Tawˆ kʼai ve li‸ 17
17
Haˉ hpawˇ hkʼaw iˉ kaˆ tawˆ la ve
1Iˉsaˍreˍlaˆ chaw teˇ hpaˍ lehˬ, Senˍ teh‸ kʼoˆ ve hteunˍ lonˉ hkʼaw tawˆ kʼai leh, Gʼuiˬsha yawˇ hui hta‸ kʼo ˆpiˇ ve hkʼe awˬ gʼuˇ suhˍ teˇ kaˬ peuˬ teˇ kaˬ lo haˉ kʼai ve yoˬ. Hkʼe te leh, yawˇ hui Reˍhpiˆdenˍ teh‸ kʼoˆ ve chehˇ kuiˬ lo gaˬ la ve yoˬ. Ya‸ hkʼaˇ, oˇ kaˬ lo yawˇ hui iˉ kaˆ dawˬ tuˬ ca maˇ mawˬ. 2Hkʼe te leh, yawˇ hui Moˉseˍ hta‸ deˇ leh, Ngaˬ hui hta‸ iˉ kaˆ taw laˇ-oˆ, teh‸ yawˇ hta‸ kʼoˆ piˇ ve yoˬ.
Moˉseˍ kʼoˆ ve, Nawˬ hui aˬ hto‸ ma pa taw ngaˬ hta‸ deˇ ve le. Aˬ hto‸ ma pa taw, nawˬ hui Gʼuiˬsha hta‸ lawˇ nyi ve le, teh‸ yawˇ hui hta‸ kʼoˆ piˇ ve yoˬ.
3Ya‸ hkʼaˇ, chaw oˇ ve teˇ hpaˍ iˉ kaˆ shiˉ jaˇ ve pa taw, yawˇ hui Moˉseˍ hta‸ gʼaˇ hte‸ deˇ leh, Ngaˬ hui leh ngaˬ hui ve miˇ yaˇ teˇ hpaˍ, leh ngaˬ hui ve ceˇ teˇ hpaˍ hta‸ iˉ kaˆ shiˉ pehˍ piˇ tuˬ, nawˬ ngaˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ la taˍ ve laˇ, teh‸ yawˇ hta‸ kʼoˆ piˇ ve yoˬ.
4Oˇ htaˇ, Moˉseˍ Gʼuiˬsha geh bon lawˬ leh, Ngaˬ chaw chi teˇ hpaˍ hta‸ hkʼaˬ hkʼe gʼa te piˇ tuˬ le. Yawˇ hui ngaˬ hta‸ haˉ pui ga hpoˆ baˬ la yoˬ, teh‸ kʼoˆ ve yoˬ.
5Oˇ htaˇ Gʼuiˬsha kʼoˆ ve, Iˉsaˍreˍlaˆ chaw awˬ hoˉ awˬ naˬ teˇ hpaˍ hta‸ shiˍ veu leh chaw moˍ lonˉ gʼuˇ suhˍ kʼai-o. Nawˬ Niˍlaˆ iˉ kaˆ lawˬ hta‸ yuˬ dawˆ jaw ve juˇ fuiˍ taˬ oˇ ve hta‸ htawˇ yuˬ kʼai-o. 6Siˉnaˆ hkʼaw hkʼoˆ lo cawˬ ve haˉ hpawˇ teˇ maˬ awˬ hkʼoˆ lo ngaˬ nawˬ mehˆ gʼuˇ suhˍ huˉ taˍ laˇ tuˬ yoˬ. Haˉ hpawˇ oˇ ve hta‸ dawˆ-oˆ. Oˇ hkʼe te ve kʼo, chaw yaˇ teˇ hpaˍ iˉ kaˆ gʼa dawˬ tuˬ, oˇ kaˬ lo iˉ kaˆ tawˆ la tuˬ yoˬ, teh‸ Moˉseˍ hta‸ kʼoˆ piˇ ve yoˬ. Moˉseˍ lehˬ Iˉsaˍreˍlaˆ chaw awˬ hoˉ awˬ naˬ teˇ hpaˍ mehˆ gʼuˇ suhˍ lo Gʼuiˬsha kʼoˆ ve hkʼe te ve yoˬ.
7Hkʼe te leh, chehˇ kuiˬ oˇ ve hta‸ Maˍsaˍ #17:7 Chi lehˬ, lawˇ nyi ve teh‸ kʼoˆ gaˇ ve yoˬ leh Meˍriˇbaˆ#17:7 Chi lehˬ, hkʼanˇ ve teh‸ kʼoˆ gaˇ ve yoˬ teh‸ kʼoˆ ve yoˬ. Awˬ lawn kʼo, Iˉsaˍreˍlaˆ chaw teˇ hpaˍ hkʼanˇ ve awˬ hkʼoˆ Gʼuiˬsha hta‸ lawˇ nyi leh, Gʼuiˬsha ngaˬ hui geh chehˇ laˇ, maˇ chehˇ laˇ, teh‸ kʼoˆ ve pa taw yoˬ.
