Tawˆ kʼai ve li‸ 14
14
Laˇ tsuhˇ gʼuiˬ nyi hta‸ hkanˍ ve
1Oˇ ve hkʼaw‸ nawˉ, Gʼuiˬsha Moˉseˍ hta‸ chi hkʼe kʼoˆ piˇ ve yoˬ. 2Iˉsaˍreˍlaˆ chaw hui Miˆgaˍdawˇlaˆ venˇ leh Baˍlaˆseˍhponˍ venˇ awˬ kaˍ lo cawˬ ve Piˆhaˍhiˇraˆ venˇ paˇ lo kʼaw‸ hpfuhˆ kʼaw‸ la leh, oˇ kaˬ lo jehˇ taˍ tuˬ yawˇ hui hta‸ kʼoˆ piˇ-oˆ. 3Awˬ lawn kʼo Eˇjiˇtu‸ jawˇmawˇ lehˬ, Iˉsaˍreˍlaˆ chaw teˇ hpaˍ mvuhˇmiˬ ya‸ leh caw toˇ chehˇ taˍ peuˬ. Heh puiˉ hkʼaw lo yawˇ hui hkanˉ taˍ peuˬ, teh‸ dawˇ chehˇ tuˬ yoˬ. 4Ngaˬ yawˇ ve nyi ma hta‸ heh la piˇ leh, yawˇ lehˬ nawˬ hui hkʼaˇ suh gʼa‸ yuˬ laˬ tuˬ yoˬ. Ngaˬ lehˬ Gʼuiˬsha hpeh‸ ve hta‸ Eˇjiˇtu‸ chaw teˇ hpaˍ gʼa shiˍ tuˬ, Jawˇmawˇ leh yawˇ ve ma‸ moˍ ma‸ cuˇ hta‸ te luˬ te sheˆ piˇ ve hkʼaw, ngaˬ ve awˬ me‸ awˬ hponˇ hta‸ tawˆ la piˇ tuˬ yoˬ, teh‸ Moˉseˍ hta‸ kʼoˆ piˇ ve yoˬ. Yawˇ hui hta‸ kʼoˆ piˇ ve hkʼe, Iˉsaˍreˍlaˆ chaw teˇ hpaˍ na yuˬ leh te ve yoˬ.
5Iˉsaˍreˍlaˆ chaw hui tawˆ kʼai peuˬ ve awˬ lawn Eˇjiˇtu‸ jawˇmawˇ gʼa shiˍ ve teˇ yanˇ, yawˇ leh yawˇ ve a ma‸ lonˉ teˇ hpaˍ nyi ma kʼaw‸ pa leh, Ngaˬ hui hkʼaˬ hkʼe te peuˬ ve le. Ngaˬ hui lehˬ, ngaˬ hui ve awˬ ceˬ te chehˇ ve Iˉsaˍreˍ laˆ chaw hui hta‸ hpehˇ piˇ peuˬ ve law, teh‸ kʼoˆ ve yoˬ. 6Oˇ htaˇ, jawˇmawˇ lehˬ yawˇ ve iˉ mvuhˇ lawˬ hta‸ hkʼa deh‸ gu tcuh peuˬ hkʼaw‸ nawˉ, yawˇ ve ma‸ yaˇ teˇ hpaˍ hta‸ shiˍ leh tawˆ kʼai ve yoˬ. 7Fuiˍ teh taˍ ve yawˇ ve iˉ mvuhˇ lawˬ 600 maˬ hta‸ htawˇ yuˬ kʼai ve yoˬ. Iˉ mvuhˇ lawˬ oˇ ve teˇ hpaˍ awˬ hkʼaw ma‸ poˍ teˇ hpaˍ ciˇ taˍ ve yoˬ. 8Gʼuiˬsha lehˬ jawˇmawˇ ve nyi ma hta‸ heh la piˇ leh, ha lehˬ ha kʼa tawˆ kʼai chehˇ ve Iˉsaˍreˍlaˆ chaw hui hkʼaˇ suh gʼa‸ yuˬ kʼai ve yoˬ. 9Jawˇmawˇ ve iˉ mvuhˇ leh iˉ mvuhˇ lawˬ teˇ hpaˍ, iˉ mvuhˇ ciˇ ve ma‸ yaˇ leh Eˇjiˇtu‸ chaw teˇ hpaˍ, yawˇ hui hkʼaˇ suh gʼa‸ yuˬ kʼai leh, Baˍlaˆseˍhponˍ leh Piˇhaˍhiˇraˆ venˇ paˇ lo cawˬ ve Laˇ tsuhˇ gʼuiˬ nyi lo jehˇ taˍ ve Iˉsaˍreˍlaˆ chaw hui geh gaˬ la ve yoˬ.
