ꠁꠘ꠆ꠎꠤꠟ ৬: ꠞꠥꠝꠣꠘ 8
8
ꠀꠟ꠆ꠟꠣꠁ ꠙꠣꠇ ꠞꠥꠢꠥ ꠙꠣꠅꠀꠞ ꠚꠟ
1ꠔꠦ ꠅꠃ ꠔꠣꠟꠤꠝ ꠕꠣꠇꠤ ꠀꠝꠞꠣ ꠛꠥꠎꠤ, ꠁꠍꠣ ꠀꠟ-ꠝꠍꠤꠞ ꠎꠦꠞꠣ ꠀꠙꠘ ꠎꠘ ꠛꠘꠤ ꠉꠦꠍꠂꠘ, ꠅꠈꠘ ꠔꠣꠞꠣꠞꠦ ꠀꠞ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣ ꠅꠁꠔ ꠘꠣꠄ। 2ꠉꠥꠘꠣ ꠀꠞ ꠝꠃꠔꠞ ꠀꠔ ꠕꠣꠇꠤ ꠀꠝꠣꠞꠦ ꠈꠣꠟꠣꠍ ꠇꠞꠣ ꠅꠁꠍꠦ, ꠎꠤꠘ꠆ꠖꠦꠉꠤ ꠖꠦꠅꠞꠣ ꠞꠥꠢꠦ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠈꠣꠟꠣꠍ ꠇꠞꠍꠂꠘ। 3ꠞꠇ꠆ꠔ-ꠝꠣꠋꠡꠞ ꠡꠞꠤꠟꠞ ꠛꠖ ꠈꠣꠁꠡꠞ ꠟꠣꠉꠤ ꠡꠞꠤꠅꠔꠦ ꠀꠝꠞꠣꠞꠦ ꠛꠣꠌꠣꠁꠔ ꠙꠣꠞꠍꠦ ꠘꠣ, ꠀꠞ ꠡꠞꠤꠅꠔꠦ ꠎꠦꠔꠣ ꠇꠞꠔ ꠙꠣꠞꠍꠦ ꠘꠣ, ꠀꠟ꠆ꠟꠣꠄ ꠔ ꠘꠤꠎꠦꠃ ꠁꠔꠣ ꠇꠞꠍꠂꠘ। ꠔꠣꠁꠘ ꠔꠣꠘ ꠘꠤꠎꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞꠦ ꠀꠝꠞꠣꠞ ꠟꠣꠈꠣꠘ ꠉꠥꠘꠣꠉꠣꠞ ꠝꠣꠘꠡꠞ ꠍꠥꠞꠔꠦ ꠙꠣꠑꠣꠁꠟꠣ, ꠉꠥꠘꠣꠞ ꠈꠦꠝꠔꠣꠞꠦ ꠛꠤꠘꠣꠡ ꠇꠞꠣꠞ ꠟꠣꠉꠤ। ꠀꠞ ꠅꠃ ꠝꠣꠄꠀꠞ ꠎꠘꠞ ꠎꠣꠘ ꠇꠥꠞꠛꠣꠘꠤꠞ ꠝꠣꠎꠖꠤ ꠉꠥꠘꠣꠞ ꠛꠤꠌꠣꠞ ꠇꠞꠤꠀ ꠔꠣꠞ ꠈꠦꠝꠔꠣꠞꠦ ꠛꠣꠔꠤꠟ ꠇꠞꠤ ꠖꠤꠟꠣ। 4ꠔꠣꠁꠘ ꠀꠝꠞꠣꠞ ꠙꠇ꠆ꠇ ꠟꠁꠀ ꠁꠔꠣ ꠇꠞꠟꠣ, ꠀꠝꠞꠣ ꠎꠦꠞꠣ ꠞꠇ꠆ꠔ-ꠝꠣꠋꠡꠞ ꠡꠞꠤꠟꠞ ꠈꠣꠁꠡꠦ ꠘꠣ ꠌꠟꠤꠀ ꠞꠥꠢꠥꠞ ꠛꠡꠦ ꠌꠟꠤ, ꠅꠃ ꠀꠝꠞꠣꠞ ꠟꠣꠉꠤ ꠡꠞꠤꠅꠔꠞ ꠖꠣꠛꠤ-ꠖꠣꠅꠀ ꠀꠖꠣꠄ ꠇꠞꠟꠣ।
