ខគម្ពីរពេញនិយមពី Baefeso 4

ចែក​រំលែក

Mundaa mwáirirana emabuya na kuatana kwe'chamba. Mundaa mwábabalirana ngo'kwa Ongo nai ánabababaliraa kurengera Kirisito*.

Mundaa mwáchirembeka na kuba balomvu na kunde mwáata ebushibirisi. Kanji mundaa mwásesa emuchima we'kuba ala'uma mwa nzii.

Mwa bunu bwenyu muténdaa mwátenga myasi ibi. Si mundaa mwáteta myasi ibuya, era ìngaasa ebanji mwa malae mabo, kanji era ìngareta ngahanyi kwa ba bákwomvirisa.

Ene myasi yoshi mukábuliraa'i bure: ekubikirana emungo, ebute, ne'busibuke, ne'bwaka ne'ngambo. Ebi byoshi ala'uma ne'bukali, murékanaa nabi.

Emango musíbukire, muményaa mwêngira mwa bibi. Ekusibuka kwenyu kwémire kuwe era muhondo esuba lìchirowe. Mutábooreraa Wamusimu enjira.

Bushi no'ku, mwěmire kureka emyanya yenyu yo'kwa mira. Kanji murékanaa ne'mibere yenyu yo'kwa mira ye'buhuma-huma ye'bwengeere era yéndee yábeka mwa muero. Muíribwaa bayayaya mwa michima no'mwa mianyisa yenyu. Kanji muhúbaa bandu bayayaya, ba bábumbirwe kwe'huhi lya Ongo, mwa kunde mwáata mibere era ìtungenene, kanji ibuya-buya era ìtenganyire ne'kanangana.

Muchisesaa kuba mwa buuma ngo'kwa eMuchima Mubuya-buya atúla àtubikire mwa buuma. Kanji mundaa mwálanga ebôlo bwa bubábikire mwo'bu buuma.

Yeine iwêresise ebandu enyêmbo. Áirire bauma kuba ndumwa*, ne'banji kuba barebi*, ne'banji kuba bandu ba kunde báhubanganya eMwasi Mubuya-buya, ne'banji kuba balanzi na bakangirisi. Áirire bacha, kwa kukunganya ebandu ba Ongo, bakóle emulimo wai, chasiya emubiri wa Kirisito* aímbibwe. Mwa bacha, tuboshi tungáikirira kuba mwa buuma bwe'bwemeresi bwetu, na kumenya eMwana wa Ongo kanangana. Aola, tungába bandu ba bákula kuikirira twába ngo'kwa Kirisito* yeine atúla.

Rero tutáchibe nga bana batoto ba bêkibwa na chira kausi. Kanji tutáchengeerwe ne'myasi ye'bisha era bandu bénjire bákangirisa mwa bukalange bwabo. Si akaba tùngende twáteta ekanangana mwa nzii, tungákula mwa myasi yoshi. Tungáikirira no'kwa chihangi twába nga Kirisito*, i'utúla etwe.