1 Samweli 19
19
Sawulo e len èè wolo Dafidi
1Sawulo ɛ dɔ̀ wobi Yonatan ma bɛndɩrɛbi fɔ powu gɛtɛ bàà wolo Dafidi. Mɔ Yonatan ee len Dafidi wade gepepe. 2Okoro Yonatan ɛ dɔ̀ Dafidi alan, <<Miinte Sawulo ee len osele gɛtɛ ɛ̀ɛ̀ ka wolo wɔ̀, okoro dɩyɛ koro gɩsa gɛgyɩgyan. Ma bugiti gebukʋn gɩkɩ fɔ àà sara dʋkɔbɛ. 3Nan san n ma yela miinte wakʋn oli waanɩ ɔkʋn gɛtɛ aà ma bu fɔ. Fɔ nan dɔ̀ aade n tɛ wɔ, gɛ gengyi ɛ̀ dɔ̀ ade ɩkɩ fɔ, nan biri n bɛ dɔ̀ wɔ̀.>>
4Gɛ Yonatan ɛ dɔ̀ ade-kpara ɛ dama Dafidi wo koro ɛ tɛ wote alan, <<Awɔ egyu-dɩrɛ, kara mɛ aasaranyan Dafidi ade-kpen, yema ɛn mɛ wɔ̀ ade-kpen ɩkɩ. Ade gɛtɛ ɛ mɛ gba fɔ, wʋ kpà gɛ awɔ gepepe. 5Yema ɛ ka wɔ nkpa ɛ sɩ̀, gɛ ɛ ma wolo Filisiti-te fɔ. Gɛ Yahwe ɛ yɛ Isareli powu e to koro, gɛ a we wʋ gɛ a di ɔsɛ. Anʋn yii koro gɛ aà mɛ ɛnɩ ɛkɩ anlɛ Dafidi ade-kpen fɔ àà wolo wɔ gɛtɛ ɛn nyɩ̀ ade ɩkɩ yaanɩ?
6Sawulo ɛ nʋn Yonatan wakʋn gɛ ɛ kan ntam alan, <<Na nya Yahwe gɛtɛ è si nkpa lɛ alan, mɩ nan wolo Dafidi.>>
7Okoro Yonatan e kpèlè Dafidi, gɛ ɛ dɔ̀ wɔ ade gɛtɛ bɛ dɔ̀ fɔ powu, gɛ Yonatan ɛ ka Dafidi ɛ ba Sawulo wakʋn. Gɛ Dafidi ɛ sʋma Sawulo anlɛ gɛtɛ ɛ̀ fʋrʋma ɛɛ mɛ fɔ.
8Nyawʋ wʋʋ gama fɔ, be biri be wura akpa ma Filisiti bete fɔ. Gɛ Dafidi ɛ ka ɔkɛma-dɩrɛ ɛ kpà ma ɛbɛ gɛ wʋ yɛ be serenti bɛ da.
9Mɔ Yahwe ɛ yɛ gifiye-kpen gɩ ba Sawulo wo koro gɛtɛ è si wɔ dɩkpaara gɛ wɔ giturunyan gɩ̀ sa wɔ gʋlɔ fɔ. Fɔ Dafidi ɛɛ tà adʋlɛ. 10Sawulo e fun gɩtà fɔ èè sere Dafidi marama ɔpɔrɩ, mɔ Dafidi ɛ waran e kura gɛ gɩtà fɔ gi ma sere ma ɔpɔrɩ. Gɛ Dafidi e serenti ɛ da odente wʋtɔkɔ.
11Sawulo ɛ sa bɛnɩ Dafidi dɩkpaara bàà ma dɩyɛ wɔ, fɔ bàà wolo wɔ koro-kpalɛ gagyɩgyan fuu. Mɔ Dafidi wɔsɔ Mikali ɛ dɔ̀ wɔ alan, <<Gengyi gɛ an serenti odente nyawʋ àà to aa nkpa fɔ, baà wolo wɔ̀ gɩsa.>> 12Gɛlɛ wuu koro Mikali e tiri Dafidi e ye ma nfansɩrɩ, gɛ e serenti. 13Ɛwʋ gɛ Mikali ɛ ka ekpen-salɩlɛ ɛ dʋrɔ difenge dii koro, gɛ ɛ ka dɩyan e tin wɔ, gɛ ɛ ka begbebi baanu e tin wo duyu.