5ꠡꠞꠤꠟꠞ ꠛꠖ ꠈꠣꠁꠡꠞ ꠀꠅꠔꠣꠄ ꠎꠦꠔꠣ ꠝꠣꠘꠥꠡ ꠌꠟꠂꠘ, ꠔꠣꠞꠣꠞ ꠝꠘꠅ ꠛꠖ ꠈꠣꠁꠡꠞ ꠛꠣꠄ ꠈꠤꠀꠟꠤ ꠕꠣꠇꠦ, ꠀꠞ ꠎꠦꠞꠣ ꠙꠣꠇ ꠞꠥꠢꠥꠞ ꠀꠅꠔꠣꠄ, ꠔꠣꠞꠣꠞ ꠝꠘ ꠔ ꠙꠣꠇ ꠞꠥꠢꠥꠞ ꠈꠥꠡꠤ ꠝꠣꠚꠤꠇ ꠌꠟꠔꠦ ꠈꠤꠀꠟꠤ ꠞꠄ। 6ꠡꠞꠤꠟꠞ ꠛꠖ ꠈꠣꠁꠡ ꠎꠦ ꠇꠣꠝꠞ ꠈꠤꠀꠟꠤ, ꠁꠔꠣꠞ ꠚꠟ ꠅꠁꠟ ꠝꠞꠘ, ꠅꠁꠟꠦ ꠙꠣꠇ ꠞꠥꠢꠥꠞ ꠈꠤꠀꠟꠦ ꠌꠟꠣꠞ ꠚꠟ ꠅꠁꠟ ꠎꠤꠘ꠆ꠖꠦꠉꠤ ꠀꠞ ꠡꠣꠘ꠆ꠔꠤ। 7ꠎꠦ ꠎꠘꠞ ꠝꠘ ꠡꠞꠤꠟꠞ ꠛꠖ ꠈꠣꠁꠡꠞ ꠛꠣꠄ ꠈꠤꠀꠟꠤ, ꠁ ꠝꠘ ꠔ ꠀꠟ꠆ꠟꠣꠞ ꠖꠥꠡꠝꠘ, ꠢꠦ ꠀꠟ꠆ꠟꠣꠁ ꠡꠞꠤꠅꠔ ꠝꠣꠘꠔꠦ ꠞꠣꠎꠤ ꠘꠣꠄ, ꠝꠣꠘꠔ ꠙꠣꠞꠦꠅ ꠘꠣ। 8ꠄꠞꠟꠣꠉꠤꠃ ꠎꠦꠔꠣ ꠝꠣꠘꠥꠡ ꠡꠞꠤꠟꠞ ꠛꠖ ꠈꠣꠁꠡꠞ ꠀꠅꠔꠣꠄ ꠌꠟꠂꠘ, ꠔꠣꠞꠣ ꠀꠟ꠆ꠟꠣꠞꠦ ꠈꠥꠡꠤ ꠇꠞꠔꠣ ꠙꠣꠞꠂꠘ ꠘꠣ।
9ꠅꠁꠟꠦ ꠔꠥꠝꠞꠣꠞ ꠖꠤꠟꠅ ꠎꠦꠛꠟꠣ ꠀꠟ꠆ꠟꠣꠞ ꠞꠥꠢꠥ ꠛꠡꠔ ꠇꠞꠂꠘ, ꠔꠦ ꠔꠥꠝꠞꠣ ꠔ ꠡꠞꠤꠟꠞ ꠛꠖ ꠈꠣꠁꠡꠞ ꠀꠅꠔꠣꠄ ꠘꠣꠄ, ꠛꠞꠋ ꠙꠣꠇ ꠞꠥꠢꠥꠞ ꠀꠅꠔꠣꠄ। ꠀꠍꠟ ꠇꠕꠣ ꠅꠁꠟ, ꠀꠟ-ꠝꠍꠤꠞ ꠞꠥꠢꠥ ꠎꠣꠞ ꠝꠣꠎꠦ ꠘꠣꠁ, ꠢꠦ ꠀꠟ-ꠝꠍꠤꠞ ꠘꠣꠄ। 10ꠀꠞ ꠢꠣꠍꠣꠃ ꠎꠥꠖꠤ ꠀꠟ-ꠝꠍꠤ ꠔꠥꠝꠞꠣꠞ ꠝꠣꠎꠦ ꠕꠣꠇꠂꠘ, ꠔꠦ ꠉꠥꠘꠣꠞ ꠚꠟ ꠢꠤꠡꠣꠛꠦ ꠔꠥꠝꠞꠣꠞ ꠡꠞꠤꠟ ꠝꠞꠣꠞ ꠙꠕꠤ ꠅꠁꠟꠦꠅ, ꠙꠣꠇ ꠞꠥꠢꠥꠞ ꠚꠟ ꠢꠤꠡꠣꠛꠦ ꠔꠥꠝꠞꠣ ꠔ ꠎꠤꠘ꠆ꠖꠣ। ꠀꠟ꠆ꠟꠣꠄ ꠔ ꠔꠥꠝꠞꠣꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠍꠂꠘ। 