متّانین رئوایت 17
17
عئسانین ظاهئری دیئشئلئر
1آلتی گوندن سورا عئسا، پطروسی، یعقوبی و اونون قارداشی یوحنّانی اؤزی ائنن گؤتوروب، اولاری آیریجا اوجا بئر داغین اوستونه آپاردی. 2اولارین قاباغیندا عئسانین ظاهئری دیئشئلدی؛ اوزی گون کئمی پاریلدادی و پالتاری ائشیق کئمی آغ-آبّاغ اولدی. 3بئردن شاگئردلرئن گؤزونه موسا پیغمبر و ائلیا پیغمبر گؤروندولر. اولار عئسا ائنن صؤحبت الهیئردئلر. 4پطروس عئسایا ددی: «یارب، بوردا اولماغیمیز نه یاخشی اولدی! اگر ائستهیئرسن، بوردا اوچ چادیر قوراق؛ بئری سنه، بئری موسا پیغمبره، بئری ده ائلیا پیغمبر اوچون.» 5حله پطروس بو سؤزلری دیئردی کی، نورلی بئر بولود اولارین اوستونه کؤلگه سالدی. بولوددان بئر سس گلدی کی دیئردی: «بو منئم عزئز اوغلومدور. اوندان چوخ راضییام. اونون سؤزونه قولاق آسین.» 6شاگئردلر بونی اشئدن واخت، چوخ قورخدولار و اوزی-اوسته یره ییخیلدیلار. 7عئسا گلدی و اولارا اَل قویوب ددی: «قالخین، قورخمایین.» 8اولار دا گؤزلرئنی قالخیزدیلار و عئسادان باشقا هچ کسی گؤرمهدئلر.
9داغدان اِنَن واخت، عئسا شاگئردلرئنه امر الهیئب ددی: «ائنسان اوغلونون اؤلولردن دئرئلمهسئنه قدر، گؤردویوزی هچ کئمه دمهیئن.» 10شاگئردلری اوندان سوروشدولار: «اگر اِلهدئر، بس نه اوچون تؤورات موعلّئملری دیئرلر کی، اوّلجه ائلیا گلمهلیدئر؟» 11عئسا جاواب ورئب ددی: «دوغرودان دا، اوّلجه ائلیا گلهجک و هر شیی قایدایا سالاجاق. 12آمّا سئزه دیئرم: ائلیا گلدی و اونی تانیمادیلار. آمّا ائستهدئکلری هر شیی اونا الهدئلر. اله بوجور ائنسان اوغلی دا اولارین اَلئندن عذاب چکهجک.» 13شاگئردلر او زامان باشا دوشدولر کی، عئسا بو سؤزلری اولارا، تعمئد ورن یحیا حاقّیندا دیئردی.
ائبلئس روحا توتولموش اوشاق
14جاماعاتین یانینا یِتئشن زامان، بئر آدام عئسانین یانینا گلدی و اونون قاباغیندا دئز چؤکوب ددی: 15«آغا! اوغلوما یازیغین گلسئن، چونکی غشّئدئر و چوخ اذئیّت چکئر، چونکی تز-تز گاه اودا، گاه دا سویا دوشور. 16اونی سنئن شاگئردلرئنئن یانینا گتئردئم، آمّا شفا وره بئلمهدئلر.» 17عئسا جاواب ورئب ددی: «ای ائمانسیز و ترسه نسئل! نه واختاجاق گرک سئز ائنن اولوب، سئزه دؤزَم؟! اونی منئم یانیما گتئرئن.» 18عئسا ائبلئس روحا آجیقلاندی و ائبلئس روح اوشاقدان اشئیه چیخدی. اوغلان او آندا شفا تاپدی. 19سورا شاگئردلر، تک اولان زامان، عئسانین یانینا گلئب ددئلر: «نه اوچون بئز اونی چیخاردا بئلمهدئک؟» 20عئسا اولارا ددی: «ائمانیزین آز اولدوغی اوچون. اگر سئزده بئر خاردال توخومی قدر ائمان اولسایدی بو داغا دئیه بئلَردئز: ”بوردان اورایا کؤچ“، داغ دا کؤچردی. سئزئن اوچون مومکون اولمایان هچ بئر شی اولماز. 21آمّا بو جئنس روح اشئیه چیخماز، مگر دوعا و اوروج ائنان.»
عئسا اؤلمه سی و دئرئلمهسی حاقّیندا خبر ورئر
22جلئل وئلایتئنده اولان زامان، عئسا اولارا ددی: «ائنسان اوغلی ائنسانلارین اَلئنه تسلئم اولوناجاق. 23اونی اؤلدورهجکلر و اوچونجی گون دئرئلهجک.» شاگئردلر بونا چوخ قمگئن اولدولار.
معبدئن مالیاتی
24کفرناحوما گلدئکلری واخت، معبد مالیاتینی ییغانلار پطروسا یاخینلاشیب ددئلر: «سئزئن اوستادیز ائکی دئرهم مالیاتی ورمئر؟» 25پطروس ددی: «ورئر.» اِوه گلن زامان، عئسا اونی قاباقلاییب ددی: «شمعون، سن نجه دوشونورسن؟ دونیانین پادشاهلاری مالیاتی، یا دا باجی کئملردن آلیرلار؟ اؤز اوغوللاریندان، یوخسا قرئبلردن؟» 26پطروس اونا ددی: «قرئبلردن.» عئسا دا اونا ددی: «اگر بلهدئر، اوندا اوغوللار آزاددیرلار. 27آمّا اولاری ائنجئتمهیک، گؤله گت و قولّابی آت. اوّلده توتدوغون بالیغین آغزینی آچ. بئر دؤرد دئرهملئک سئکه تاپارسان؛ اونونان منئم سهمئمی و اؤزونونکئنی اولارا ور.»
اکنون انتخاب شده:
متّانین رئوایت 17: CAB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
