HIBRIUKVDVNG 3
3
Jisubv Mose:mcyam Bottcya:dag
1Cdcmpidag, angunnc bvrrangkvdvnga, sc:kobulu taycng gognamcm tadmvndonc, Jisumc mc:toka, ngoluk lude:sunamlok ager gernamdc odokkc kumnam agerlok bottcnc. 2Bv mc:jvg jvrvgnckkai Bvm sc:kobv agercm bikaji, kappar Mose:bv:sin Ru:ncpvnckc okum ara:do mc:jvgdagaji. 3Ckvdaggom kapc okum moncdcm okumdcmpcyam mcnggcya:dagji Mose:mcyam Jisumc bojcru:ya:pc arc kadopc kvto. 4(Kapcnc appvng okumcm akonkokki modag, cmpige:la appvng attarlok moncdc Ru:ncpvncbv.) 5Su:pak Mose:bv Ru:ncpvnckc okumdo ager gerya:nckoncmpc mc:jvgdagai, lcdupc lupcnam attarkvdv:dcm, 6cmpige:la Kristobv awo akoncmpc Ru:ncpvnckc okumdo mc:jvgjvrvgdagai. Odokkc ngolu Bvk okumc ngolu jodi mc:tinsutvla du:mvlo odokkc ngoluk mc:tinno bottcpc mc:sutvmvlo.
Ru:ncpvnck Tani:kvdv:dok Lcgangc Du:rasunamko
7Cdcmpidag, Angunnc Yalodc kapc ludagji,
“Silo, cdvlo nolu Bvk gomugcm taddonc,
8mimag moncdokkcmpc birudi:pc noluk asin kvdv:dcm tormoyoka,
yumrangdo ankang ka:nam longcdokkcmpc,
9Okolo noluk abukvdv:dc ngom ankang kangkolo kangkvto
odokkc ngok agerdcm dv:tak yv:pikopc ka:to.
10Cdcmpidag ngom cdc opvndokki aglvngcm sa:moto, odokkc luto,
‘Bulu lo:dcm asin kvdv:dokki mc:yotla mc:dag;
bulu ngok lambc kvdv:dcm kintomang.’
11Kapc ngo ngok aglv:la pesutoji,
‘Bulu cdvlosin ngok du:rasukolo gva:la:ma:yc.’ ”
12Ka:sv:mosv:toka, bvrrang kvdvnga, ckvdma:mvlo nolukkolok akonc jodi aima:nc ager gerckvdv:dokkcpc iyc, mc:jvgma:nc asinpc ila, turnc Ru:ncpv:ncdokkcpc gerdopc gvboycpc. 13Cmpige:la akoncm akonc longgcm longgcm luyirmvnsulang, cddvlo:pc “silo” cmna luycji, jc nolukkolok sc:kosin pa:pdok yadnamdokki asin torma:ycpc. 14Kapcnc ngolu Kristokolo orsudo, jodi ngolu mc:tinar–po:namdcm du:tcrdo:pc mcnggabtvla du:mvlo,
15Cdcm cdvlo lutagji cdcm lukamdcmpc.
“Silo, cdvlo no Bvk gomugcm taddoji,
noluk asin kvdv:dcm
cdc mimag mododokkcmpc tormoyoka.”
16Cdc sc:kobulun jc tatto odokkc ckvdaggom mimagcm mokanc? Cdcbulu Igiptdcm Mose:kc gvgcbonamdo gvmvnna mcnckvdv:dc:mangalang? 17Odokkc sckkokki Bv dv:tak yv:pi:kopc Bv aglvngsangkan? Cdc pa:b inc kvdv:dokkimangalang, sc:k amvrkvdv:dc yumra:do kcdamka:nc. 18Odokkc sc:kom Bv pesuton jc cdcbulu Bvk du:rasukodo gvangkuma:ycnc, cmpige:la cdc agom lukam tadma:nc kvdv:dc:ma:lang? 19Cdcmpidag ngolu ka:dag jc bulu gva:la:mangai jc buluk mc:jvgma:nam lcgangki.
ទើបបានជ្រើសរើសហើយ៖
HIBRIUKVDVNG 3: MISIBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.