Tawˆ kʼai ve li‸ 16
16
Maˍnaˆ shiˍ leh kaˉ koeˍ
1Iˉsaˍreˍlaˆ chaw hui Eˇjiˇtu‸ mvuhˇmiˬ hkʼaw tawˆ la peuˬ hkʼaw‸ nawˉ, ha pa nyiˇ maˬ teˇ maˬ, teˇ chi ngaˇ nyi gaˬ ve teˇ yanˇ, yawˇ hui Eˍlinˍ teh‸ kʼoˆ ve chehˇ kuiˬ lo tu leh Siˉnaˆ teh‸ kʼoˆ ve hteunˍ lo gaˬ la ve yoˬ. 2Iˉsaˍreˍlaˆ chaw hui heh puiˉ hkʼaw lo Moˉseˍ leh Aˍronˍ mehˆ gʼuˇ suhˍ hkʼanˇ maˍ piˇ leh kʼoˆ ve, 3Ngaˬ hui Eˇjiˇtu‸ mvuhˇmiˬ hkʼaw chehˇ htaˇ, ngaˬ hui caˇ gaˇ ve shaˍ hkʼa bvuhˆ gʼa caˇ ve yoˬ. Oˇ kaˬ lo Gʼuiˬsha ngaˬ hui hta‸ tiˇ pehˍ laˇ ve kʼo hkʼaˬ ma da‸ jaˇ tuˬ ve le. Ya‸ hkʼaˇ, nawˬ huiˉ maˬ lehˬ ngaˬ hui chi ma ve hta‸ choˬ kaˬ heh puiˉ hkʼaw lo shiˍ laˬ leh meu‸ suh kaˆ suh piˇ lawˬ ve yoˬ, teh‸ yawˇ huiˉ maˬ hta‸ kʼoˆ piˇ ve yoˬ.
4Oˇ htaˇ, Gʼuiˬsha Moˉseˍ hta‸ kʼoˆ piˇ ve, Chi beu‸ ngaˬ mvuhˇ naw ma hkʼoˆ lo nawˬ hui awˬ pon caˇ tuˬ ce la piˇ tuˬ yoˬ. Teˇ nyi le le chaw chi teˇ hpaˍ, teˇ nyi awˬ pon loˍ ve hkʼe ca gʼawˆ yuˬ tcuh-o. Chi hkʼe te ve hkʼaw, yawˇ hui ngaˬ ve tawˇ hta‸ na yuˬ, maˇ na yuˬ ve hta‸ ngaˬ lawˇ nyi tuˬ yoˬ. 5Ya‸ hkʼaˇ, hkaw‸ nyi teˇ nyi gaˬ kʼo, teˇ nyi le le gʼawˆ yuˬ jaw ve a‸ kehˉ nyiˇ pun gʼawˆ yuˬ leh ha‸ shaˉ tcuh taˍ-o‸, teh‸ yawˇ hta‸ kʼoˆ piˇ ve yoˬ.
6Hkʼe te leh, Moˉseˍ leh Aˍronˍ Iˉsaˍreˍlaˆ chaw hui hta‸ kʼoˆ piˇ ve, Ya‸ nyi mvuhˇ hpeu‸ hpawˇ gaˬ kʼo, nawˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ laˇ shehˍ hpaˇ lehˬ, Gʼuiˬsha hpeh‸ ve hta‸ nawˬ hui gʼa shiˍ tuˬ yoˬ. 7Shawˉ pawˍ mvuhˇ htiˇ la kʼo, nawˬ hui Gʼuiˬsha ve awˬ me‸ awˬ hponˇ hta‸ gʼa mawˬ tuˬ yoˬ. Awˬ lawn kʼo, nawˬ hui hkʼanˇ ve awˬ hkawˇ hta‸ Gʼuiˬsha gʼa kaˇ peuˬ. Nawˬ hui hkʼanˇ ve chi lehˬ, ngaˬ huiˉ maˬ hta‸ caˉ da‸ ve maˇ heˆ. Awˬ lawn kʼo, ngaˬ huiˉ maˬ lehˬ yawˇ kʼoˆ laˇ ve hkʼe ceh te chehˇ ve yoˬ. 8Mvuhˇ hpeu‸ htaˇ Gʼuiˬsha nawˬ hui hta‸ shaˍ piˇ laˇ leh, mvuhˇ shawˉ htaˇ hkaoˍmonˇ piˇ laˇ tuˬ yoˬ. Awˬ lawn kʼo, nawˬ hui hkʼanˇ chehˇ ve awˬ hkawˇ hta‸ yawˇ gʼa kaˇ peuˬ. Nawˬ hui hkʼanˇ maˍ laˇ ve chi lehˬ, Gʼuiˬsha hta‸ hkʼanˇ maˍ piˇ chehˇ ve teˇ ceuˬ hpeh‸ ve yoˬ, teh‸ yawˇ hui hta‸ kʼoˆ piˇ ve yoˬ.