11ꠀꠞ ꠢꠃ ꠁꠍꠣꠞꠦ ꠎꠦꠁꠘ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ, ꠅꠃ ꠀꠟ꠆ꠟꠣꠞ ꠞꠥꠢꠥ ꠎꠦꠛꠟꠣ ꠔꠥꠝꠞꠣꠞ ꠖꠤꠟꠅ ꠛꠡꠔ ꠇꠞꠂꠘ, ꠔꠦ ꠔꠣꠘ ꠅꠃ ꠞꠥꠢꠥꠞ ꠛꠟꠦ ꠝꠃꠔꠞ ꠀꠅꠔꠣꠄ ꠕꠣꠇꠣ ꠔꠥꠝꠞꠣꠞ ꠡꠞꠤꠟꠞꠦꠅ ꠎꠤꠘ꠆ꠖꠦꠉꠤ ꠖꠣꠘ ꠇꠞꠛꠣ।
12ꠄꠞꠟꠣꠉꠤ ꠅ ꠜꠣꠁ ꠅꠇꠟ, ꠡꠞꠤꠟꠞ ꠛꠖ ꠈꠣꠁꠡꠞ ꠉꠦꠍꠦ ꠀꠝꠞꠣ ꠀꠞ ꠑꠦꠇꠣꠔ ꠘꠣꠄ, ꠅꠃ ꠛꠖ ꠈꠣꠁꠡꠞ ꠅꠗꠤꠘꠦ ꠌꠟꠣꠞꠅ ꠎꠞꠥꠞ ꠘꠣꠄ। 13ꠅꠈꠘ ꠡꠞꠤꠟꠞ ꠛꠖ ꠈꠣꠁꠡꠞ ꠀꠅꠔꠣꠄ ꠌꠟꠟꠦ ꠔ ꠔꠥꠝꠞꠣ ꠌꠤꠞꠇꠣꠟꠞ ꠟꠣꠉꠤ ꠝꠞꠛꠣꠄ, ꠅꠁꠟꠦ ꠙꠣꠇ ꠞꠥꠢꠥꠞ ꠛꠟꠦ ꠡꠞꠤꠟꠞ ꠢꠇꠟ ꠘꠣꠚꠞꠝꠣꠘꠤꠞꠦ ꠛꠤꠘꠣꠡ ꠇꠞꠤꠟ꠆ꠟꠦ ꠌꠤꠞꠇꠣꠟ ꠎꠤꠘ꠆ꠖꠣ ꠞꠁꠛꠣꠄ। 14ꠇꠣꠞꠘ ꠀꠟ꠆ꠟꠣꠞ ꠞꠥꠢꠥꠞ ꠛꠟꠦ ꠎꠦꠞꠣ ꠌꠟꠦ, ꠔꠣꠞꠣꠃ ꠀꠟ꠆ꠟꠣꠞ ꠀꠅꠟꠣꠖ। 15ꠔꠥꠝꠞꠣ ꠔ ꠉꠥꠟꠣꠝꠤꠞ ꠞꠥꠢꠥ ꠙꠣꠁꠍ ꠘꠣ, ꠔꠦ ꠀꠞ ꠒꠞꠣꠁꠔꠣꠄ ꠇꠦꠘꠦ? ꠔꠥꠝꠞꠣ ꠈꠣꠟꠤ ꠢꠃ ꠀꠟ꠆ꠟꠣꠞ ꠞꠥꠢꠥ ꠙꠣꠁꠍ, ꠎꠦꠁꠘ ꠔꠥꠝꠞꠣꠞꠦ ꠀꠅꠟꠣꠖ ꠅꠀꠞ ꠄꠈꠔꠤꠀꠞ ꠖꠤꠍꠂꠘ। ꠄꠞꠟꠣꠉꠤꠃ ꠀꠟ꠆ꠟꠣ ꠙꠣꠇꠞꠦ ꠀꠝꠞꠣ ꠞꠥꠢꠣꠘꠤ ꠀꠛ꠆ꠛꠣ, ꠙꠛꠤꠔ꠆ꠞ ꠛꠣꠛꠣ ꠇꠁꠀ ꠒꠣꠇꠤ। 16ꠀꠝꠞꠣꠞ ꠖꠤꠟꠞ ꠝꠣꠎꠞ ꠀꠟ꠆ꠟꠣꠁ ꠙꠣꠇ ꠞꠥꠢꠦꠅ ꠅꠟꠣ ꠡꠣꠇ꠆ꠇꠤ ꠖꠤꠀ ꠇꠁꠞꠣ, ꠀꠝꠞꠣ ꠀꠟ꠆ꠟꠣꠞ ꠀꠅꠟꠣꠖ। 