ខគម្ពីរពេញនិយមពី Ipi. 5

ចែក​រំលែក

Tuma asamtai atumsha Yus atumín anenmana núnisrum anenaitiarum. Kristu iin anenmajⁱ núnisrum anenaitiarum. Kame ii tunaari̱n akikmaktaj tusa Niṉki Yusan súsatniuncha tura ti shiir nekapújamnia áestamuncha núnis jákatniunam surumakmiayi.

Nu asamtai átum túramu íimiastarum. Nékachu áintsarum pujusairap. Antsu péṉker enentáimprarum wekasatarum. Ashí tsawant péṉker túramnia nu wasurkairap. Tunáa ti pampaatsuk.

Nampekairap. Nampeakmeka aya yajauch ajame. Antsu Yusa Wakaní̱ winia enentái̱rui̱ takamtsuk pujurtusti tu enentáimsatarum. Túrarum Yus shiir enentáimtakrum Yus kanta kantamkirum shiir áujnaisatarum. Ii Uuntri̱ Jesukrístu náari̱ji̱a̱i̱ ashí írunna nu Yus Apa tuke yumiṉsatarum.

Enentáincha áirap. Ii Uuntri̱ Kristu warinia wakera nu enentáimtustarum.

Kristu ni shuari̱n ti aneak nin yáiṉtaj tusa jákatniun surumakmiayi. Núnisrumek áishmaṉtirmesha atumí nuwé̱ aneatniuitrume.

Yáunchuka atumsha kiritniunam wekainiuyarme. Tura yamaikia Krístuja̱i̱ tsaniṉkiu asarum péṉker tsáapninium wekaarme. Shuar tsáapninium wekainia nuja̱i̱ métek wekasatarum.

Yus shuar asarum nuamtak umirnaikiatarum. Túrakrum Kristu shiir awajsattarme.

Núwa̱ka Krístun umirna núnisaṉ ni áishri̱ncha umirkatniuiti.

Tura núnisaṉ ashí áishmaṉtiram atumí nuwé̱ atumí aya̱shí̱a nútiksarmek aneatniuitrume. Nuwa̱sha ni áishri̱n umirkatniuiti.

Tuma asamtai áishmaṉ ni aparí̱ncha nukurí̱ncha ikiukin ni nuwe̱ja̱i̱ tsaniṉkiar chikichik aya̱shtin ajainiawai.

Kiritniunam wekainia nu túramu pachisairap. Antsu nu shuar tsáapninium eṉkeatarum.