1 KORINTIANG KVDVNG 12
12
Angunnc Yalodok Aman Binam
1Su:pak bvrokvdvnga, ainctaycng among yalodok aman agomc, ngo nolum c:mo:pc incpc imolv:mang. 2Nolu kindag jc nolu cdvlo ui-kumna:ji nolu agom luma:nc monam moimang kvdv:do:pc gvyodbola gvtungai, cdcmpc idag imanggom nolum gvnampc idungaboi. 3Cdcmpidag ngo nolum mcngkintoka cmna mc:dag jc sc:kosin Ru:ncpvnckc Yalodokki luncdc “Jisumc pelvgnampc ika:langka!” Cmna luma:yc, odokkc sc:kobv:sin Angunnc Yalodokkima:mvlo “Jisubv Ru:tumc” cmna lula:ma:yc.
4Su:pak angu angu amanc dung, cmpige:la yallo akkongko; 5Odokkc angu angu agerc dung, ckvdaggom Ru:tum akko:dc; 6odokkc angu angu agerc dung, ckvdaggom cdc Ru:ncpvnc akko:dc sc:kobv ilang-gvlangcm odobulu appv:do ako akko:pc bidagji. 7Appvngcm appvngkc amin lcgangc Yalodok lcngkansunamcm bitung. 8Akoncm Yalodokki kinjvgla kinnam agomcm bitung lukur lule:la lubila:dopc, odokkc akonkoncm kinnam agomcm lubila:dopc cdc Yalo atcro:doggongkcmpc, akonkoncm mc:jvgnammcm cdc Yalo akko:dokki, 9akonkoncm csa:mokula:namdok amancm Yalo akko:dokki, 10akonkoncm mcngapla:ma:nam ager gernamcm, akonkoncm lungor lunamcm, akonkoncm yalokvdv:dcm angu angupc kangkinna lubila:dopc, akoncm angu angu agom lula:namcm akondcm agom lunamkvdv:dcm lukurbila:dopc. 11Cdc appv:dc Yalo akko:dokki ilanggvlangcm binamongc, sc:kobv atckpc Bv mcngkampc idopc bidagji.
Amvr Atcro:lo Bojcrungko Alc-alag Du:nam
12Kapila:nc amvrdc kapc akonc odokkc bojcrungko angu angu ajon amvr-ammo du:nc, odokkc amvrdok alc alag appv:dc, bojcrungko idaggom, amvr akkongko, cdcmpidag cdc Kristokolo dung. 13Kapila:nc Yalo akodokki ngolu appvngc amvr akodc baptismongcm langka–Jiwudaggom cdcmanggom Girikdaggom, pagbodaggom cdcmanggom avkc mc:supc du:ncdaggom–odokkc appv:dcm Yalo akkongkolok tv:moto.
14Kapila:nc amvrdc amvr-amo akkongdo kancmang cmpige:la bojcrung kokki. 15Alcdc jodi luyc, “Ngo alakmangga:lok, ngo amvrdokkcpc imang” cdc amvrdokkcpc atv adji:ya:nc inyopkopc amvramodokkcpc pv:ma:dopc imoma:ycpc. 16Odokkc jodi yeru:dc luyc, “Ngo amikpc imangga:lok, ngo amvrdokkcmang,” cdc amvrdokkcpc atv pv:ma:nckopc ima:ycpc. 17Jodi amvr appv:dc amik appirkopc iyya:mvlo, tadnancdc okolo du:ya:ncm? Amvr appv:dc jodi yeru:pc iyya:mvlo, okolok namnamdc du:ya:n? 18Cmpige:la cdcm kapc, Ru:ncpvncbv ru:lvgtonc amvrdo alcalagkvdv:dcm, appv:dcm ako akkopc, Bv kapc mc:toji. 19Appv:dc alcalag akko:ya:mvlo, amvrdc okolo du:ya:ji? 20Cdcm kapc idagji bojcrungko angu angu lctv-lagpangc dung, ckvdaggom amvr akkongko.
21Amigdc alagdcm lula:mang, “Ngo nom mamang.” 22Kekonpc lupc, amvrdok alc-alag kvdv:dc adji:ya:pc torncpc ka:namkvdv:do mcpakla:ma:nammc, 23odokkc cdc amvrdok alcalagkvdv:dcm okodcm bulu ngolu adji:ya:pc mcnggcpcnamcmna mc:donc ngolu bottcya:nc mcnggcm mclvgdo, odokkc ngoluk kangkanma:nc alc-alakkvdv:dcm aiya:pc mclvgdo, 24okodcm ka:yumnc alcalakkvdv:dc mama:ji. Cmpige:la Ru:ncpvncbv amvrdcm rungkumsula Ru:to, adji:ya:nc alc alagkvdv:dcm mcnggcnammcm bila. 25Odomvlo amvrdo angunammc kama:ycpc cma, cmpige:la jc adinamvr kvdv:dc c:mo:pinc ka:mvnsunamcm akonc lcgangc ka:ycpc cmna. 26Adinamvr akonc rammvlo, appv:dc ramdag lckko:pc; akoncm mcnggcycmvlo, appv:dc lckko:pc mc:podag.
27Cdcmpinamc nolu Kristokc amvrc odokkc atckpc odok adinamvrc. 28Odokkc Ru:ncpvncbv Kristokc mondoli:do mclvgla ager germonamkvdv:dcm bia:danna bitung, lckondo lungor lunckvdv:dcm, lcumdo poyirnckvdv:dcm, odokkc mcngapla:ma:nam ager gernckvdv:dcm, odokkc csa:mokunckvdv:dcm, ager gerdumsunc-kvdv:dcm, migom donc kvdv:dcm, angu angupc agom lunckvdv:dcm. 29Appv:dc mclvgla ager germonammclang? Appv:dc lungor lunnclang? Appv:dc poyirnclang? Appv:dc mcngapla:ma:nam agercm gerdolang? 30Appvnglokkc csa:mokumnam amanc olang? Appvngc angu angu agom lulangki ludolang? Appvngc lukonsunamcm ludolang? 31Ckvdaggom kvnggv:pc bottaya:nc amandcm pa:lv:langka.
Odokkc ngo cdcmyam aipakya:nc lambcko lcngkanyc.
ទើបបានជ្រើសរើសហើយ៖
1 KORINTIANG KVDVNG 12: MISIBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.