17ꠀꠝꠞꠣ ꠎꠦꠛꠟꠣ ꠀꠅꠟꠣꠖ, ꠔꠦ ꠀꠝꠞꠣ ꠝꠃꠞꠡꠤ ꠛꠣꠐ ꠙꠣꠁꠝꠥ। ꠀꠟ-ꠝꠍꠤꠄ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠝꠃꠞꠡꠤ ꠛꠣꠐ ꠙꠣꠁꠛꠣ, ꠀꠞ ꠔꠣꠘ ꠟꠉꠦ ꠀꠝꠞꠣꠅ ꠙꠣꠁꠝꠥ। ꠈꠣꠟꠤ ꠀꠝꠞꠣ ꠔꠣꠘ ꠟꠉꠦ ꠖꠥꠈ-ꠇꠡ꠆ꠐ ꠡꠁꠎ꠆ꠎ ꠇꠞꠟꠦ, ꠔꠣꠘ ꠟꠉꠦ ꠉꠃꠞꠛ-ꠝꠢꠤꠝꠣꠞꠅ ꠜꠣꠉ ꠙꠣꠁꠝꠥ।
ꠀꠝꠞꠣ ꠇꠥꠘ ꠟꠣꠈꠣꠘ ꠛꠣꠐ ꠙꠣꠁꠝꠥ
18ꠜꠣꠁꠀꠁꠘꠞꠦ, ꠀꠝꠞꠣ ꠛꠣꠖꠦ ꠎꠦ ꠝꠢꠤꠝꠣ ꠙꠣꠁꠝꠥ, ꠁꠔꠣꠞ ꠔꠥꠟꠘꠣꠄ ꠅꠈꠘꠇꠥꠞ ꠁ ꠖꠥꠈ-ꠇꠡ꠆ꠐ ꠇꠥꠘ꠆ꠔꠣꠃ ꠘꠣꠄ, ꠁꠔꠣ ꠔ ꠀꠝꠤ ꠎꠣꠘꠤ। 19ꠢꠃ ꠡꠝꠄ ꠀꠁꠟꠦ ꠖꠦꠈꠣ ꠎꠣꠁꠛ ꠇꠦ ꠇꠦ ꠔꠣꠘ ꠀꠍꠟ ꠀꠅꠟꠣꠖ, ꠄꠞꠣꠞꠦ ꠖꠦꠈꠣꠞ ꠟꠣꠉꠤꠃ ꠀꠟ꠆ꠟꠣꠞ ꠙꠄꠖꠣ ꠇꠞꠣ ꠢꠇꠟꠔꠣꠄ ꠎꠣꠘꠦ-ꠙꠞꠣꠘꠦ ꠛꠣꠞ ꠌꠣꠁꠞꠣ। 20ꠇꠣꠞꠘ ꠔꠣꠘ ꠙꠄꠖꠣ ꠇꠞꠣ ꠢꠇꠟꠔꠣꠃ ꠅꠈꠘ ꠅꠡꠣꠞ ꠅꠁꠉꠦꠍꠦ। ꠁꠔꠣ ꠇꠥꠘꠥ ꠘꠤꠎꠦ ꠘꠤꠎꠦ ꠅꠡꠣꠞ ꠅꠁꠉꠦꠍꠦ ꠘꠤ? ꠘꠣ, ꠛꠞꠋ ꠀꠟ꠆ꠟꠣꠄꠃ ꠔꠣꠞꠣꠞꠦ ꠢꠃ ꠙꠕꠦ ꠍꠣꠠꠤ ꠖꠤꠍꠂꠘ। ꠅꠁꠟꠦ ꠄꠞꠟꠉꠦ ꠔꠣꠁꠘ ꠅꠃ ꠀꠡꠣꠅ ꠖꠤꠍꠂꠘ, 21ꠄꠇꠖꠤꠘ ꠁꠔꠣ ꠢꠇꠟꠔꠣ ꠛꠤꠘꠣꠡꠞ ꠀꠔ ꠕꠣꠇꠤ ꠈꠣꠟꠣꠍ ꠅꠁꠀ, ꠀꠟ꠆ꠟꠣꠞ ꠀꠅꠟꠣꠖ ꠅꠇꠟꠞ ꠡ꠆ꠛꠣꠗꠤꠘꠔꠣ ꠀꠞ ꠉꠃꠞꠛꠞ ꠜꠣꠉꠤ ꠅꠁꠔ ꠙꠣꠞꠛ। 