9Oˇ htaˇ Moˉseˍ lehˬ, Iˉsaˍreˍlaˆ chaw hui hkʼanˇ ve awˬ hkawˇ hta‸ Gʼuiˬsha gʼa kaˇ peuˬ ve pa taw, yawˇ hui Gʼuiˬsha mehˆ gʼuˇ suhˍ jiˆ la tuˬ hto piˇ-oˆ, teh‸ Aˍ ronˍ hta‸ kʼoˆ piˇ ve yoˬ. 10Aˍronˍ Iˉsaˍreˍlaˆ chaw hui hta‸ tawˇ yaw piˇ chehˇ ve teˇ yanˇ, yawˇ hui hkʼaw hkʼoˆ lo chiˇ nyi peu leh Gʼuiˬsha ve awˬ me‸ awˬ hponˇ moˬ hkʼaw lo tawˆ la chehˇ ve hta‸ gʼa mawˬ ve yoˬ. 11Oˇ htaˇ, Gʼuiˬsha Moˉseˍ hta‸ chi hkʼe kʼoˆ piˇ ve yoˬ. 12Iˉsaˍreˍlaˆ chaw hui hkʼanˇ ve awˬ hkawˇ hta‸ ngaˬ gʼa kaˇ peuˬ. Chi hta‸ pa taw, mvuhˇ hpeu‸ la htaˇ yawˇ hui shaˍ gʼa caˇ leh, mvuhˇ shawˉ htaˇ hkaoˍmonˇ hkʼa biˇ gʼa tuˬ yoˬ. Oˇ htaˇ, ngaˬ lehˬ yawˇ hui ve Gʼuiˬsha hpeh‸ ve hta‸ yawˇ hui shiˍ la tuˬ yoˬ, teh‸ yawˇ hta‸ kʼoˆ piˇ ve yoˬ.
13Oˇ ve teˇ haˉ mvuhˇ hpeu‸ la htaˇ, yawˇ hui deh chehˇ taˍ kuiˬ lo kaˉ koeˍ hkʼa biˇ poˬ laˬ ve yoˬ. Mvuhˇ htiˇ la htaˇ, yawˇ hui awˬ paˇ awˬ kui lo ciˍ gʼuiˬ hkʼa biˇ kʼa taˍ ve yoˬ. 14Ciˍ guiˬ oˇ ve teˇ hpaˍ mehˉ kʼai peuˬ hkʼaw‸ nawˉ, miˬ chaˇ hkʼoˆ lo awˬ shiˍ ehˉ cawˬ taˉ ve yoˬ. Oˇ ve lehˬ, a ngeu hkʼa shuˍ paˇ jaˇ ve yoˬ. 15Iˉsaˍreˍlaˆ chaw hui oˇ ve hta‸ gʼa mawˬ ve teˇ yanˇ, yawˇ hui maˇ shiˍ ve pa taw, Oˇ ve aˬ hto‸ ma le, teh‸ teˇ gʼaˇ leh teˇ gʼaˇ kʼoˆ da‸ ve yoˬ.
Oˇ htaˇ Moˉseˍ kʼoˆ ve, Chi ve nawˬ hui caˇ tuˬ awˬ pon Gʼuiˬsha pe‸ laˇ ve hkaoˍmonˇ hpeh‸ ve yoˬ. 16Chaw teˇ gʼaˇ le le a shu yawˇ yehˬ yaˇ kʼa yaˇ caˇ law‸ ve hkʼe ceh, teˇ gʼaˇ teˇ hkʼawˍ lawˇ ehˉ gʼawˆ yuˬ-o‸, teh‸ yawˇ hui hta‸ kʼoˆ piˇ ve yoˬ.