10Iˉsaˍreˍlaˆ chaw hui lehˬ, jawˇmawˇ leh yawˇ ve ma‸ moˍ lonˉ gʼa‸ laˬ chehˇ ve hta‸ gʼa mawˬ ve teˇ yanˇ, kawˆ jaˇ leh Gʼuiˬsha hta‸ kuˬ ve yoˬ. 11Yawˇ hui Moˉseˍ hta‸ deˇ leh kʼoˆ ve, Eˇjiˇtu‸ mvuhˇmiˬ hkʼaw tuˍ hpfuh maˇ cawˬ ve pa taw, heh puiˉ hkʼaw lo ca suh la tuˬ nawˬ ngaˬ hui hta‸ choˬ kaˬ lo shiˍ veu laˇ ve laˇ. Ngaˬ hui hta‸ nawˬ hkʼaˬ hkʼe te laˇ taˍ peuˬ ve hta‸ nyi-o. 12Ngaˬ hui maˇ tawˆ la sheˍ htaˇ ka‸ chi hkʼe hpeh‸ la tuˬ yoˬ, teh‸ nawˬ hta‸ kʼoˆ piˇ taˍ peuˬ ve maˇ heˆ laˇ. Ngaˬ hui Eˇjiˇtu‸ chaw hui ve awˬ ceˬ te chehˇ ve hta‸ taˇ te sho‸ sha‸ laˇ-oˆ, teh‸ nawˬ hta‸ kʼoˆ piˇ taˍ peuˬ ve yoˬ. Choˬ kaˬ heh puiˉ hkʼaw lo ca suh la ve a‸ kehˉ, shu ve awˬ ceˬ gʼa te chehˇ ve lehˬ leuˉ leh da‸ ve yoˬ, teh‸ Moˉseˍ hta‸ kʼoˆ piˇ ve yoˬ.
13Oˇ htaˇ Moˉseˍ kʼoˆ ve, Taˇ kawˆ. Nyi ma yeˬ chaweh taˍ-o‸. Ya‸ nyi Gʼuiˬsha nawˬ hui hta‸ hkʼaˬ hkʼe te ponˬ laˇ tuˬ ve hta‸ law nyi taˍ-o‸. Awˬ lawn kʼo, nawˬ hui lehˬ Eˇjiˇtu‸ chaw chi teˇ hpaˍ hta‸ awˬ hkʼaw‸ nawˉ teˇ pawˆ ka‸ gʼa kʼaw‸ mawˬ tuˬ ve maˇ heˆ. 14Gʼuiˬsha lehˬ nawˬ hui awˬ pon ma‸ bawˆ tuˬ yoˬ. Chi hta‸ pa taw, nawˬ hui gawˬ lehˍ chehˇ taˍ-o‸, teh‸ yawˇ hui hta‸ kʼoˆ piˇ ve yoˬ.
