ខគម្ពីរពេញនិយមពី ꠁꠘ꠆ꠎꠤꠟ ৬: ꠞꠥꠝꠣꠘ 8

ចែក​រំលែក

ꠀꠝꠞꠣ ꠎꠣꠘꠤ, ꠀꠟ꠆ꠟꠣꠞꠦ ꠎꠦꠞꠣ ꠝꠢꠛ꠆ꠛꠔ ꠇꠞꠂꠘ, ꠝꠣꠘꠤ ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠝꠞ꠆ꠎꠤ ꠝꠣꠚꠤꠇ ꠎꠦꠞꠣꠞꠦ ꠖꠣꠅꠔ ꠖꠤꠍꠂꠘ, ꠔꠣꠞꠣꠞ ꠜꠣꠟꠣꠁꠞ ꠟꠣꠉꠤ ꠢꠇꠟꠔꠣꠄ ꠄꠇꠟꠉꠦ ꠇꠣꠝ ꠇꠞꠦꠞ।

ꠔꠦ ꠀꠝꠤ ꠁꠈꠣꠘ ꠜꠣꠟꠣꠝꠘ꠆ꠔꠦꠃ ꠎꠣꠘꠤ, ꠎꠤꠘ꠆ꠖꠦꠉꠤ ꠛꠣ ꠝꠃꠔ, ꠚꠤꠞꠤꠡ꠆ꠔꠣ ꠛꠣ ꠁꠛꠟꠤꠍꠞ ꠇꠥꠘꠥ ꠌꠦꠟꠣ, ꠅꠈꠘ ꠛꠣ ꠜꠛꠤꠡꠔꠞ ꠇꠥꠘꠥꠔꠣꠄꠃ, ꠇꠥꠘꠥ ꠟꠣꠈꠣꠘ ꠡꠇ꠆ꠔꠤꠄꠃ, ꠀꠍꠝꠣꠘꠞ ꠛꠣ ꠙꠣꠔꠣꠟꠞ ꠛꠣ ꠙꠄꠖꠣ ꠅꠀ ꠇꠥꠘꠥ ꠎꠤꠘꠤꠡꠦꠃ ꠀꠝꠞꠣꠞꠦ ꠀꠟ꠆ꠟꠣꠞ ꠝꠢꠛ꠆ꠛꠔ ꠕꠣꠇꠤ ꠀꠟꠉ ꠇꠞꠔ ꠙꠣꠞꠔ ꠘꠣꠄ। ꠔꠣꠘ ꠅꠃ ꠝꠢꠛ꠆ꠛꠔ ꠔ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠙꠣꠁꠍꠤ।

ꠁꠔꠣ ꠍꠣꠠꠣ ꠀꠝꠞꠣꠞ ꠇꠝꠎꠥꠞꠤꠞ ꠡꠝꠄ ꠔ ꠙꠣꠇ ꠞꠥꠢꠦ ꠀꠝꠞꠣꠞꠦ ꠡꠣꠁꠎ꠆ꠎ ꠇꠞꠂꠘ। ꠖꠥꠀ ꠇꠞꠣꠞ ꠇꠣꠟꠅ ꠀꠝꠞꠣ ꠇꠤꠔꠣ ꠌꠣꠁꠔꠣꠝ, ꠁꠔꠣ ꠔ ꠀꠝꠞꠣ ꠎꠣꠘꠤ ꠘꠣ। ꠅꠁꠟꠦ ꠝꠥꠈꠖꠤ ꠎꠦꠔꠣ ꠇꠅꠀꠞ ꠡꠣꠁꠖ꠆ꠖ ꠘꠣꠁ, ꠖꠤꠟꠞ ꠇꠣꠘ꠆ꠖꠘꠞ ꠟꠉꠦ ꠙꠣꠇ ꠞꠥꠢꠦ ꠘꠤꠎꠦꠃ ꠀꠝꠞꠣꠞ ꠙꠇ꠆ꠇ ꠅꠁꠀ, ꠁꠔꠣꠞ ꠟꠣꠉꠤ ꠝꠤꠘꠔꠤ ꠇꠞꠂꠘ।

