ខគម្ពីរពេញនិយមពី ရောမ 1

ចែក​រំលែក

သ​တင်ꩻ​ဟဝ် တ​ရာꩻ​နဝ်ꩻ ခွေ​ယွုမ်း လ​က္ခံႏ​လို့​စင် မွေး​စွဉ်ႏ​သွူ။ အ​ရီး​သွတ်ꩻ ဂျူး​လိုꩻ​မျိုꩻ​ဖုံႏ တွမ်ႏ​လိုꩻ​မျိုꩻ​လင်​ဖုံႏ က​အီႏ​ကယ်ႏ​ဒါႏ လိုꩻ​ယွုမ်း​သား​ဖုံႏ ကား​က​အဝ်ႏ​နဝ်ꩻ ထွာ​ဒျာႏ​ဗွေႏ​ဘု​ရာꩻ တန်ꩻခိုꩻ​သွူ။

လိုꩻ​ဖုံႏ ဖေႏ​က​ဆွုပ်​ဆံႏ​မဲဉ်ႏ​တွမ်ႏ ဝွေꩻ​ဗွေႏ​နမ်း၊ သ​တင်ꩻ​ဟဝ်​နဝ်ꩻ ဗွေႏ​ဘု​ရာꩻ ဖေါႏနယ်​ဖေႏ​တဲင် နဝ်ꩻ​နဝ်ꩻ​ထွာ ထာꩻ​ယွုမ်း အဝ်ႏ​အ​စ ဗꩻ​အ​သွတ်ꩻ​နဝ်ꩻ​သွူ။ နုဲင်း​လိတ်ကျမ်ꩻ က​ရိုꩻ​အ​တွိုင်ꩻ၊ “​လိုꩻ​နဝ်ꩻ​စွဉ်ႏ အ​ထာꩻ​ယွုမ်း​တွော့ꩻ ဗွေႏ​ဘု​ရာꩻ​မတ် လိုꩻ​စွို့ꩻ​စွဉ်ႏ​နဝ်ꩻ​မꩻ အ​သက်​အီႏ​အဝ်ႏ​မွန်​ဗာႏ” နုဲင်း​နဝ်ꩻ​သွူ။

တယ်ႏ​စွဉ်ႏ ဗွေႏ​ဘု​ရာꩻ က​ဖန်​ဆင်ꩻ မာꩻ​ထွာ​လွဉ်​စ ဟံႏ​တန်​ခါ​ကာႏ၊ တွမ်ႏ​မဲ့​တဲင် တ​ထီႏ​နွောင်ꩻ​တဝ်း​ဒါႏ ဝွေꩻ​ဗွေႏ​စွဉ်ႏ​တဲ့ အဝ်ႏ​သေ​နွောင်ꩻ ဝွေꩻ​ဗွေႏ​နဝ်ꩻ​ထွာ ထာ​ဝ​ရ​တန်ꩻခိုꩻ အ​ဗွေႏ​ကျောင်ꩻ တွမ်ႏ​ဝွေꩻ​ဗွေႏ​နဝ်ꩻ ထွာ​ဗွေႏ​ဘု​ရာꩻ အ​ဇာႏ​တိ​ကျောင်ꩻ ထောက်​ထွား​ဗော့ꩻ အ​ထာꩻ​မာꩻ ကား​က​အဝ်ႏ​နဝ်ꩻ​တဲင် အဝ်ႏ​သေ​စဲင်း​နွောင်ꩻ​ဒျာႏ​သွူ။ နုဲင်း​ဗွေႏ​ဘု​ရာꩻ က​ဖန်​ဆင်ꩻ မာꩻ​ထွာ​လဲဉ်း အ​ကို​နဝ်ꩻ ဝွေꩻ​သီး အဝ်ႏ​ရိက်​ခေႏ​လꩻ နဝ်ꩻ​သွူ။ နဝ်ꩻ​မꩻ ဝွေꩻ​သီး အ​ပဲစ်​ဖုံႏ အဝ်ႏ​ကျောင်ꩻ ကြဲစ်​တော​ကြဲစ်​လင်​ထာꩻ တ​လꩻ​တဝ်း​သွူ။