15Oˇ htaˇ Gʼuiˬsha Moˉseˍ hta‸ kʼoˆ piˇ ve, Aˬ hto‸ ma pa taw nawˬ ngaˬ hta‸ kuˬ chehˇ ve le. Iˉsaˍreˍlaˆ chaw hui hta‸ awˬ gʼuˇ suhˍ kʼai tuˬ kʼoˆ piˇ-oˆ. 16Nawˬ ve juˇ fuiˍ taˬ hta‸ laˇ tsuhˇ gʼuiˬ hkʼoˆ lo che peu-o. Laˇ tsuhˇ gʼuiˬ nyiˇ hkoˇ hpeh‸ kʼai leh, Iˉsaˍreˍlaˆ chaw teˇ hpaˍ goˇ lehˍ ve miˬguiˬ hkʼoˆ gʼa juˇ kʼai tuˬ yoˬ. 17Ngaˬ lehˬ Eˇjiˇtu‸ chaw teˇ hpaˍ hta‸ nyi ma heh la piˇ leh, yawˇ hui lehˬ nawˬ hui hkʼaˇ suh gʼa‸ yuˬ laˬ tuˬ yoˬ. Jawˇmawˇ leh yawˇ ve ma‸ moˍ hta‸ te luˬ piˇ ve hkʼaw, ngaˬ ve awˬ me‸ awˬ hponˇ hta‸ te tawˆ la piˇ tuˬ yoˬ. 18Ngaˬ yawˇ hui hta‸ te luˬ te sheˆ piˇ ve teˇ yanˇ, ngaˬ lehˬ Gʼuiˬsha hpeh‸ ve hta‸ Eˇjiˇtu‸ chaw teˇ hpaˍ shiˍ la tuˬ yoˬ, teh‸ Moˉseˍ hta‸ kʼoˆ piˇ ve yoˬ.
19Iˉsaˍreˍlaˆ chaw hui gʼuˇ suhˍ lo kʼai chehˇ ve Gʼuiˬsha ve mvuhˇ naw tcuh yaˇ lehˬ, yawˇ hui hkʼaw‸ nawˉ lo kʼaw‸ chehˇ sheˬ leh, yawˇ hui gʼuˇ suhˍ kʼai chehˇ ve moˬ yehˬ hkuiˉdaw oˇ ve htawˇ, yawˇ hui hkʼaw‸ nawˉ kʼaw‸ chehˇ sheˬ ve yoˬ. 20Hkʼe te leh, moˬ yehˬ hkuiˉ daw oˇ ve lehˬ Iˉsaˍreˍlaˆ chaw leh Eˇjiˇtu‸ chaw awˬ kaˍ lo chehˇ taˍ leh, Eˇjiˇtu‸ chaw hui hpawˇ lo naˆ ho‸ la piˇ lawˬ ve yoˬ. Ya‸ hkʼaˇ, Iˉsaˍreˍlaˆ chaw hui hpawˇ lo awˬ gʼeuˆ ba piˇ chehˇ ve yoˬ. Hkʼe te leh, teˇ haˉ mvuhˇ hkʼa htiˇ chaw oˇ ve nyiˇ moˍ lehˬ, teˇ moˍ leh teˇ moˍ awˬ paˇ lo kʼai maˇ gaˬ ve yoˬ.
21Oˇ htaˇ, Moˉseˍ yawˇ ve juˇ fuiˍ taˬ hta‸ laˇ tsuhˇ gʼuiˬ hkʼoˆ lo che peu leh, Gʼuiˬsha lehˬ mvuhˇ nyi tawˆ hpawˇ ve mvuhˇ haw hta‸ teˇ haˉ tanˇ hkuinˇ meuˆ laˬ tcuh ve yoˬ. Hkʼe te leh laˇ tsuhˇ gʼuiˬ nyiˇ hkoˇ hpeh‸ sheˬ leh, laˇ tsuhˇ gʼuiˬ hkʼaw lo goˇ lehˍ ve miˬguiˬ tawˆ la ve yoˬ. 22Hkʼe te leh Iˉsaˍreˍlaˆ chaw teˇ hpaˍ laˇ tsuhˇ gʼuiˬ hkʼaw goˇ lehˍ ve miˬguiˬ hkʼoˆ juˇ kʼai ve yoˬ. Iˉ kaˆ teˇ hpaˍ lehˬ, yawˇ hui ve la‸ sha paˉ la‸ mehˍ paˉ hpawˇ lo gʼo‸ pa ko taˍ ve hkʼe hpeh‸ chehˇ taˍ ve yoˬ. 23Eˇjiˇtu‸ jawˇmawˇ lehˬ yawˇ ve ma‸ moˍ lonˉ hta‸ shiˍ leh yawˇ hui hkʼaˇ suh gʼa‸ yuˬ kʼai ve yoˬ. 24Mvuhˇ htiˇ la paˇ neˇ ve teˇ yanˇ, Gʼuiˬsha lehˬ aˬ miˍ yehˬ hkuiˉ daw hkʼaw chehˇ taˍ leh Eˇjiˇtu‸ chaw hui hta‸ kawˆ tuˬ te piˇ ve yoˬ. 25Gʼuiˬsha lehˬ, iˉ mvuhˇ lawˬ oˇ ve teˇ hpaˍ hta‸ haˆ haˆ kʼai maˇ gaˬ tuˬ te piˇ ve yoˬ. Oˇ htaˇ Eˇjiˇtu‸ chaw teˇ hpaˍ kʼoˆ ve, Gʼuiˬsha lehˬ Iˉsaˍreˍlaˆ chaw hui hpawˇ chehˇ leh ngaˬ hui hta‸ bawˆ laˇ chehˇ ve yoˬ. Ngaˬ hui choˬ kaˬ lo tawˆ kʼai-a veuˬ, teh‸ kʼoˆ ve yoˬ.
