روملولارا 8
8
روحدان گلن حیات
1بونا گؤره، ائندی مسئح عئسادا اولانلارا هچ بئر محکومئیّت یوخدور. 2چونکی مسئح عئسادا اولان حیات روحونون شرئعتی، منی گوناه و اؤلومون شرئعتئندن آزاد الهدی. 3چونکی تاری بئزه او شیی الهدی کی، جئسم اوزوندن ضعئف اولان شرئعت اونی اِلئیه بئلمئردی: او اؤز اوغلونی گوناهلی جئسمه اوخشار، گوناه اوچون قوربان گؤندَرئب، جئسمده اولان گوناهی محکوم الهدی کی، 4شرئعتئن طلب الهدئکلری بئزده یرئنه یتئشسئن؛ بئز کی، جئسمه گؤره یوخ، بلکی روحا گؤره یاشاییریق.
5چونکی جئسمئن دالیسیجا اولانلار فئکئرلرئنی جئسمانی شیلرئن اوستونه قویوبلار، آمّا روحون دالیسیجا اولانلار فئکئرلرئنی روحانی شیلرئن اوستونه قویوبلار. 6جئسمئن اوستونه قویولان فئکئر اؤلومدور، آمّا روحون اوستونه قویولان فئکئر حیات و باریشدیر. 7بونا گؤره کی، جئسمئن اوستونه قویولان فئکئر تارییا دوشمنچئلئک الهیئر؛ چونکی تارینین شرئعتئنه تابع دیئل و اولا دا بئلمز. 8جئسمه گؤره ده یاشایانلار تارینی راضی الئیه بئلمزلر.
9آمّا اگر تارینین روحی سئزدهدئر، سئز جئسمده یوخ، روحداسیز. آمّا کئمده مسئحئن روحی یوخدور، او آدام مسئحه عایید دیئل. 10آمّا اگر مسئح سئزدهدئر، بدنئز گوناه اوزوندن اؤلودور، آمّا روحوز صالحلئک اوزوندن دئری. 11اگر عئسانی اؤلولردن دئرئلدهنئن روحی سئزده یاشاییر، او زامان مسئحی اؤلولردن دئرئلدن، سئزئن ده فانی بدنلرئزه، سئزده یاشایان اؤز روحی ائنن حیات ورهجک.
12بله ده ای قارداشلار، بئز جئسمئمئزه بورجلی دیئلئک کی، جئسمئمئزه گؤره یاشایاق. 13چونکی اگر جئسمه گؤره یاشایاسیز، اؤلرسئز، آمّا اگر جئسمئن عمللرئنی روحون واسئطهسی ائنن اؤلدورهسئز، یاشایارسیز. 14چونکی تارینین روحی ائنن هئدایت اولونانلارین هامیسی تارینین اوغوللاریدیرلار. 15دوغرودان دا، قوللوق روحونی آلماییبسیز کی، گئنه قورخی ائچئنده یاشایاسیز، اوغوللوق روحونی آلیبسیز کی، اونون واسئطهسی ائنن «آبّا، آتا» چاغیریریق. 16اله همن روح بئزئم روحوموز ائنان شهادت ورئر کی، بئز تارینین اؤولادلاریییق. 17ائندی اگر اونون اؤولادلاریییق، دمهلی اونون وارئثلرئیئک ده، تارینین وارئثلری و مسئحئن مئراث شرئکی. اگر دوغرودان اونون چکدئیی عذابلاریندا بئز ده شرئک اولوروق، بله ده اونون جلالیندا دا شرئک اولاجاغیق.
گلهجکده کی جلال
18بله دوشونورم کی، چکدئیئمئز ائندئکی عذابلار، بئزه ظاهئر اولاجاق جلال ائنان هچ موقایئسهیه گلمز. 19چونکی خئلقت تارینین اوغوللارینین ظوهورونی بؤیوک بئر حسرت ائنن گؤزلهیئر. 20چونکی خئلقت اؤز ائرادهسی ائنن یوخ، اونی تسلئم اله یه نئن ائرادهسی ائنن چورومهیه تابع اولوب، بو اومئد ائنن کی، 21خئلقت اؤزی ده چورومهیئن اسارتئندن آزاد اولاجاق و تارینین اؤولادلارینین شؤوکتلی آزادلیغینا شرئک اولاجاق.