14Gɛtɛ Sawulo ɛ sa bɛnɩ alɛ bɛ ma gye Dafidi fɔ, Mikali ɛ dɔ̀ bɛ alan, <<Ee yeba.>>
15Ɛwʋ gɛ Sawulo e biri ɛ sa bɛnɩ Dafidi akʋn gɛ ɛ dɔ̀ bɛ alan, <<Ɩ san yàà ma ka wɔ ma wo difenge fɔ powu ɩ ba nfan fɔ nan wolo wɔ.>> 16Mɔ gɛtɛ bɛnɩ fɔ be gyu dikwo fɔ daanɩ fɔ, ekpen-salɩlɛ n dɔ difenge fɔ dii koro, gɛ begbebi baanu n tin wo duyu.
17Gɛ Sawulo e lila Mikali alan, <<Anʋn yii koro gɛ a gban mɩ anlɛ, gɛ a tiri mɩɩnkyʋnlɛ osele gɛ a yɛ wɔ e serenti>> Gɛ Mikali e tiri wuunyun alan, <<Ɛ dɔ̀ mɩ alan, <Yɛ mɩ nan serenti, nka gɛlɛ fɔ, nan wolo wɔ̀.> >>
18Gɛtɛ Dafidi e serenti fɔ, ɛ san Samweli wakʋn Rama ditele, gɛ ɛ dɔ̀ wɔ ade gɛtɛ Sawulo ɛ mɛ wɔ fɔ powu. Gɛ ɛwɔ ma Samweli bɛ san bɛ ma sara Nayito ditele daanɩ. 19Gɛ wʋ ma nʋn Sawulo alan, <<Dafidi ɛ̀ sa Nayito ditele gɛtɛ dɩ̀ sa Rama fɔ.>> 20Okoro Sawulo ɛ sa bɛnɩ alɛ bɛ ma gye Dafidi. Mɔ gɛtɛ bɛ ma gyu fɔ, be we Wurubwarɛ bɛtabʋrʋlɛ dikpi gɛtɛ bè yela bɛɛ tabʋrʋ Wurubwarɛ wade, fɔ Samweli è gyegeye bɔɔ bʋnʋn. Gɛ Wurubwarɛ Gifiye gɩ ba Sawulo bɛnɩ fɔ mɔ boo koro, gɛ ɛbɛ mɔ be gyu Wurubwarɛ ade yɩɩ gɛtabʋrʋ. 21Gɛtɛ bɛ dɔ̀ Sawulo ade gɛtɛ i sere fɔ, e biri ɛ sa bɛnɩ ɛ fɩya, gɛ ɛbɛ mɔ be ma gyu Wurubwarɛ ade fɔ yɩɩ gɛtabʋrʋ. Sawulo e biri ɛ sa bɛnɩ disere-siyeefɛ, gɛ ɛbɛ mɔ be gyu Wurubwarɛ ade yɩɩ gɛtabʋrʋ. 22Ɛwʋ gɛ ɛwɔ gbagba ɛ san Rama, gɛ ɛ san ditiribun-dɩrɛ gɛtɛ dɩ̀ sa Seku fɔ dɩɩpɩ. Gɛ e lila alan, <<Gaanɩ gɛ Samweli ma Dafidi bɛ̀ sa?>> Gɛ ɛkɩ e tiri wuunyun ɛ tɛ wɔ alan, <<Nya, bɛ̀ sa Nayito gɛtɛ dɩ̀ sa Rama ditele fɔ.>> 23Okoro Sawulo ɛ san Nayito gɛtɛ wʋ̀ sa Rama ditele daanɩ fɔ. Mɔ Wurubwarɛ Gifiye gɩ ba wo koro, gɛ ɛ kya Wurubwarɛ ade yɩɩ gɛtabʋrʋ gɛlɛɛ ma gyu Nayito. 24Ɛ kʋrʋba wɔ ngba, gɛ ɛwɔ mɔ e gyu Wurubwarɛ ade yɩɩ gɛtabʋrʋ Samweli bʋnʋn. Ɛ dʋrʋ dibolonkwaa duwi fɔ powu ma wuudente. Gɛlɛ wuu koro gɛ bɛnɩ bɛɛ dɔ̀ alan, <<Sawulo mɔ ɛ̀ fɩya ma Wurubwarɛ bɛtabʋrʋlɛ fɔ?>>
اکنون انتخاب شده:
1 Samweli 19: ADE
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2025 Ghana Institute of Linguistics Literacy and Bible Translation