ꠅꠈꠘ ꠁꠔꠣ ꠛꠦꠙꠣꠞꠦ ꠀꠝꠞꠣ ꠇꠤꠔꠣ ꠇꠁꠔꠣꠝ? ꠡ꠆ꠛꠄꠅꠋ ꠀꠟ꠆ꠟꠣ ꠙꠣꠇ ꠎꠦꠛꠟꠣ ꠀꠝꠞꠣꠞ ꠙꠇ꠆ꠇꠦ, ꠔꠦ ꠀꠝꠞꠣꠞ ꠛꠤꠙꠇ꠆ꠇꠦ ꠇꠦꠉꠥ ꠟꠣꠉꠔ?

ꠔꠦ ꠅꠃ ꠔꠣꠟꠤꠝ ꠕꠣꠇꠤ ꠀꠝꠞꠣ ꠛꠥꠎꠤ, ꠁꠍꠣ ꠀꠟ-ꠝꠍꠤꠞ ꠎꠦꠞꠣ ꠀꠙꠘ ꠎꠘ ꠛꠘꠤ ꠉꠦꠍꠂꠘ, ꠅꠈꠘ ꠔꠣꠞꠣꠞꠦ ꠀꠞ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣ ꠅꠁꠔ ꠘꠣꠄ।

ꠡꠞꠤꠟꠞ ꠛꠖ ꠈꠣꠁꠡ ꠎꠦ ꠇꠣꠝꠞ ꠈꠤꠀꠟꠤ, ꠁꠔꠣꠞ ꠚꠟ ꠅꠁꠟ ꠝꠞꠘ, ꠅꠁꠟꠦ ꠙꠣꠇ ꠞꠥꠢꠥꠞ ꠈꠤꠀꠟꠦ ꠌꠟꠣꠞ ꠚꠟ ꠅꠁꠟ ꠎꠤꠘ꠆ꠖꠦꠉꠤ ꠀꠞ ꠡꠣꠘ꠆ꠔꠤ।

ꠘꠣ, ꠁꠟꠣ ꠇꠥꠘ꠆ꠔꠣꠃ ꠘꠣꠁ। ꠇꠣꠞꠘ ꠎꠦ ꠁꠍꠣꠄ ꠀꠝꠞꠣꠞꠦ ꠅꠔ ꠝꠢꠛ꠆ꠛꠔ ꠇꠞꠍꠂꠘ, ꠔꠣꠘ ꠛꠟꠦ ꠀꠝꠞꠣ ꠁꠔꠣ ꠢꠇꠟꠔꠣꠔꠃ ꠙꠥꠞꠣꠙꠥꠞ ꠎꠄꠁ ꠅꠁꠀꠞ।

ꠜꠣꠁꠀꠁꠘꠞꠦ, ꠀꠝꠞꠣ ꠛꠣꠖꠦ ꠎꠦ ꠝꠢꠤꠝꠣ ꠙꠣꠁꠝꠥ, ꠁꠔꠣꠞ ꠔꠥꠟꠘꠣꠄ ꠅꠈꠘꠇꠥꠞ ꠁ ꠖꠥꠈ-ꠇꠡ꠆ꠐ ꠇꠥꠘ꠆ꠔꠣꠃ ꠘꠣꠄ, ꠁꠔꠣ ꠔ ꠀꠝꠤ ꠎꠣꠘꠤ।

