THA 20
20
Polnii Mesidoniya ninado Akaiya ki kagong
1Sateichii koi nrung tei gatu sek-kii, Polnii boumei gotei lat tosii lung tiimadipyii sanii tat n-nou wosii Mesidoniya ki tat tang karam jangpii tatpat takle. 2Sateichii mpounii sazyii teitui tat kagong kiteito ahnyiigo hangkapii tam katwipyii sanii mpounii Gris kitei gongtakle. 3Sateichii mpounii teiki teito sakhiitum bamsanii Sairiya ki katang malyii hoisii tat tanglesii bamleibangpii Jehudimeinii mpougo jumtang karam makumpii tiikajyii tei tigong sek-kii, mpounii Mesi- doniya lampang nlai tang taklesii maning wotakle. 4Sateichii Biroya kito Paihus nah sapfii mpou Soptar, Thesolonikamei kak kito Aristarkas ninado Sekundas, Derbe kito Gaiyas ninado Timothi sateichii Asiya kito Taichikas ninado Trophimas, ahnyii ainii mpougo kaswisii tatle. 5Ah- nyiinii doi reisii Trosh kito nyiigo koile. 6Nlenii ahee kaihai kasu tiirok hang-ngi piinei leimik mangii kashang piinei Trosh ki ahnyiida gong wotakle, tei kito nyii leimik sana bamle.
Polnii Trosh ki kalui tiisii kagong
7Sateichii hapta kito karei piinei leimik tei nyiinii tiirok tiirak tang karam jangpii gong ndwi katu tinglang kak, Polnii supounei tatpat tanglesii maning kalu kito ahnyiigo tampyii ralipyii sanii mpounii sam katam tei tinghum asumkii pitakle. 8Sateichii nyiinii ndwi kalei ki shang kasagoi kitei thaomi hangkii masei bamle. 9Sateichii Iotaikas sii kalat rahang kaleimei hangninii kamlat kuto bamle, mpou ai hangkapii ziitnasii n-ngaktu takle, sateichii Polnii sam tam mathang jupii mpou zyiitu sanii hangtum kashang rasam kiteito takmang takle, ninado taisii poi matu takle. 10Nlenii Polnii mpou phyiiryii nkwimangsii, mpougo gaiwosii tamle, gonyii hing sulo; kadaponii mpouda karing tei leile. 11Sateichii mpounii tatkhii wosii, tiirok tei tiiraksii chiiwosanii ah- nyiigo kaswisii kathangkii leimik pat kasuta katang tei karashii sii, aitiisii tat n-nou takle. 12Sateichii ahnyiinii nah sapfii mpou gotei ringsii poitat tutakle; sateichii ahnyiinii hangkapii nta takle.
Polnii Miletas ki kagong
13Nlenii nyiinii malyii garyiinii katang tei adoi reimaasii Assos ki katang tei malyii tong gong takle; teikito Polgo tong matulesii ma- ningle, kadaponii mpou sekpiinii apipii tatlesii aitiisii kakhatpyii bamle, 14Sateichii mpounii nyiigo Assos kito kadou wosek-kii, nyiinii mpougo tong malu wosii, Mitailini ki gongtakle. 15Tei kito nlaigongsii, nyiinii adoipiinei leimik tei Kiyas ki doilampang tei gong wole; sateichii leimik hangninii sousii leimik kanapiinei tei Miletas ki gong takle. 16Kadaponii Polnii Asiya ki tei tinglang bamtoi laktang karam jangpii, Ipisa tat majupat tosii malyii hoisii tat tutang karam jangpii lung maning wotakle; kada- pokii mazhii leponii mpounii Pentikos ki leimik piinei Jerosalem ki bam tang karam jangpii kalangsii tat tutakle.
