Tawˆ kʼai ve li‸ 13
13
Diˇ maˇ keu ve hkaoˍmonˇ caˇ ve
1Oˇ ve hkʼaw‸ nawˉ Gʼuiˬsha kʼoˆ ve, Iˉsaˍreˍlaˆ chaw awˬ hkʼaw lo awˉ lawˉ peuˇ paw la ve yaˇ paˍ uiˍ teˇ gʼaˇ le maˇ kʼoˆ, to nuˇ to shaˆ maˇ kʼoˆ, ngaˬ hta‸ gʼa chiˇ a‸ laˇ ve yoˬ. 2Awˬ lawn kʼo, oˇ ve teˇ hpaˍ lehˬ ngaˬ ve mawˇ hpeh‸ ve yoˬ, teh‸ Moˉseˍ hta‸ kʼoˆ piˇ ve yoˬ.
3Oˇ htaˇ, Moˉseˍ chaw moˍ lonˉ hta‸ kuˬ hpawnˬ leh kʼoˆ ve, Nawˬ hui Eˇjiˇtu‸ mvuhˇmiˬ hkʼaw shu ceˬ te chehˇ kuiˬ lo gʼa ponˬ tawˆ la ve awˬ nyi chi teˇ nyi hta‸ dawˇ nawˇ-oˆ. Awˬlawn kʼo, Gʼuiˬsha lehˬ yawˇ ve kanˇ paˆ hta‸ yehˇ leh nawˬ hui hta‸ shiˍ tawˆ laˇ taˍ peuˬ. Hkʼe te leh, diˇ keu taˍ ve hkaoˍmonˇ hta‸ taˇ caˇ. 4Ya‸ nyi awˉ lawˉ peuˇ ve Aˍbiˆbaˍlaˆ ha pa chi ve teˇ nyi awˬ hkʼaw lo, nawˬ hui Eˇjiˇtu‸ mvuhˇmiˬ hkʼaw gʼa tawˆ kʼai tuˬ yoˬ. 5Gʼuiˬsha lehˬ, nawˬ hui ve awˬ puˍ awˬ pi hui hta‸ piˇ tuˬ ka ti‸ te taˍ ve hkuiˇ jaˇ da‸ jaˇ ve mvuhˇmiˬ, Hkaˍnaˍniˆ chaw, Hiˇtiˆ chaw, Aˍmawˇriˆ chaw, Hiˇviˆ chaw, leh Yeˍbuˇsiˆ chaw hui ve mvuhˇmiˬ hkʼaw Gʼuiˬsha nawˬ hui hta‸ shiˍ lo‸-e piˇ ve teˇ yanˇ, nawˬ hui lehˬ ha pa chi teˇ maˬ hkʼaw pawehˇ chi hta‸ gʼa te tuˬ yoˬ. 6Suhˍ nyi hkʼa gaˬ nawˬ hui lehˬ, diˇ maˇ keu ve hkaoˍmonˇ hta‸ ceh tiˉ gʼa caˇ tuˬ yoˬ. Suhˍ nyi teˇ nyi gaˬ htaˇ, nawˬ hui hpawnˬ da‸ leh Gʼuiˬsha hta‸ oˉ kʼoˍ gʼa pui ve yoˬ. 7Chi ve suhˍ nyi awˬ hkʼaw lo, nawˬ hui lehˬ diˇ keu taˍ ve hkaoˍmonˇ hta‸ maˇ gʼa caˇ. Nawˬ hui ve mvuhˇmiˬ hkʼaw lo diˇ keu taˍ ve hkaoˍmonˇ leh diˇ maˇ gʼa cawˬ piˇ. 8Chi lehˬ, ngaˬ Eˇjiˇtu‸ mvuhˇmiˬ hkʼaw tawˆ la htaˇ, Gʼuiˬsha ngaˬ awˬ pon hkʼaˬ hkʼe te laˇ taˍ ve hta‸ dawˇ nawˇ tuˬ awˬ pon hpeh‸ ve yoˬ, teh‸ nawˬ hui a shu yawˇ ve yaˇ teˇ hpaˍ hta‸ gʼa kʼoˆ maˍ piˇ tuˬ yoˬ. 9Pawehˇ chi lehˬ, nawˬ hui hkʼaˬ htaˆ ka‸ dawˇ nawˇ chehˇ tuˬ, la‸ sheh hkʼoˆ leh naˍ kʼa‸ pui hkʼoˆ lo hpeh taˍ ve awˬ heˆ hkʼe hpeh‸ leh, Gʼuiˬsha ve aw liˇ tawˇ hkawˇ hta‸ henˇ yuˬ tcuhˉ taˍ tuˬ awˬ pon hpeh‸ ve yoˬ. Awˬ lawn kʼo, Gʼuiˬsha lehˬ yawˇ ve kanˇ paˆ hta‸ yehˇ leh, nawˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ laˇ taˍ peuˬ. 10Chi hta‸ pa taw, teˇ hkʼaw‸ le le tinˍ taˍ ve awˬ yanˇ gaˬ la htaˇ, pawehˇ chi hta‸ nawˬ hui hkʼa deh‸ gʼa te tcuhˉ taˍ ve yoˬ.