22چونکی بئلئرئک کی، بوتون خئلقت ائندئیه کئمی بئرلئکده ناله الهیئب، دوغوم آغریسی چکئر. 23و آنجاق بو یوخ، بئز ده کی، روحون نوبارینی آلمیشیق، بئز اؤزوموز ده اؤز ائچئمئزده ناله الهیئب، اوغوللوغا آلینماغی یعنی بدنئمئزئن خئلاصینی گؤزلهیئرئک. 24چونکی بئز اومئد ائنن نئجات تاپدیق. آمّا گؤزه گؤرولن اومئد، اومئد دیئل. چونکی کئم گؤردویی شیه اومئد باغلایار؟ 25آمّا اگر گؤرمهدئیئمئز شیه اومئد باغلایاق، اونی صبر ائنن گؤزلهیهرئک.
26اله بله ده روح بئزه ضعئفلئیئمئزده کؤمک اله ر. چونکی بئز لازیم اولدوغی کئمی دوعا اله مهیی بئلمئرئک. آمّا روح اؤزی سؤز ائنن، آنلاتیلماز نالهلر ائنن بئزئم اوچون شفاعت الهیئر. 27او کی اورَکلری تفتئش الهیئر، روحون نه دوشوندویونی بئلئر، چونکی روح تارینین ائرادهسئنه گؤره موقدّسلر اوچون شفاعت الهیئر.
مسئحده قالئب اولماق
28و بئلئرئک کی، تاری بوتون شیلری، اونی سِوَنلر اوچون و اونون هدفئنه گؤره دعوت اولونانلار اوچون اولارین خیئرئنه بئرلئکده ائشلهدئر. 29چونکی او، اولاری کی اوّلدن تانیمیشدی، قاباقجادان موعیّن الهمئشدی ده کی، اوغلونون شکلئنه دؤنسونلر. اِله کی، او، چوخلی قارداشلار آراسیندا، ائلک دوغولان اولسون. 30تاری کئملری قاباقجادان موعیّن الهمئشدی، اولاری دا دعوت الهدی؛ دعوت الهدئیی آداملاری صالح سایدی؛ صالح سایدیغی آداملاری دا عئزّتلندئردی.
31اگر بلهدئر، بو شیلره نه دئیک؟ اگر تاری بئز ائنندئر، کئم بئزه ضئدّ دورار؟ 32او کی، اؤز اوغلونی قیماییب، بلکی اونی بئزئم هامیمیز اوچون تسلئم الهدی، نجه اونونان برابر بوتون شیلری بئزه احسان اله مئیهجک؟ 33تارینین سچدئکلرئنه کئم ائتّئهام ووراجاق؟ اولاری صالح سایان تاریدیر. 34محکوم الهین کئمدئر؟ اؤلموش، اوستهلئک دئرئلمئش اولان مسئح عئسا. او کی، هم تارینین صاغیندادیر، هم ده بئزئم اوچون شفاعت الهیئر. 35مسئحئن محبّتئندن بئزی کئم آییرا بئلر؟ موصئبت؟ دارلیق؟ عذاب؟ آجلیق؟ لوتلوک؟ خطر یا قیلینج؟ 36نجه کی، یازیلیب دا: «سنئن خاطئرئن اوچون بوتون گون اؤلوم اَلئنه ورئلئرئک، قصّابلیق قویونلاری کئمی ساییلیریق.»
37یوخ، بوتون بولاردا بئز قالئب گلنلردن باشیق، اونون واسئطهسی ائنن کی بئزی سِوئر. 38چونکی یقئن بئلئرم کی، نه اؤلوم، نه حیات، نه ملکلر، نه ریاستلر، نه ائندئکی، نه گلهجک شیلر، نه قودرتلری، 39نه اوجالیق، نه درئنلئک، نه ده آیری بئر مخلوق قادئر اولاجاق کی، بئزی ربّئمئز مسئح عئسادا اولان تارینین محبّتئندن آییرسین.
اکنون انتخاب شده:
روملولارا 8: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company