ខគម្ពីរពេញនិយមពី Ekihsatahs 6

ចែក​រំលែក

Miitahsh o'o ke'inatwaa Isriyalak: ‘Niin hsa kaaTipenciketc kaawiih saakisi'inakook eshi mamaancikwahpininekwaa Iicip kaa‑ayaawaatc, ewii aapa'oninakook i'imaa kaashi tetako mihtanohkii'ikooyek. Kika naatamawininim hsa ewii aapacihtooyaan nimashkawisiiwin ci⁠kihci sanakaahkonakwaa kaye iki Iicipahkiink kaa‑ayaawaatc.

Niin hsa ko kika opimaatisiimininim, niin ci⁠oKishemanitoomimiyek. Miitahsh ci⁠kihkentamek niin kaaTipenciketc kiKishemanitoomiwaa eh⁠tinowiyaan, ekiih saakiciwininakook i'imaa eshi kakwaataki mihtanohkii'inekwaa iki Iicipahkiink kaa‑ayaawaatc.

Miihsh ci‑ishiwininakook weti ahkiink kaakii aayiici ahshotamawakwaapan ewii miinak Eparahaam, Aaisik, Cekap kaye. Kika miinininim hsa kiinawaa piko ci⁠tipinawewisiyek; niin ohsha kaaTipencikeyaan,’ kika'inaak,” okii'ikoon. Miitahsh Moosihs kaakii wiintamawaatc Isriyala' aaniin kaa⁠ihkitonitc kaaTipencikenitc. Kaawiin itahsh okiih pisintaakohsii', wiinke aaniihsh kii⁠aanihsentamoo' piincaya'ii kaa‑ahpiihci kakwaataki mihtanohkii'imintc.

KaaTipencikenitc itahsh okii'ikoon, “Miitahsh i'i noonkom ci⁠waapantaman aaniin waah⁠tootawak Peroo. Niin hsa piko nimashkawisiiwinink ninka onci tootawaa ci⁠pakitinaatc ci⁠maacaanitc, otahkiimink kaye ci⁠onci saakitaama'waatc Isriyala',” okii'ikoon.