حوارئلرئن ائشلری 18
18
پولوس قورئنتده
1بو شیلردن سورا، پولوس آتِنی ترک الهیئب قورئنت شهرئنه گتدی. 2اوردا پونطوس اهلی اَکئلا آدیندا یهودی بئر آداما راست گلدی کی، آروادی پرئسکئلا ائنن برابر ائتالیادان تزه گلمئشدئلر؛ چونکی کلودئیوس بوتون یهودئلره امر الهمئشدی کی، رومدان چیخسینلار. پولوس اولارین یانینا گلدی 3و همن صنت صاحئبی اولدوغونا گؤره، اولار ائنان قالدی و ائشلهدی. اولارین صنتی چادیرچیلیق ائدی. 4او هر شنبه گونی عئبادتگاهدا بحث الهیئب، یهودئلری و یونانئلری قانع الهمهیه اللشئردی.
5آمّا سئلاس و تئموتاعوس مقدونئیّه منطقهسئندن گلندن سورا، پولوس اؤزونی تامامن کلاما وقف الهیئب، یهودئلره عئسانین همن وعده ورئلن مسئح اولدوغونی شهادت ورئردی. 6او زامان کی، اولار موقاوئمت گؤرسهدئب کوفر ددئلر، پولوس پالتارینی سئلکئب اولارا ددی: «قانیز اؤز بوینوزا اولسون! من اوندان تمئزم! بوندان بله قیرییهودئلرئن یانینا گدهرم.»
7پولوس اوردان چیخیب تارینی پرستئش الهین تئتئیوس یوستوس آدیندا بئر آدامین اِوئنه گتدی. اونون اِوی عئبادتگاهین بؤیرونده ائدی. 8عئبادتگاهین ریئسی، کرئسپوس بوتون اِو اهلی ائنن ربّه ائمان گتئردئلر و قورئنتلیلردن بئر چوخی، بونی اشئدن واخت، ائمان گتئرئب تعمئد آلیردیلار.
9بئر گجه رب بئر رؤیا واسئطهسی ائنن پولوسا ددی: «آرتیق قورخما! آنجاق دانیش و ساکئت قالما. 10چونکی من سن ائنه نَم و سنه هچ کس توخونمایاجاق، اونا گؤره کی، بو شهرده چوخلی آداملاریم وار.» 11پولوس دا بئر ائل آلتی آی اوردا ساکئن اولوب، تارینین کلامینی اولارین آراسیندا تعلئم وردی.
12آمّا قالئیو اَخایئه منطقهسئئن والئسی اولاندا، یهودئلر اَلبئر اولوب، پولوسون ضئدّئنه قالخدیلار و اونی محکمه تختئنئن قاباغینا چکئب، 13ددئلر: «بو کئشی آداملاری قانع الهیئر کی، شرئعت ددئیی طرئقئن ضئدّئنه تارینی پرستئش الهسئنلر.»
14پولوس آغزینی آچماق ائستهینده، قالئیو یهودئلره ددی: «ای یهودئلر، اگر بئر حاقسیزلیق و یا آغیر بئر جئنایت مسلهسی اولسایدی، منه منطئقی اولاردی کی، سئزئن شئکایتئزه قولاق آسام. 15آمّا اگر سؤزلر، آدلار و اؤز شرئعتئز بارهدهدئر، اؤزوز اولاری حلّ الهیئن. من بله شیلره حؤکم الهمک ائستهمئرم.» 16و اولاری محکمهدن اشئیه سالدی. 17اولارین هامیسی عئبادتگاهین ریئسی سوستِنِسی توتدولار و محکمهنئن قاباغیندا دؤیمهیه باشلادیلار. قالئیو بولارین هچ بئرئسئنئن قیدئنده دیئلدی.
پولوس انطاکئیه یه قاییدیر
18پولوس بئر چوخ گونلر اوردا قالاندان سورا، قارداشلاردان آیریلدی و گمی ائنن سورئیهیه گتدی. پرئسکئلا و اکئلا دا اونونان ائدئلر. نذری اولدوغی اوچون، پولوس کنخرئیهده باشینین توکلرئنی قیرخدیرمیشدی. 19اِفِسوسا چاتدیقلاری زامان، پولوس اولاری اوردا بوراخدی و اؤزی عئبادتگاها گئرئب یهودئلر ائنن بحث الهدی. 20و اولار پولوسدان بئر آز داها چوخ قالماسینی ائستهینده او راضی اولمادی 21آمّا اولار ائنان وئداعلاشاندا ددی: «اگر تاری ائستهسه، گئنه سئزئن یانیزا گلهرم.» سورا گمی ائنن اِفِسوسدان یولا دوشدی. 22قیصرئیّهیه یتئشنده گدئب کئلئسا ائنن سالاملاشدی و سورا انطاکئیه شهرئنه اندی. 23اوردا بئر مودّت قالاندان سورا، پولوس یولا چیخدی و ترتئب ائنن قالاتئیا و فئرئجئیه دئیاریندان کچئب شاگئردلرئن هامیسینی قووّتلَندئرئردی.
24بو زامان اَپولّوس آدیندا بئر یهودی کی، اصلی ائسکندرئیهلی ائدی اِفِسوسا گلدی. اَپولّوس دانیشماقدا ماهئر ائدی و موقدّس یازیلاری چوخ یاخشی بئلئردی. 25بو آدام ربّئن یولوندا تعلئم آلمیشدی و روحدا قایناییردی و عئسا حاقّیندا صحئح دانیشیب تعلئم ورئردی، گرچی فقط یحیانین تعمئدئندن خبری وار ائدی. 26او عئبادتگاهدا جورعت ائنن دانیشماغا باشلادی. آمّا او زامان کی، اَکئلا و پرئسکئلا بونی اشئتدئلر، اونی یانلارینا آلیب ربّئن یولونی اونا لاپ دقئق اؤیرتدئلر.
27اَپولّوس اخایئه منطقهسئه گتمک فئکرئنده اولدوغی زامان، قارداشلار اونی تشوئق الهیئب، اورداکی شاگئردلره نامه یازدیلار کی، اونی قبول الهسئنلر. اورایا چاتدیغی زامان، فیض ائنن ائمان گتئرنلره چوخ کؤمک الهدی. 28چونکی وار-گوجی ائنن یهودئلری عوموم خالق قاباغیندا رد الهیئب، موقدّس یازیلار ائنان ثابئت الهیئردی کی، عئسا، اله او وعده ورئلن مسئحدئر.
اکنون انتخاب شده:
حوارئلرئن ائشلری 18: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