ဗွေႏ​ဘု​ရာꩻ​နဝ်ꩻ ဝွေꩻ​သီး အဝ်ႏ​သေ​စွဉ်ႏ​တဲ့ က​ဆဲင်ႏ​ဒါ အဝ်ႏ​လိုႏ​အုပ်ꩻ ဝွေꩻ​ဗွေႏ​နဝ်ꩻ ဝွေꩻ​သီး တ​အုပ်ꩻ​တဝ်း ဝွေꩻ​ဗွေႏ ဂွုဏ်ႏ​တောႏ၊ ဝွေꩻ​ဗွေႏ ကေꩻ​ဇူꩻ​တောႏ​နဝ်ꩻ​တဲ့ ဝွေꩻ​သီး တ​ကေꩻ​ဇူꩻ​တင်ႏ​တဝ်း​သွူ။ ဝွေꩻ​သီး ထာꩻ​ယူႏ​စဉ်ꩻ​စာꩻ​ဖုံႏ​နဝ်ꩻ ထွာ​ထိုꩻ​တော​ဒျာႏ ထာꩻ​ခြေင်​ခြေင်​တဲင် သ​တိ​ဉာဏ်ႏ​အဲဉ်​ထဝ်း ဝွေꩻ​သီး​သ​ဖုံႏ​နဝ်ꩻ​တဲ့ အဝ်ႏ​ဗွေ​သော့ꩻ​ဒျာႏ ထာꩻ​မွိုက်​မာႏ ခေ့ꩻ​က​ရစ်ꩻ​ဖုံႏ​သွူ။

ပွိုင်း​ဝွို့​တွမ်ႏ ဗွေႏ​ဘု​ရာꩻ သ​မ္မာႏ​တ​ရာꩻ​နဝ်ꩻ ဝွေꩻ​သီး လုဲင်ႏ​ထိုꩻ​တော​ဒျာႏ စွဉ်ႏ​ထာꩻ​အ​မာႏ​သွူ။ အဝ်ႏ​လိုႏ​ဝုဲင်ႏ ကိုꩻ​ကွယ်ႏ​ဒျာႏ က​ဖန်​ဆင်ꩻ မာꩻ​ထွာ​လွဉ်​ဒါႏ အ​ဗွေႏ​နမ်း​နဝ်ꩻ ဝွေꩻ​သီး ဝုဲင်ႏ​ကိုꩻ​ကွယ်ႏ​တော​ဒျာႏ ဗွေႏ​ဘု​ရာꩻ အ​က​ဖန်​ဆင်ꩻ သေꩻ​ခါꩻ​ဒါႏ ထာꩻ​ဖုံႏ​နဝ်ꩻ​သွူ၊ က​ဖန်​ဆင်ꩻ​ဒါႏ အ​ဗွေႏ​နဝ်ꩻ အုပ်ꩻ​ထင်ႏ သေႏ​သေႏ​သွော့​။ အာ​မေင်။

လိုꩻ​ဖုံႏ ဖေႏ​က​သေ​ဗာႏ​မွိုန်း အ​မဲဉ်ႏ​တ​ရာꩻ​နယ်ꩻ က​ရဲ​ဆီꩻ​ခါꩻ​တဲင် ဖေႏ​က​ကံ​ကျင်ꩻ မာꩻ​လွဉ်ꩻ​ထိုꩻ အ​နယ်ꩻ​ကုဲင်​ဖုံႏ တွမ်ႏ​အ​ပဲစ်​က​ဆန်​ချာ​ဒါႏ ထာꩻ​ကား​က​အဝ်ႏ​နဝ်ꩻ အဝ်ႏ​ခမ်းထီ​မို့ꩻ​လောင်း ဗွေႏ​ဘု​ရာꩻ​နဝ်ꩻ သ​လျား​ကျောင်ꩻ ဖေါႏနယ် ထင်ႏ​သျာꩻ​ဖေႏ​လဲဉ်း​သွူ။