22ꠅꠈꠘ ꠙꠞ꠆ꠎꠘ꠆ꠔ ꠖꠦꠈꠤꠀꠞ, ꠢꠥꠞꠥꠔ꠆ꠔꠣ ꠙꠄꠖꠣꠞ ꠇꠣꠟꠅ ꠝꠣʼꠄ ꠎꠦꠟꠣ ꠛꠥꠇ ꠚꠣꠐꠣꠁꠀ ꠌꠤꠟ꠆ꠟꠣꠁꠘ, ꠔꠣꠘ ꠙꠄꠖꠣ ꠇꠞꠣ ꠢꠇꠟꠔꠣꠄꠃ ꠅꠟꠣ ꠀꠢꠣꠎꠣꠞꠤ ꠇꠞꠤ ꠌꠤꠟ꠆ꠟꠣꠁꠞꠣ। 23ꠈꠣꠟꠤ ꠁꠈꠣꠘ ꠘꠣꠄ, ꠀꠝꠞꠣꠅ ꠢꠃ ꠎꠦ ꠝꠢꠤꠝꠣ ꠛꠣꠖꠦ ꠙꠣꠁꠝꠥ, ꠄꠞ ꠙꠄꠟꠣ ꠇꠤꠡ꠆ꠔꠤ ꠢꠤꠡꠣꠛꠦ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞꠦ ꠅꠈꠘ ꠙꠣꠁꠍꠤ, ꠙꠣꠁꠀ ꠛꠣꠇꠤ ꠇꠤꠡ꠆ꠔꠤꠞ ꠟꠣꠉꠤ ꠀꠝꠞꠣꠅ ꠅꠟꠣ ꠌꠤꠟ꠆ꠟꠣꠁꠀꠞ। ꠀꠞ ꠢꠃ ꠇꠤꠡ꠆ꠔꠤ ꠙꠣꠅꠀꠞ ꠖꠤꠘꠞ ꠟꠣꠉꠤ ꠛꠣꠞ ꠌꠣꠁꠀꠞ, ꠎꠦ ꠖꠤꠘ ꠀꠝꠞꠣꠞꠦ ꠀꠟ꠆ꠟꠣꠞ ꠀꠅꠟꠣꠖ ꠢꠤꠡꠣꠛꠦ ꠎꠣꠁꠞ ꠇꠞꠣ ꠅꠁꠛ, ꠝꠣꠘꠤ ꠎꠦ ꠖꠤꠘ ꠀꠝꠞꠣꠞ ꠡꠞꠤꠟꠞꠦ ꠛꠤꠘꠣꠡꠞ ꠀꠔ ꠕꠣꠇꠤ ꠈꠣꠟꠣꠍ ꠇꠞꠣ ꠅꠁꠛ। 24ꠀꠝꠞꠣ ꠈꠣꠟꠣꠍ ꠅꠀꠞ ꠅꠃ ꠀꠡꠣ ꠙꠣꠁꠍꠤ, ꠁꠝꠣꠘ ꠀꠘꠣꠞ ꠇꠣꠟꠅ। ꠔꠦ ꠎꠦꠔꠣ ꠎꠤꠘꠤꠡ ꠝꠣꠘꠡꠦ ꠖꠦꠈꠤꠟꠣꠄ, ꠁꠔꠣ ꠖꠦꠈꠣꠞ ꠟꠣꠉꠤ ꠢꠦ ꠀꠞ ꠀꠡꠣ ꠇꠞꠦ ꠘꠣ, ꠎꠦꠔꠣ ꠖꠦꠈꠣ ꠅꠁꠉꠦꠍꠦ, ꠁꠔꠣꠞꠦ ꠖꠦꠈꠣꠞ ꠀꠡꠣ ꠀꠞ ꠇꠦꠘꠦ ꠇꠞꠔ? 25ꠅꠁꠟꠦ ꠘꠣ ꠖꠦꠈꠣ ꠎꠤꠘꠤꠡꠞꠦ ꠖꠦꠈꠣꠞ ꠟꠣꠉꠤ ꠀꠝꠞꠣ ꠗꠂꠎ꠆ꠎ ꠗꠞꠤꠀ ꠛꠣꠞ ꠌꠣꠁ।
26ꠁꠔꠣ ꠍꠣꠠꠣ ꠀꠝꠞꠣꠞ ꠇꠝꠎꠥꠞꠤꠞ ꠡꠝꠄ ꠔ ꠙꠣꠇ ꠞꠥꠢꠦ ꠀꠝꠞꠣꠞꠦ ꠡꠣꠁꠎ꠆ꠎ ꠇꠞꠂꠘ। ꠖꠥꠀ ꠇꠞꠣꠞ ꠇꠣꠟꠅ ꠀꠝꠞꠣ ꠇꠤꠔꠣ ꠌꠣꠁꠔꠣꠝ, ꠁꠔꠣ ꠔ ꠀꠝꠞꠣ ꠎꠣꠘꠤ ꠘꠣ। ꠅꠁꠟꠦ ꠝꠥꠈꠖꠤ ꠎꠦꠔꠣ ꠇꠅꠀꠞ ꠡꠣꠁꠖ꠆ꠖ ꠘꠣꠁ, ꠖꠤꠟꠞ ꠇꠣꠘ꠆ꠖꠘꠞ ꠟꠉꠦ ꠙꠣꠇ ꠞꠥꠢꠦ ꠘꠤꠎꠦꠃ ꠀꠝꠞꠣꠞ ꠙꠇ꠆ꠇ ꠅꠁꠀ, ꠁꠔꠣꠞ ꠟꠣꠉꠤ ꠝꠤꠘꠔꠤ ꠇꠞꠂꠘ। 