ꠄꠞꠟꠣꠉꠤ ꠁꠟꠣ ꠇꠥꠘꠥ ꠎꠤꠘꠤꠡ ꠀꠍꠦ ꠘꠤ, ꠎꠦꠔꠣꠄ ꠀꠝꠞꠣꠞꠦ ꠀꠟ-ꠝꠍꠤꠞ ꠝꠢꠛ꠆ꠛꠔ ꠕꠣꠇꠤ ꠀꠟꠉ ꠇꠞꠔ? ꠎꠥꠟꠥꠝ-ꠘꠤꠞ꠆ꠎꠣꠔꠘ, ꠎꠣꠟꠣ-ꠎꠘꠔ꠆ꠞꠘꠣ, ꠝꠘꠞ ꠇꠡ꠆ꠐ, ꠈꠣꠅꠀ-ꠚꠤꠘ꠆ꠖꠣꠞ ꠅꠜꠣꠛ, ꠛꠤꠙꠖ-ꠀꠙꠖ ꠛꠣ ꠖꠥꠡꠝꠘꠞ ꠔꠟꠥꠀꠞ?

ꠇꠣꠞꠘ ꠎꠦꠁꠘ ꠝꠣꠘꠡꠞ ꠖꠤꠟꠞ ꠔꠣꠟ꠆ꠟꠣꠡ ꠇꠞꠂꠘ, ꠔꠣꠁꠘ ꠔ ꠙꠣꠇ ꠞꠥꠢꠥꠞ ꠇꠕꠣꠅ ꠛꠥꠎꠂꠘ। ꠙꠣꠇ ꠞꠥꠢꠦ ꠀꠟ꠆ꠟꠣꠞ ꠝꠞ꠆ꠎꠤ ꠝꠣꠚꠤꠇ ꠔꠣꠘ ꠙꠣꠇ ꠛꠘ꠆ꠖꠣ ꠅꠇꠟꠞ ꠟꠣꠉꠤ ꠝꠤꠘꠔꠤ ꠇꠞꠂꠘ।

ꠇꠣꠞꠘ ꠀꠟ꠆ꠟꠣꠞ ꠞꠥꠢꠥꠞ ꠛꠟꠦ ꠎꠦꠞꠣ ꠌꠟꠦ, ꠔꠣꠞꠣꠃ ꠀꠟ꠆ꠟꠣꠞ ꠀꠅꠟꠣꠖ।

ꠡꠞꠤꠟꠞ ꠛꠖ ꠈꠣꠁꠡꠞ ꠀꠅꠔꠣꠄ ꠎꠦꠔꠣ ꠝꠣꠘꠥꠡ ꠌꠟꠂꠘ, ꠔꠣꠞꠣꠞ ꠝꠘꠅ ꠛꠖ ꠈꠣꠁꠡꠞ ꠛꠣꠄ ꠈꠤꠀꠟꠤ ꠕꠣꠇꠦ, ꠀꠞ ꠎꠦꠞꠣ ꠙꠣꠇ ꠞꠥꠢꠥꠞ ꠀꠅꠔꠣꠄ, ꠔꠣꠞꠣꠞ ꠝꠘ ꠔ ꠙꠣꠇ ꠞꠥꠢꠥꠞ ꠈꠥꠡꠤ ꠝꠣꠚꠤꠇ ꠌꠟꠔꠦ ꠈꠤꠀꠟꠤ ꠞꠄ।

ꠀꠝꠞꠣ ꠢꠇꠟꠞꠦ ꠛꠣꠌꠣꠘꠤꠞ ꠟꠣꠉꠤ, ꠀꠟ꠆ꠟꠣꠄ ꠎꠦꠛꠟꠣ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞꠦ ꠛꠤꠟꠣꠁ ꠖꠤꠔꠦꠅ ꠘꠣꠞꠣꠎ ꠅꠁꠟꠣ ꠘꠣ, ꠔꠣꠘꠞꠦ ꠝꠃꠔꠞ ꠀꠔꠅ ꠡꠙꠤ ꠖꠤꠟꠣ, ꠔꠦ ꠅꠃ ꠝꠣꠄꠀꠞ ꠎꠘꠞ ꠟꠉꠦ ꠢꠇꠟꠔꠣꠃ ꠀꠝꠞꠣꠞꠦ ꠖꠣꠘ ꠇꠞꠔꠣ ꠘꠣꠄ ꠘꠤ?