ကွပ်​ပွိုး ဝွေꩻ​သီး မာꩻ​ထာꩻ နုဲင်း​ယို​အ​တွက် ဝွေꩻ​သီး​နဝ်ꩻ ဗွေႏ​ဘု​ရာꩻ အပ်​ထိုꩻ​ဖေႏ ထာꩻ​ဟဝ်​ဝင်ꩻ​သꩻ​ခ​ရာႏ ကိ​လေ​သာႏ တ​ဏာႏ အ​စူ​ကို​သွူ။ လိုꩻ​မူႏ​ဖုံႏ​တဲ့ စွဉ်ꩻ​အွဉ်ႏ​ကုဲင်​ထိုꩻ အ​သ​ဘာႏ​ဝ ထွုံꩻ​စံႏ​တွော့ꩻ ဝွေꩻ​သီး​လွူꩻ​လောႏ ကာႏ​မ​ဂုဏ်ႏ​နဝ်ꩻ ဆန်ꩻ​ထိုꩻ​တော​ဒျာႏ သ​ဘာႏ​ဝ​ဖုံႏ​သွူ။ ဗွိုန်​နုဲင်း​နဝ်ꩻ​နေ​နေ လိုꩻ​ခို​ဖုံႏ​နဝ်ꩻ​တဲ့ စွဉ်ꩻ​အွဉ်ႏ​ကုဲင်​ထိုꩻ လိုꩻ​ခို​သ​ဘာႏ​ဝ​တွော့ꩻ အဝ်ႏ​လိုႏ ဗေင်ႏ​လွူꩻ​ငီꩻ​ဒျာႏ တွမ်ႏ​လိုꩻ​မူႏ​နဝ်ꩻ ကိ​လေ​သာႏ တန်​တော​ဒျာႏ လိုꩻခို​အ​ချင်ꩻ​ချင်ꩻ ဗေင်ႏ​လွူꩻ​ငီꩻ​လို့​ဝင်ꩻ နဝ်ꩻ​သွူ။ လိုꩻ​ခို​ဖုံႏ​နဝ်ꩻ တ​ဖြာꩻ​တွမ်ႏ​တ​ဖြာꩻ မာꩻ​ဒျာႏ​ထာꩻ​ဝင်ꩻ​သꩻ ခ​ရာႏ​ဖုံႏ​တဲင် အ​ဆုဲင်ꩻ​သွတ်ꩻ​နဝ်ꩻ ဝွေꩻ​သီး က​အဝ်ႏ​မာꩻ​မာႏ​ဒါႏ ထာꩻ​အ​တာႏ ဝွေꩻ​သီး က​ထွိုက်​တန်ႏ​ဒါႏ အ​ပဲစ်​တံႏ​ဖုံႏ​နဝ်ꩻ ဝွေꩻ​သီး​အီ​လွဉ် လူး​ချာ​ဒျာႏ ဝွေꩻ​သီး အ​နမ်း​လောင်း​ဖုံႏ​သွူ။ လိုꩻ​စား​ယို​ဖုံႏ​နဝ်ꩻ ထာꩻ​သေ ဗွေႏ​ဘု​ရာꩻ​ခ​ရာႏ ပ​ညာႏ အ​စဲစ်​အ​မဲဉ်ႏ​နဝ်ꩻ ကွပ်​ပွိုး တ​အွဉ်ႏ​သော့ꩻ​တဝ်း ဝွေꩻ​သီး​အ​သꩻ​ကို နဝ်ꩻ​မꩻ ဝွေꩻ​သီး သꩻ​ထာꩻ​ယူႏ​ဖုံႏ​နဝ်ꩻ ဝွေꩻ​ဗွေႏ အပ်​ဖေႏ​ဒျာႏ ထာꩻ​ကုဲင်​စူ​ကို နဝ်ꩻ​မꩻ ဝွေꩻ​သီး တ​ဟဝ်​မာꩻ​တဝ်း ဒါႏ​ဖုံႏ​နဝ်ꩻ ဝွေꩻ​သီး​မာꩻ​စွဉ်ႏ​သွူ။

ဝွေꩻ​သီး​ရိုꩻ​ဒျာႏ အ​နမ်း​နဝ်ꩻ ဉာဏ်ႏ​ပ​ညာႏ​အဝ်ႏ၊ စွဉ်ႏ​တဲ့ ထွာ​ဒျာႏ လိုꩻ​မွိုက်​မာႏ ပ​ညာႏ​အဲဉ်​ထဝ်း​ဖုံႏ​သွူ။ အဝ်ႏ​လိုႏ​ဝုဲင်ႏ​ကိုꩻ​ကွယ်ႏ​ဒျာႏ တ​သီ​တ​မား​ဒါႏ​တဝ်း ဗွေႏ​ဘု​ရာꩻ အ​ခင်ႏ​လမ်း​နဝ်ꩻ ဝွေꩻ​သီး ဝုဲင်ႏ​ကိုꩻ​ကွယ်ႏ ထိုꩻ​တော​ဒျာႏ က​သီ က​မား​ဒါႏ က​မာꩻ​နေး​ဒါႏ ထွား​ဗွိုန်​နုဲင်း​ဒါႏ လိုꩻ​တဲ့​နဝ်ꩻ၊ ဝါး​ဖုံႏ​တဲ့​နဝ်ꩻ၊ ထာꩻ​သား ခင်ႏ​လစ်ꩻ​ဒဲင်​တဲ့​နဝ်ꩻ၊ ထာꩻ​သား က​တွာႏ​လွေꩻ​နေး​ဒါႏ အ​ဟို့ꩻ​ဖုံႏ​တဲ့​နဝ်ꩻ၊ အ​ရွုတ်​တု​ဖုံႏ​သွူ။