لوقا روایت 17
17
عئسانین تعلئملری
1عئسا اؤز شاگئردلرئنه ددی: «ائنسانلاری گوناها وسوسه الهین شِیلرئن گلمهسی حتمی دئر. آمّا وای او آدامین حالینا کی، وسوسه اونون واسئطهسی ائنن گله. 2بو کئچئکلردن بئرئنی گوناها سالان آدام اوچون لاپ یاخشی او اولاردی کی، بوینونا بئر دَیئرمان داشی آسیلیب، دَهَنزه آتیلسین. 3اؤزوزی گؤزله یئن. اگر قارداشین گوناه الهسه، اونی دانلا و اگر تؤوبه الهسه، اونی باغیشلا. 4و اگر گونده یِدّی دفه سنئن حاقّیندا گوناه اِله سه و یِدّی دفه سنه قاییدیب ”تؤوبه اِله یئرم“ دِسه، اونی باغیشلامالیسان.»
5حوارئلر رب عئسایا ددئلر: «ائمانیمیزی آرتیر.» 6رب عئسا ددی: «اگر سئزده بئر خاردال توخومی قدر ائمان اولسایدی، بو توت آغاجینا دئیه بئلَردئز: ”کؤکدن چیخ و دَهَنزده اَکئل!“ و او دا، سئزدن ائطاعت اِله یَردی.
7سئزلردن کئم یِری شوخوم ووران یا دا چوبانلیق الهین بئر قولا، زمئدن قاییدان زامان دئیر: ”تِز اول، گل سوفره باشیندا اوتور؟“ 8مگر اونا دِمز کی، ”منه یمک حاضیرلا و بِلئنی باغلاییب منه خئدمت اِله کی، ییئب ائچئم. سن سورا ییئب ائچَرسن؟“ 9او قولدان، اونون امرلرئنی یِرئنه یتئردئیی اوچون تشکّور اِله ر؟ 10ائندی سئز ده، سئزه امر اولونان هر شیی یِرئنه یِتئرندن سورا دِیئن: ”بئز دَیرسئز قوللاریق، بئز آنجاق اؤز وظئفه مئزی یِرئنه یِتئرمئشئک.“»
اون جوذاملینین شفاسی
11عئسا اورشلئم شهرئنئن یولوندا، سامئره منطقه سی ائنن جلئل وئلایتئنئن آراسینداکی یِردن کِچئردی. 12بئر کنده گئرن زامان، اون نفر جوذاملی آدام اونون قاباغینا چیخیب، اوزاقدا دوردولار. 13و سَسلرئنی اوجالدیب ددئلر: «عئسا، اوستاد! بئزه یازیغین گلسئن.» 14عئسا اولاری گؤرَنده ددی: «گدئن، اؤزوزی معبد کاهئنلرئنه گؤرسدئن.» و یولدا گِدنده جوذامدان شفا تاپدیلار. 15اولاردان بئری شفا تاپدیغینی گؤرنده، اوجا سَس ائنن تارییا حمد اِلئیه-اِلئیه قاییتدی 16و اوزی-اوسته عئسانین آیاقلارینا دوشوب، اوندان تشکّور الهدی؛ بو آدام سامئرهلی ائدی. 17او واخت عئسا ددی: «مگر جوذامدان شفا تاپانلار اون نفر دِیئلدئلر؟ بس قالان دوقّوز نفر هاردادیر؟! 18آیا بو قرئبدَن باشقا هچ کئم تاپیلمادی کی، قاییدیب تارییا حمد اِله سئن؟» 19اوندان سورا او کئشئیه ددی: «قالخ گِت؛ ائمانین سنی شفا ورئب.»
تارینین پادشاهلیغینین گلمهسی
20فرئسی فئرقهسئنئن عالئملری عئسادان تارینین پادشاهلیغینین نه زامان گلهجهیی بارهده سوروشدولار. عئسا اولارا جاواب ورئب ددی: «تارینین پادشاهلیغی اِله بئر شَکئلده گلمز کی، گؤز ائنن گؤروله بئلسئن. 21و هچ کس ده دِمهیهجک کی، ”باخ، بوردادیر“ یا دا ”اوردادیر.“ چونکی تارینین پادشاهلیغی سئزئن آرازدادیر.»
22عئسا شاگئردلره ددی: «اِله گونلر گلهجَک کی، آرزی اِلئیه جکسئز، ائنسان اوغلونون گونلرئندن بئرئنی گؤره سئز آمّا گؤرمه یه جکسئز. 23سئزه دئیهجَکلر ”باخ، اوردادیر“ یا ”باخ، بوردادیر.“ سئز گتمهیئن و اولارین داللارینا دا دوشمهیئن! 24چونکی ائلدیریم نجه گؤیون بئر طرفئندن شاخیب، او بئری طرفئنه قدر ائشیقلاندیریر، ائنسان اوغلی دا اؤز گونونده اِله اولاجاق. 25آمّا اوّل گرک او، چوخ عذابلار چکسئن و بو نسئل طرفئندن ردّ اولونسون. 26نوحون گونلرئنده نجه ائدی، ائنسان اوغلونون گونلرئنده ده اِله اولاجاق. 27او گونه قدر کی نوح پیغمبر گَمئیه گئردی، ائنسانلار ییئردئلر، ائچئردئلر، آرواد آلیردیلار، اَرَه گِدئردئلر. سورا سِل گلئب، هامیسینی محو الهدی. 28لوطون گونلرئنده ده بله اولدی؛ ائنسانلار یِیئردئلر، ائچئردئلر، آلیردیلار، ساتیردیلار، اَکئردئلر، تئکئردئلر. 29آمّا او گون کی لوط سودوم شهرئندن چیخدی، گؤیدن اود و گوگورد یاغیب، اولارین هامیسینی محو الهدی. 30ائنسان اوغلونون ظوهور اِلهدئیی گونده ده، بله اولاجاق. 31او گونده، او آدام کی دامین اوستونده دئر، اِوئن ائچئنده اولان اَشیایی گؤتورمک اوچون آشاغی اِنمهسئن. اِلهبوجور اکئن یرئنده اولان آدام دا اِوه دؤنمه سئن. 32لوطون آروادینی یادیزا گتئرئن. 33هر کس اَللَشسه کی اؤز جانینی ساخلایا، اونی اَلدَن ورهجک. آمّا هر کس اؤز جانیندان کِچسه، اونی ساخلایاجاق. 34سئزه دیئرم: او گِجه ده، بئر دؤشَکده یاتان ائکی نفردن؛ بئری گؤتورولهجک، بئرئسی قالاجاق. 35اَل دَیئرمانی چَکن ائکی آرواددان؛ بئری گؤتورولهجک، بئرئسی قالاجاق. 36زمئده اولان ائکی کئشی دن؛ بئری گؤتورولهجک، بئرئسی قالاجاق.» 37شاگئردلر عئسادان سوروشدولار: «هاردا اولاجاق، آغا؟» عئسا اولارا ددی: «لش هاردا اولسا، لشخورلار دا اورایا ییغیلارلار.»
اکنون انتخاب شده:
لوقا روایت 17: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