27ꠇꠣꠞꠘ ꠎꠦꠁꠘ ꠝꠣꠘꠡꠞ ꠖꠤꠟꠞ ꠔꠣꠟ꠆ꠟꠣꠡ ꠇꠞꠂꠘ, ꠔꠣꠁꠘ ꠔ ꠙꠣꠇ ꠞꠥꠢꠥꠞ ꠇꠕꠣꠅ ꠛꠥꠎꠂꠘ। ꠙꠣꠇ ꠞꠥꠢꠦ ꠀꠟ꠆ꠟꠣꠞ ꠝꠞ꠆ꠎꠤ ꠝꠣꠚꠤꠇ ꠔꠣꠘ ꠙꠣꠇ ꠛꠘ꠆ꠖꠣ ꠅꠇꠟꠞ ꠟꠣꠉꠤ ꠝꠤꠘꠔꠤ ꠇꠞꠂꠘ।
28ꠀꠝꠞꠣ ꠎꠣꠘꠤ, ꠀꠟ꠆ꠟꠣꠞꠦ ꠎꠦꠞꠣ ꠝꠢꠛ꠆ꠛꠔ ꠇꠞꠂꠘ, ꠝꠣꠘꠤ ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠝꠞ꠆ꠎꠤ ꠝꠣꠚꠤꠇ ꠎꠦꠞꠣꠞꠦ ꠖꠣꠅꠔ ꠖꠤꠍꠂꠘ, ꠔꠣꠞꠣꠞ ꠜꠣꠟꠣꠁꠞ ꠟꠣꠉꠤ ꠢꠇꠟꠔꠣꠄ ꠄꠇꠟꠉꠦ ꠇꠣꠝ ꠇꠞꠦꠞ। 29ꠀꠟ꠆ꠟꠣꠄ ꠎꠦꠞꠣꠞꠦ ꠀꠉ ꠕꠣꠇꠤꠃ ꠔꠣꠘ ꠘꠤꠎꠞ ꠟꠣꠉꠤ ꠙꠍꠘ꠆ꠖ ꠇꠞꠤ ꠞꠣꠈꠍꠤꠟꠣ, ꠔꠣꠞꠣꠞꠦ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠍꠣꠞ ꠟꠣꠈꠣꠘ ꠅꠀꠞ ꠟꠣꠉꠤꠃ ꠙꠍꠘ꠆ꠖ ꠇꠞꠍꠤꠟꠣ, ꠎꠣꠔꠦ ꠅꠃ ꠁꠍꠣ ꠁꠛꠘꠥꠟ꠆ꠟꠣꠃ, ꠄꠞꠣ ꠢꠇꠟꠞ ꠛꠠ ꠜꠣꠁ ꠅꠁꠘ। 30ꠔꠣꠁꠘ ꠀꠉꠦ ꠎꠦꠞꠣꠞꠦ ꠙꠍꠘ꠆ꠖ ꠇꠞꠍꠤꠟꠣ, ꠔꠣꠞꠣꠞꠦꠃ ꠖꠣꠅꠔ ꠖꠤꠟꠣ। ꠀꠞ ꠎꠦꠞꠣꠞꠦ ꠖꠣꠅꠔ ꠖꠤꠟꠣ, ꠔꠣꠞꠣꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠟꠣ, ꠀꠞ ꠎꠦꠞꠣꠞꠦ ꠛꠦ-ꠇꠍꠥꠞ ꠉꠁꠘ꠆ꠘ ꠇꠞꠟꠣ, ꠔꠣꠞꠣꠞꠦ ꠔꠣꠘ ꠘꠤꠎꠞ ꠉꠃꠞꠛ-ꠝꠢꠤꠝꠣꠅ ꠖꠣꠘ ꠇꠞꠟꠣ।