Ipisa ki katingmei dakii Polnii kaluisam katam
17Sateichii Miletas kito Ipisa kikii mei lang magongsii Charsh ki katingmei hang go mpou dakii lat magong takle. 18Sateichii ahnyiinii mpouda gong wosek-kii, mpounii ahnyii dakii tamle, “Inii Asiya ki api kangliit karei leimik sekpiinii ting- lang kaleita gonyiigo kaswisii kada takumpiinii bampo katu tei gonyii sekpiinii tile. 19Katunii, Inii hang- kapii lung manoisii, mikdwi kapat ninado Jehudimeinii n-gu makumpii jumtang karam kito n-gu ajai kaju kapat tei njasii Bangpii mah nga ngasii; 20Saraa lampangkii lung ka- kali ninado nyii Bangpii Jisu Krista dakii kamalum Jehudimei dakiido Grikmei dakiido sakchyii tiisii, 21mah kata bitang karam sam gonyii dakii tam ka-mpat kito sateichii mei machii doikii, aki-ki lungkado gonyii- go tam ralikapyii kito kada takumpii Inii nkhiimang makpo katu gonyiinii tile. 22Sateichii aitoinii julo, rangiinii katam swisii I-Jerosalem ki katang tat leile; tei kito gudato kadapei pat tangpo Inii timakle. 23Ai katangnii tile, Kabang ninado kamage kalak piinii n-gu koisii bamlesii rangii kamateinii namdi hang kikii n-gu sakchyii pyiile. 24Nlenii gumah tii- kamajyii ninado Saraa mah kalung- set mah kabi rasam mah sakchyii pyiitang karam jangpii, Bangpii Jisu dato Inii doukalu atha tei Inii tiimashang tang karam jangpii, Inii gumah tiilung ai amai bamlesii, ninado gudato maiteenglesii maning makle.
25Sateichii aitoinii, julo, gonyii kak kito Inii Saraa mah sating sazyii rasam tam ralipyiisii tatsii leile, nlenii gonyiihangnii guju nlailoisii ngoulak takle katu ai Inii tile. 26Teijangpiinii meihang mah azai kito I-kama gale katu tingneinii Inii gonyii dakii sakchyii tiileile. 27Kadaponii Saraa mah kamaning hang kito gonyii dakii tam ka-mpat kito Inii nkhiimakle. 28Mpounah mah zai sekpiinii lyii kalu Saraamah Charsh go kamakot, gonyii roinapii ninado Jaokoi hang kiteito machyii wolo; rangii kamateinii gonyiigo jaokoi teimah kakoimei tiipyii takle. 29Inii tattu kaleitai jaokoigo masaklak tang karam, ngoukahing sangyiinii gonyii kak ki liit tangle katu tei Inii tile. 30Sateichii gonyii kak ki sek aito ahnyiitai switang karam jangpii boumeigo chyii mpat tang karam jangpii tiikarampou sam katam sapfiimei pat tangle. 31Teijang teipiinii tingkum hangtum katang tei Inii tinghum tingna mikdwi patsii meihang go ralikapyii matou makle katu tei gonyiinii maning wosii sakai wolo.
32“Sateichii aitoinii Inii gonyiigo Saraa dakii ninado mpou mah jumage kapyii mah samtam kikii pyiitoi leile; samtam aipiinii gonyiigo tiikamakhii ninado tiimatei kaleimei ahnyii hang kak kito dou kamajyii tei gonyii dakii pyii wobuile. 33Inii mei- mah kado seh sana mak-kii peimani lukanyii tei tiimakle. 34Sateichii bah aipiinii gujangpii ninado n-gu kaswi kaleimei jangpii tha tiitakle katu gonyiinii tile. 35Mahlyii hang kito Inii gonyiigo tiimangou pyiitakle, katunii, tha teisii katii aipiinii nyiinii kasuimeigo tiiha tang karamle, Bangpii Jisunii tam kabam mpoumah samtam hang gotei maningsii, ‘Kadou sung kapyii teinii kisii sadoi bile.’ ”
36Ai tam aisii, mpounii kok kumsanii ahnyii hang go kaswisii riita takle. 37Sateichii ahnyii hangnii hatsii Polgo gaisii matwum takle, 38Mpou ju nlailoisii ahnyiinii ngouloilak taklesii mpounii katam sam jang teipiinii ahnyiinii kisii lung kamage takle. Teito ahnyiinii mpougo malyiini katang tei kapaopyii takle.
ទើបបានជ្រើសរើសហើយ៖
THA 20: NAG2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Maram Naga, KARANU KABI SAMTAM © Bible Society of India, 2007.
