Matie 3
3
Waazoi Zãa woo dasi inyi
(Cɔ Maaku 1:1-8; Luku 3:1-18; Zãa 1:19-28)
1Waati bɛɛbɛi, Zãa woo dasi inyi í na wa ce waazo si gbaai Zudee. 2Í ni, i kpaasi idɔ nŋɛ ŋa domi waati í maai iyi Ilaaɔ̃ á na ku jɛ bommaɛ. 3Idei Zãaui walii Ezai í fɔ wo, si waati iyi í ni,
à gbɔ imui inɛ gɔ wa dɔ̃ anu si gbaa wa ni,
i teese kpãai Lafɛ̃ɛ ku tɛ ŋa.#3:3 Cɔ Ezai 40:3.
4Zãa wa dasi ibɔi ntoi kpookpo, nɔ wa dĩ santiikii bata. Kɛtɛngbo do nyikɔ̃i í jɛ ijɛɛ. 5Nɔ inɛ ŋa à naa bi tɛɛ hai Zeruzalɛmu do hai ilɛi Zudee fei do hai ilu ŋa iyi à wa cingaa do cingaai idoi Zuudɛ̃ɛu fei. 6À ce tuubai dulum du ŋa nɔ à jɔ̀ Zãa í dasi ŋa inyi si idoi Zuudɛ̃ɛu.
7 Farisi ŋa do Sadusi ŋa mɔ à waa naa bi tɛɛ aŋa nkpɔ nkpɔ ku ba ku dasi ŋa inyi. Iyi Zãa í yɛ ŋa ŋɔi í sɔ̃ ŋa í ni, iŋɛ inɛ buu ŋa bɛi njo wukuku, yooi í sɔ̃ ŋɛ í ni i saa idɔɔkɔ̃i Ilaaɔ̃ iyi í maai wa. 8Na nŋu, i ce kookoosu jiida i nyisiò iyi ì kpaasi idɔ ŋa. 9I maà tamaa mà aa ba faaba ŋa si na iyi í jɔ̀ ì jɛ tɔkui Aburahamu ŋa. An sɔ̃ ŋɛ, Ilaaɔ̃ á yɔkɔ ku so kuta ŋau ihɛ̃ ku ce ŋa tɔkui Aburahamu ŋa. 10Wee dagba wa kãsi tã mɔm a daò icui jĩi. Na nŋu, jĩi iyi kù waa so iso jiida fei aa daai a dasi ina. 11Amu inyii ǹ wa n dasi ŋɛ ku ba ku jɛ sɛɛdai idɔ ku kpaasi nŋɛ, amma inɛ gɔ á na ku naa si anyim. Í rem do gbugbã ntɔ ntɔ, n kù to baa n bɔ baataɛ. Nŋui á da nŋɛ si Hundei Ilaaɔ̃ do ina. 12Wa mu mii ku fɛ bileeɛ si awɔ, nɔ ku kpã bileeu bii à kpokpoɛ, nɔ ku ko yɔyɔu ku dasi aka, sakou mɔ ku dasi ina iyi ci ya ku.
Inyi ku dasii Jesu
(Cɔ Maaku 1:9-11; Luku 3:21-22)
13Waati bɛɛbɛ Jesu í naa hai ilɛi Galilee nɔ í bɔ idoi Zuudɛ̃ɛ ku ba Zãa ku dasiɛ inyi. 14Iyi í to wa í ni Zãa ku dasi nŋu inyi, ŋɔi Zãa wa bi ku kɔ̀, í ni, awɔi ì nɛ kpãa i dasim inyi, nɔ bɛirei í ce ì waa naa bi tom. 15Ŋɔi Jesu í jɛaa í ni, jɔ̀ ku ce bɛɛbɛ titã, domi bɛɛbɛi à nɛ ka ce ka ceò mii iyi Ilaaɔ̃ í bi fei. Nɔ Zãa í jɛ. 16Iyi í dasi Jesu inyi í tã, bɛ gbakã Jesu í fita wa hai si inɔ inyiu. Ŋɔi lelei Aɔ̃ í cĩ nɔ í yɛ Hundei Ilaaɔ̃ wa de siɛ wa bɛi ankasiidi. 17Nɔ à gbɔ ide ku fɔ gɔ wa hai lele í ni, inɛ ihɛ̃i í jɛ Amam. Ǹ buu jiida jiida, siɛi inɔ didɔ̃m fei í ya wa.
ទើបបានជ្រើសរើសហើយ៖
Matie 3: MKL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
2021, SIM International et UEEB