ ܓܵܘ ܒܹܝܬ ܐܲܣܝܼܪܹ̈ܐ، ܘܦܩܝܼܕ ܠܗܘܿܢ ܠܢܵܛܘܿܪܵܐ ܕܒܹܝܬ ܐܲܣܝܼܪܹ̈ܐ ܕܢܵܛܹܪܗܘܿܢ ܒܗܸܫܝܵܪܘܼܬܵܐ. 24ܘܗ̇ܘ ܟܲܕ ܩܘܼܒܸܠ ܠܹܗ ܗܲܕܟ݂ܵܐ ܦܘܼܩܕܵܢܵܐ، ܕܸܪܝܲܝ ܠܹܗ ܓܵܘ ܒܲܝܬܵܐ ܓܵܘܵܝܵܐ ܕܒܹܝܬ ܐܲܣܝܼܪܹ̈ܐ، ܘܐ݇ܣܝܼܪܹܗ ܐܲܩܠܵܬܲܝ̈ܗܝ ܒܩܵܘܕܵܐ.
25ܒܦܲܠܓܵܐ ܕܠܲܝܠܹܐ ܦܵܘܠܘܿܣ ܘܫܝܼܠܵܐ ܨܲܠܘܼܝܹܐ ܝܗ݇ܘܵܘ ܘܫܲܒܘܼܚܹܐ ܠܐܲܠܵܗܵܐ، ܘܐܲܣܝܼܪܹ̈ܐ ܒܸܫܡܵܥܲܝ. 26ܡܸܢܫܸܠܬܵܢܹܐ ܗܘܹܐ ܠܹܗ ܪܵܘܕܵܢܵܐ ܓܘܼܪܵܐ، ܘܫܥܝܼܫ ܠܗܘܿܢ ܒܸܢܝܲܬܹ̈ܐ ܕܒܹܝܬ ܐܲܣܝܼܪܹ̈ܐ. ܗܲܪ ܒܗ̇ܝ ܥܕܵܢܵܐ ܦܬܝܼܚ ܠܗܘܿܢ ܟܠܲܝܗܝ ܬܲܪ̈ܥܵܢܹܐ ܘܫܪܹܐ ܠܗܘܿܢ ܐܸܣܘܼܪܹ̈ܐ ܕܟܠܲܝܗܝ ܐܲܣܝܼܪܹ̈ܐ. 27ܟܲܕ ܪܥܝܼܫ ܠܹܗ ܢܵܛܘܿܪܵܐ ܕܒܹܝܬ ܐܲܣܝܼܪܹ̈ܐ ܘܚܙܹܐ ܠܹܗ ܬܲܪ̈ܥܵܢܹܐ ܦܬܝܼܚܹܐ، ܫܩܝܼܠ ܠܹܗ ܣܲܝܦܵܐ ܘܒܥܹܐ ܠܹܗ ܕܩܵܛܹܠ ܗ݇ܘܵܐ ܠܵܗ̇ ܓܵܢܹܗ، ܣܵܒܵܒ ܚܫܝܼܒ݂ ܠܹܗ ܥܪܝܼܩܹܐ ܝܗ݇ܘܵܘ ܐܲܣܝܼܪܹ̈ܐ. 28ܐܝܼܢܵܐ ܦܵܘܠܘܿܣ ܩܪܹܐ ܠܹܗ ܐܸܠܹܗ ܒܩܵܠܵܐ ܪܵܡܵܐ ܘܐ݇ܡܝܼܪܹܗ، ”ܠܵܐ ܥܵܒ݂ܕܹܬ ܠܓܵܢܘܼܟ݂ ܒܝܼܫܬܵܐ. ܟܠܲܢ ܠܐܲܟ݂ܵܐ ܝܘܲܚ.“ 29ܛܠܝܼܒ ܠܹܗ ܢܵܛܘܿܪܵܐ ܫܪܵܓ݂݇ܝܵܐ ܘܪܚܝܼܛ ܠܹܗ ܠܓܵܘܵܐ ܟܲܕ ܪܲܬܪܘܼܬܹܐ، ܘܢܦܝܼܠ ܠܹܗ ܩܵܕ݇ܡ ܐܲܩܠܵܬܹ̈ܐ ܕܦܵܘܠܘܿܣ ܘܫܝܼܠܵܐ. 30ܦܘܼܠܛܲܝ ܠܹܗ ܠܒܲܕܲܪ ܘܒܘܼܩܸܪܹܗ ܡܸܢܲܝܗܝ، ”ܡܵܪ̈ܲܝ، ܡܘܿܕܝܼ ܥܵܒ݂ܕܹܢ ܕܦܵܝܫܹܢ ܦܘܼܪܩܵܐ؟“ 31ܘܐܵܢܝܼ ܓ̰ܘܼܘܸܒ ܠܗܘܿܢ، ”ܗܲܡܸܢ ܒܡܵܪܲܢ ܝܼܫܘܿܥ ܘܒܸܬ ܦܵܪܩܹܬ، ܐܲܢ݇ܬ ܘܟܠܹܗ ܒܲܝܬܘܼܟ݂.“ 32ܗ̇ܝܓܵܗ ܗܘܼܡܙܸܡ ܠܗܘܿܢ ܐܸܠܹܗ ܗܹܡܸܙܡܵܢ ܕܡܵܪܝܵܐ ܘܠܟܠܲܝܗܝ ܐܵܢܝܼ ܕܓܵܘ ܒܲܝܬܹܗ. 33ܠܘܼܒܠܲܝ ܠܹܗ ܒܗ̇ܝ ܥܕܵܢܵܐ ܒܠܲܝܠܹܐ، ܘܚܘܼܠܸܠܲܝ ܠܹܗ ܡ̣ܢ ܕܲܪ̈ܒܵܬܲܝܗܝ، ܘܥܡܝܼܕ ܠܹܗ ܗ̇ܘ ܘܟܠܲܝܗܝ ܐ݇ܢܵܫܹ̈ܐ ܕܒܲܝܬܹܗ. 34ܠܘܼܒܠܲܝ ܠܹܗ ܠܒܲܝܬܹܗ ܘܡܘܼܬܸܒ݂ ܠܹܗ ܩܵܕ݇ܡܲܝܗܝ ܡܹܐܟ݂ܘܼܠܬܵܐ، ܘܚܕܹܐ ܠܗܘܿܢ ܟܠܲܝܗܝ، ܗ̇ܘ ܘܐ݇ܢܵܫܹ̈ܐ ܕܒܲܝܬܹܗ، ܣܵܒܵܒ ܗܘܼܡܸܢܗܘܿܢ ܒܐܲܠܵܗܵܐ.