Aˍmaˍlehˆ chaw hui hta‸ ma‸ bawˆ ve
8Reˍhpiˆdenˍ lo chehˇ taˍ ve Iˉsaˍreˍlaˆ chaw hui hta‸ Aˍmaˍlehˆ chaw teˇ hpaˍ ca bawˆ la ve yoˬ. 9Oˇ htaˇ, Moˉseˍ Yawˇsuˆ hta‸ kuˬ leh, Shawˉ pawˍ kʼo nawˬ ve chaw teˇ hpaˍ hta‸ shiˍ veu leh Aˍmaˍlehˆ chaw hui hta‸ ca bawˆ-e loˬ. Ngaˬ lehˬ Gʼuiˬsha ve juˇ fuiˍ taˬ hta‸ yuˬ veu leh hkʼaw pui hkʼoˆ lo huˉ taˍ tuˬ yoˬ, teh‸ yawˇ hta‸ kʼoˆ piˇ ve yoˬ. 10Yawˇsuˆ lehˬ Moˉseˍ kʼoˆ ve tawˇ hta‸ na yuˬ leh, Aˍmaˍlehˆ chaw hta‸ ca bawˆ-e ve yoˬ. Moˉseˍ, Aˍronˍ leh Huˇraˆ hui hkʼaw hkʼoˆ taˆ-e ve yoˬ. 11Moˉseˍ yawˇ ve la‸ sheh chiˇ taˍ ve teˇ yanˇ, Iˉsaˍreˍlaˆ chaw ma‸ bawˆ gʼaˇ ve yoˬ. Ya‸ hkʼaˇ yawˇ ve la‸ sheh hta‸ yuˬ ya‸ ve teˇ yanˇ, Aˍmaˍlehˆ chaw kʼaw‸ gʼaˇ ve yoˬ. 12Hkʼe te leh, Moˉseˍ la‸ gʼawˇ suh la ve teˇ yanˇ, Aˍronˍ leh Huˇraˆ lehˬ haˉ pui shiˍ teˇ maˬ ca chiˇ veu laˇ leh Moˉseˍ hta‸ mui tcuh ve yoˬ. Yawˇ huiˉ maˬ lehˬ, Moˉseˍ geh teˇ gʼaˇ teˇ hpawˇ lo chehˇ taˍ leh, mvuhˇ nyi lo‸-e htaˇ hkʼa gaˬ, Moˉseˍ ve la‸ sheh hta‸ yuˬ tiˍ taˍ piˇ ve yoˬ. 13Hkʼe te leh, Yawˇsuˆ Aˍmaˍlehˆ chaw hui hta‸ ma‸ bawˆ gʼaˇ ve yoˬ.
14Oˇ htaˇ Gʼuiˬsha Moˉseˍ hta‸ kʼoˆ piˇ ve, Awˬ lawn chi hta‸ dawˇ nawˇ hpeh‸ tuˬ hkʼa deh‸ bvuh‸ keu taˍ-o‸. Ngaˬ lehˬ Aˍmaˍlehˆ chaw hkʼa peu-eˬ hta‸ te luˬ te sheˆ piˇ tuˬ yoˬ, teh‸ Yawˇsuˆ hta‸ kʼoˆ piˇ-oˆ. 15Oˇ ve hkʼaw‸ nawˉ, Moˉseˍ lehˬ Gʼuiˬsha hta‸ tuˉ tanˇ kuiˬ teˇ maˬ te leh oˇ ve hta‸, Gʼuiˬsha lehˬ ngaˬ ve htanˬ tuˬ hpeh‸ ve, teh‸ meh piˇ ve yoˬ. 16Yawˇ kʼoˆ ve, Gʼuiˬsha ve htanˬ tuˬ hta‸ mvuh chaweh chiˇ taˍ-o‸. Gʼuiˬsha lehˬ, Aˍmaˍlehˆ chaw hui hta‸ kʼaw‸ caˉ leh ma‸ bawˆ tuˬ sheˍ ve yoˬ, teh‸ kʼoˆ ve yoˬ.
اکنون انتخاب شده:
Tawˆ kʼai ve li‸ 17: LHBE
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Lahu Bible Edited © Thailand Bible Society and Bible Society of Myanmar, 2010, 2020.