حوارئلرئن ائشلری 19
19
پولوس افسوسدا
1اَپولّوس قورئنت شهرئنده اولاندا، پولوس یوخاری اؤلکهلری کچئب اِفِسوسا گلدی و بئر نچه شاگئرد تاپدی. 2و اولارا ددی: «آیا ائمان گتئردئیئز زامان تارینین موقدّس روحونی آلدیز؟»
اولار اونا ددئلر: «خیر، موقدّس روحون اولدوغونی بله اشئتمهمئشئک!»
3پولوس ددی: «بس نه اساس اوستونده تعمئد قوسلی اولوندوز؟»
ددئلر: «یحیانین تعمئدئنه.»
4پولوس ددی: «یحیا تؤوبه تعمئدی ائنن تعمئد ورئب خالقا دیئردی کی، اؤزوندن سورا گلنه ائمان گتئرسئنلر، یعنی عئسایا.» 5بونی اشئدن واخت، اولار رب عئسانین آدیندا تعمئد آلدیلار. 6پولوس اَللرئنی اولارین اوستونه قویاندا، تارینین موقدّس روحی اولارین اوستونه نازئل اولدی و اولار قرئب دئللر ائنن دانیشماغا و نبئلئک الهمهیه باشلادیلار. 7اولار تخمئنَن اونائکی کئشی ائدئلر.
8پولوس عئبادتگاها گئرئب، اوچ آی جسارت ائنن دانیشیردی و تارینین پادشاهلیغی حاقّیندا بحث الهیئب، اولاری قانع الهیئردی. 9آمّا او زامان کی، بعضئلری داش اورَکلی اولوب، ائمان گتئرمه دئلر و جاماعاتین حوضوروندا طرئقتی پئسلهدئلر، پولوس دا اولاری ترک الهدی و شاگئردلری آییریب تئرانوس مکتبئنده هر گون بحث الهیئردی. 10ائکی ائل بله کِچدی و آسئیا منطقهسئده یاشایانلارین هامیسی، هم یهودی، هم ده یونانی، ربّئن کلامینی اشئتدئلر.
11تاری پولوسون اَللری ائنن عجایئب مؤجوزهلر یارادیردی. 12اله کی، حتّا اونون بدنئندن دستماللار و یا بِلباغیلار گؤتورولوب، ناخوشلارین اوستونه قویولوردی و ناخوشلوق اولاردان گدئردی، خبئث روحلار دا چیخیردی.
13آمّا بعضی یهودی جئن توتانلار دا وار ائدی کی، اورایا-بورایا گدئب اللشئردئلر کی، خبئث روحلارا اسئر اولان آداملارین اوستونه رب عئسانین آدینی اوخوسونلار. اولار دیئردئلر: «پولوسون اعلان الهدئیی عئسانین آدی ائنن سئزه امر الهیئرئک.» 14بونی الهینلر اِسکئوا آدیندا بئر یهودی باش کاهئنئن یدّی اوغوللاری ائدئلر. 15آمّا خبئث روح اولارا جاواب ورئب ددی: «عئسانی تانیییرام، پولوس حاقّیندا دا بئلئرم. آمّا سئز کئمسئز؟» 16و ائچئنده خبئث روح اولان آدام، اولارین اوستونه یوگوردی و اولارین هامیسینی توتوب باسدی، اِله کی، اولار لوت و یارالی او اِودن قاچدیلار.
17بو حادئثه اِفِسوس شهرئنده یاشایان بوتون یهودئلره و یونانئلره معلوم اولدی. اولارین هامیسینی قورخی بورودی و رب عئسانین آدینا حؤرمت الهدئلر. 18ائمان گتئرنلردن بئر چوخی دا گلئردئلر و اؤز عمللرئنه اعتئراف الهیئردئلر. 19جادوگرلئک الهینلردن بئر چوخی کئتابلارینی بئر یرده گتئرئب، هامینین گؤزی قاباغیندا یاندیردیلار. کئتابلارین دَیَرئنی حسابلاییب گؤردولر کی، اولارین دَیَری الّیمئن دئرهم اولور. 20بله ده ربّئن کلامی قودرت ائنن یاییلیب، قووّتله نئردی.
21بو شیلر باشورندن سورا، پولوس موقدّس روحدا قرار وردی کی، مقدونئیّه و اَخایئه منطقهلرئندن کچئب، اورشلئم شهرئنه گتسئن. پولس دیئردی: «اورایا گتدئیئمدن سورا، رومی دا گرک گؤرَم.» 22و اونا خئدمت الهینلردن ائکئسئنی یعنی تئموتاعوس و اِراستوسی مقدونئیّهیه گؤندَرئب، اؤزی بئر مودّت آسئیا منطقهسئده قالدی.