17Iˉsaˍreˍlaˆ chaw hui lehˬ, chaw maˇ ve kʼo maˇ ve hkʼe, chaw i ve kʼo i ve hkʼe gʼawˆ yuˬ ve yoˬ. 18Ya‸ hkʼaˇ, yawˇ hui hkaoˍmonˇ oˇ ve hta‸ kʼaw‸ kawˬ nyi ve teˇ yanˇ, maˇ chaweh gʼawˆ yuˬ taˍ ve chaw teˇ hpaˍ lehˬ, awˬ leuˉ maˇ cawˬ. A ciˉ ceh tiˉ gʼawˆ yuˬ ve chaw teˇ hpaˍ htawˇ, loˍ ve cuˆ ve maˇ cawˬ. Chaw teˇ gʼaˇ le le a shu yawˇ caˇ law‸ ve hkʼe ma gʼa ve yoˬ. 19Oˇ htaˇ Moˉseˍ lehˬ, Chaw teˇ gʼaˇ ka‸ hkaoˍmonˇ chi hta‸ shawˉ pawˍ awˬ pon maˇ gʼa ha‸ shaˉ taˍ, teh‸ yawˇ hui hta‸ kʼoˆ piˇ ve yoˬ. 20Ya‸ hkʼaˇ, chaw teˇ hpaˍ hpaˍ Moˉseˍ kʼoˆ hkawˇ maˇ na leh ha‸ shaˉ taˍ ve pa taw, hkaoˍmonˇ oˇ ve teˇ hpaˍ kuiˇ kʼai leh hawehˆ hkʼa biˇ cawˬ taˍ ve yoˬ. Hkʼe te leh, Moˉseˍ yawˇ hui hta‸ nyi ma zuhˆ ve yoˬ. 21Teˇ shawˉ le le chaw yaˇ teˇ hpaˍ a shu yawˇ caˇ law‸ ve hkaoˍmonˇ hta‸ gʼawˆ yuˬ ve yoˬ. Mvuhˇ cha chiˆ la ve teˇ yanˇ, hkaoˍmonˇ oˇ ve hkʼa peu-eˬ kuiˬ kʼai ve yoˬ.
22Hkaw‸ nyi teˇ nyi gaˬ htaˇ, yawˇ hui hkaoˍmonˇ oˇ ve hta‸ nyiˇ pun gʼawˆ yuˬ ve yoˬ. Oˇ htaˇ, Iˉsaˍreˍlaˆ chaw awˬ hoˉ awˬ naˬ teˇ hpaˍ Moˉseˍ geh laˬ leh awˬ lawn chi yawˇ hta‸ ca kʼoˆ piˇ la ve yoˬ. 23Hkʼe te leh Moˉseˍ yawˇ hui hta‸ kʼoˆ piˇ ve, Shawˉ pawˍ lehˬ Gʼuiˬsha ve da‸ kehˬ ve shinˉ nyi hpeh‸ leh, ta‸ iˉ gawˬ lehˍ chehˇ leh gʼaˇ jehˇ ve awˬ nyi hpeh‸ ve yoˬ. Chi hta‸ pa taw, ya‸ nyi nawˬ hui te caˇ gaˇ ve hkʼe te caˇ leh, caˉ caˇ gaˇ ve hkʼe caˉ caˇ-oˆ. Ya‸ nyi nawˬ hui caˇ leuˉ ve teˇ hpaˍ shawˉ pawˍ awˬ pon ha‸ shaˉ taˍ-o‸, teh‸ yawˇ hui hta‸ kʼoˆ piˇ ve yoˬ. 24Hkʼe te leh, yawˇ hui lehˬ Moˉseˍ kʼoˆ ve hkʼe caˇ leuˉ dawˬ leuˉ ve teˇ hpaˍ hta‸ shawˉ pawˍ mvuhˇ htiˇ la htaˇ hkʼa gaˬ ha‸ shaˉ taˍ ve yoˬ. Hkaoˍmonˇ oˇ ve teˇ hpaˍ maˇ kuiˇ leh hawehˆ ka‸ maˇ cawˬ. 25Oˇ htaˇ Moˉseˍ lehˬ, Hkaoˍmonˇ hta‸ ya‸ nyi caˇ-oˆ. Awˬ lawn kʼo, ya‸ nyi lehˬ da‸ kehˬ ve shinˉ nyi hpeh‸ leh gʼaˇ jehˇ ve awˬ nyi hpeh‸ ve yoˬ. Awˬ baˬ hpawˇ lo nawˬ hui hkaoˍmonˇ hta‸ gʼa mawˬ tuˬ ve maˇ heˆ. 26Hkaw‸ nyi hkʼa gaˬ nawˬ hui hkaoˍmonˇ hta‸ gʼa gʼawˆ caˇ leh, gʼaˇ jehˇ ve awˬ nyi hpeh‸ ve shinˉ nyi chi teˇ nyi awˬ hkʼaw lo, hkaoˍmonˇ chi kʼaw‸ ce la tuˬ ve maˇ heˆ, teh‸ kʼoˆ ve yoˬ.