Awˉ lawˉ peuˇ paw la ve yaˇ paˍ
11Gʼuiˬsha lehˬ, nawˬ hui leh nawˬ hui ve awˬ puˍ awˬ pi hui hta‸ piˇ tuˬ ka ti‸ te taˍ ve Hkaˍnanˍ mvuhˇmiˬ lo nawˬ hui hta‸ shiˍ lo‸-e piˇ ve teˇ yanˇ, 12nawˬ hui geh awˉ lawˉ peuˇ paw la ve yaˇ paˍ teˇ gʼaˇ le le leh, to nuˇ to shaˆ awˬ paˍ teˇ hkeh le le Gʼuiˬsha hta‸ gʼa chiˇ a‸ piˇ ve yoˬ. 13Piˉ laˬ awˬ ma peuˍ geh awˉ lawˉ peuˇ paw la ve awˬ paˍ hta‸ yawˬ ehˉ teˇ hkeh yuˬ leh gʼa pa hkʼaw‸ ve yoˬ. Oˇ hkʼe maˇ te gaˇ ve kʼo, piˉ laˬ ehˉ oˇ ve kʼawˍ peˍ hta‸ gʼa awˉ hteh piˇ ve yoˬ. Nawˬ hui geh awˉ lawˉ peuˇ paw la ve yaˇ paˍ teˇ gʼaˇ le le hta‸ gʼa vuiˬ hkʼaw‸ ve yoˬ. 14Teˇ nyi gaˬ leh nawˬ hui ve yaˇ teˇ hpaˍ lehˬ, Chi ve aˬ hto‸ ma tcuhˉ kuiˬ le, teh‸ na nyi laˇ ve kʼo, Ngaˬ hui Eˇjiˇtu‸ mvuhˇmiˬ hkʼaw shu ceˬ te chehˇ ve teˇ yanˇ, Gʼuiˬsha lehˬ yawˇ ve kanˇ paˆ hta‸ yehˇ leh ngaˬ hui hta‸ shiˍ tawˆ laˇ ve yoˬ. 15Jawˇmawˇ nyi ma heh jaˇ leh ngaˬ hui hta‸ maˇ hpehˇ peu laˇ ve teˇ yanˇ, Gʼuiˬsha lehˬ Eˇjiˇtu‸ mvuhˇmiˬ hkʼaw awˉ lawˉ peuˇ paw la ve yaˇ paˍ teˇ hpaˍ leh to nuˇ to shaˆ hkʼa peu-eˬ ve hta‸ tiˇ pehˍ piˇ ve yoˬ. Chi hta‸ pa taw, ngaˬ hui geh awˉ lawˉ peuˇ paw la ve to nuˇ to shaˆ awˬ paˍ teˇ hkeh le le Gʼuiˬsha hta‸ gʼa chiˇ a‸ piˇ ve yoˬ. Awˉ lawˉ peuˇ paw la ve yaˇ paˍ uiˍ teˇ gʼaˇ le le hta‸ htawˇ gʼa vuiˬ hkʼaw‸ piˇ ve yoˬ. 16Hkʼe te leh, awˬ liˇ chi lehˬ ngaˬ hui ve la‸ sheh leh ngaˬ hui ve naˍ kʼa‸ pui hkʼoˆ lo, dawˇ nawˇ tuˬ hpeh taˍ ve awˬ heˆ hkʼe hpeh‸ ve yoˬ. Awˬ lawn kʼo, Gʼuiˬsha lehˬ yawˇ ve kanˇ paˆ hta‸ yehˇ leh ngaˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ laˇ taˍ peuˬ, teh‸ yawˇ hui hta‸ gʼa kʼoˆ maˍ piˇ tuˬ yoˬ, teh‸ Moˉseˍ yawˇ hui hta‸ kʼoˆ piˇ ve yoˬ.