ꠀꠝꠞꠣꠞ ꠖꠤꠟꠞ ꠝꠣꠎꠞ ꠀꠟ꠆ꠟꠣꠁ ꠙꠣꠇ ꠞꠥꠢꠦꠅ ꠅꠟꠣ ꠡꠣꠇ꠆ꠇꠤ ꠖꠤꠀ ꠇꠁꠞꠣ, ꠀꠝꠞꠣ ꠀꠟ꠆ꠟꠣꠞ ꠀꠅꠟꠣꠖ। ꠀꠝꠞꠣ ꠎꠦꠛꠟꠣ ꠀꠅꠟꠣꠖ, ꠔꠦ ꠀꠝꠞꠣ ꠝꠃꠞꠡꠤ ꠛꠣꠐ ꠙꠣꠁꠝꠥ। ꠀꠟ-ꠝꠍꠤꠄ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠝꠃꠞꠡꠤ ꠛꠣꠐ ꠙꠣꠁꠛꠣ, ꠀꠞ ꠔꠣꠘ ꠟꠉꠦ ꠀꠝꠞꠣꠅ ꠙꠣꠁꠝꠥ। ꠈꠣꠟꠤ ꠀꠝꠞꠣ ꠔꠣꠘ ꠟꠉꠦ ꠖꠥꠈ-ꠇꠡ꠆ꠐ ꠡꠁꠎ꠆ꠎ ꠇꠞꠟꠦ, ꠔꠣꠘ ꠟꠉꠦ ꠉꠃꠞꠛ-ꠝꠢꠤꠝꠣꠞꠅ ꠜꠣꠉ ꠙꠣꠁꠝꠥ।

ꠎꠦ ꠎꠘꠞ ꠝꠘ ꠡꠞꠤꠟꠞ ꠛꠖ ꠈꠣꠁꠡꠞ ꠛꠣꠄ ꠈꠤꠀꠟꠤ, ꠁ ꠝꠘ ꠔ ꠀꠟ꠆ꠟꠣꠞ ꠖꠥꠡꠝꠘ, ꠢꠦ ꠀꠟ꠆ꠟꠣꠁ ꠡꠞꠤꠅꠔ ꠝꠣꠘꠔꠦ ꠞꠣꠎꠤ ꠘꠣꠄ, ꠝꠣꠘꠔ ꠙꠣꠞꠦꠅ ꠘꠣ।

ꠢꠃ ꠡꠝꠄ ꠀꠁꠟꠦ ꠖꠦꠈꠣ ꠎꠣꠁꠛ ꠇꠦ ꠇꠦ ꠔꠣꠘ ꠀꠍꠟ ꠀꠅꠟꠣꠖ, ꠄꠞꠣꠞꠦ ꠖꠦꠈꠣꠞ ꠟꠣꠉꠤꠃ ꠀꠟ꠆ꠟꠣꠞ ꠙꠄꠖꠣ ꠇꠞꠣ ꠢꠇꠟꠔꠣꠄ ꠎꠣꠘꠦ-ꠙꠞꠣꠘꠦ ꠛꠣꠞ ꠌꠣꠁꠞꠣ।

ꠅꠈꠘ ꠙꠞ꠆ꠎꠘ꠆ꠔ ꠖꠦꠈꠤꠀꠞ, ꠢꠥꠞꠥꠔ꠆ꠔꠣ ꠙꠄꠖꠣꠞ ꠇꠣꠟꠅ ꠝꠣʼꠄ ꠎꠦꠟꠣ ꠛꠥꠇ ꠚꠣꠐꠣꠁꠀ ꠌꠤꠟ꠆ꠟꠣꠁꠘ, ꠔꠣꠘ ꠙꠄꠖꠣ ꠇꠞꠣ ꠢꠇꠟꠔꠣꠄꠃ ꠅꠟꠣ ꠀꠢꠣꠎꠣꠞꠤ ꠇꠞꠤ ꠌꠤꠟ꠆ꠟꠣꠁꠞꠣ।