27Chaw teˇ hpaˍ hpaˍ shinˉ nyi htaˇ hkaoˍmonˇ ca gʼawˆ tuˬ tawˆ kʼai ve yoˬ. Ya‸ hkʼaˇ, yawˇ hui te‸ chiˉ maˇ gʼa mawˬ. 28Oˇ htaˇ Gʼuiˬsha Moˉseˍ hta‸ kʼoˆ piˇ ve, Nawˬ hui ngaˬ ve awˬliˇtawˇhkawˇ teˇ hpaˍ hta‸ maˇ na yuˬ leh hkʼaˬ maw maw te chehˇ tuˬ sheˍ ve le. 29Ngaˬ Gʼuiˬsha nawˬ hui hta‸ gʼaˇ jehˇ tuˬ awˬ nyi piˇ taˍ ve hta‸ dawˇ nawˇ-oˆ. Chi hta‸ pa taw, hkaw‸ nyi gaˬ ve teˇ yanˇ nawˬ hui hta‸ nyiˇ nyi awˬ pon caˇ tuˬ hkʼa law‸ piˇ taˍ ve yoˬ. Suhˍ nyi teˇ nyi htaˇ chaw teˇ gʼaˇ ka‸ maˇ gʼa te toˇ. A shu yawˇ ve chehˇ kuiˬ hkʼaw gʼa chehˇ taˍ ve yoˬ. 30Hkʼe te leh, Iˉsaˍreˍlaˆ chaw teˇ hpaˍ suhˍ nyi teˇ nyi htaˇ, kanˉ maˇ te leh chehˇ taˍ ve yoˬ.
31Iˉsaˍreˍlaˆ chaw hui hkaoˍmonˇ oˇ ve hta‸ maˍnaˆ shiˍ teh‸ kʼoˆ ve yoˬ. Hkaoˍmonˇ oˇ ve lehˬ hpuˉ-ehˍ cawˬ ve awˬ yawˇ hta‸ shuˍ leh, pehˇ gʼuiˬ yuˬ te taˍ ve hkaoˍmonˇ hkʼa shuˍ mehˬ ve yoˬ. 32Oˇ htaˇ Moˉseˍ kʼoˆ ve, Gʼuiˬsha ngaˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ la leh, heh puiˉ hkʼaw lo maˍnaˆ shiˍ caˍ laˇ ve hta‸, awˬ hkʼaw‸ nawˉ laˬ tuˬ ve chaw teˇ hpaˍ gʼa shiˍ tuˬ, Gʼuiˬsha lehˬ maˍnaˆ shiˍ teˇ hpaˍ hta‸ gʼawˆ yuˬ leh ha‸ shaˉ taˍ tuˬ ngaˬ hui hta‸ kʼoˆ laˇ taˍ ve yoˬ. 33Hkʼe te leh Moˉseˍ lehˬ, Ngaˬ hui ve awˬ ceuˬ awˬ hkʼaˇ teˇ hpaˍ awˬ pon, je‸ mu‸ hkʼu teˇ maˬ hkʼaw maˍnaˆ shiˍ teˇ awˇmehˇ #16:33 Chi lehˬ teˇ hkʼawˍ lawˇ ehˉ teh‸ kʼoˆ gaˇ ve yoˬ. gʼawˆ keu leh Gʼuiˬsha mehˆ gʼuˇ suhˍ ha‸ shaˉ taˍ-o‸, teh‸ Aˍronˍ hta‸ kʼoˆ piˇ ve yoˬ. 34Gʼuiˬsha Moˉseˍ hta‸ kʼoˆ piˇ taˍ ve hkʼa peu-eˬ hta‸ Aˍronˍ na yuˬ leh te ve yoˬ. Yawˇ lehˬ maˍnaˆ shiˍ oˇ ve hta‸ Gʼuiˬsha ve ka ti‸ shaˉ caˆ ta kʼoˍ gʼuˇ suhˍ lo teh taˍ ve yoˬ. 35Iˉsaˍreˍlaˆ chaw hui lehˬ, Hkaˍnanˍ mvuhˇmiˬ lo gaˬ htaˇ hkʼa gaˬ, maˍnaˆ shiˍ hta‸ 40 hkʼaw‸ gʼa caˇ ve yoˬ. 36(Teˇ awˇmehˇ kʼoˆ ve lehˬ, Eˇhpaˍ teˇ chi pun teˇ pun hpeh‸ ve yoˬ.)
اکنون انتخاب شده:
Tawˆ kʼai ve li‸ 16: LHBE
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Lahu Bible Edited © Thailand Bible Society and Bible Society of Myanmar, 2010, 2020.