افسوسداکی ائغتئشاش
23او واختلاردا طرئقت اوزوندن بؤیوک بئر ائغتئشاش باش وردی. 24چونکی دئمئترئیوس آدیندا بئر زرگر کی، آرتِمئس معبدئنئن گوموش بوتلرئنی دوزَلدئردی و صنتکارلارا چوخ ائش گتئرئردی؛ 25بولاری و آیری بله صنتکارلاری ییغیب ددی: «جنابلار، بئلئرسئز کی، رئفاهیمیز بو صنته باغلیدیر. 26آمّا گؤروب اشئدئرسئز کی، بو پولوس، نهائنکی اِفِسوسدا، حتّا تقرئبن بوتون آسئیا منطقه سئنده، بئر چوخ آدامی قانع الهیئب و یولدان چیخاردیب. او دیئر ائنسان اَلی ائنن دوزَلَن تاریلار، اصلا تاری دیئللر. 27و بو خطر آنجاق صنتئمئزئن اعتئباردان دوشمهسئنده دیئل، بلکی بوندادیر کی، بؤیوک ائلاهه آرتِمئسئن معبدی اهمئیّتدن دوشسون و بو ائلاههنئن عظمتی کی، اونی بوتون آسئیا منطقه سی و دونیا پرستئش الهیئر، یوخا چیخسین.»
28اولار، بونی اشئدن زامان، چوخ قضبلندئلر و قیشقیریب ددئلر: «بؤیوکدور اِفِسوسلولارین آرتِمئسی!» 29و شهر ائغتئشاش ائنان دولدی و بئرلئکده تاماشا میدانینا طرف قاچیب، پولوس ائنان مقدونئیّهدن سفره چیخان یولداشلاری غایوس و ارئسترخوسی یاخالادیلار. 30پولوس خالقین ائچئنه گئرمک ائستهینده، شاگئردلر اونی قویمادیلار. 31آسئیا منطقهسئئن ریئسلرئندن بعضئلری ده اونون دوستلاری اولدوغوندان، اونا خبر گؤندَرئب یالواردیلار کی، تاماشا میدانینا آیاق قویماسین.
32بو آرادا هامی باغیریردی و هره بئر شی دیئردی؛ چونکی جاماعاتی ائغتئشاش بوروموشدی و اکثرئیّتی بئلمئردی کی، نهدن اؤتری ییغیلیبلار. 33یهودئلر ائسکندری قاباقدا سوردوکلری اوچون، جاماعات ائچئندن بعضئلری حادئثهنی ائسکندره باغلادیلار. ائسکندر اَلی ائنن ائشاره الهیئب، ائستهیئردی کی، جاماعاتا دئفاعئیه نوطقی الهسئن. 34آمّا اونون یهودی اولدوغونی بئلَنده، هامی بئر سَس ائنن ائکی ساعاتا یاخین باغیریردیلار: «بؤیوکدور اِفِسوسلولارین آرتِمئسی!»
35آمّا شهرئن کاتئبی خالقی ساکئت الهیئب ددی: «اِفِسوسلولار! کئم بئلمئر کی، اِفِسوسلولارین شهری عظمتلی ائلاهه آرتِمئسئن و گؤیدن دوشموش موقدّس داشین موحافئظیدئر؟! 36ائندی کی، بولاری هچ کس ائنکار الئیهبئلمز، سئز گرک ساکئت اولوب تلهسئک بئر ائش گؤرمهیهسئز. 37چونکی سئز بو آداملاری بورایا گتئرئبسئز کی، نه معبدی قارَت الهیئبلر، نه ده ائلاههمئزه کوفر دیئبلر. 38بله ده، اگر دئمئترئیوس و اونونان اولان صنتکارلارین بئر کسدن شئکایتی وار، محکمهلر آچیق و حاکئملر ده اوردا دیرلار. قوی بئربئرئندن شئکایت الهسئنلر. 39آمّا اگر آیری بئر شی دالیسیجاسیز، بو، قانونی مجلئسده حلّ اولونار. 40چونکی بو گونکی حادئثه اوزوندن بو خطردهیئک کی، ائغتئشاشین سببی اولمادیغی اوچون، قئیام ائتّئهامی بئزه باغلانسین. اگر بله اولسا، بو ییغیناقدان اؤتری جاواب ورمهیه قادئر اولمایاجاغیق.» 41کاتئب بونی دیئب، مجلئسی داغیتدی.
اکنون انتخاب شده:
حوارئلرئن ائشلری 19: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