26Oˇ htaˇ Gʼuiˬsha kʼoˆ ve, Eˇjiˇtu‸ chaw hui ve ma‸ moˍ lonˉ awˬ hkʼoˆ lo, iˉ kaˆ kʼaw‸ hoˆ beh piˇ tuˬ, nawˬ ve la‸ sheh laˇ tsuhˇ gʼuiˬ hkʼoˆ che peu-o, teh‸ Moˉ seˍ hta‸ kʼoˆ piˇ ve yoˬ. 27Mvuhˇ htiˇ la leh Moˉseˍ yawˇ ve la‸ sheh laˇ tsuhˇ gʼuiˬ hkʼoˆ lo che peu ve teˇ yanˇ, iˉ kaˆ teˇ hpaˍ ponˬ laˬ htaˇ hkʼe kʼaw‸ biˇ sheˬ ve yoˬ. Eˇjiˇtu‸ chaw teˇ hpaˍ gʼaˇ hte‸ gʼuiˇ hpaw-e ve htawˇ, Gʼuiˬsha lehˬ yawˇ hui hta‸ iˉ kaˆ hkʼaw lo paiˍ piˇ lawˬ ve yoˬ. 28Iˉsaˍreˍlaˆ chaw hui hkʼaˇ suh gʼa‸ yuˬ laˬ chehˇ ve Eˇjiˇtu‸ ma‸ moˍ lonˉ hta‸ iˉ kaˆ hoˆ beh sheˬ leh yawˇ hui hkʼa peu-eˬ suh-e ve yoˬ. 29Ya‸ hkʼaˇ, Iˉsaˍreˍlaˆ chaw hui lehˬ laˇ tsuhˇ gʼuiˬ hkʼaw lo goˇ lehˍ ve miˬguiˬ hkʼoˆ juˇ kʼai leh, iˉ kaˆ teˇ hpaˍ lehˬ yawˇ hui ve la‸ sha paˉ, la‸ mehˍ paˉ hpawˇ lo gʼo‸ pa ko taˍ ve hkʼe hpeh‸ chehˇ taˍ ve yoˬ.
30Oˇ ve teˇ nyi Gʼuiˬsha lehˬ, Iˉsaˍreˍlaˆ chaw hui hta‸ Eˇjiˇtu‸ chaw hui ve la‸ sheh hkʼaw ponˬ piˇ leh, yawˇ hui laˇ tsuhˇ gʼuiˬ pfuhˍ lo suh hpoˆ taˍ ve hta‸ Iˉsaˍreˍlaˆ chaw hui gʼa mawˬ ve yoˬ. 31Gʼuiˬsha lehˬ yawˇ ve kanˇ paˆ hta‸ yehˇ leh, Eˇjiˇtu‸ chaw hui hta‸ te luˬ te sheˆ piˇ ve hta‸ Iˉsaˍreˍlaˆ chaw hui gʼa mawˬ ve teˇ yanˇ, yawˇ hui hkʼa peu-eˬ anˇ jaˇ kawˆ jaˇ ve yoˬ. Oˇ htaˇ yawˇ hui Gʼuiˬsha hta‸ maˇ kʼoˆ, yawˇ ve awˬ ceˬ paˍ Moˉseˍ hta‸ maˇ kʼoˆ, yonˍ la ve yoˬ.
اکنون انتخاب شده:
Tawˆ kʼai ve li‸ 14: LHBE
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Lahu Bible Edited © Thailand Bible Society and Bible Society of Myanmar, 2010, 2020.