35ܟܲܕ ܗܘܹܐ ܠܹܗ ܝܵܘܡܵܐ، ܫܘܼܕܸܪܗܘܿܢ ܫܲܠܝܼܛܹ̈ܐ ܠܦܲܪ̈ܵܫܹܐ ܕܐܵܡܪܝܼ ܠܢܵܛܘܿܪܵܐ ܕܒܹܝܬ ܐܲܣܝܼܪܹ̈ܐ ܕܫܵܪܹܐ ܠܐܵܢܝܼ ܐ݇ܢܵܫܹ̈ܐ. 36ܐ݇ܡܝܼܪܹܗ ܓܘܼܪܵܐ ܕܒܹܝܬ ܐܲܣܝܼܪܹ̈ܐ ܠܦܵܘܠܘܿܣ، ”ܫܲܠܝܼܛܹ̈ܐ ܒܹܐܡܵܪܵܐ ܝܢܵܐ، ܕܦܵܝܫܝܼܬܘܿܢ ܫܸܪܝܹܐ. ܐܵܕܝܼܵܐ ܦܠܘܿܛܘܼܢ ܘܙܹܠ݇ܡܘܼܢ ܒܫܠܵܡܵܐ.“ 37ܓ̰ܘܼܘܸܒ ܠܹܗ ܦܵܘܠܘܿܣ، ”ܡܚܹܐ ܠܗܘܿܢ ܐܸܠܲܢ ܕܠܵܐ ܕܝܵܢܬܵܐ ܩܵܕ݇ܡ ܥܲܝܢܹ̈ܐ ܕܟܠܹܗ ܟܸܢܫܵܐ ܟܲܕ ܐܲܚܢܲܢ ܪ̈ܗ݇ܘܿܡܵܝܹܐ ܝܘܲܚ، ܘܕܪܹܐ ܠܗܘܿܢ ܐܸܠܲܢ ܓܵܘ ܒܹܝܬ ܐܲܣܝܼܪܹ̈ܐ. ܐܵܕܝܼܵܐ ܒܵܥܝܼ ܕܦܲܠܛܝܼ ܠܲܢ ܒܛܸܫܘܵܐ؟ ܠܵܐ. ܫܒ݂ܘܿܩ ܐܵܬܝܼ ܒܓܵܢܲܝܗܝ ܘܦܲܠܛܝܼ ܠܲܢ.“ 38ܐ݇ܙܝܼܠ ܠܗܘܿܢ ܦܲܪ̈ܵܫܹܐ ܘܗܘܼܩܹܐ ܠܗܘܿܢ ܠܫܲܠܝܼܛܹ̈ܐ. ܘܟܲܕ ܫܡܝܼܥ ܠܗܘܿܢ ܕܪ̈ܗ݇ܘܿܡܵܝܹܐ ܝܗ݇ܘܵܘ، ܙܕܝܼܥ ܠܗܘܿܢ. 39ܐ݇ܬܹܐ ܠܗܘܿܢ ܠܟܸܣ ܠܲܝܗܝ ܫܲܠܝܼܛܹ̈ܐ ܘܛܠܝܼܒ ܠܗܘܿܢ ܦܵܚܲܠܬܵܐ ܡܸܢܲܝܗܝ، ܘܦܘܼܪܦܸܠ ܠܗܘܿܢ ܒܝܼܲܝܗܝ ܕܦܵܠܛܝܼ ܗ݇ܘܵܘ ܡ̣ܢ ܡܕܝܼܢ݇ܬܵܐ. 40ܡ̣ܢ ܒܵܬ݇ܪ ܕܦܠܝܼܛ ܠܗܘܿܢ ܡ̣ܢ ܒܹܝܬ ܐܲܣܝܼܪܹ̈ܐ، ܥܒ݂ܝܼܪܗܘܿܢ ܠܒܲܝܬܵܐ ܕܠܘܼܕܝܼܵܐ. ܬܵܡܵܐ ܚܙܹܐ ܠܗܘܿܢ ܠܐܲܚܘܿܢܘܵܬܹ̈ܐ. ܡ̣ܢ ܒܵܬ݇ܪ ܕܝܘܼܗܒܲܝ ܠܗܘܿܢ ܠܸܒܵܐ، ܦܠܝܼܛ ܠܗܘܿܢ ܡ̣ܢ ܬܵܡܵܐ.
ទើបបានជ្រើសរើសហើយ៖
ܣܘܥܪ̈ܢܐ 16: ABTAB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Aramaic Bible Translation Assyrian Bible © 2025 Aramaic Bible Translation