Moˬ yehˬ hkuiˉ daw leh aˬ miˍ yehˬ hkuiˉ daw
17Eˇjiˇtu‸ jawˇmawˇ lehˬ, Iˉsaˍreˍlaˆ chaw hui hta‸ hpehˇ piˇ peuˬ ve teˇ yanˇ, Gʼuiˬsha lehˬ hteˇ jaˇ ve ya‸ kʼaw hpeh‸ ve, Hpiˇliˇtiˆ chaw hui ve mvuhˇmiˬ lo yawˇ hui hta‸ maˇ shiˍ kʼai piˇ. Awˬ lawn kʼo, chaw chi teˇ hpaˍ ma‸ gʼa bawˆ da‸ kuiˬ cawˬ kʼo, nyi ma luˬ leh Eˇjiˇtu‸ mvuhˇmiˬ lo kʼaw‸ hpfuhˆ kʼo‸-e la ve hta‸ hkiˉ ve pa taw yoˬ. 18Hkʼe te leh, Gʼuiˬsha yawˇ hui hta‸ heh puiˉ hkʼaw lo caw toˇ tcuh leh, Laˇ tsuhˇ gʼuiˬ nyi cawˬ kuiˬ lo shiˍ kʼai piˇ ve yoˬ. Iˉsaˍreˍlaˆ chaw teˇ hpaˍ lehˬ la‸ caˉ hkʼa deh‸ pfuhˇ taˍ ve yoˬ.
19Moˉseˍ lehˬ, Yoˇseh‸ ve awˬ to hta‸ yawˇ geh lo yuˬ kʼai taˍ ve yoˬ. Awˬ lawn kʼo Yoˇseh‸ lehˬ, Gʼuiˬsha nawˬ hui hta‸ htaiˍ hkʼaw‸ laˇ ve teˇ yanˇ, ngaˬ ve awˬ to hta‸ nawˬ hui geh gʼa yuˬ kʼai ve yoˬ, teh‸ Iˉsaˍreˍlaˆ chaw hui hta‸ kʼoˆ piˇ leh hkanˍ tcuh taˍ ve pa taw yoˬ.
20Yawˇ hui Suˇkoˆ venˇ hkʼaw tawˆ kʼai leh, hteunˍ lonˉ awˬ paˇ lo cawˬ ve Eˇtanˍ venˇ paˇ lo ca jehˇ taˍ ve yoˬ. 21Gʼuiˬsha lehˬ, mvuhˇ law‸ kʼaw htaˇ moˬ yehˬ hkuiˉ daw hkʼaw chehˇ taˍ leh yawˇ hui hta‸ shiˍ kʼai piˇ ve yoˬ. Mvuhˇ hpeu‸ htaˇ, aˬ miˍ yehˬ hkuiˉ daw hkʼaw chehˇ taˍ leh yawˇ hui hta‸ awˬ gʼeuˆ paw piˇ chehˇ ve yoˬ. Hkʼe te leh, yawˇ hui tanˇ hkuinˇ tanˇ vanˇ ya‸ kʼaw te toˇ hpeh‸ ve yoˬ. 22Mvuhˇ law‸ kʼaw htaˇ, moˬ yehˬ hkuiˉ daw leh mvuhˇ hpeu‸ htaˇ, aˬ miˍ yehˬ hkuiˉ daw yawˇ hui gʼuˇ suhˍ hkʼaˬ htaˆ ka‸ chehˇ taˍ ve yoˬ.
اکنون انتخاب شده:
Tawˆ kʼai ve li‸ 13: LHBE
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Lahu Bible Edited © Thailand Bible Society and Bible Society of Myanmar, 2010, 2020.