ꠀꠟ꠆ꠟꠣꠞ ꠝꠢꠛ꠆ꠛꠔꠞ ꠛꠟ-ꠡꠇ꠆ꠔꠤ
31ꠅꠈꠘ ꠁꠔꠣ ꠛꠦꠙꠣꠞꠦ ꠀꠝꠞꠣ ꠇꠤꠔꠣ ꠇꠁꠔꠣꠝ? ꠡ꠆ꠛꠄꠅꠋ ꠀꠟ꠆ꠟꠣ ꠙꠣꠇ ꠎꠦꠛꠟꠣ ꠀꠝꠞꠣꠞ ꠙꠇ꠆ꠇꠦ, ꠔꠦ ꠀꠝꠞꠣꠞ ꠛꠤꠙꠇ꠆ꠇꠦ ꠇꠦꠉꠥ ꠟꠣꠉꠔ? 32ꠀꠝꠞꠣ ꠢꠇꠟꠞꠦ ꠛꠣꠌꠣꠘꠤꠞ ꠟꠣꠉꠤ, ꠀꠟ꠆ꠟꠣꠄ ꠎꠦꠛꠟꠣ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞꠦ ꠛꠤꠟꠣꠁ ꠖꠤꠔꠦꠅ ꠘꠣꠞꠣꠎ ꠅꠁꠟꠣ ꠘꠣ, ꠔꠣꠘꠞꠦ ꠝꠃꠔꠞ ꠀꠔꠅ ꠡꠙꠤ ꠖꠤꠟꠣ, ꠔꠦ ꠅꠃ ꠝꠣꠄꠀꠞ ꠎꠘꠞ ꠟꠉꠦ ꠢꠇꠟꠔꠣꠃ ꠀꠝꠞꠣꠞꠦ ꠖꠣꠘ ꠇꠞꠔꠣ ꠘꠣꠄ ꠘꠤ? 33ꠀꠞ ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠟꠣꠉꠤ ꠎꠦꠞꠣꠞꠦ ꠙꠍꠘ꠆ꠖ ꠇꠞꠍꠂꠘ, ꠄꠞꠣꠞ ꠛꠤꠞꠥꠖ꠆ꠖꠦ ꠘꠣꠟꠤꠡ ꠖꠤꠛꠣꠞ ꠡꠣꠁꠖ꠆ꠖ ꠇꠣꠞ? ꠀꠟ꠆ꠟꠣꠄ ꠘꠤꠎꠦꠃ ꠔꠣꠞꠣꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠍꠂꠘ। 34ꠔꠦ ꠔꠣꠞꠣꠞꠦ ꠇꠦꠉꠥꠄ ꠖꠥꠡꠤꠔ? ꠎꠦꠞꠣꠞ ꠟꠣꠉꠤ ꠢꠃ ꠁꠍꠣ ꠀꠟ-ꠝꠍꠤꠞ ꠝꠃꠔ ꠅꠁꠍꠦ, ꠝꠃꠔꠞ ꠛꠣꠖꠦ ꠎꠤꠘ꠆ꠖꠣ ꠇꠞꠤꠅ ꠔꠥꠟꠣ ꠅꠁꠍꠦ, ꠔꠣꠁꠘ ꠅꠈꠘ ꠀꠟ꠆ꠟꠣ ꠙꠣꠇꠞ ꠒꠣꠁꠘ ꠉꠣꠟꠣꠞ ꠔꠈ꠆ꠔꠅ ꠛꠁꠀ, ꠀꠝꠞꠣꠞ ꠟꠣꠉꠤ ꠝꠤꠘꠔ-ꠇꠣꠎ꠆ꠎꠤ ꠇꠞꠣꠔ ꠀꠍꠂꠘ। 