AGER KVDVNG 24
24
Poulmc Jiwukvdv:dc Lugc:la Lunam
1Odokkc longc lcdulo kumnam ager gergcnclok bottarya:nc Ononio:bv ake abv:nc tani: kvdvdokkilang odokkc ukil akoncki gvido, Tertullu: cmnamko. Bulu amo: ru:tumdok kcra:do cdc lujvg agomdcm Poulkc birudi:pc lvgto; 2odokkc cdvlo bvm goga:toji, Tertullu:bv bvm aimang cmna scmpc lula lurobbomkang:
“Nokkokki ngolu airu:pc mc:pom pa:la:yam, odokkc nok binamkokki, airu:pc ainc Pelika, sc opvnsok lcga:pc ainc agercm airu:nc agercm gerrento, 3appv:pc odokkc appv:lo ngolu cdcm aipcmc:lvgsula torvgsuto. 4Cmpige:la, nom odokkcsin du:mopc, ngo nok ayangki ngolum andc:pc tatteika cmna kumna ludung. 5Kapila:nc ngolu sc tani:scm ya:bc-bclc:la yanga:nc kinamcmpc pa:to, Jiwu appv:lo imoncko mo:pvsok appv:lo, odokkc Najarene kcra:dok gvgcpo:ncdc.
6“Bv kumko okumdcmci narc:ma:dopc imopc cmna ankvto, cmpige:la ngolu bvm ycnggabto. 7Cmpige:la mimagmonc gvgcboncdok bottarya:nc Lisiasbv gva:to odokkc kvnggv:pc morvdla bvm ngoluk alaglokkcm bompakkang. 8Bvm no avyc kangkangge:la bvkkolokkcm appvnggcm kinyc ngolum okkom bvm lujcgcm ludu:ji.” 9Jiwu kvdv:dc:gom cdc lujcmdcm lumvnna luto, cdc agomkvdv:dc arro.
Poulbv Pelikkc Kcra:lo Lurasunam
10Odokkc cdvlo amo:ru:tumdc bvm agom luycpc cmna lcngkanto, Poulbv lulatsuto:
“Dv:tak bojcrungkopc no sc opvnsok kcba: ba:ncpc idung cmna mc:la, ngo mc:po:pc lurasudung. 11No aiyo:pc lula:ycpc, vyvng kolang lo:nyik imangcida ngo Jerusalempc gvla kumkapc gvnamc; 12odokkc bulu ngom sck lcdulo sckkokkisin lukerluyer-mvsunammcm pa:tomang cdcmpcmanggom yadkumsunc tani: kcrcngko luwur lubarmang, dormo iko kumko okumdo, cdcmanggom nogordo. 13Bulukkolok akosinci nokkolo:pc su:pak ngok agomcm lukanna lubila:mang. 14Cmpige:la scm ngo nom arro cmna lubidung, jc Lambcdok gvkampc, okodcm bulu c:mo:pin opvn cmdu:ji, ngo ngoluk abukvdv:dok Ru:ncpvncdcm kumdo, lujvg-lurodo lukam appv:dcm mc:jvgla cdcmanggom lungor lunckvdv:do adnamkvdv:dcm, 15Ru:ncpvnckolo mc:tinna mc:la okodcm bulu avkvdv:dc:sin torvgsudo, jc ainclang aima:nclok anyipaklokkc sige:la turkunamko turycku. 16Cdcmpila ngo lo:dvscm Ru:ncpvnckc lcgangc tani:lo:pc narcngo:nc mc:nam sagnamcm mc:pc mc:dvrro mc:do.
17“Su:pak cdcmpinamc ngo dvtag tagnyi tagum lcdupc ngok opvnsok lcgangc da:n ckkclang tolvgla binamckkc bomtungku. 18Ngo cdcm bila du:dom, bulu ngom kumko okumdo narc:dopc pa:to, yadkumsunc tani:kcrcngcsin kama:pc cdcmanggom atv urusare:kosin kama:pc. Cmpige:la Asia:dok Jiwu ckkcnc– 19bulu nok kcra:so du:pcnammc atv lujckko luto, bulukkc atvko ngok biru:di:pc du:mvlo. 20Cdcmanggom sc tani:kvdv:sc avkvdv:dc avyc lusupcnamai oko germur agerko ngo kcba:dok kangkolo gertoji, 21cddo:ma:mvlo ngo buluk kcra:do jcsa:namdcmong, ‘Sinckvdv:dok turkunamdok turkunam agomki ngom silo kcba: ba:pcnampc idung.’ ”
22Cmpige:la Pelikbv, Lambcdok agomdcm cdcyam aiyo:pc kinna:yam, tawunamdcm kcra:ya:pc langa:to, scmpc lula, “Cdvlo Lisiasbv kcba:ba:ncdc gviycji, ngo nok kcba:dcm tadla luyc.” 23Odo bv lvngko mimag moncdok gvgcboncdcm lulvgto jc bvm kanggabonna du:pcnammc ckvdaggom asudowko mcngkampc du:mopcnamc, odokkc bvk ajonkvdv:dok sc:komsin bvk manamcm bila:ma:dopc motumyok.
Poulbv Pelikkclang Drusilla:kc Kcra:do
24Longc asudko lcdupc Pelikbv bvk nc:ng Drusillangkc lcdulo gvto, sc:kobv Jiwu nc:ngka:ji; odokkc bv Poulkc lcgangc mclvgto odokkc Kristo Jisukolo mc:jvgnam tadto. 25Odokkc bv aropc kcba: ba:namc, avyc motumsula du:namcm odokkc ro:yampokc kcba:ba:nam agomcm svgka:mvnsunammc, Pelikbv aglvng sangkang odokkc luto, “Su:pakkcpc gc:rpongkang; cdvlo ngo tadmo:ycnc ngo nom goga:ycku.” 26Odo ayirv:do bv mc:dagai jc Poulbv murkongcm biycpc cmna. Cdcmpila bvk lcgangc lckko: lckkolo agomcm luposuto.
27Cmpige:la dv:tak anyiko idodcm Pelikkc dungkodo Porkiu Pestu:bv pa:to; odokkc Jiwu kvdv:dok mcngkampc ibinamko ibipc cmna mc:la, Poulmc Pelikbv makana:do tumna mcpakto.
ទើបបានជ្រើសរើសហើយ៖
AGER KVDVNG 24: MISIBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
