متّانین رئوایت 18
18
لاپ بؤیوک کئمدئر؟
1او زامان شاگئردلر عئسانین یانینا گلئب ددئلر: «گؤیلرئن پادشاهلیغیندا لاپ بؤیوک کئمدئر؟» 2عئسا بئر کؤرپه اوشاغی یانینا چاغیردی و اونی اورتایا قویوب، 3ددی: «دوغروسونی سئزه دیئرم، اگر سئز دؤنوب کؤرپه اوشاقلار کئمی اولمایاسیز، گؤیلرئن پادشاهلیغینا گئرمهیهجکسئز. 4اونا گؤره، کئم اؤزونی بو اوشاق کئمی آلچاق الهسه، گؤیلرئن پادشاهلیغیندا لاپ بؤیوک اودور. 5و هر کئم بله بئر اوشاغی منئم آدیمدا قبول الهسه، منی قبول الهمئش اولور.
6آمّا کئم منه ائنانان بو کئچئکلردن بئرئنی گوناها سالسا، اونون اوچون لاپ یاخشی او اولاردی کی، بوینونا ائری بئر دیئرمان داشی آسیب، دهنزئن دئبئنه آتیلسین. 7وای بو دونیانین حالینا، ائنسانلاری گوناها وسوسه الهین شیلری اوچون! البتّه کی بِله شیلرئن گلمهسی حتمیدئر، آمّا وای او آدامین حالینا کی، وسوسه اونون واسئطهسی ائنن گله.
8اگر اَلئن، یا دا آیاغین سنی پئس یولا چکئر، اونی کس و اؤزوندن آت؛ سنئن اوچون توپال یا دا چولاق حیاتا گئرمک، ابدی اودا ائکی اَل یا دا ائکی آیاقلی آتیلماقدان داها یاخشیدیر. 9اگر گؤزون سنی پئس یولا چکئر، اونی چیخارت و اؤزوندن آت؛ سنئن اوچون حیاتا تک گؤزلی گئرمک، جهنّم اودونا ائکی گؤزلی آتیلماقدان داها یاخشیدیر.
ائتمئش قویونون مَثلی
10دئقّت الهیئن کی، بو کئچئکلردن هچ بئرئنه حقارت ائنن باخمایاسیز، چونکی سئزه دیئرم، گؤیده، اولارین ملکلری، گؤیده اولان آتامین اوزونی دائم گؤرورلر. 11چونکی ائنسان اوغلی گلدی کی، ائتمئش اولانی، نئجات ورسئن. 12سئز نه گومان الهیئرسئز؟ اگر بئر آدامین یوز قویونی اولسا و اولاردان بئری یولونی آزسا، مگر دوخساندوقّوزونی داغلاردا قویوب، ائتمئش قویونی آختارماغا گتمز؟ 13و اگر اونی تاپا بئلسه، دوغروسونی سئزه دیئرم، او، یولونی آزمایان دوخساندوقّوزوندان داها چوخ، اونون اوچون سوئنَر. 14بوجور دا، گؤیلردهکی آتازین بله بئر ائستهیی یوخدور کی، بو کئچئکلردن بئری هلاک اولسون.
اگر قارداشین سنئن حاقّیندا خاطا الهسه
15اگر قارداشین سنئن حاقّیندا خاطا الهسه، گت و خاطاسینی اونا گؤرسد. هر شی آنجاق اؤز آرازدا قالسین. اگر سنه قولاق آسسا، قارداشینی قازانیبسان. 16آمّا اگر قولاق آسماسا، یانینا بئر و یا ائکی نفر داها آل کی، دیئلن هر سؤز ائکی و یا اوچ شاهئدئن آغزی ائنن تصدئق اولونسون. 17و اگر اولارین سؤزونه قولاق آسماق ائستمهسه، کئلئسایا ده. اگر کئلئسانین سؤزونه ده قولاق آسماق ائستمهسه، قوی او سنئن اوچون بوتپرست و یا باج ییغان کئمی اولسون. 18دوغروسونی سئزه دیئرم؛ یر اوزونده باغلادیغیز هر شی، گؤیده باغلانمیش اولاجاق. و یر اوزونده آچدیغیز هر شی، گؤیده آچیلمیش اولاجاق. 19گئنه سئزه دیئرم کی، اگر سئزدن ائکی نفر یِر اوزونده ائسته دئکلری هر هانسی بئر شی اوچون موتّفئق اولالار، گؤیده اولان آتام اولار اوچون الئیهجک. 20چونکی هاردا ائکی و یا اوچ نفر منئم آدیمدا بئر یره ییغیلسالار، من اوردا، اولارین آراسیندایام.»
رحمسئز نؤکرئن مثلی
21او زامان پطروس گلئب عئسایا ددی: «یارب، قارداشیم منئم حاقّیمدا نچه دفه خاطا الهسه، اونی باغیشلامالییام، یدّی دفه؟» 22عئسا اونا ددی: «سنه دیئرم: یدّی دفه یوخ، یتمئش دفه یدّی دفه!
23چونکی گؤیون پادشاهلیغی او پادشاها بنزهر کی، نؤکرلری ائنن حسابلاشماق ائستهدی. 24حسابلاشماغا باشلادیغی زامان، اونون یانینا بئر نؤکر گتئرئلدی کی، اون مئن تالانت بورجی وار ائدی. 25بورجونی ورمهیه بئر شیی اولمادیغی اوچون، آغاسی امر وردی کی، او، آروادی و اوشاقلاری و بوتون وار-یوخی ساتیلسین و بورجی قایتاریلسین. 26او زامان نؤکر یره دوشدی و اونا سجده الهیئب ددی: ”منه مؤهلت ور، بورجومون هامیسینی ورهرم.“ 27آغاسینین قولا اورهیی یاندی. اونی آزاد الهیئب، بورجونی دا باغیشلادی. 28آمّا الهکی او نؤکر چؤله چیخیب، اونا یوز دئنار بورجلی اولان بئر یولداشینی گؤردی. اونی توتدی و بوغازیندان یاپیشیب ددی:"بورجونی ور!“ 29یولداشی آیاقلارینا دوشوب یالواردی: ”منه مؤهلت ور، بورجومی ورهرم.“ 30آمّا نؤکر قبول الهمهیئب، بورجونی ورهنه قدر اونی زئندانا سالدیردی. 31بو آدامین یولداشلاری، باش وِرَن حادئثهنی گؤرن واخت، چوخ قمگئن اولدولار و گدئب بوتون اولانلاری آغالارینا خبر وردئلر. 32او زامان آغاسی نؤکری یانینا چاغیریب، ددی: ”ای پئس نؤکر، یالواردیغین اوچون بوتون او بورجی سنه باغیشلادیم. 33من سنه رحم الهدئیئم کئمی، مگر سن ده یولداشینا رحم الهمهلی دیئلدئن؟!“ 34پس حئرصلهنئب بوتون بورجونی ورهنه قدر، اونی شئکنجهورنلرئن الئنه وردی. 35گؤیده اولان آتام دا سئزه بله اِلئیهجک، اگر سئزلردن هر بئرئز ده قارداشیزین خاطاسینی اورَکدن باغیشلامایاسیز.»
اکنون انتخاب شده:
متّانین رئوایت 18: CAB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