35ꠄꠞꠟꠣꠉꠤ ꠁꠟꠣ ꠇꠥꠘꠥ ꠎꠤꠘꠤꠡ ꠀꠍꠦ ꠘꠤ, ꠎꠦꠔꠣꠄ ꠀꠝꠞꠣꠞꠦ ꠀꠟ-ꠝꠍꠤꠞ ꠝꠢꠛ꠆ꠛꠔ ꠕꠣꠇꠤ ꠀꠟꠉ ꠇꠞꠔ? ꠎꠥꠟꠥꠝ-ꠘꠤꠞ꠆ꠎꠣꠔꠘ, ꠎꠣꠟꠣ-ꠎꠘꠔ꠆ꠞꠘꠣ, ꠝꠘꠞ ꠇꠡ꠆ꠐ, ꠈꠣꠅꠀ-ꠚꠤꠘ꠆ꠖꠣꠞ ꠅꠜꠣꠛ, ꠛꠤꠙꠖ-ꠀꠙꠖ ꠛꠣ ꠖꠥꠡꠝꠘꠞ ꠔꠟꠥꠀꠞ? 36ꠙꠛꠤꠔ꠆ꠞ ꠎꠛꠥꠞ ꠡꠞꠤꠚꠅ ꠀꠍꠦ,
ꠔꠥꠝꠣꠞ ꠘꠣꠝꠞ ꠟꠣꠉꠤ
ꠀꠝꠞꠣꠞꠦ ꠢꠞ-ꠢꠣꠝꠦꠡꠣ ꠈꠥꠘ ꠇꠞꠣ ꠅꠞ।
ꠝꠣꠘꠡꠞ ꠌꠈꠥꠔ ꠀꠝꠞꠣ ꠅꠁꠟꠣꠝ ꠛꠟꠤꠞ ꠙꠣꠑꠣ।
37ꠘꠣ, ꠁꠟꠣ ꠇꠥꠘ꠆ꠔꠣꠃ ꠘꠣꠁ। ꠇꠣꠞꠘ ꠎꠦ ꠁꠍꠣꠄ ꠀꠝꠞꠣꠞꠦ ꠅꠔ ꠝꠢꠛ꠆ꠛꠔ ꠇꠞꠍꠂꠘ, ꠔꠣꠘ ꠛꠟꠦ ꠀꠝꠞꠣ ꠁꠔꠣ ꠢꠇꠟꠔꠣꠔꠃ ꠙꠥꠞꠣꠙꠥꠞ ꠎꠄꠁ ꠅꠁꠀꠞ। 38ꠔꠦ ꠀꠝꠤ ꠁꠈꠣꠘ ꠜꠣꠟꠣꠝꠘ꠆ꠔꠦꠃ ꠎꠣꠘꠤ, ꠎꠤꠘ꠆ꠖꠦꠉꠤ ꠛꠣ ꠝꠃꠔ, ꠚꠤꠞꠤꠡ꠆ꠔꠣ ꠛꠣ ꠁꠛꠟꠤꠍꠞ ꠇꠥꠘꠥ ꠌꠦꠟꠣ, ꠅꠈꠘ ꠛꠣ ꠜꠛꠤꠡꠔꠞ ꠇꠥꠘꠥꠔꠣꠄꠃ, ꠇꠥꠘꠥ ꠟꠣꠈꠣꠘ ꠡꠇ꠆ꠔꠤꠄꠃ, 39ꠀꠍꠝꠣꠘꠞ ꠛꠣ ꠙꠣꠔꠣꠟꠞ ꠛꠣ ꠙꠄꠖꠣ ꠅꠀ ꠇꠥꠘꠥ ꠎꠤꠘꠤꠡꠦꠃ ꠀꠝꠞꠣꠞꠦ ꠀꠟ꠆ꠟꠣꠞ ꠝꠢꠛ꠆ꠛꠔ ꠕꠣꠇꠤ ꠀꠟꠉ ꠇꠞꠔ ꠙꠣꠞꠔ ꠘꠣꠄ। ꠔꠣꠘ ꠅꠃ ꠝꠢꠛ꠆ꠛꠔ ꠔ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠙꠣꠁꠍꠤ।
ទើបបានជ្រើសរើសហើយ៖
ꠁꠘ꠆ꠎꠤꠟ ৬: ꠞꠥꠝꠣꠘ 8: sylN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Ahle Kitab Society. All rights reserved.
